“Mafwuwa Mayumu” A “Bakamboni Bobilo” Ino Ziswaangene Buti?

MUMWAKA wa 1919, businsimi bobilo ibuswaangene bwakazuzikizyigwa: bumwi bujatikizya “mafwuwa mayumu,” eelyo bumbi bujatikizya “bakamboni bobilo.” Cilengaano ‘camafwuwa mayumu’ cakasinsima ciindi cilamfwu kapati (eeco cakatola myaanda yamyaka minji) icakamana ciindi bantu ba Leza banji nobakaba baumi. (Ezk. 37:2-4; Ciy. 11:1-3, 7-13) Businsimi bwaamba “bakamboni bobilo” bupandulula ciindi cisyoonto (bwakazuzikizyigwa kutalikila kumamanino aamwaka wa 1914 kusikila kumatalikilo aamwaka wa 1919) icakamana ciindi kakamu kasyoonto kababelesi ba Leza nobakaba baumi. Businsimi boonse bobilo bwakatondezya bubuke bwacikozyanyo alimwi boonse bwakazuzikizyigwa mazuba aano mu 1919 ciindi Jehova naakapa kuti babelesi bakwe ibananike ‘baimikile,’ bazwe mubuzike kuli Babuloni Mupati alimwi akubungana mumbungano iyakabukulusyigwa.—Ezk. 37:10.

Aboobo, amubone kuti kuzuzikizyigwa ooko kwabusinsimi oobu bobilo kuliindene munzila iyandika. Businsimi ibwaamba “mafwuwa mayumu” bwaamba kuba baumi kwabananike basyeede boonse. Nokuba boobo, businsimi ibwaamba “bakamboni bobilo” bwaamba kuba baumi kwabananike basyeede ba Leza bamwi, nkokuti aabo ibakali kusololela mumbunga alimwi ibakasalwa kuba “muzike uusyomeka alimwi uucenjede.”—Mt. 24:45; Ciy. 11:6.a

“Cibanda Camukkuti icakazwide mafwuwa”​—Ezk. 37:1

1. NOYAKAINDA 100 C.E.

   Kuzwa mumwaanda wamyaka wabili C.E. kuya kumbele ciindi mbungano ya Banakristo bananike noyakajaigwa munzila yacikozyanyo, “cibanda camukkuti” cakazwide “mafwuwa”

2. KUMATALIKILO 1919

   1919: “Mafwuwa mayumu” akaba abuumi ciindi Jehova naakapa bananike boonse kuti bazwe mu Babuloni Mupati akubungana mumbungano iyakabukulusyigwa

“Bakamboni Bobilo”​—Ciy. 11:3

1. KUMAMANINO 1914

   kukambauka ‘muzisani zyamasaka’

   1914: “Bakamboni bobilo” bakakambauka kabasamide “zisani zyamasaka” kwamyaka yotatwe acisela. Kumamanino aaciindi eeco, bakajaigwa munzila yacikozyanyo

2. lufwu lwacikozyanyo

3. KUMATALIKILO 1919

   1919: “Bakamboni bobilo” bakaba baumi ciindi kakamu kasyoonto kabakwesu ibananike ibakali kusololela mumbunga nokakasalwa kubeleka kakali “muzike uusyomeka alimwi uucenjede”