MAKANI AAYEEME AMUTWE UULI ACIVWUMBYO: NKAAMBO NZI KUPENGA NCOKUVWULIDE BOOBU? INO KUYOOMANA LILI?

Bantu Banji Batajisi Mulandu Balajaigwa!

Mwana musimbi wazyina lya Noelle wakali kuyandisisya kapati kudulowiŋa. Bumwi buzuba kumangolezya wakali kuyaabweendeenda kunze aaŋanda, mukutazyiba wakanyikila muciziba cakudwaila caaŋanda. Wakafwa kakuceede mvwiki zyobilo kuti asisye myaka yone yakuzyalwa.

Charlotte, Daniel, Olivia, Josephine . . . Aaya ngamwi aamazyina aabana bali 20 bamyaka iili akati ka 6 a 7 akati kabaabo ibali 26 bakadubulwa kucikolo caku Connecticut, mucisi ca U.S.A., mu December 14, 2012. Ba President Obama bamucisi eeci nobakali kwaamba makani aadilwe bakaabandauka mazyina aabana aaba akwaambila bantu ibakali kulila kuti: “Mapenzi aali boobu ayelede kumana.”

Mu 1996, Bano, mwana musimbi uujisi myaka yakuzyalwa iili 18 wakalongela ku Norway kuzwa kucisi ca Iraq abamukwasyi wakwe. Mukubula coolwe, mu July 22, 2011, Bano wakali akati kabantu bali 77 bakajaigwa acigwebenga cakali kutwanga akwaamba kuti: “Mundijatile nobantu . . . ikuti tiindajaya bantu banji kweelana ambondali kuyanda.”

Makani aali boobu alalipootwa ziindi zinji nyika yoonse. Amuyeeye buyo myoyo yesu mboicisa alimwi akuusa akaambo kantenda, bugwebenga, nkondo, ntenda zilicitikila, alimwi azimwi buyo. Tabalivwulili kaka bantu bajaigwa naa kupenzyegwa nokuba kuti banyina mulandu!

Bantu bamwi bapa mulandu Leza, akwaamba kuti mulengi wesu tababikkili maano bantu. Ibamwi baamba kuti Leza ulatubona notupenga pele tayandi kutugwasya pe. Pele bamwi baamba kuti ntenda zili boobu zyakabikkilwa limwi kuti zicitike. Kuboneka kuti bantu bajisi mizeezo iindene-indene kujatikizya makani aaya. Ino nkuuli nkotukonzya kujana bwiinguzi busyomeka alimwi bukkazyika moyo? Muzibalo zitobela, tulalanga-langa mu Jwi lya Leza, Ibbaibbele, kutegwa tuzyibe cipa kuti mapenzi kaaliko alimwi ambwaayoomanizyigwa.

[Cifwanikiso icili apeeji 3]