MIBUZYO YAMU BBAIBBELE YAINGULWA

Sena buumi oobu mbobuliko bulikke?

Sena kuli nomwakayeeyede naa kuli zintu zimbi nzyomunga mwacita mubuumi kunze lyakwiile kusobana, kubeleka, kukwata naa kukwatwa, kukomezya bana, alimwi akucembaala? (Job 14:1, 2) Bbaibbele litondezya kuti nobaba bantu basongo balagambwa kujatikizya makani aaya.—Amubale Mukambausi 2:11.

Sena buumi bulijisi mpindu? Cakusaanguna tweelede kubuzya kuti, Ino buumi bwakatalika buti? Bantu banji nobalanga-langa mbuli bongo alimwi amubili woonse wamuntu mbozipangidwe munzila iigambya, balazumina kuti Mulengi musongo ngowakatulenga. (Amubale Intembauzyo 139:14.) Ikuti naa mboobo, nkokuti kuli kaambo ncotwakalengelwa. Kwiiya kaambo aaka inga kwatugwasya kapati.

Ino bantu bakalengelwa nzi?

Leza wakabalongezya banabukwetene bakusaanguna akubapa mulimo uukkomanisya. Makanze aakwe akali aakuti bazuzye nyika, akwiipanga kuba paradaiso, alimwi akuti kabapona kukabe kutamani.—Amubale Matalikilo 1:28, 31.

Makanze aa Leza akanyonganizyigwa ciindi bantu nibakazangila bulelo bwakwe. Pele Leza tanaakatulekelezya pe—nokuba kucinca makanze aakwe kujatikizya ndiswe alimwi anyika. Ibbaibbele lilatusyomezya kuti Leza wali kubeleka kutegwa afwutule bantu bakwe basyomeka alimwi akuti makanze aakwe kujatikizya nyika akazuzikizyigwe! Aboobo Leza uyanda kuti mupone buumi kweelana ambwaakali kuyanda kuzwa kumatalikilo! (Amubale Intembauzyo 37:29.) Amwiiye mbomukonzya kugwasyigwa azisyomezyo nzyaakasyomezya Leza mu Bbaibbele.