Tacinamana Ciindi Cakubelekela Leza
Ku Málaga, kumusanza a Spain, banyina amwana aabo boonse bala zyina lya Ana bakabbapatizigwa mu December 19, 2009. Bakali aakati kabantu bali 2,352 bakabbapatizyigwa ku Spain mu 2009. Kwakali cintu cimwi cakali kukkomanisya akati kamwana abanyina, eeyi yakali myaka yabo. Banyina bakali amyaka 107 mwana 83.
Ino ncinzi cakabapa kuti balyaabe kuli Jehova akubbapatizyigwa? Muma 1970 kumatalikilo, basimukobonyina Ana mwana, bakali kumutamba kuti baunke limwi ku Ciiyo Cabbuku Cambungano cakali kucitika kuŋanda ya Kamboni umwi. Ana wakali kujanika zimwi ziindi. Nokuba boobo, akaambo kamulimo ngwaakali kubeleka tanaakaya aambele.
Nokwakainda myaka iili kumi, bana ba Ana bamwi bakatalika kwiiya Bbaibbele alimwi bakaba babelesi ba Jehova. Umwi akati kabana aaba wazyina lya Mari Carmen, wakabagwasya banyina kutalika kukayanda kasimpe kamu Bbaibbele alimwi wakatalika kubagwasya kuti batalike kwiiya Bbaibbele. Bamane abalo bakaapanyina Mari Carmen, ba Ana bapati bakatalika kwiiya Bbaibbele. Kumane, boonse bakabbapatizyigwa mukwasyi ooyu bakali kumi.
Buzuba mbubakali kubbapatizyigwa ba Ana aaba bobilo, banyina amwana bakali kkomene kapati. Ba Ana bali amyaka iili 107 bakaamba kuti, “Jehova mubotu, wapa kuti ndimuzyibe.” Mwanaabo wakayungizya naakati, “Kaitanasika Paradaiso ndiyanda kubelekela Jehova, kucita kuyanda kwakwe akukambauka makani mabotu kusikila mpondikonzya.”
Cibakkomanisya aaba bantu bobile bakafwidwa nkujanika kumiswaangano. Mwaalu umwi mumbungano yabo wakaamba kuti, “Kunyina nobalovwa kumiswaangano, alimwi lyoonse balatola lubazu aaciiyo ca Ngazi Yamulindizi.”
Cikozyanyo cabo cakusyomeka cituyeezya Anna, ‘watakali kulovwa mutempele, wakali kubeleka mulimo uusetekene masiku asyikati, kuliimya kulya alimwi akupaila mipailo yakukombelezya.’ Eeci cakamupa coolwe cipati cakubona Jesu naakali muvwanda. (Lk. 2:36-38) Naakali amyaka iili 84, Anna tanakacembeede cakuti tanaakali kukonzyi kumubelekela Jehova mbuli ba Ana baambwa mucibalo eeci.
Sena mulijisi bamukowa ibayanda kwiiya Bbaibbele? Naa ndiza mwakajana bacembeede ibayanda kwiiya nimwakabaswaya kuŋanda? Ibali boobu inga baba mbuli ba Ana baambwa kale mucibalo eeci ibakacibona kuti tacinamana ciindi cakubelekela Leza wakasimpe, Jehova.
Majwi aakwelelezya sikubala aali apeeji 25]
“Jehova mubotu”
Majwi aakwelelezya sikubala aali apeeji 25]
“Kaitanasika Paradaiso ndiyanda kubelekela Jehova”