BA SARAH,a baku Ghana ibakkala mucikwati aba Jacob kwamyaka iili 17 bakaamba kuti: “Kanji-kanji tulazwangana kujatikizya mali. Ndilanyema akaambo kakuti ba Jacob kunyina nobabandika andime makani aamali nokuba kuti nzinji nzyondicita mukulanganya mukwasyi. Kulainda nsondo zili mbozibede katutaambauzyanyi.”

Balumi babo ba Jacob balaazumina makani aaya nobaamba kuti: “Kuli ziindi notutaingulani kabotu. Eeci cilacitika akaambo kakutamvwisya umwi ncaamba alimwi akaambo kakutabandika munzila iigwasya. Mazwanga alimwi alacitika akaambo kakuciindizya kunyema kujatikizya bukkale bumwi.”

Ba Nathan ibakakwata caino-ino ku India balapandulula icakacitika buzuba bumwi ciindi bausyizyala nobakabwentela banyinazyala. Baamba kuti: “Bamamazyala bakanyema akuzwa aŋanda. Nondakababuzya basizyala ncobakabwenta boobu, bakalimvwa kuti mebo ndemukwe wabo ndabatukila. Tiilyakalampa bakatalika kutubwentela toonse buyo.”

Ambweni andinywe mwakabona kale majwi aatali kabotu aambwa aciindi citeelede mbwaakonzya kuleta mazwanga mumukwasyi. Mubandi iwatalikide kabotu ulakonzya kucinca akuba wakwaambana majwi aatali kabotu. Kunyina muntu uukonzya kwaamba zintu ziluzi lyoonse, aboobo ncuuba-uba kutamvwisya nzyobaamba bamwi naa kubayeeyela zintu zitali kabotu. Nokuba boobo, cilakonzyeka kumvwana alimwi akuba aluumuno.

Ino ncinzi ncomukonzya kucita kuti kwaba mazwanga? Ino nintaamu nzi nzyomukonzya kubweza kutegwa mubambe luumuno alimwi mumukwasyi? Ino mbuti mikwasyi mboikonzya kubamba luumuno? Amubale zibalo zitobela.

INO MBUTI kuti mumukwasyi wanu lyoonse mulazwangana? Ambweni mazwanga lino alacitika kanji-kanji alimwi aindila. Alimwi ambweni tamuzyi kuzwangana ambokwakatalika. Nokuba boobo, mulayandana alimwi tamuyandi kubisizyanya.

Cilayandika ikuzyiba kuti kwiindana mbomuyeeya tacaambi kuti buumi bwanu mumukwasyi bwanyongana. Icikonzya kupa kuti kakuli luumuno naa pe, taali mazwanga pele zintu nzyomucita kujatikizya mazwanga aabuka. Amubone zintu zimwi zikonzya kumugwasya kumana mazwanga.

1. MUTANOOJOKEZYI.

Kuzwangana inga kujatikizya bantu bobilo, pele kuti umwi watalika kuswiilila muciindi cakwaambaula, kuzwangana kulaceya. Aboobo, amusolekesye kutajokezya kuti bamunyemya. Kwiinda mukulilesya mulakonzya kulijanina bulemu. Amuzyibe kuti kuba aluumuno mumukwasyi cilayandika kapati kwiinda kuzyiba kuti nguni uujisi mulandu.

“Kuti kakunyina nkuni mulilo ulazima, alimwi ikuti kakunyina sikubejekezya mazwanga alamana.”—Tusimpi 26:20.

2. AMUBIKKILE MAANO MBWALIMVWA MUNAMUKWASYI.

Kuswiilila cakubikkila maano kakunyina kunjila umwi mukanwa naa kumuyeeyela zintu zitako kulakonzya kucesya bukali bwaumwi akuleta luumuno alimwi. Muciindi cakumuyeeyela zintu zitaluzi, amumvwisye muntu mbwalimvwa. Zintu zitaluzi nzyakonzya kucita muntu akaambo kakutalondoka mutanooziyeeyeli kuti wazicita amakanze aatali kabotu. Majwi aacisizya moyo alakonzya kwaambwa ikutali akaambo kakuti muntu uyanda kupilusizya cibi, pele ambweni akaambo kakuti tanaayeeya kabotu naa kucisa kwamoyo.

“Amulisamike luyando lwamoyo walubomba, luzyalo, kulicesya, kubomba moyo alimwi akukkazika moyo.”—Bakolose 3:12.

3. AMULINDILE KUTEGWA MOYO UKKALE.

Ikuti naa mulafwambaana kunyema, ncamaano kulomba kuzwa akuya kumbi kwaciindi cisyoonto kutegwa moyo ukkale. Ambweni mulakonzya kuunka muluumu iimbi naa kweenda kuya kumbi kusikila moyo wakkala. Eeci tacaambi kuti tamuyandi kubandika. Muciindi caboobo, eeci inga caba ciindi cibotu cakupaila kuli Leza kuti amugwasye kukkazika moyo alimwi akumvwisya.

“Kubwesyanya kakutanatalika, kozwa buyo aawo.”—Tusimpi 17:14.

4. AMUBIKKILE MAANO ICEELEDE KWAAMBWA AMBOCEELEDE KWAAMBWA.

Ikuti mwabikkila maano kubelesya majwi aakonzya kumucisizya moyo muntu umwi, tacikonzyi kugwasya pe. Muciindi caboobo amusole kwaamba majwi aakonzya kupa munamukwasyi iwanyemede kulimvwa kabotu. Alimwi muciindi cakuyeeyela mbwalimvwide, cakulicesya amumubuzye mbwalimvwa alimwi amulumbe lugwasyo luli loonse ndwakonzya kumupa.

“Majwi aambwa cakutayeeya alayasa mbuli panga, pele mulaka wabasongo ulaponya.”—Tusimpi 12:18.

5. KAMWAAMBAUDA ANSI ALIMWI MUNZILA IIYAKA.

Kutakkazika moyo kwamunamukwasyi kulakonzya kukalazya umwi. Amusolekesye kutabelesya majwi aasampaula naa aatukila naa kukkwezyeka jwi lyanu nokuba kuti mwanyema buti. Amweelebe majwi aacisizya moyo mbuli aakuti, “Tondibikkili maano” naa aakuti “Lyoonse tondiswiilili.” Muciindi caboobo, amumwaambile cabubombe ngomukwetene limwi mbomulimvwa kujatikizya nzyaacita (“Inga tandimvwi kabotu ciindi nomu. . . ”). Tamweelede kumutonka muntu cankazi, kumuuma mbayi naa cibbaka naa nzila buyo zimwi zyakulwana. Alimwi ncimwi buyo kujatikizya kunonga, kubelesya majwi aakusampaula alimwi aakukonga.

“Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse.”—Baefeso 4:31.

6. MUTANOOMUKI KULILEKELELA, ALIMWI AMUPANDULULE CINI NCOMUYOOCITA KUTEGWA MUBAMBE TWAAMBO.

Mutalekeli kunyema kunyonganya makanze aanu aakubamba luumuno. Kamuyeeya kuti, ikuti mwalwana amuntu umwi nkokuti nyoonse nyobilo taakwe ncomwapanga. Pele ikuti mwabamba luumuno nkokuti nyoonse nyobilo mulagwasyigwa. Aboobo amucite lubazu lwanu kwaba mazwanga. Nokuba kuti muli masimpe kuti tamuli ndinywe mwalubizya, mulakonzya kulilekelela akaambo kakuti mwalinyemede, tiimwazibweza kabotu zintu, naa akaambo kakuleta mwazwanga cakutazyiba. Kuba aluumuno cilayandika kapati kwiinda kulisumpula naa kuzunda mumazwanga. Alimwi kuti muntu walilekelela amufwambaane kumulekelela.

“Koya ukalibombye akulikombelezya cakufwambaana kumweenzinyoko.”—Tusimpi 6:3.

Ino ncinzi ncomukonzya kucita kutegwa kube luumuno mumukwasyi mazwanga naamana? Aaya ngamakani aatibandikwe mucibalo citobela.

SENA muyeeya kuti Bbaibbele lilakonzya kugwasya kutegwa kube luumuno mumukwasyi? Amweezyanisye ncolyaamba Bbaibbele atwaambo twakabagwasya bantu batobela ibakabuzyigwa-buzyigwa. Amubone twaambo tukonzya kumugwasya kutegwa kutabi mazwanga, kube luumuno, alimwi alukamantano.

NJIISYO ZYAMU BBAIBBELE IZIGWASYA KUBA ALUUMUNO

KAMUBONA MWEENZINYOKO MUNZILA IILI KABOTU.

“Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda. Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:3, 4.

“Twajana kuti ncibotu kubona ngomukwetene limwi kuti ulayandika kwiinda nduwe alimwi abantu bamwi.”—Ba C. P., ibakkala mucikwati myaka iili 19.

AMUSWIILILE CAKUBIKKILA MAANO.

“Kozumanana kubayeezya kuti . . . batabi basinkazi, pele kabanyoneka, kabatondezya kubomba moyo cakumaninina kubantu boonse.”—Tito 3:1, 2.

“Tulakonzya kulesya mazwanga ikuti katutainguli cankazi. Cilayandika kuswiililila kakunyina kuyeeyela twaambo tumbi alimwi akulemeka ncaamba ngomukwetene limwi nokuba kuti tamuzuminizyi ancaamba.”—Ba P. P., ibakkala mucikwati myaka iili 20.

AMUKKAZIKE MOYO AKUBA BABOMBE.

“Kwiinda mukukkazika moyo mweendelezi wabasikalumamba ulakonzya koongelezyegwa, alimwi mulaka mubombe ulakonzya kutyola cifwuwa.”—Tusimpi 25:15.

“Mazwanga anooliko, pele muuya ngotutondezya nguukonzya kupa kuti kube luumuno naa pe. Tuyandika kukkazika moyo ncobeni. Twacita boobo, zintu zilalulama.”—Ba G. A., ibakkala mucikwati myaka iili 27.

MUTANOOBELESYI MAJWI MABI NAA KULWANA.

“Mweelede kuzigusya zyoonse eezyi kulindinywe: bukali, kunyema, bubi, majwi aakusampaula, alimwi kutazwi majwi aacisapi kumulomo wanu.”—Bakolose 3:8.

“Kulilesya kwabalumi bangu kulandikkomanisya. Lyoonse balakkazika moyo alimwi tabandinyemeni naa kunditukila.”—Ba B. D., ibakkala mucikwati myaka iili 20.

KAMUFWAMBAANA KULEKELELA AKUBAMBA MAZWANGA.

“Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina.”—Bakolose 3:13.

“Ciindi nomwanyemezyanya, tacili cuuba-uba kukkazika moyo, alimwi cipa kufwambaana kwaamba naa kucita zintu zikonzya kumucisa ngomukwetene limwi. Muziindi zili boobu, ncibotu kuba amuuya wakulekelela. Cikwati tacikonzyi kuzwidilila kuti kakunyina kulekelelana.”—Ba A. B., ibakkala mucikwati myaka iili 34.

AMUBE ACILENGWA CAKWAABA KUZWA ANSI AAMOYO.

“Amube baabi, abalo bantu bayoomwaabila. . . . Nkaambo cipimyo ncomubelesya kupimina bamwi, ncobayoobelesya kumupimina andinywe.”—Luka 6:38.

“Balumi bangu balizizyi zintu zindikkomanisya, aboobo lyoonse balandicitila zintu eezyo nonditayeeyeli. Andime eeci cindipa kulibuzya kuti, ‘Ino ncinzi ncondikonzya kubacitila kutegwa bakkomane?’ Akaambo kakucita boobo, tulakkomana kapati alimwi tucikkomene.”—Ba H. K., ibakkala mucikwati myaka iili 44.

MUTALEKI KUCITA ZINTU ZIPA KUTI KUBE LUUMUNO MUMUKWASYI

Banamukwasyi aaba ibasyoonto ibakabuzyigwa-buzyigwa abalembi ba Sinsimuka! bali akati kamamiliyoni aabantu nyika yoonse ibakagwasyigwa a Bbaibbele kuba abube bupa kuti kube luumuno mumukwasyi.a Nokuba kuti bamwi mumukwasyi tabayandi kubelekela antoomwe, bajana kuti cilagwasya kapati ikusola kubamba luumuno, akaambo kakuti Bbaibbele lisyomezya kuti: “Aabo baleta luumuno balikkomene.”—Tusimpi 12:20.