Abril

¿Tuku natlawayaw xlakata nalitamakgtayayaw xtaskujutkan lakgkgolotsin? Kamakglhkatiw xtakanajlakan, xatlan xliʼakxilhtitkan chu kakgalhakgaxmatwi tastakyaw xalak Biblia nema kinkamaxkikgoyan (Heb. 13:7, 17). Kalakapastakwi pi lakgkgolotsin kinkapaxkikgoyan chu lakaskinkgo pi tlan katalaliw Jehová. Akgtum li’akxilhtit, komo akxilhkgo pi nialh lu anaw ktamakxtumit o taxlajwanimaw, lakapala nakinkamakgtayakgoyan. Liwana nakinkakgaxmatnikgoyan, nakinkamakgpuwantinikgoyan chu nakinkamaxkikgoyan lakwan tastakyaw nema takilhtinit kBiblia. ¿Kaliʼakxilha wix lakgkgolotsin la tuku Jehová limaklakaskin xlakata nakinkalimasiyaniyan tapaxkit? Min kilhtamaku lakgkgolotsin tuwa makgkatsikgo akxni kinkamaxkikgoyan tastakyaw. Wa xlakata, ¿tuku natlawaya wix xlakata lakgkgolotsin ni tuwa namakgkatsikgo xtaskujutkan? Kataktuju, kakgaxpatti tuku nawanikgoyan chu kakapaxtikatsini. Tamakgtay nema maxkikgoyan limasiya pi Dios paxkiyan. Chuna wix nalitamakgtayaya chu lakgkgolotsin nalipaxuwakgo taskujut nema tlawakgo. w18.03 31:15, 16

Xlikana kamanan ni lakxtum. Makgapitsi lakapala katsinikgo xlakata tamunut pero makgapitsi nichuna. Makgapitsi lu laktsujku akxni tlantiya liwana lakapastaknankgo chu wankgo pi tamunuputunkgo. Pero makgapitsi tsinu makgapalakgo xlakata tlan natamunukgo. Natlatni tiku akgatekgskgo uma, ni kamalakapalikgo xkamanankan xlakata natamunukgo wata lakatsuku kamakgtayakgo xlakata tlakg nastaka xtakanajlakan. Natlatni lipaxuwakgo akxni akxilhkgo pi xkamanankan xlakaskinka akxilhkgo tuku lichuwinan texto xala uku. Xlikana, natlatni ankgalhin nalilakpuwankgo pi xkamanankan tlan kstalaninanin Cristo nalitaxtukgo. Xlakata uma tuku lichuwinaw, natlatni tlan nakakgalhskinkan: «¿Kgalhi kinkgawasa xaʼakchan takatsin xlakata tlan natamakamastani Dios chu natamunu?». w18.03 9:6

Wa xlakata, komo nakinkawanikanan pi naʼanaw kxchik chatum tala chu nakgalhtinanaw pi tlan, ni nawanaw alistalh pi ni naʼanaw kaj xlakata natlawayaw tuku ni lu xlakaskinka. Komo chuna natlawayaw, tala tiku kinkawanin nitu katilitaxtulh talakkaxlan nema tlawalh (Mat. 5:37). Wi tiku wankgo pi naʼankgo, pero alistalh wankgo pi ni katiʼankgolh kaj xlakata naʼankgo alakatanu niku tlakg tlan akxilhkgo. ¿Nixlikana pi uma ni limasiya tapaxkit chu ni mastayaw kakni? Tuku natlawayaw wa namakgamakglhtinanaw tuku natalan xatapaxuwan kinkamaxkiputunkgoyan (Luc. 10:7). Chu, komo xlikana nila naʼanaw tlan tunkun namakatsiniyaw tala tiku kinkawanin pi naʼanaw kxchik. Chuna namastayaw kakni chu nalimasiyayaw tapaxkit. Nachuna xlakaskinka namaxkiyaw kakni talismanin nema anan kʼakgatunu chiki. Kmakgapitsi familias, ni anan taʼakglhuwit komo wi tiku kaj akglakgwa nachan kʼakgtum chiki chu ni namakatsininan, pero alakatanu talakaskin pulana namakatsininanaw. Makgapitsi lismanikgonit pi ni tunkun lakaskinkgo akxni kawanikan pi naʼankgo kxchik chatum tala pero alakatanu uma nitlan akxilhkan. Wa xlakata, maski tanu tanu talismanin nema anan, akinin kaliskujwi xlakata natlawayaw tuku tlan nema namakgapaxuwa tiku kinkawanin pi kaʼaw kxchik. w18.03 18:20, 21

Kalakapastakwi pi ni kajwatiya talakaskin nakgalhiyaw takatsin xalak Biblia xlakata tliwakga nakgalhiyaw kintakanajlakan (1 Rey. 4:29, 30; 11:4-6). Wata talakaskin ankgalhin namatliwakglhaw kintakanajlakan (Col. 2:6, 7). Wa xlakata lu xlakaskinka nalikgalhtawakgayaw libro «Katamakgxtakgtit kxtapaxkit Dios». Akxni chuna natlawayaw nakinkamakgtayayan nakatsiyaw la nalilatamayaw tastakyaw xalak Biblia. Komo masputunitawa, kalikgalhtawakgaw amakgapitsi likgalhtawakga nema nakinkamakgtayayan chuntiya tliwakga nakgalhiyaw kintakanajlakan (Col. 1:23). Nachuna, talakaskin natlawayaw oración chu nalilakpuwanaw la nalilatamayaw tuku katsiniyaw. Tuku talakaskin natlawayaw akxni nalilakpuwanaw tuku likgalhtawakgayaw wa namakgapaxuwayaw chu nakgalhakgaxmataw Jehová (Sal. 40:8; 119:97). Nachuna nakatsiyaw la nalakgmakganaw tuku tlawa pi nila natatliwakglha kintakanajlakan (Tito 2:11, 12). w18.02 24, 25:7-9

Kakgalhiw akgtum takanajla la xla Noé. Tuku talakaskin wa ankgalhin nalikgalhtawakgayaw Biblia, lanka xtapalh naʼakxilhaw tuku katsiniyaw, namastayaw talakaskin pi nalakgpali kilatamatkan chu kakinkapulalin akxni wi tuku nalaksakaw (1 Ped. 1:13-15). Komo chuna natlawayaw, takanajla chu liskgalala nakinkamakgtayayan akxni Satanás wi tuku nakinkaliʼakgskgawiputunan chu uma xalixkajni kakilhtamaku (2 Cor. 2:11). Xlitliwakga uma kakilhtamaku tlawa pi latamanin napaxkikgo latalatlawat, talakgxtumit xalimaxana chu tlawa pi kajwatiya nalilakgaputsakgo tuku nixatlan (1 Juan 2:15, 16). Max natlawa pi tiku ni tliwakga wi xtakanajlakan ni kuenta natlawakgo pi xkilhtamaku Jehová tlakg lakatsuwa wi. Kalilakpuwaw akxni Jesús tamalakxtumilh kxkilhtamaku Noé chuna la uku, ni kajwatiya lichuwinalh latalatlat chu talakgxtumit xalimaxana, wata na lichuwinalh pi tlan xlaktlawalh kintakanajlakan (Mat. 24:36-39). Kakinkakgalhskinkan: «¿Klimasiya kkilatamat pi xlikana klakgapasa Jehová? ¿Kimakgpuwantini kintakanajla pi ni kajwatiya nakkgalhakgaxmata xlimapakgsin Jehová, wata nachuna nakkamasiyani amakgapitsin?». Mintakgalhtin nalimasiya komo wix nachuna ni makgxtakga xaxlikana Dios (Gén. 6:9). w18.02 9, 10:8-10

Xlikana, nila xliputum katamakgatliniyaw latamanin, xlakata max kataskujaw, kataʼanaw kʼescuela, o akxtum katawilaw. Pero tuku tlan tamakgatliniyaw wa la lakpuwankgo chu la likatsikgo. ¿La natlawayaw? Talakaskin pi namatliwakglhaw la talalinaw Jehová akxni likgalhtawakgayaw Biblia chu akxni kalaksakaw kiʼamigoskan tiku xlikana skujnaniputunkgo. Talakaskin naliskujaw xlakata nakamakgtayayaw latamanin xlakata xtakanajlakan. Kaputsaw la nakalitachuwinanaw Dios latamanin chu kaskiniw Jehová pi kakinkamakgtayan xlakata nawanaw tuku xaxlikana akxni chuna natalakaskin. Kakawaniw latamanin pi akinin xtatayananin Jehová. Chuna, xatlan kintayatkan namalanki Dios chu ni akinin. Katsininitaw «mpi [...] namakgaxtakgaw wa ntu ni maxkiy nkakni Dios, chu wa ntu xtatlawaputu ntu xala katuxawat, wa ntu ntlan talakapastakna nkalilatamaw yunu nkatuxawat» (Tito 2:11-14). Komo nachuna natlawayaw la Jehová chu nakgalhakgaxmataw, latamanin nakinkaʼakxilhkgoyan chu max nawankgo «nakkataʼanan, xlakata kkgaxmatnitaw pi Dios katalaman» (Zac. 8:23). w18.01 31:17, 18

¿Wamputun uma pi nitlan kiʼakstukan nakinkapaxkikanan? Ni. Xlakaskinka pi akinin nakinkapaxkikanan xlakata nitu nalaniyaw. Chuna kinkatlawan Jehová. Jesús lichuwinalh: «Kalakgalhamanti amakgapitsin mintatamalakatsukun lantla wix akstu lakgalhamankana» (Mar. 12:31). Komo ni nakinkapaxkikanan kiʼakstukan nila katikapaxkiw amakgapitsin. Nachuna Biblia lichuwinan: «Nachuna lakchixkuwin xlipaxkitkan xlakpuskatinkan chuna la paxkikgo xmaknikan. Tiku paxki xpuskat, x’akstu paxkikan, xlakata niti sitsini xmakni, wata mawi chu kuentajtlawa» (Efes. 5:28, 29). Wa xlakata xlakaskinka pi nakinkapaxkikanan. Pero komo nakgalhiyaw tapaxkit nema lichuwinankan anta ktexto xla 2 Timoteo 3:2 uma tapaxkit nixatlan chu tlawa pi akstu napaxkikana. Tiku malakatsali la x’akstu paxkikan lhuwa tuku kgalhiputun nema ni xlakaskinka (Rom. 12:3). Tuku tlakg lilakgaputsakgo kxlatamatkan wa tuku kaj xʼakstu xpalakatakan. Chu ni kuenta tlawakgo xpalakatakan amakgapitsin. Akxni nitlan tuku kakitaxtuni wa kalimawakakgo amakgapitsin, wata ni lakpuwankgo pi na linkgo kuenta. w18.01 23:4, 5

Akxilhnitawa pi kgaxmatniyaw Jehová akxni likgalhtawakgayaw Biblia. Pero, komo tachuwinamputunaw talakaskin natlawaniyaw oración. Kstalaninanin Cristo ni kiliʼakxilhatkan oración la akgtum talismanin o kaj xlakata lakaskinaw pi tlan nakinkakitaxtuniyan. Oración wa tuku tlan nalimaklakaskinaw xlakata natachuwinanaw Malakatsukina. Chu Jehová kgaxmatniputunan (Filip. 4:6). Akxni wi tuku lilakgaputsapat, kalakapastakti pi Biblia maxkiyan uma tastakyaw: «Kamakamaxki Jehová mintakuka» (Sal. 55:22, SXP). ¿Xlikana kanajlaya pi uma namakgtayayan? Lhuwa natalan tlan nawanikgoyan pi uma lu kamakgtayanit. Chu wix na namakgtayayan. Talakaskin ankgalhin natlawaniyaw oración Jehová, ni kajwatiya akxni lakaskinaw pi kakinkamakgtayan. Max namin kilhtamaku lu nalilakgaputsayaw kintaʼakglhuwitkan chu nialh katilakapastakwi tasikulunalin nema makglhtinanitaw. ¿Tuku xlakata ni lakkaxwiliya chu lilakpuwana chali chali pulaktutu nema tlan nalipaxtikatsiniya Jehová? w17.12 25, 26:10, 11

Akgatunu kata lhuwa tiku likgalhtawakgakgo Biblia, tamakamastanikgo Jehová chu tamunukgo. Lhuwa tiku chuna tlawakgo wa kamanan tiku kamakgastakkan kfamilia niku kstalaninanin Cristo litaxtukan chu laksakkgonit tlan latamat nalinkgo (Sal. 1:1-3). Xlikana pi putum natlatni tiku xtatayananin Jehová lakaskinkgo pi kamilh kilhtamaku akxni xkamanankan tlan natamunukgo (3 Juan 4). Natlatni tiku kstalaninanin Cristo lakaskinkgo pi xkamanankan kalakgapaskgolh «xasanto tatsokgni», nema la uku kilhchanima Tatsokgni xaHebreo chu Tatsokgni xaGriego. Asta maski kajku laktsu kamanan, tlan nakatsinikgo xlakata tiku kalichuwinankan kBiblia chu liʼakxilhtit nema limin. Xkachikin Jehová tlawanit lhuwa libros, folletos chu videos klhuwa tachuwin nema natlatni tlan nakalimasiyanikgo chu nakalimakgtayakgo xkamanan. Kalakapastakwi pi tuku katsiyaw xalak Biblia xlakaskinka xlakata tlan natalalinaw Jehová. w17.12 18:1; 19:4

Kalilakpuwaw chatum tala puskat tiku lakpuwan pi xchixku nitlan likatsini xlakata ni xtatayana Jehová. ¿Tlakg tlan nakitaxtu komo nakilhni xlakata la likatsi? Komo puskat wa namapakgsi xchixku, ¿natlawa uma pi xla naskujnaniputun Jehová? Max ni. Lu tanu nakitaxtu komo xla namaxki kakni xlakata xla wa pulalin familia. Natlawa pi naʼanan takaksni kfamilia, namalanki Jehová chu max asta naskujnaniputun. Komo chuna natlawakgo max xchatiykan tlan namakglhtinankgo latamat (1 Ped. 3:1, 2). Chu kalilakpuwaw chatum tala chixku tiku xpuskat ni xtatayana Jehová chu ni maxki kakni. ¿Natlawa pi namaxki kakni komo kaj nakilhni chu nalimasiyani tiku mapakgsinan anta kchiki? Xlikana pi ni. Jehová lakaskin pi kastalanilh xliʼakxilhtit Jesús chu kalimasiyanilh tapaxkit xpuskat. Cristo pulalin congregación pero limasiya tapaxkit chu xakgalhkgalhina (Luc. 9:46-48). Kstalanina Cristo tiku stalani xliʼakxilhtit Jesús max tlan natlawa pi xpuskat nachuna naskujnani Jehová. w17.11 28, 29:13, 14

Latamanin tiku na watiya talakapastakni kgalhikgo tuku xalak kakilhtamaku ni kgalhakgaxmatkgo xlimapakgsin Jehová. Komo nakatalalinaw tsinu tsinu naxlajwanan kintakanajlakan. Kimputumkan katuwa wilaw xlakata nachuna nalakapastakaw la xalak kakilhtamaku, la tasiya ktelevisión, kʼInternet, kputaskujut chu kʼescuela. Klhuwa países, latamanin wankgo pi ni kanajlanikgo Dios. Max ni liwana lakputsananikgonit pi Dios xlikana wi, pero lu lakgatikgo tlawakgo putum tuku lakgatikgo (Sal. 10:4). Makgapitsi max na lakpuwankgo pi lu lakgskgalalan akxni wankgo pi ni talakaskin nakanajlaniya Dios xlakata tlan nalikatsiya. ¿Lakgchan nakanajlayaw pi ni anan chatum Malakatsukina? Komo naputsayaw xtakgalhtin uma takgalhskinin kciencia, max nalaktlawa tuku lakapastakaw. Pero xatakgalhtin uma takgalhskinin ni tuwa. Chuna la chiki wi tiku katlawanit, nachuna putum tuku staknan wi tiku kamalakatsukilh. w17.11 21:2-4

¿Tuku xlakata lu xlakaskinka naʼanaw akxni talakapastaka akxni tinilh Cristo? Kalakapastakwi pi tamakxtumit makgtanuma kkintakakninkan nema maxkiyaw Dios. Max Jehová chu Jesús lhkawilikgo akxni akxilhkgo pi wi tiku fuerza tlawa naʼan kʼuma lu xlakaskinka tamakxtumit. Lakaskinaw pi nakinkaʼakxilhkgoyan pi anta natawilayaw, pero xlakan naʼakgatekgskgo komo lu nitlan makgkatsiyaw o tatatlayaw chu nila naʼanaw. Akxni limasiyayaw xlakata tuku tlawayaw pi tamakxtumit lu xlakaskinka kimpalakatakan, limasiyaniyaw Jehová pi lakaskinaw chuntiyaku nawili kintukuwanikan «klibro xla talakapastakni». Uma libro na litalakgapasa «libro xla latamat» niku limin xtukuwanikan tiku Jehová kamaxkiputun latamat nema ni kgalhi xlisputni (Rev. 20:15). Xlakata nina chin uma tamakxtumit lu xlakaskinka nalimaxtuyaw kilhtamaku xlakata natlawayaw oración chu liwana naʼakxilhaw la talalinaw Jehová (2 Cor. 13:5). w18.01 13:4, 5

Akxni makgnina anta xwi kachikin niku tlan tatsekgkan, nitu xlilakgaputsa. Jehová lichuwinalh xlakata uma kachikinin: «Chu nalimaklakaskinatit la minputatsekgnikan» (Jos. 20:2, 3). Xla ni xwan pi amakgtum nalakputsananiparakan makgnina xlakata tuku xtlawanit. Chu malakgaxokgena ni xmaxkikan talakaskin natanu kʼama kachikin xlakata namakgni. Xlakata makgnina anta xtamakgxtakga kʼama kachikin, nitu xlipekuan xlakata wa Dios xkuentajtlawama. Ni kpulachin xwi, wa xlakata tlan kskuja, xkamakgtaya amakgapitsin chu tlan kskujnani Dios chu nitu xlilakgaputsa. Tlan xlin xlatamat chu tapaxuwan xtawila. Wilakgolh xlakskujnin Dios tiku nialhtu tlawamakgolh lanka talakgalhin pero chuntiyaku nitlan limakgkatsikgo. Makgapitsi lakpuwankgo pi Jehová chuntiyaku nitlan akxilha tuku tlawakgonit. Komo wix chuna makgkatsiya, kakatsi pi Jehová tapatinitan chu masiyaninitan xtalakgalhaman. Wa xlakata nitu nalipekuana. w17.11 9:6; 11:13, 14

Xlakata namakgtayananaw akxtum natawilayaw wa nalilakpuwanaw tuku kilhchanima kaxtalanchu chu vino nema maklakaskinkan akxni lakapastakkan akxni tinilh Cristo. Chuna natlawayaw akxni nina chan uma kilhtamaku chu nachuna akxni antiya wilaw (1 Cor. 11:23-25). Kaxtalanchu nema ni kgalhi levadura kilhchanima tiyatliwa nema ni kgalhi talakgalhin tuku Jesús makamastalh chu vino kilhchanima xkgalhni nema stajtamakgalh. Kalilakpuwaw pi xtamakamastan Jesús limasiyalh pulaktiy tlakg xlakaskinka tapaxkit: tapaxkit nema Jehová limasiyalh akxni makamastalh xKgawasa xlakata nakinkalakgmaxtuyan chu tapaxkit nema Jesús limasiyalh akxni xatapaxuwan mastalh xlatamat kimpalakatakan. Akxni nalilakpuwanaw tapaxkit nema kinkalimasiyanikgoyan, kinkamakgpuwantiniyan nachuna nakalimasiyaniyaw tapaxkit. Chu tapaxkit nema kgalhiniyaw Jehová chu kinatalankan tlawa pi akxtum nakinkatlawayan chu nakinkamatliwakglhan. w18.01 15:11

Jehová lanka xtapalh kinkaʼakxilhan. Xla lu kinkapaxkiyan, asta mastalh xkgalhni xKgawasa xlakata nakinkalakgmaxtuyan chu chuna tlan nakgalhiyaw latamat nema ni kgalhi xlisputni (Juan 3:16). Komo Jehová ni namakgantaxti tuku malaknunit, Satanás max tlan nawan pi Jehová kaj xaʼakgsanina, chatum mapakgsina tiku ni xaʼakgstitum chu ni kamaxki talakaskin pi latamanin wi tuku nalipaxuwakgo. Nachuna xkamaxkilh talakaskin pi xtalamakgasitsin tiku likgalhkgamanankgo, xlakpuwankgolh: «¿Tu akgspulalh xtamalaknun lantla wanit mpi namin? Sampi asta akxni yama nkilhtamaku, akxni nkinatlatnikan ntinikgolh, xlipaks xaliankgalhin chuna nkatuwaj, nitu ntalakgpaliy lantla asta akxni xakgasiyaj tikilhtsukulh nkatuxawat» (2 Ped. 3:3, 4). Wa xlakata, Jehová na kuentajtlawa pi xlakgtaxtutkan latamanin tiku kgalhakgaxmatnankgo na nalitasiya pi wa Jehová lakgchan namapakgsinan (Is. 55:10, 11). Nachuna, tapaxkit litasiya la mapakgsinan Jehová. Wa xlakata liwana katsiyaw pi ankgalhin napaxkinan chu nakalakgalhaman kskujnin tiku ni makgxtakgkgo (Éx. 34:6). w17.06 23:7

Akxni nialh kgalhakgaxmatnankgolh Adán chu Eva, Jehová tlakg limasiyalh xaxlikana tapaxkit. Liwana xkatsi pi makgapitsi xlakkamanan Adán xʼamakgolh paxkikgo, chu wi tuku tlawalh xlakata nakalakgmaxtu lata akxni Jehová malaknulh chatum Lakgmaxtuna, xtachuna xakxilha la komo xmakamastanita xKgawasa. Akgtati mil kata alistalh Jehová makamastalh xachastum xKgawasa xpalakata latamanin maski lu nitlan makgkatsilh (Juan 3:16). ¡Lu paxtikatsiniyaw xlakata uma!. Xlakata kinkatlawakan chuna la Dios, tlan nalimasiyayaw xaxlikana tapaxkit. Akgtum liʼakxilhtit, Abel limasiyalh tapaxkit nema xkgalhini Dios akxni xmaxki tuku tlakg xatlan nema xkgalhi (Gén. 4:3, 4). Noé kalimasiyanilh tapaxkit latamanin akxni akglhuwa kata lichuwinalh Dios maski latamanin ni kgaxmatkgolh (2 Ped. 2:5). Abrahán limasiyalh pi tapaxkit nema xkgalhini Dios tlakg tliwakga xwanit nixawa tuku atanu, wa xlakata xʼama makamasta xkgawasa Isaac (Sant. 2:21). Chuna la uma lakchixkuwin tiku ni makgxtakgkgolh Dios, nachuna akinin limasiyaputunaw tapaxkit maski tuwa namakgkatsiyaw. w17.10 7, 8:3, 4

La uku kilhtamaku, xtaskujut xaPuxku Sacerdote tlakg lhuwa kinkamaxkiyan xlakata nalipawanaw pi namakgamakglhtinanaw xtalakgalhaman «chu nakinkamaxkiyan xlipaxkatsinit akxni lu[...] maklakaskinaw» (Heb. 4:16). Wa xlakata talakaskin nakgalhiniya takanajla xtamakamastan Jesús. Liwana kakatsi pi talakgmaxtut wix nalitamakgtayaya (Gál. 2:20, 21). Chu kakgalhini takanajla talakgmaxtut xlakata namaxkiyan akgtum takgalhkgalhitin xlakata tlan putum kilhtamaku nalatapaya. Xtamakamastan Jesús wa akgtum tamaskiwin nema Jehová wix maxkinitan. Nachuna akxni Jehová kinkatapatiyan, nialh talakaskin nalakpuwanaw pi xla amakgtum nakinkaliwaniyan (Sal. 103:8-12). Akinin tlakg kgalhiyaw tuku nalipawanaw pi kgalhiyaw xtalakgalhaman Jehová. w17.11 11, 12:14-17

Katsisni akxni xapulana tlawalh Taway xla kiMalanakan, Jesús skilh kxʼoración pi kstalaninanin na xlipaxuwakgolh la akxtum xtawilakgolh chuna la xla chu xTlat akxtum tawilakgo. Xlikana pi Jehová kgalhtinit uma oración nema tlawalh xKgawasa. Ni anan atanu tamakxtumit la akxni talakapastaka akxni tinilh Cristo nema limasiya pi akinin xtatayananin Jehová akxtum wilaw. Klhuwa kachikinin, umakgolh tamakxtumit niku ankgo tiku tanu tanu xkachikinkan chu xcolorkan chu wi tiku nitlan akxilhkgo. Pero Jehová chu Jesús lu stlan akxilhkgo uma tamakxtumit. Xtatayananin Jehová ni kaks lilakawanaw pi lipaxuwayaw xlakata akxtum tawilayaw xlakata Jehová xlichuwinanita (Ezeq. 37:15-17; Zac. 8:23). w18.01 14:7-9

«Ixyawananin chiki», wa tiku lakgmakgankgolh Jesús, Mesías. Ni kajwatiya lakgmakgankgolh pi wa Mesías xwanit. Lhuwa judíos skinkgolh pi xmakgnika (Luc. 23:18-23). Wa xlakata, judíos linkgolh kuenta xlakata makgnika. Komo Jesús lakgmakgankgolh chu makgnikgolh, ¿la tlan xlitaxtulh «talipaw chiwix»? Kajwatiya komo xmalakastakwanika. Pedro lichuwinalh xlakata «Jesucristo xalak Nazaret», tiku xlakan «ntipakgaxtokgowaka[kgolh], wampi Dios, malakastakwanilh klinin». (Hech. 3:15; 4:5-11; 1 Ped. 2:5-7). Akxni malakastakwanika, xKgawasa Dios litaxtulh nema tlan nalilakgtaxtuyaw, «sampi ni anan akgtum ntapakuwit kxtampin akgapun [nema] ntamaxkikgonit nchixkuwin lantla naliʼakgaputaxtuyaw» (Hech. 4:12; Efes. 1:20). w17.12 9, 10:6-9

Akxni lichuwinalh tuku xʼama la kxaʼawatiya kilhtamaku, Jesús na lichuwinalh akxni namimpara: «Natasiyuy nchu xaliukxilhtit xla xKam nchixku anta nkakgapun; na naʼakxilhkgo xKam nchixku, [namin kpuklhni] anta nkʼakgapun, chu xa wa xlitlanka xlitliwakga, chu xlikakni. Na namalakgachay xʼángeles, pixtlanka nasunukan lisunun; na namamakgstokgkgokan xtalaksaknin, lantla xlikatlanka nkatuxawat, asta kxtankgana, lakatum, chu kxlakgaputu ntani nkikgalhsputa akgapun» (Mat. 24:29-31). Jesús nakamamakxtumi «xtalaksaknin» akxni nakalin kʼakgapun tiku xatalaksakni nema wilakgolhku nawan katiyatni. Uma natsuku akxni lama nawan lanka takatsanajwat pero akxni nina tsuku nawan Armagedón. Kʼuma guerra, Jesús chu 144,000 nakatlajakgo mapakgsinanin xalak Katiyatni (Rev. 17:12-14). Akxni xaʼawatiya nalakapastakkan akxni tinilh Cristo wa nema tlawakanita nawan akxni Jesús nakalin tiku xatalaksakni kʼakgapun. w18.01 16:15

La uku, Jesús wi anta kʼakgapun «nkanikxni liwayaj xtiwaj» Rev. 1:5, 18; (Rom. 6:9; Col. 1:18; 1 Ped. 3:18). Xla kamalaknunilh xʼapóstoles tiku ni xmakgxtakgkgo xlakata nachuna naʼankgo kʼakgapun xlakata natamapakgsinankgo (Luc. 22:28-30). Pablo tsokgli: «Lakastakwananit nCristo klinin; na wa nti xapulh lakastakwananit, xaliʼukxilhtit liwanit lantla nalakastakwanankgoy xlipaks ninin». Chu alistalh lichuwinalh pi wi tiku nachuna xʼamakgolh lakastakwanankgo xlakata nalatamakgo kʼakgapun. Lichuwinalh: «[Chatunu] nalakgchankgoy lantla nalakastakwanankgoy, wa nCristo nti xapulh lakastakwanalh, alistalh nchu wa nti ntapakgsinikgoy nCristo nalakastakwanankgoy akxni [kinkatawilan nawan]» (1 Cor. 15:20, 23). Akglhuwata kata xtatayananin Jehová limaklakaskinkgonit Biblia xlakata namasiyakgo pi uma tamalaknun tsukulh kkata 1914. La uku «kinkatawilan» chu nialh makgas namasputukan xalixkajni kakilhtamaku. w17.12 10:11; 11:14-16

Jehová kinTlatkan «xmakilhtsukina talakgalhaman» na makgatsankganit tiku lu xkapaxki, chuna la Abrahán, Isaac, Jacob, Moisés chu mapakgsina David (Núm. 12:6-8; Mat. 22:31, 32; Hech. 13:22). Biblia wan pi Dios lakaskima pi xchilha kilhtamaku akxni nakamaxkipara latamat (Job 14:14, 15). Ama kilhtamaku, xlakan napaxuwakgo chu nikxni katitatatlaparakgolh. Kalakapastakwi pi Dios na akxilhli akxni lu makgapatinanka akxni makgnika xKgawasa, «tiku lu xpaxki» (Prov. 8:22, 30). Nila lilakpuwanaw takatsanajwat nema makgkatsilh Jehová (Juan 5:20; 10:17). Tlan nalipawanaw pi Jehová nakinkamakgtayayan. Wa xlakata kawaniw putum tuku wi kkinakujkan chu tuku makgkatsiyaw. Tlan limakgkatsiyaw pi xla akgatekgsa kintakatsanajwatkan chu kinkamaxkiyan takgoxamixat nema maklakaskinaw (2 Cor. 1:3, 4). w17.07 13:3-5

La uku lhuwa millones latamanin limakgtayanankgo «wantuku laklanka xtapalh», nema kilhchani xkilhtamakujkan, xtuminkan chu xlitliwakgakan (Prov. 3:9). Jehová putum kilhtamaku nalakapastaka tuku tlawayaw xpalakata chu tapaxkit nema kgalhiniyaw. Putum tuku kgantaxtunit la uku kxaʼawatiya kilhtamaku xpalakata xaxlikana takaknin, litasiya xtasikulunalin Jehová chu xtapulalit Cristo. Akinin xlakskujnin Dios makgtapakgsiyaw kʼakgtum kachikin niku liwana chu putum kilhtamaku natawilayaw. Lhuwa xtapalh kaliʼakxilhwi xlakata makgtapakgsiyaw kxkachikin Jehová chu kakgaxmatwi «xtachuwin Jehová» kiDioskan (Zac. 6:15). Komo chuna natlawayaw, nakinkakuentajtlawayan kiMapakgsinakan chu xaPuxku Sacerdote. Lu kaliskujwi xlakata namakgtayayaw xaxlikana takaknin. Chuna liwana nakatsiyaw pi Jehová nakinkakuentajtlawayan kʼuma kxaʼawatiya kilhtamaku chu putum kilhtamaku chuna natlawa. w17.10 30:18, 19

Kilhtamaku nema aku mima namasputukan xkakilhtamaku Satanás, política chu nixaxlikana takanajla. Palakachuwinanin Ezequiel chu Sofonías lichuwinankgolh pi oro chu plata kaj nitu xʼama litaxtu, maski lata makgasa kilhtamaku wa uma tuku tlakg maklakaskinkgo tiku xalak kakilhtamaku (Ezeq. 7:19; Sof. 1:18). ¿La xmakgkatsiw komo xmilha kilhtamaku akxni naniyaw, chu xʼakxilhwi pi nitu kgalhiyaw tuku lhuwa xtapalh nema xaxlikana kaj xpalakata mastokgmaw tuku «lhuwa xtapalh nema ni xaʼakgstitum»? Xtachuna xmakgkatsiw la tiku lhuwa skujli xlakata natlaja lhuwa tumin chu alistalh nakatsi pi tumin nixaxlikana (Prov. 18:11). Tuku lhuwa xtapalh anan unu kakilhtamaku nakitsankga. Wa xlakata, ni kamakgatsankgaw kilhtamaku namaklakaskinaw tuku kgalhiyaw xlakata naliputsayaw amigos anta kʼakgapun. Lata tuku natlawayaw xlakata nalimakgtayayaw xTamapakgsin Jehová nakinkamakgtayayan tlakg tlan xʼamigo nawanaw. w17.07 11:16

Makgapitsi kstalaninanin Cristo tiku tlawakgonit laklanka talakgalhin makgtsekgwilikgo xlakata ni natamamaxanikgo chu ni nakamakgalipuwankgo amakgapitsin (Prov. 28:13). Pero uma limasiyakgo pi ni kgalhikgo xaxlikana tapaxkit, xlakata xʼakstukan katlawanikan tuku nitlan chu amakgapitsin latamanin. Espíritu santo nialh kamakgtaya chu xtakaksni putum congregación katuwa natawila (Efes. 4:30). Xaxlikana tapaxkit namakgpuwantini tiku tlawanit lanka talakgalhin xlakata nakatachuwinan lakgkgolotsin chu namaxkikan tamakgtay (Sant. 5:14, 15). Tuku tlakg xlakaskinka tayat xlikgalhit kstalanina Cristo wa tapaxkit (1 Cor. 13:13). Wa litalakgapasaw pi xlikana kstalaninanin Jesús akinin, tiku makglhkatiyaw Jehová, tiku Masta uma tapaxkit. Pablo lichuwinalh komo ni xkgalhi tapaxkit kaj nitu xlitaxtu (1 Cor. 13:2). Wa xlakata chuntiya kalimasiyaw tapaxkit ni kaj xman «[tuku nawanaw]» wata «nkamakgantaxtiw [...] chu wa ntu ntalulokgtat» (1 Juan 3:18). w17.10 11:17, 18

Kaʼakxilhwi la José ni pekualh akxni xpuskat Potifar xtatlawaputun talakgxtumit xalimaxana. Xlikana, xla liwana xkatsi pi xʼama kgalhi taʼakglhuwit xlakata lakgmakgalh tuku wanilh ama puskat. Pero maski chuna José tunkun lakgmakgalh (Gén. 39:10, 12). Chu kaʼakxilhwi xliʼakxilhtit Rahab, tiku xlama kJericó. Akxni chatiy skgalananin israelitas kilakgolh kxchik, ni pekualh chu kamakgtayalh xlakata tlan natsalakgo (Jos. 2:4, 5, 9, 12-16). Xʼapóstoles Jesús na limasiyakgolh pi ni xpekuankgo. Akxni akxilhkgolh la Jesús ni xpekuan, uma kamakgtayalh chuntiya nalichuwinankgo xtukuwani Jesús (Hech. 5:17, 18, 27-29). José, Rahab, Jesús chu apóstoles liwana xlakpuwankgonit natlawakgo tuku xatlan. Ni pekuankgolh xlakata xlipawankgo Jehová, ni wa xlakata x’akstukan xkalipawankan. Akxni titaxtuyaw taʼakglhuwit natalakaskin pi ni napekuanaw, ni kiʼakstukan nakinkalipawankanan wata kalipawaw Jehová (2 Tim. 1:7). w17.09 29:6-9

Nila katimakgxtakgwi xamakgan tayat komo kaj kiʼakstukan nakinkalipawankanan. Latamanin tiku chuna tlawakgolh lhuwa liskujkgolh xlakata nalakgpalikgo xlatamatkan. ¿La makgxtakgkgolh nixatlan tayat? Wa xlakata litliwakga nema kamaxkilh Biblia chu xʼespíritu santo Dios (Luc. 11:13; Heb. 4:12). Akinin na nalitamakgtayayaw uma litliwakga komo nalikgalhtawakgayaw Biblia chali chali, nalilakpuwanaw chu naskiniyaw Jehová putum kilhtamaku pi kakinkamaxkin litliwakga chu liskgalala xlakata nakgalhakgaxmataw xTachuwin (Jos. 1:8; Sal. 119:97; 1 Tes. 5:17). Biblia chu espíritu santo na nakinkamaxkiyan litliwakga komo nalakkaxwiliyaw tuku naʼakxilhkan ktamakxtumit chu komo naʼanaw (Heb. 10:24, 25). Nachuna namaklakaskinaw tuku kinkamaxkiyan xkachikin Jehová, la komo revistas, JW Broadcasting, aplicación JW Library chu sitio jw.org (Luc. 12:42). Kstalaninanin Cristo xlilakgmakganatkan xamakgan tayat chu nachuna talakaskin nalilhakgananaw xasasti tayat chu nikxni namakgxtakgaw kkilatamatkan (Col. 3:10). w17.08 21:16, 17

Mapakgsina David nachuna nitlan tuku titaxtulh. Maski Jehová laksakli akxni kajku kgawasa xwanit xlakata mapakgsina xlitaxtulh anta kʼIsrael, David akgkukitsis kata kgalhkgalhilh xlakata wa xmapakgsinalh (2 Sam. 2:3, 4). Pero akxni nina xchan kilhtamaku xlitsalanit xwanit mapakgsina Saúl, tiku xmakgniputun. Wa xlakata, David xtalakaskin pi alakatanu niku xʼalh latama o anta xtawi kʼakgtum lhuku. Alistalh, Saúl nilh kʼakgtum guerra. Maski chuna, David chuntiya akgtujun kata kgalhkgalhilh xlakata xmapakgsinalh xlikalanka Israel (2 Sam. 5:4, 5). ¿Tuku xlakata David xatapaxuwan kgalhkgalhinalh? xlipawan xtapaxkit Jehová nema ni makgxtakgnan. Xatapaxuwan xkgalhkgalhima akxni Jehová xmasputulh xtaʼakglhuwit. (Sal. 13:6). Nachuna, xlilakpuwan la Jehová xmakgtayanit makgasa. Xlikana, David xkatsi pi tlan xkitaxtulh xlakata xkgalhkgalhinama. w17.08 6, 7:14, 15

Chuna la titaxtu kilhtamaku talakgpalitilha la chuwinankan. Max katsiniyaw makgapitsi tachuwin kkintachuwinkan nema talakgpalitilha tuku wamputun chuna la titaxtutilha kilhtamaku. Wa uma tuku akgspulalh tachuwin hebreo chu griego, wa uma tachuwin nema limaklakaskinka xlakata natsokgkan Biblia. La uku lu tanu, nixawa la makgasa. Pero, putum tiku akgatekgsputunkgo xTachuwin Dios lakaskinkgo pi nakamatitaxtinikan kxtachuwinkan maski katsinikgo hebreo o griego xala uku. Makgapitsi lakpuwankgo pi tlakg tlan na’akgatekgskgo Biblia komo nakatsinikgo griego chu hebreo xala makgasa, pero max uma ni lu xlakaskinka chuna la lakpuwankgo. Lu paxtikatsiniyaw pi Biblia matitaxtikanit xatakgatsin o kaj makgapitsi kliwaka 3,200 k’atanu tachuwin. Uma limasiya pi Jehová lakaskin pi latamanin, «putum laklanka kachikin chu tribu chu tachuwin chu kachikin» putum nakatsinikgo chu nalitamakgtayakgo xtamakatsinin (Rev. 14:6). Xlikana pi akxni akxilhaw xtapaxkit chu xlakata ni laksakpaxkinan Jehová tlawa pi tlakg natalakatsuwiniyaw. w17.09 19:4

Nachuna komo kgalhiyaw kkifamiliajkan tiku tamakxtukanit kcongregación, kuenta natlawayaw xlakata ni natachuwinanaw. Max tuwa namakgkatsiyaw, pero tlakg ni tuwa katimakgkatsiw komo nastalaniyaw xliʼakxilhtit Jehová chu nakgalhakgaxmataw xtastakyaw. Akgtum lu tlan li’akxilhtit wa mapakgsina David. Akxni Saúl xputsastalanima chu akxni Simeí xtalatlawaputun, David ni sitsilh chu ni katalatlawalh (1 Sam. 26:9-11; 2 Sam. 16:5-10). Xlikana, katsiyaw pi David ni ankgalhin machokgolh tuku nitlan xtlawaputun. Kalakapastakwi la tlankajwanalh kxlakatin Nabal chu talakgalhin nema tatlawalh Bat-seba (1 Sam. 25:10-13; 2 Sam. 11: 2-4). ¿Tuku katsiniyaw xlakata David? Pulana, wa superintendentes ni lakapala nasitsikgo chu kuenta natlawakgo ni akglakgwa nalimaklakaskinkgo limapakgsin nema kgalhikgo. Chu xlipulaktiy, ni kiʼakstukan nakinkalipawankanan chu ni nalakpuwanaw pi tlan natayaniyaw taputsan (1 Cor. 10:12). w17.09 5, 6:12, 13