MAKANI AAYEEME AMUTWE UULI ACIVWUMBYO | SENA LEZA ULAMUBIKKILA MAANO?
Leza Ulakonzya Kumuumbulizya
“Leza, ooyo wuumbulizya baabo batyompedwe, wakatuumbulizya.”—2 BAKORINTO 7:6.
‘Mwana wa Leza, wakandiyanda akulyaaba akaambo kandime.’—BAGALATIYA 2:20
IKAAMBO BAMWI NCOBADOONEKA: Nociba ciindi bantu nobayandika lugwasyo akaambo kakupenga, bamwi balimvwa kuti tacili camaano kuti Leza anjilile kutegwa abagwasye kumana mapenzi aabo. Mukaintu umwi wazina lya Raquel wakaamba kuti: “Ikuti ndayeeya mweelwe wabantu bali munyika—alimwi amapenzi aakatazya ngobajisi, zintu zindipa kulibilika ziboneka mbuli kuti taziyandiki kapati cakuti ndilawayawaya kulomba Leza kuti andigwasye.”
NCOLIYIISYA JWI LWA LEZA: Leza watondezya kale munzila imwi kuti ulabagwasya alimwi akubaumbulizya bantu. Muntu uuli woonse anyika wakakona cibi, nkokuti kutacikonzya kucita kuyanda kwa Leza munzila iilondokede. Nokuba boobo, Leza “nguwakatuyanda akutuma Mwanaakwe kuti abe cipaizyo cakumanya zibi zyesu.” (1 Johane 4:10) Kwiinda mucituuzyo calufwu lwa Jesu, Leza wapa kuti cikonzyeke kulekelelwa zibi, kuba amanjezeezya aasalala, alimwi akuba abulangizi bwa buumi butamani munyika mpya yaluumuno.a Pele sena cituuzyo eeco cijatikizya bantu boonse, naa citondezya luyandisisyo ndwajisi Leza kulindinywe kumugama?
Atulange-lange cikozyanyo camwaapostolo Paulo. Wakakulwaizyigwa acituuzyo ca Jesu cakuti wakalemba kuti: “Ndilapona akaambo kalusyomo ndondijisi mumwana wa Leza, iwakandiyanda akulyaaba akaambo kandime.” (Bagalatiya 2:20) Masimpe Jesu wakafwa ciindi Paulo katanaba Munakristo. Pele Paulo wakali kubona cituuzyo kuti ncipego ca Leza cigamikidwe kulinguwe.
Mbubonya buyo, cituuzyo ca Jesu ncipego ca Leza ncaakamupa. Cipego eeci citondezya mbomuyandika kapati kuli Leza. Cilakonzya kumupa “luumbulizyo lutamani abulangizi bubotu” alimwi “akumuyumya mumilimo mibotu iili yoonse alimwi amajwi.”—2 Batesalonika 2:16, 17.
Nokuba kuti Jesu wakatuula buumi bwakwe kacili cituuzyo myaka iitandila ku 2,000 yainda, ncitondezyo nzi ciliko citondezya kuti Leza ulamubikkila maano mazubaano?
a Kutegwa mwiiye zinji kujatikizya cituuzyo ca Jesu, amubone cibalo 5 cabbuku lya Ino Ncinzi Cini Bbaibbele Ncoliyiisya? ilyakamwaigwa abakamboni ba Jehova.