Nkuli nkomukonzya kujana bwiinguzi?
MULIMO umwi wacikombelo ngwakuyiisya bantu kuzyiba ncobaponena. Nokuba boobo, bantu banji bajana kuti nzyobaiya kuzikombelo zyabo tazibagwasyi kumana nzala yakumuuya. Denise iwakakomenena mucikombelo caba Katolika ulayeeya ategwa: “Mukabbuku kajisi mibuzyo njobabuzya bantu bayanda kuba ba Katolika, kuli mubuzyo wakuti, ‘Nkaambo nzi Leza ncaakatulengela?’ Kumane kuli bwiinguzi bwakuti, ‘Leza wakatulenga kuti katutondezya mbwali mubotu akuti tukkomane anguwe kujulu mane kukabe kutamani.’”
Denise ulazumanana kuti: “Eeci tiicakandigwasya kumvwisya ikaambo keni ncondiponena. Ikuti naa ndilindila buyo kuunka kujulu, ino ncinzi ncondeelede kucita kwaciindi cino?” Bantu banji bayeeya mbwayeeya Denise. Buvwuntauzi bumwi bwakatondezya kuti bantu banji ibakabuzyigwa basyoma kuti zikombelo zinji tazibagwasyi bantu kuzyiba ncobaponena.
Aboobo, eeci cipa kuti ibanji batalike kuyandaula bwiinguzi kumbi—kuli basayaansi abasyaabusongo baindene-indene. Ino nkaambo nzi bantu ncobazumanana kubuzya ikaambo ncobaponena nokuba kuti kuboneka kuti kunyina nobajana bwiinguzi bwamasimpe?
Twakalengwa Anzala Yakumuuya
Ba Dr. Kevin S. Seybold bakaamba kuti “kuboneka kuti bantu balayanda kukomba.” Mumyaka misyoonto yainda, basayaansi bali mbobabede bakabona kuti bantu balazyalwa kabajisi luyandisisyo lwakuzyiba ncobaponena. Mane buya ibamwi basyoma kuti bantu bakalengwa munzila yakuti kabayanda kuba acilongwe a Leza.
Nokuba kuti basyaabusongo baluujisi kusola kuzyiba naa bantu bakalengwa munzila yakuti kabayanda kukomba Leza, bantu banji kunyina nobayandika kwaambilwa buya abasayaansi kuti bayandika zyintu zyakumuuya. Ikuyanda zyintu zyakumuuya nkokutupa kubuzya mibuzyo iiyandika kapati mbuli yakuti: Nkaambo nzi ncotuli waano? Ino ncinzi ncotweelede kucita mubuumi? Sena nzyotucita kuli mbozimujatikizya Mulengi singuzu zyoonse?
Masimpe ngakuti mulakonzya kujana bwiinguzi bwamibuzyo imwi akati kayeeyi kwiinda mukulanga-langa zyintu nzyaakalenga Leza. Mucikozyanyo, amuyeeye buyo zilenge zilibedelede, kutalikila kutuuka tuniini-niini kusikila kumilalabungu iili kulamfwu kapati. Sena zyintu eezyi tazitugwasyi kubona kuti kuli Mulengi musongo iwakazilenga? Ibbaibbele lyaamba kuti: “Kuzwa kumalengelo bantu balizi bube butaboneki bwa Leza, nkokuti nguzu zyakwe zitamani abuleza bwakwe. Bantu balaziba nibabona eezyo Leza nzyaakalenga. Aboobo tabajisi cilitamizyo pe.”—Ba-Roma 1:20, BT.
Mbomukonzya Kumana Nzala Yakumuuya
Ikujatikizya mbwaakabalenga bantu Leza, Ibbaibbele lyaamba kuti: “Wabika bulangizi bwabuumi buteeli mumyoyo yabo.” (Mukambausi 3:11) Twakalengwa munzila yakuti katuyanda kupona ikutali kufwa. Alimwi ncotuyanda nkuzyiba ncotuponena akujana bwiinguzi kumibuzyo njotujisi.
Masimpe ngakuti, bantu balayanda kuzyiba zibacitikila mubuumi. Naakabona nzyobacita bantu mumakani aasayaansi, mulembi mupati wamagazini ya The Wall Street Journal wakalemba kuti: “Tuciyanda kuzyiba mbotubede, ncotuli waano alimwi ankotuya.” Aboobo, ncotuyanda kucita lino nkuyandaula bwiinguzi bwamasimpe. Kalyaamba nkotukonzya kujana bwiinguzi, Ibbaibbele lyaamba kuti “[Leza] ngonguwe iwakatulenga, tuli bakwe.”—Intembauzyo 100:3.
Masimpe, ncamaano kuyandaula bwiinguzi kuli Yooyo wakalenga zyintu zyoonse. Jesu Kristo wakaamba kuti oobu mbotweelede kucita. Wakalizyi kuti alikke Mukamwini buumi —Imulengi wesu—nguukonzya kupa kuti nzala yakumuuya imane.—Intembauzyo 36:5, 9; Matayo 5:3, 6.
Ncobeni, ikujana bwiinguzi bwamasimpe bwamubuzyo wakuti, Nkaambo nzi ncotuli waano? kulayandika kutegwa tuyaambele kumuuya. Aboobo, amubone bwiinguzi bukkazyika moyo mbwapa Mulengi wesu kujatikizya makani aaya.