Capítulo 16
“Tlakg kalakgalhinitit xaxlikana tapaxkit”
1. ¿Tuku kaks kamalakawani tiku kajku xlimakgtum ankgoy kxtamakxtumitkan xtatayananin Jehová?
WANTIKU kajku xlimakgtum an kxtamakxtumitkan xtatayananin Jehová kaks lilakawankgoy akxni akxilhkgoy tapaxkit nema lakgalhinikgoy. Uma tapaxkit akxilhkgoy xlakata liwana kamakgamakglhtinankan chu xlakata lapaxkikgoy wantiku wilakgolh ktamakxtumit. Wantiku ankgoy klaklanka tamakxtumit na wa uma tapaxkit nema akxilhkgoy. Maktum periódico lichuwinalh xlakata uma tamakxtumit: “Niti xlimaklakaskinit droga, na niti xkgachi. Niti pixtlanka xchuwinan, na niti xlatantlakglin. Niti xwan pi wi tuku nitlan kaʼakgspulalh achatum, niti lixkajni xkgalhkgamanan, na niti lixkajni xkgalhchuwinan. Niti kxkuli, niti xkgalhanan, na niti katuwa xmakgan kkatutsu. Ni anan tuku xtachuna uma”. Uma tuku lichuwinaw wa xlakata xlakan lapaxkikgoy, uma tapaxkit «ni lixkajni xtayat ni wa putsay kaj wantuku xtlan» (1 Corintios 13:4-8, NM).
2. 1) Chuna la natitaxtutilha kilhtamaku, ¿la xliwanat tapaxkit nema kgalhiyaw? 2) Chuna la tlawalh Cristo, ¿tukuya tapaxkit nakgalhiyaw?
2 Tapaxkit nema lakgalhinikgoy tlaway pi nalaʼakxlilhkgoy la linatalan chu wa uma nema talitalakgapaskgoy xaxlikana kstalaninanin Cristo (Juan 13:35). Chuna la nastaktilha kintakanajlakan, tlakg tlan nalimasiyayaw tapaxkit. Akxni apóstol Pablo tlawalh xʼoración skilh pi xnatalan «[x]tapaxkitkan, kax kataliwakalh» (Filipenses 1:9). Nachuna apóstol Juan, masiyalh pi wi tuku nalimakgxtakgaw xlakata nalimasiyayaw pi kapaxkiyaw amakgapitsi. Xla tsokgnalh: «Wa yuma lakgapasaw xtapaxkit, xampi [xKgawasa Dios] wa nkinkapalakamastan xlatamat. Na chuna nchu nkin nkilipalakamastatkan nkilatamatkan xpalakata natalanin» (1 Juan 3:16; Juan 15:12, 13). ¿Namastayaw kilatamatkan xlakata kinatalankan? Maski ni xlenkgalhin natalakaskin namastayaw kilatamatkan, ¿limakgxtakgaw tuku lu xlakaskinka xlakata nakamakgtayayaw kinatalankan la uku, maski tuwa namakgkatsiyaw?
3. 1) ¿La tlan tlakg napaxkinanaw? 2) ¿Tuku xlakata lu xlakaskinka tlakg nalakgalhiniyaw tapaxkit?
3 Maski wi tuku nalimakgxtakgaw tuku xlakaskinka xlakata xtlankan amakgapitsin, na talakaskin lu xlikana nakapaxkiyaw kinatalankan. Wa xTachuwin Dios kinkawaniyan: «Kalapaxkitit nchatunu amakgapitsin luwa xtachuna linatalanin nkalalikatsinitit» (Romanos 12:10). Kinputumkan wi tiku paxkiyaw. Pero, ¿tlan tlakg chalhuwa tiku nakapaxkiyaw? Xlakata uma xamakgan kakilhtamaku ay lakatsu wi xlisputni, lu xlakaskinka pi tlakg makxtum nakatatawilayaw kinatalankan. Biblia wan: «Wa xlikgatsputni xlipaks nkatuwaj, lakatsuwa wi [...]. Na tlakg xaliwaka, nkalakgalhinitit wa ntu xlikana ntapaxkit, xampi wa ntapaxkit, lakatsalay ntipalhuwa talakgalhin» (1 Pedro 4:7, 8).
Akxni tawila taʼakglhuwit
4. 1) ¿Tuku xlakata anta congregación tawila taʼakglhuwit? 2) ¿Tuku lu tlan nakitaxtuy komo natlawayaw tuku wan Biblia maski tuwa namakglhkatsiyaw?
4 Xlikana, xlakata akinin makglakgalhinanin, namin kilhtamaku akxni max nakawaniyaw tuku nitlan amakgapitsi, chu kinatalankan na max wi tuku nakinkatlawanikgoyan (1 Juan 1:8). ¿Tuku natlawayaw akxni chuna nalay? Biblia kinkawaniyan la natlawayaw pero lakgachunin nichuna katitlawaputuw xlakata akinin makglakgalhinanin (Romanos 7:21-23). Pero komo akinin naliskujaw xlakata natlawayaw tuku wan Biblia, nalimasiyayaw pi xlikana makgapaxuwaputunaw Jehová chu natlawa pi tlakg nakapaxkiyaw amakgapitsi.
5. Komo wi tiku nakinkatlawaniyan tuku nitlan, ¿tuku xlakata ni namakgaxokgoyaw?
5 Akxni chatum lataman wi tuku tlawanikan, lakgachunin putsay la namakgaxokgonan. Pero akxni chuna tlawakan tlakg staka takglhuwit. Komo talakaskin pi chatum lataman nalakgxokgo xlakata tuku tlawalh, wa Jehová kamakamaxkiw uma takglhuwit (Proverbios 24:29; Romanos 12:17-21). Amakgapitsi latamanin nialh xakgatlikgo wantiku katlawanilh tuku nitlan. Pero akinin nichuna nakatlawaniyaw kinatalankan, xlakata Jehová tlan namakgamakglhtinan kintakakninkan talakaskin nakapaxkiyaw kinatalankan (1 Juan 4:20). Wa xlakata Pablo tsokgnalh: «Kalapaxuwanalipinitit, chu na nalamatsankgenaniyatit nchatunu amakgapitsin lapi wi nti lamakgasitsiyatit; xtachuna lantla nkamatsankgananin [...] [Jehová, NM], nachuna wixin nkatlawatit» (Colosenses 3:13). ¿Tlan natlawaya chuna la wan uma tastakyaw?
6. 1) ¿La makglit nakatapatiyaw kinatalankan? 2) ¿Tuku ni napatsankgayaw nema nakinkamakgtayayan nakatapatiyaw kinatalankan akxni nakinkatlawanikgoyan tuku nitlan?
6 ¿Tuku natlawayaw komo wi tiku makglhuwa nakinkatlawaniyan tuku nitlan, pero uma tuku tlawalh ni talakaskin nalitamakxtukan kcongregación? Akxni apóstol Pedro wa pi akxni wi tiku nakinkatlawaniyan ni lu lanka talakgalhin tlan «asta makgtujun» namatsankgenaninan, Jesús kgalhtilh: «Ni kkwaniyan: asta mpala makgtujun, wampi: asta [tutumpuxamakutujun, NM]». Alistalh lichuwinalh pi tlakg lhuwa tuku nitlan tlawanitaw kxlakatin Dios nixawa tuku nakinkatlawaniyan chatum lataman (Mateo 18:21-35). Chali chali makglakgalhinanaw kxlakatin Jehová chu nipara katsiyaw akxni chuna tlawayaw: akxni tlawayaw tuku kaj akinin tlan nakinkakitaxtuniyan, xlakata tuku wanaw o tuku lakapastakaw, o akxni ni tlawayaw tuku kilitlawatkan (Romanos 3:23). Pero maski chuna, Jehová chuntiya kinkalakgalhamanan (Salmo 103:10-14; 130:3, 4). Wa xlakata, xla lakaskin pi nachuna kakalakgalhamaw amakgapitsi (Mateo 6:14, 15; Efesios 4:1-3). Komo chuna natlawayaw, nakgalhiyaw tapaxkit nema «ni lakapastaka wa ntu nitlan [tlawanika]» (1 Corintios 13:4, 5; 1 Pedro 3:8, 9).
7. ¿Tuku natlawayaw komo chatum kintalakan kinkasitsiniyan?
7 Lakgachunin akinin ni sitsiniyaw kintalakan, pero akxilhaw pi xla kinkasitsiniyan. Pulaktiy tuku tlan natlawayaw: “namalakatsaliyaw” tuku kinkatlawanin xlakata tapaxkit nema kgalhiyaw chuna la wan 1 Pedro 4:8, o natachuwinanaw xlakata nialh natawila taʼakglhuwit (Mateo 5:23, 24).
8. Komo chatum kintalakan natlaway tuku nitlan akxilhaw, ¿tuku tlan natlawayaw?
8 Nachuna max chatum tala wi tuku tlawama nema wix nitlan akxilha, chu makgapitsi latamanin na nitlan akxilhkgoy. ¿Tlan xwa xtachuwinanti? Max tlan. Komo wix liwana nawaniya xlakata tama taʼakglhuwit, max tlan nakitaxtuy. Pero pulana kakgalhskinka: «¿Lakatsalay tuku wan Biblia uma tuku tlawama, o chuna kliʼakxilha xlakata tuku akit klismaninit chu xlakata la kimakgastakkanit nixtachuna la tama tala?». Kuenta katlawa ni nakawaniya pi nitlan tuku tlawamakgolh amakgapitsi kaj xlakata wix lakpuwana pi nitlan tuku tlawama (Santiago 4:11, 12). Jehová ni laksakpaxkinan, putum latamanin kamakgamakgalhtinan maski tanu tanu tuku lismanikgonit chu ni kamalakapalima xlakata lakapala natatliwakglha xtakanajlakan.
9. 1) ¿Tiku lakkaxtlaway laklanka talakgalhin kcongregación? 2) ¿Tuku kilitlawatkan akxni nakinkatlawanikanan tuku nitlan chu tuku xlakata chuna natlawayaw?
9 Komo chatum xalak congregación natlaway akgtum lanka talakgalhin —kaliʼakxilhwi—, talakgxtumit xalimaxana, tunkun xlitalakkaxtlawat uma taʼakglhuwit. ¿Tiku nalakkaxtlaway? Lakgkgolotsin (Santiago 5:14, 15). Pero komo nitlan tuku natlawanikan chatum lataman max xlakata akgtum negocio o kaj nitlan nalichuwinankan, wantiku tlawanika tuku nitlan, pulana xakstu natachuwinan wantiku tlawanilh tuku nitlan (Mateo 18:15). Komo ni nalakkaxla taʼakglhuwit, xlitlawat chuna la wan Mateo 18:16, 17. Xlakata paxkiyaw tiku kinkatlawanin tuku nitlan chu tlan talalinputunparayaw uma nakinkamatlawiyan pi wantu nawaniyaw nalakgchan xnaku (Proverbios 16:23).
10. Akxni natawila akgtum taʼakglhuwit, ¿tuku nakinkamakgtayayan naʼakxilhaw chuna la xlilat?
10 Akxni natawila taʼakglhuwit, maski lanka o ni lanka taʼakglhuwit, kaliskujwi xlakata naʼakxilhaw chuna la akxilha Jehová. Xla ni akxilhputun talakgalhin, chu akxni xlilat xla katamakxtuy kxkachikin wantiku tlawakgoy laklanka talakgalhin chu ni makgxtakgkgoy tuku nitlan tlawamakgolh. Pero, ni kapatsankgaw pi kinputumkan min kilhtamaku tlawayaw tuku ni xlilat chu akxni chuna tlawayaw lakaskinaw pi Dios kakinkamakgakgalhin chu kakinkalakgalhaman. Jehová kinkawiliniyan liʼakxilhtit nema tlan natlawayaw akxni wi tiku nakinkatlawaniyan tuku nitlan. Komo xalakgalhamananin akinin, nalimasiyayaw xtapaxkit Dios (Efesios 5:1, 2).
Kaputsaw la nakapaxkiyaw tlakg lhuwa latamanin
11. ¿Tuku xlakata Pablo kawanilh xalak Corinto pi tlakg lhuwa tiku xkapaxkikgolh?
11 Pablo akglhuwa papaʼ xlimaxtunit xlakata xkamatliwakglhma congregación xalak Corinto nema xtapakgsiy kGrecia. Lu lhuwa xliskujnit xlakata xkamakgtayama natalan xalak tama kachikin, chu xkapaxkiy. Pero makgapitsi natalan ni xpaxkikgoy Pablo chu lu nitlan xlichuwinankgoy, wa xlakata kamakgpuwantinilh pi tlakg lhuwa tiku xkapaxkikgolh (2 Corintios 6:11-13; 12:15). Kinputumkan kiliʼakxilhatkan la xlilhuwa kapaxkiyaw amakgapitsi chu naputsayaw la natlawayaw xlakata tlakg nakapaxkiyaw (1 Juan 3:14).
12. ¿La natlawayaw xlakata tlakg nakapaxkiyaw putum xalak congregación?
12 ¿Tuwa makgkatsiyaw liwana nakatalalinaw makgapitsi natalan xalak congregación? Ni lu kuenta natlawayaw xlakata tanu tanu la lakapastakkgoy —chuna la lakaskinaw pi ni kuenta kakinkatlawanikan chuna la tanu lakapastakaw—, chu akxni chuna natlawayaw max tlakg tlan nakatalalinaw. Nachuna, komo wa naʼakxilhaw tuku tlan tlawakgoy, tlakg tlan la nakaʼakxilhaw, chu chuna tlakg nakapaxkiyaw (Lucas 6:32, 33, 36).
13. ¿La tlan tlakg chalhuwa nakapaxkiyaw natalan xalak congregación?
13 Kakatsiw pi nila putum tlan nakamakgtayayaw kinatalankan. Max nila nakamakgachipakgoyaw putum natalan kʼakgatunu tamakxtumit o akxni natlawayaw liwat kkinchikkan nila putum nakatawayanaw. Pero, ¿tlan nalimasiyayaw pi tlakg chalhuwa kapaxkiputunaw xlakata nalimaxtuyaw maski kaj tsinu kilhtamaku xlakata liwana nalakgapasaw chatum xalak congregación? ¿Lakapastaknitaw nawaniyaw chatum kintalakan wantiku ni liwana lakgapasaw nakinkataʼanan akxni naʼanaw lichuwinanaw Dios?
14. Akxni lakatsu kinkatawilakgon natalan tiku ni kalakgapasaw, ¿la tlan nakalimasiyaniyaw pi lu kapaxkiyaw?
14 Laklanka tamakxtumit kinkamakgtayayan xlakata tlakg lhuwa tiku nakapaxkiyaw. Xlakata max akglhuwa mil wilakgolh, maski nila putum nakalakgapaskgoyaw tiku wilakgolh ktamakxtumit, tlan natlawayaw nema nalimasiyayaw pi lakaskinaw tuku xtlankan amakgapitsi nixawa tuku akinin tlan nalimakgkatsiyaw. Na nalimasiyaw pi kalakgapasputunaw komo tastunut nakatakgalhchuwinanaw wantiku lakatsu wilakgolh. Namin kilhtamaku, akxni putum tiku lamakgolh kkatiyatni linatalan nawanaw chu makxtum nakakninaniyaw kajwatiya Dios xaxlikana tiku kinTlatkan. ¡Lu lipaxuw nawan nalalakgapasaw! Xlakata lu paxkinanaw natlaway pi nalalakgapasputunaw. ¡Kamatsukiw chuna natlawayaw la uku!
Wantuku talichuwinalh
• Akxni kstalaninanin Cristo kgalhikgoy taʼakglhuwit, ¿la xlitalakkaxtlawat chu tuku xlakata?
• Chuna la nastaktilha kintakanajlakan, ¿la nachuna xlistakat tapaxkit nema kgalhiyaw?
• ¿Tuku natlawayaw xlakata nikajwatiya kiʼamigoskan lu nakapaxkiyaw?
[Dibujo xla página 148]
Tapaxkit nema kgalhi kstalanina Cristo pulaklhuwa la litasiyay, pulaktum la litasiyay chuna la latalalin ktamakxtumit