Kusuluta Ndembela, Kuvwoota Alimwi Amilimo Iitali Yabusikalumamba

Kusuluta ndembela. Bakamboni ba Jehova basyoma kuti ikukotamina naa kusuluta ndembela bunji bwaziindi ikucitwa ciindi nokwiimbwa lwiimbo lwacisi caamba kukomba cisi naa baleli kuti mbabakonzya kuleta lufwutuko ikutali Leza. (Isaya 43:11; 1 Bakorinto 10:14; 1 Johane 5:21) Umwi wabaleli aaba wakali Mwami Nebukadinezara waku Babuloni yansiku. Ikutegwa abakkomanisye bantu akubatondezya nguzu abusungu mbwaakajisi mubukombi, ooyu mwami singuzu wakapanga cikozyanyo cipati akupa mulawo wakuti bantu boonse ibakali mubwami bwakwe bacikotamine zyanakulila nyimbo zili mbuli lwiimbo lwacisi. Nokuba boobo, bana Hebrayo botatwe—Sadirake, Mesaki a Abedinego—bakakaka kucikotamina cikozyanyo eeci nokuba kuti bakali kulangilwa kupegwa cisubulo cakujaigwa.—Daniele, caandaano 3.

Sikwiiya makani aakaindi, Carlton Hayes, wakalemba kuti mazuba aano “cikozyanyo cipati ncobasyoma akukomba bantu ibayandisya cisi cabo nindembela. Basankwa balasamununa zisoti zyabo ciindi ndembela noyiinzyigwa; alimwi kutegwa batembaule ndembela basikweema balalemba nyimbo zyakweema kumane bana balaakwiimba nyimbo.” Wakayungizya kuti, bantu ibayandisya cisi balijisi “amazuba aakulyookezya” mbuli buzuba bwane mumwezi wa July mucisi ca United States, alimwi balijisi abantu “bajisi mpuwo” mbobalemeka mbuli “basaante” alimwi amaanda ngobalemeka mbuli “matempele,” naa tukombelo. Kupobwe limwi mucisi ca Brazil, mupati wabasikalumamba wakaamba kuti: “Indembela ilalemekwa akukombwa . . . mbubonya mbuli nyika yokwesu mboikombwa.” Masimpe, ibbuku lyakuti The Encyclopedia Americana lyakaamba kuti “indembela ilisetekene mbubonya mbuli ciingano.”

Bbuku ndimunya eeli caino-ino lyakaamba kuti nyimbo zyacisi “zitondezya mbobaciyanda bantu cisi cabo alimwi bunji bwaziindi zijatikizya kulomba Leza kuti asololele alimwi akukwabilila bantu bamucisi naa beendelezi babo.” Aboobo, babelesi ba Jehova baliluzi nobaamba kuti kusekelela mapobwe aacisi kwiinda mukusuluta ndembela akwiimba nyimbo zyacisi mbukombi. Kalyaamba kujatikizya bana ba Bakamboni ba Jehova mbobakali kukaka kulemeka ndembela naa kukonka muzikolo zyamucisi ca United States, bbuku lyakuti The American Character lyakaamba kuti: “Mukukosola milandu iili mbwiibede, Nkuta Mpati yakaamba kuti kucita zilengwa eezyi zyacisi kuleelene akukomba.”

Nokuba kuti tabatoli lubazu muzilengwa nzyobabona kuti tazili zyamu Magwalo, babelesi ba Jehova balizyi kuti muntu umwi aumwi ulijisi nguzu zyakulisalila mumakani aaya. Alimwi tabasobanyi ndembela naa kusampaula baleli babikkidwe kweelana amulawo nkaambo balizyi kuti “beendelezi” babeleka mbuli “babelesi ba Leza.” (Baroma 13: 1-4) Aboobo, Bakamboni ba Jehova balaatobela malailile aakuti katubapailila “bami abaabo boonse ibali muzyuuno zyabweendelezi.” Nokuba boobo, imakanze eesu ngakuti “tuzumanane kupona muluumuno akuliiba alimwi akumaninina mukubelekela Leza cakulyaaba akubikkila maano.”—1 Timoteyo 2:2.

Kuvwoota mutwaambo twacisi. Banakristo bakasimpe tababakasyi bantu ibayanda kubelesya nguzu zyabo zyakulisalila mumakani aakuvwoota. Tabaambili bantu kuti batavwooti alimwi balabalemeka beendelezi basalwa. Nokuba boobo, tabatoli lubazu naaceya mutwaambo twacisi. (Matayo 22:21; 1 Petro 3:16) Ino ncinzi Munakristo ncakonzya kucita ikuti naa kakkala mucisi muli mulawo wakuti bantu boonse beelede kuvwoota naa ikuti wajanika mubukkale bwakuti bantu bakanzide kupenzya baabo bataunki kumasena aakuvwootela? Kayeeyede mbobakacita ba Sadirake, Mesaki a Abedinego, kuti bakaunka mane bakaakusika kucibanda ca Dura, Munakristo uuli mubukkale buli boobo ulakonzya kusala kuunka kubusena bwakuvwootela ikuti manjezyeezya aakwe kaamuzumizya. Pele, teelede kucita cintu cili coonse cikonzya kupa kuti atole lubazu mutwaambo twacisi. Weelede kuzibikkila maano njiisyo eezyi zili cisambomwe:

1. Basikutobela Jesu ‘tabali banyika.’—Johane 15:19.

2. Banakristo mbaiminizi ba Kristo a Bwami bwakwe.—Johane 18:36; 2 Bakorinto 5:20.

3. Imbungano ya Bunakristo ilikamantene mulusyomo alimwi boonse mumbungano balayandana mbubonya Kristo mbwabayanda bantu.—1 Bakorinto 1:10; Bakolose 3:14.

4. Aabo basala mweendelezi balajatikizyigwa muzintu nzyacita.—Amubone njiisyo zili kulugwalo lwa 1 Samuele 8:5, 10-18 alwa 1 Timoteyo 5:22.

5. Bana Israyeli nobakali kuyanda kulelwa amuntu, Jehova wakabona kuti bakali kukaka nguwe.—1 Samuele 8:7.

6. Banakristo beelede kuti kabaangulukide kubandika makani aajatikizya Bwami bwa Leza kubantu bali munkamu zyoonse zyatwaambo twacisi.—Matayo 24:14; 28:19, 20; Bahebrayo 10:35.

Milimo iitali yabusikalumamba. Mumasi amwi, imfwulumende yaamba kuti aabo bakaka mulimo wabusikalumamba beelede kubeleka milimo imwi yamfwulumende iitali yabusikalumamba kwaciindi cili mbocibede. Notuyandika kusala mumakani aaya, tweelede kupaila alimwi ambweni akubandika a Munakristoma uusimide, mpoonya tweelede kusala cakucita kweelana ancaamba manjezyeezya eesu aayiisyidwe.—Tusimpi 2:1-5; Bafilipi 4:5.

Jwi lya Leza litwaambila kuti ‘katuzimvwida mfwulumende abaabo bajisi nguzu zyabweendelezi, katulibambilide kucita mulimo mubotu uuli woonse, katunyoneka.’ (Tito 3:1, 2) Aboobo, katwaayeeyede majwi aaya, tulakonzya kulibuzya kuti: ‘Sena ikuzumina mulimo ooyu uutali wabusikalumamba inga kwapa kuti nditole lubazu mutwaambo twacisi naa muzintu zicitwa abukombi bwakubeja?’ (Mika 4:3, 5; 2 Bakorinto 6:16, 17) ‘Sena kucita mulimo ooyu inga kwapa kuti cindiyumine naa ndaalilwe kuzuzikizya mikuli yangu ya Bunakristo?’ (Matayo 28:19, 20; Baefeso 6:4; Bahebrayo 10:24, 25) ‘Kulubazu lumwi, sena kucita mulimo ooyu kulakonzya kupa kuti ndiyungizye milimo yangu ya Bunakristo, mbuli kubeleka mulimo wabukambausi waciindi coonse?’—Bahebrayo 6:11, 12.

Ikuti Munakristo umwi naazinzibala kuyeeya wasala kunjila mulimo wamfwulumende uutali wabusikalumamba ikwiinda kuti atolwe kuntolongo, Banakristo bamwi tabeelede kupenga amakani aaya. (Baroma 14:10) Mbubonya buyo, ikuti wasala kutanjila mulimo ooyu, ibamwi tabeelede kumutongooka pe.—1 Bakorinto 10:29; 2 Bakorinto 1:24.