Jehová tachuwinan Samuel

Xapuxku sacerdote Elí xkgalhi chatiy lakgkgawasan: Hofní chu Finehás. Xlakan sacerdotes xwankgonit chu kskujkgo ktabernáculo. Pero ni xkgalhakgaxmatkgo xlimapakgsin Jehová chu lu nitlan xkalikatsinikgo latamanin. Akxni israelitas xlilakgatayakgo xtamakamastankan Jehová, Hofní chu Finehás xtatamakgxtakgkgo tlakg xatlan liway. Elí xkatsi pi xkamanan nitlan tuku xtlawamakgo, pero nitu xtlawa xlakata nakaʼakgastakyawa. ¿Lakpuwana pi Jehová wi tuku xʼama tlawa?

Maski Samuel tlakg aktsujku xwanit nixawa Hofní chu Finehás, ni xtlawa tuku nitlan la xlakan. Wa xlakata Samuel lu xmakgapaxuwa Jehová. Akgtum katsisni, akxni Samuel klhtatama kgaxmatli pi wi tiku xtasanima. Takilh chu lakapala alh niku xwi Elí chu wanilh: “Ukwi”. Pero Elí wanilh: “Ni ktasanin, kalhtatapara”. Samuel tamapa. Xlimakgtiy chuna lapa. Akxni Samuel xlimakgtutu kgaxmatli, Elí katsilh pi Jehová xtasanima Samuel. Elí wanilh pi komo xkgaxmatpa tachuwin xkgalhtinalh: “Kakiwani, Jehová, miskujni kgaxmatma”.

Samuel tamapa chu kgaxmatpa tachuwin: “Samuel, Samuel”. Xla wa: “Kakiwani, Jehová, miskujni kgaxmatma”. Jehová wanilh: “Kawani Elí pi nakkamalakgaxokge xla chu xfamilia. Xla katsi pi xkamanan tlawamakgo tuku nitlan kkintabernáculo pero ni kaʼakgastakyawa”. Lichali tsisa, Samuel malakkilh malakcha xla tabernáculo la xtlawa chali chali. Xpekuan nawani xapuxku sacerdote xtamakatsin Jehová. Pero Elí tasanilh chu kgalhskilh: “Kinkgawasa, ¿tuku wanin Jehová?”. Chu Samuel putum wanilh.

Samuel stakli chu Jehová chuntiya xʼamigo litaxtulh. Israelitas xalak kaniwa kachikin xkatsikgo pi Jehová xlaksaknit Samuel xlakata palakachuwina chu juez nawan.