Pepe Lyamuyuni Uutegwa Emperor Penguin

Muyuni uutegwa emperor penguin ulakonzya kuyamba mumeenda cakufwambaana kapati kumane akusotokela abbwe lyacaanda. Mbuti mbwacikonzya kucita oobo?

Amulange-lange makani aaya: Muyuni ooyu ulayobola muya mumapepe aakwe. Kucita boobu kulamukwabilila kumpeyo, alimwi kulamugwasya kuyamba cakufwambaana kapati. Mbuti mbwacita oobo? Basyaazibwene mumakani aazyintu zyeendela mumeenda baamba kuti muyuni ooyu ulacita oobo kwiinda mukugwisya muya uuli mumapepe aakwe. Ciindi nagwisya muya mumapepe cilamugwasya kuti aube-ube kutegwa acikonzye kuyamba cakufwambaana.

Cikkomanisya ncakuti, basyaazibwene mumulimo wazyakupanga-panga balikwiiya nzila zyakupanga mato munzila yakuti mato aaya kayeenda cakufwambaana mumeenda. Nokuba boobo, basikuvwuntauzya babona kuti eeci inga tacikonzyeki akaambo kakuti “bupange bwamapepe aamuyuni ooyu bulakatazya kumvwisya, calo capa kuti abalo baalilwe kupanga mato munzila iikozyenye ambwaapangidwe mapepe aayo.”

Ino muyeeya buti? Sena pepe lyamuyuni uutegwa emperor penguin lyakaba akaambo kakusanduka kwazyintu naa lyakalengwa buya?