Ja Jyoba wa xyayi kulan skʼujol ja matik wane yijel wokoli. ¿Jas oj skoltayotik bʼa snajel syajal sok yajel kulan skʼujol ja tuk, jastalni ja Jyoba? Jani yajel ajyuk ja modoʼalik ke ti chʼikansok ja yajel kulan kʼujolal. La kiltik jujuntik ja bʼa jaw. ¿Jas oj skoltayotik bʼa mi oj katikan syajtajel jbʼajtik sok yajel kulan jkʼujoltik? (1 Tes. 4:18). Jani yajel ajyuk ja modoʼalik jastal yabʼjel stojol, yajxta yiljel jbʼajtik sok ja lekil kʼujolal (Col. 3:12; 1 Pedro 3:8). Yajni ja snajel syajal sok ja bʼa tuk modoʼalik bʼa ojtik slaj ke wa xkʼot ajyukujtik, wani snikawotik yajel kulan skʼujol ja matik wan ekʼel sbʼaje wokoli. Ja Jesús xcholo jastal it: «Ja jas bʼutʼel ay ja bʼa kʼujolali jani wa x-el ja bʼa tiʼali. Jun lekil kristyano wa xya eluk jastik lek ja bʼa jastik lek snoluneji» (Mat. 12:​34, 35). Wani xchiknaji lek ke ja yajel kulan skʼujol ja kermanotik juni modoʼal tʼilan ja bʼa sjejel yajtanel. w23.11 10 par. 10, 11

Bʼa oj kabʼtik stojol ja jastik yalunejxakan ja Biblia, tʼilani oj kʼan jkoltajeltik. La jpensaraʼuktik ja sjejel it. Pensaran wana yulatajel jun chonabʼ bʼa mi bʼa wajelaʼa, pe teyasok juna wamigo bʼa wa snaʼa sbʼaj lek ja lugar jaw. Jawa wamigo wani snaʼa bʼa mero ayexa sok bʼa wa x-ikʼwani och kada calle. ¡Jelni lek yuja smojtaya jawa wamigo! Cha jachni junxta, ja Jyoba wani snaʼa jas styempoʼil wala taxtik sok ja jas ojto ekʼuk. Ja yuj, bʼa oj kabʼtik stojol ja jastik yalunejxakan ja Biblia, tʼilani chʼin oj ka jbʼajtik bʼa skʼanjelyi a-skoltayotik (Dan. 2:28; 2 Ped. 1:​19, 20). Jastalni jun lekil tatal, ja Jyoba wani skʼana ke ja yuntikil gusto oj ajyuke ja bʼa tyempo jakum (Jer. 29:11). Pe ja stukil ja Jyoba soka nantatalik, ja yeʼn wani xbʼobʼ yal tsʼikan lek ja jas ojto ekʼuk ja bʼa tyempo jakum. Skʼanani atsʼijbʼajukan ja bʼa Yabʼal ja jas ojto ekʼuk bʼa jachuk oj bʼobʼ jnatik bʼajtanxa lek ja jastik tʼilan oj ekʼuk (Is. 46:10). w23.08 8 par. 3, 4

Ja Dyos yaʼunejyi ipal ja Jesús bʼa oj xchʼak spetsanil ja wokolik. Ay wokolik ke mi xbʼobʼ jtojbʼestik. Pe ja Jesús, soka milagroʼik skʼulan, sjeʼa ke ojni bʼobʼ xchʼake. Jun sjejel, ayni yiʼoj ja ipal bʼa oj xchʼay man yechalil ja wokoliki: ja mulal ke akʼubʼal ekankitik sok ja jas wa xyiʼajani, jastal ja chamelik sok ja chamelal (Mat. 9:​1-6; Rom. 5:​12, 18, 19). Ja smilagroʼik wa xchiktes ke ojni stojbʼes «chikan jas chamel» sok asta oj ya sakʼwuk ja matik chamele (Mat. 4:23; Juan 11:​43, 44). Cha ayiʼoj ja ipal bʼa yajel lamxuk ja tsatsal ikʼ jaʼ sok skʼulajel ganar ja pukujik jel malo (Mar. 4:​37-39; Luc. 8:2). ¿Anke wani xyaʼa kulan jkʼujoltik snajel ke ja Jyoba yaʼunejyi ipal ja Yunini? Wani xbʼobʼ ajyukotik lek seguro ke ja slekilalik oj yijan ja sGobyerno ja Dyos ojni kʼot smeranil. Ja milagroʼik skʼulan ja Jesús ja bʼa Luʼum wajni tʼusan sjejel ja bʼa jas oj skʼuluk bʼa spetsanil ja luʼum jastal Rey ja bʼa sGobyerno ja Dyos. w23.04 3, 4 par. 5-7