Sena Mulizyi?

Ino ncinzi cakapa kuti sikwiiya Sitefano atayoowi ciindi naakali kupenzyegwa?

SITEFANO wakali kumbele lyabaalumi babi myoyo. Babetesi aaba ibali 71 bakali aampuwo kapati mucisi akaambo kakuti bakali bamunkuta mpati yamu Israyeli, nkokuti Nkuta Mpati Yaba Juda. Bakabunganizyigwa a Mupaizi Mupati Kayafa, walo iwakeendelezya munkuta myezi misyoonto iyakaindide, ciindi Jesu naakapegwa mulandu alimwi akujaigwa. (Mt. 26:57, 59; Mil. 6:8-12) Ciindi nobakali kuleta bakamboni bakubeja, bakabona cintu cimwi icakabagambya kujatikizya Sitefano, busyu bwakwe bwakali “mbuli busyu bwamungelo.”—Mil. 6:13-15.

Ncinzi cakapa kuti Sitefano atayoowi ciindi naakali mubukkale oobu? Katanaletwa mu Nkuta Mpati Yaba Juda, Sitefano wakajisi bubi amulimo wakwe wabukutausi keendelezyegwa amuuya wa Leza. (Mil. 6:3-7) Ciindi naakali kubetekwa, nguwenya muuya ooyu wakali kubeleka mulinguwe, kauli sikumuumbulizya asikumwiibalusya. (Joh. 14:16, bupanduluzi buyungizyidwe) Naakali kwaamba makani aakuliiminina aalembedwe mulugwalo lwa Milimo caandaano 7, muuya uusalala wakamwiibalusya zibalo zili 20 naa kwiinda aawo zyamu Magwalo aa Chihebrayo. (Joh. 14:26) Kunze lyaboobo, lusyomo lwa Sitefano lwakayuma kapati ciindi naakabona cilengaano ca Jesu kaimvwi kujanza lya Leza lyalulyo.—Mil. 7:54-56, 59, 60.

Andiswe buzuba bumwi inga twaakulijana mubukkale bwakukongwa alimwi akupenzyegwa. (Joh. 15:20) Kubala Jwi lya Leza cakusitikila akusungwaala mumulimo wakukambauka ciyoopa kuti muuya wa Jehova kaubeleka mulindiswe. Kuyungizya waawo, tuyoojana nguzu zyakuliyumya ciindi notukazyigwa katujisi luumuno lwamumizeezo.—1Pet. 4:12-14.