MBOTUKONZYA KUMANA PENZI LYAKUSULAIKANA

3 | Amulugwisye Lusulo Mumizeezo Yanu

Njiisyo Yamu Bbaibbele:

“Amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—BAROMA 12:2.

Ncocaamba:

Mbotuyeeya ncintu ciyandika kapati kuli Leza. (Jeremiya 17:10) Nokuba kuti tweelede kweeleba kwaamba naa kucita zintu izikonzya kutondezya muuya walusulo, kuli azimbi zinji nzyotweelede kucita. Penzi eeli lyakusulaika bamwi litalikila mumizeezo alimwi amumoyo. Aboobo tweelede kufwambaana kuleka kuyeeya zintu zili zyoonse izikonzya kutupa kuba alusulo. Ikuti naa twacita oobo, ndendilyo notukonzya ‘kusandulwa’ ncobeni akumana penzi lyakusulaika bamwi.

Ncomukonzya Kucita:

Amulilingule kutegwa mubone mbomuyeeya alimwi ambomulimvwa kujatikizya bamwi, kwaambisya aabo bamusyobo umbi naa ibazwa kucisi cimbi. Amulibuzye kuti: ‘Ino ndibabona buti? Sena mbondibabona ciyeeme abwini mbondibazyi? Naa ciyeeme alusalululo?’ Amutantamuke kweebelela naa kubala zintu a Intaneti zisumpula kusulaikana alimwi akulwana.

Jwi lya Leza lilakonzya kutugwasya kugwisya lusulo luli mumizeezo alimwi amumyoyo yesu

Talili lyoonse nocili cuuba-uba kuzyiba bwini mbotuyeeya alimwi ambotulimvwa. Pele Jwi lya Leza lilakonzya kutugwasya “kuzyiba mizeezo amakanze aamumoyo.” (Bahebrayo 4:12) Aboobo, amuzumanane kulibala cakusitikila Bbaibbele. Amweezyanisye zintu nzyoliyiisya amizeezo yanu, alimwi akusolekesya kusikila mpomugolela kuyeeya munzila iimukkomanisya Leza. Jwi lya Leza lilakonzya kutugwasya kugwisya lusulo ‘luyumu nta’ luli mumizeezo alimwi amumyoyo yesu.—2 Bakorinto 10:4, 5.

Cakuluula Icakacitika Ncobeni—BA STEPHEN

Bakacinca Mbobakali Kuyeeya

Ba Stephen alimwi amukwasyi wabo bakapenga kapati akaambo kakusulaikwa abamakuwa. Akaambo kaceeci, bakayungwa akusangana kabunga kamapolitikisi ikakali kulwanina lwaanguluko lwabantu. Mukuya kwaciindi, bakatalika kutola lubazu mumicito yabugwebenga. Ba Stephen bakaamba kuti: “Zimwi ziindi mebo abeenzuma twakali kweebelela mafilimu aakali kutondezya mbobakali kupenga bana Africa ibakali kutolwa mubuzike ku United States. Eeci cakatunyemya kapati akaambo kalunya oolo, aboobo twakatalika kubauma bakubusi bakuwa mumonya oomo motwakali kweebeleda filimu. Kumane twakaunka mumaanda aakali afwaafwi aabakuwa, kutegwa tukabaume abalo.”

Ba Stephen bakacinca mbobakali kuzibona zintu ciindi nobakatalika kwiiya Bbaibbele a Bakamboni ba Jehova. Bakaamba kuti: “Akaambo kakuti ndakalizyibide kubona bantu mbobakali kusalana mubala, ncondakabona akati ka Bakamboni cakandigambya. Mucikozyanyo, Kamboni umwi mukuwa naakaunka kucisi cimbi, wakasiya bana bakwe kuti balanganizyigwe amukwasyi wabantu basiya. Kuyungizya waawo, mukwasyi wabakuwa wakazumizya mukubusi uusiya kuti kakkala ambabo nkaambo wakabulide kwakukkala.” Ba Stephen bakasinizya kuti Bakamboni ba Jehova bali mbuli mukwasyi uujisi luyando, lwalo Jesu ndwaakaamba kuti luyoolibonya akati ka Banakristo bakasimpe.—Johane 13:35.

Ino ncinzi cakagwasya ba Stephen kuleka kusulaika bamwi alimwi ankondo? Ndugwalo lwa Baroma 12:2. Bakaamba kuti: “Ndakatalika kubona kuti ndakeelede kucinca mbondakali kuyeeya. Ndakeelede kucinca mizeezo yangu kutegwa nditagoleli buyo akupona muluumuno, pele alimwi akubona kuti oobu mbobuumi buli kabotu.” Lino ba Stephen bakkwanya myaka yiinda ku 40 kuzwa ciindi nobakaleka kusulaika bamwi.