Bakandigwasya

Bumwi buzuba nokwakali kutontola kapati alimwi nokwakali muwo ku Alberta, Canada, ba Bob nobakali kweenzya mootokala, vwili lyakusyule lyakulumwensyi lyakabboloka. Ba Bob kunyina nobakazyiba cakacitika, aboobo bakazumanana alweendo lwabo kuya kuŋanda ikwakasyeede makkilomita aali 5 kuti basike.

Mulugwalo ndobakalembela mbungano ya Bakamboni ba Jehova yakubusena oobo, ba Bob bakaamba cakabacitikila. Bakalemba kuti: “Bakubusi ibakali mumootokala imbi nobakasika afwaafwi, bakandiimika. Bakandaambila kuti vwili lyabboloka. Twakaleya mpoonya bakandigwasya kucinca vwili. Tiindakazyi naa ndakalijisi vwili limbi ajeke. Kandikkede akacinga kangu kabalema, bakalanga kunsi amootokala wangu, kwalo nkobakalijana vwili limbi alimwi ajeke mpoonya bakalicinca. Kwakali kutontola kapati alimwi kwakali caanda. Bakasamide kabotu, nokuba boobo bakalicinca vwili mpoonya ndakazumanana alweendo lwangu. Mulimo ooyu nondatakaukonzya ndelikke.

“Ndakalumba kubakubusi Bakamboni bosanwe ibakandigwasya. Bakali kuyaabukambaukila bantu bakubusena nkondikkala. Bakubusi aaba Mbaanakristo ncobeni. Ikuti nobatakandigwasya nondakapenga kapati, aboobo ndakalumba ncobakandicitila. Tiindakali kuyeeyela kuti kucili bantu babotu myoyo anyika.”