Mbomukonzya Kulikwabilila Kumalwazi

Buzuba abuzuba mubili wanu ulalwana abasinkondo ibatalibonyi pele ibakali kapati cakuti balakonzya kumujaya. Basinkondo aaba nkokuti tuzunda, alimwi atuuka, balakonzya kunyonganya buumi bwanu.a Ambweni tamukonzyi kuzyiba kujatikizya nkondo eezyi izicitika akaambo kakuti maseelo aanu aakwabilila mubili alatutanda naa kutunyonyoona tuzunda ootu kamutanaciswa. Nokuba boobo, zimwi ziindi, tuzunda ootu tupa kuti muciswe. Ikuti caba boobo, inga mwayandika kuyungizya bukwabilizi bwanu kwiinda mukubelesya musamu alimwi abusilisi bumwi.

Kwamyaka minji yainda, bantu kunyina ncobakazyi kujatikizya ntenda njotujisi tuuka naa tuzunda tuleta malwazi. Pele ciindi basayaansi bamumwaanda wamyaka wa 19, nobakazyiba malwazi mbwaaswaangene atuzunda, twakazyiba mbotukonzya kulikwabilila. Basikuvwuntauzya mumakani aabusilisi bacikonzya kumana naa kwiicesya kapati ntenda yamalwazi amwi aayambukila mbuli, smallpox alimwi akulemana (polio). Nokuba boobo, caino-ino, malwazi aamwi mbuli bulwazi bwa yellow fever alimwi abwa dengue bwakatalika alimwi. Ino nkaambo nzi? Amulange-lange twaambo ootu tutobela:

• Mwaka amwaka, mamiliyoni aabantu baleenda nyika yoonse, kanji-kanji inga balijisi atuzunda tuleta malwazi. Kweelana acibalo cimwi camumagazini iitegwa Clinical Infectious Diseases mbocakaamba, “mubwini malwazi oonse aayambukila alakonzya kumwaigwa kwiinda mubantu bazwa kucisi cimwi kuya kucisi cimbi.”

• Tuzunda tumwi tatucifwi amisamu iijaya tuzunda. Mbunga ya World Health Organization yakaamba kuti: “Nyika iyaabusika aciindi bunji bwamisamu iijaya tuzunda noitacibeleki kapati kulwana malwazi.”

• Nkondo alimwi abucete kanji-kanji zisinkilila kusolekesya kwamfwulumende kwakucesya ntenda yakumwaya malwazi.

• Bunji bwabantu tabajisi luzyibo lwakulikwabilila kumalwazi.

Nokuba kuti malwazi aindila, kuli zintu nzyomukonzya kucita kutegwa mulikwabilile nywebo amukwasyi wanu. Cibeela citobela cilatondezya mbomukonzya kucita oobo, nokuba kuti mukkala mucisi cicisumpuka, mulakonzya kubelesya nzila zitakatazyi alimwi zigwasya.