MBOTUKONZYA KUMANA PENZI LYAKUSULAIKANA

2 | Mutapilusyi Cibi Kucibi

Njiisyo Yamu Bbaibbele:

“Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse. . . . Mutapilusizyi muntu cibi, . . . nkaambo kulembedwe kuti: “‘Ndime ndisubula; ndime nendiyoopilusya cibi,” mbwaamba Jehova.’”—BAROMA 12:17-19.

Ncocaamba:

Nokuba kuti ncizyalwa buya kukalala ciindi bantu nobatulubizyila, Leza tatuzumizyi kupilusya cibi kucibi. Muciindi caboobo, utukulwaizya kuti tweelede kulindila cakukkazika moyo nkaambo ino-ino uyoozibambulula zintu zyoonse zilubide.—Intembauzyo 37:7, 10.

Ncomukonzya Kucita:

Ciindi bantu batalondokede nobapilusya cibi kucibi, bapa kuti penzi lyakusulaikana liindile buya. Aboobo, kuti naa muntu umwi wamunyemya naa kumucisa, mutapilusyi cibi kucibi. Amusole kulijata akucita zintu munzila iili kabotu. Mubukkale bumwi, inga cabota kutaabikkila buyo maano makani aayo. (Tusimpi 19:11) Pele zimwi ziindi, inga cabota kwaambila bamwi icakacitika. Mucikozyanyo, ikuti kamuli ndinywe mwakacitilwa mulandu, inga mwasala kwaambila basilikani naa beendelezi bamwi bamfwulumende kujatikizya mulandu ooyo.

Kuyanda kupilusya cibi kucibi, nkuliletela buyo mapenzi

Ino mbuti kuti kakulibonya kuti kunyina nzila yakumana penzi eelyo caluumuno? Naa mbuti kuti mwakacita kale zyoonse nzyomukonzya kutegwa mumane penzi eelyo caluumuno? Mutasoli kupilusya cibi kucibi. Nkaambo eeco inga capa kuti penzi liindile buya. Pele kuti tiimwapilusya cibi kucibi, inga capa kuti penzi lyakusulaikana limane. Mulakonzya kusyoma Leza kuti uyoobweza ntaamu akwaamana mapenzi. Bbaibbele lyaamba kuti: “Komusyoma, eelyo walo ulakugwasya.”—Intembauzyo 37:3-5.

Cakuluula Icakacitika Ncobeni—BA ADRIÁN

Ndakazunda Penzi Lyakuyanda Kupilusya Cibi Kucibi

Kabacili bakubusi, ba Adrián bakaba basikulwana mumigwagwa kutegwa bapilusye cibi kucibi. Bakaamba kuti: “Kanji-kanji, ndakali kujatikizyigwa mukulwana kubelesya ntobolo, alimwi ziindi zinji ndakali kujanika ndibbide mubulowa kumwi kandifwumba bulamfwu munzila.”

Ba Adrián bakatalika kwiiya Bbaibbele nobakajisi myaka iili 16. Bakaamba kuti: “Mbondakali kuyaabuzumanana kwiiya Bbaibbele, ndakabona kuti ndeelede kucinca bukkale bwangu.” Bakali kuyandika kuleka lusulo akucileka nkondo. Bakagwasyigwa kapati anzyobakaiya kulugwalo lwa Baroma 12:17-19 kujatikizya kutapilusya cibi kucibi. Bakaamba kuti: “Ndakazyiba kuti Jehova uyookumana kutalulama munzila njayanda alimwi aaciindi cakwe. Asyoonto-syoonto, ndakabuleka bukkale bwangu bwakuyandisya kulwana.”

Bumwi buzuba kumangolezya, ba Adrián bakaumwa akabunga kazigwebenga nkobakali kulwana limwi kaindi. Musololi wabo wakaamba kuti: “Kolivwuna we!” Ba Adrián bakaamba kuti: “Moyo wakali kupya kapati kuti ndibalwane andime.” Pele muciindi cakupilusya cibi kucibi, bakapaila kuli Jehova akuzwa abusena aawo.

Ba Adrián bakazumanana kwaamba kuti: “Buzuba bwakatobela twakaswaangana amusololi wakabunga aaka kazigwebenga kali alikke. Ndakanyema kapati akuyanda kumulwana, pele alimwi ndakamulomba Jehova kuti andigwasye kulijata. Cakandigambya ncakuti, mukubusi ooyu wakaboola kulindime akwaamba kuti: ‘Amundilekelele kujatikizya cakacitika jilo masiku. Masimpe ngakuti, ndiyanda kuba mbuli ndinywe. Ndiyanda kwiiya Bbaibbele.’ Eelo kaka ndakakkomana akaambo kakuti ndakacikonzya kulijata! Aboobo, twakatalika kwiiya Bbaibbele anguwe.”