TAKGALHTAWAKGA 51
¿La tlan namakgapaxuwayaw Jehová akxni chuwinanaw?
Akxni Jehová kinkamalakatsukin kinkamaxkin akgtum stlan tamaskiwin, tlawalh pi tlan nachuwinanaw. ¡Xla lu xlakaskinka akxilha la maklakaskinaw uma tamaskiwin! (Kalikgalhtawakga Santiago 1:26). Wa xlakata, ¿tuku kilitlawatkan xlakata namakgapaxuwayaw Jehová akxni chuwinanaw?
1. ¿La tlan namaklakaskinaw uma tamaskiwin nema kinkamaxkinitan Jehová?
Biblia wan: «Chuntiya kalamatliwakglhtit chu kalamakgtayatit chatunu chatunu» (1 Tesalonicenses 5:11). ¿Lakgapasa chatum tiku maklakaskima tamakgtay? ¿Wi tuku tlan xtlawa xlakata tlan xmamakgkatsini? Kalimasiyani pi xtapalh liʼakxilha. Max tlan nawaniya tuku tlan tayat kgalhi. ¿Lakapastaka akgtum texto nema namakgtaya chatum tiku wix lakgapasa? Anan lhuwa texto nema tlan nalaksaka. Nachuna, kalakapastakti pi chuna la nachuwinana chu tuku nawana tlan nakamakgtaya amakgapitsin. Wa xlakata kalimasiya tapaxkit akxni nachuwinana (Proverbios 15:1).
2. ¿Tuku tachuwin ni namaklakaskinaw?
Biblia wan: «Ni kataxtulh kminkilhnikan nipara akgtum xamasni tachuwin» (kalikgalhtawakga Efesios 4:29). Uma wamputun pi ni namaklakaskinaw xalixkajni tachuwin chu ni nakalimakgawiyaw o nakalimaktujuyaw amakgapitsin kintachuwinkan. Nachuna, ni nalaʼakgsanaw chu ni nalalimawakayaw nixatlan tachuwin (kalikgalhtawakga Proverbios 16:28).
3. ¿Tuku nakinkamakgtayayan liwana namaklakaskinaw kintachuwinkan?
Tuku wanaw limasiya tuku lakpuwanaw chu tuku makgkatsiyaw (Lucas 6:45). Wa xlakata, talakaskin nalilakpuwanaw tuku xatlan, uma kilhchanima tuku xaʼakgstitum, tuku xaskulunku, tuku makgapaxuwa Dios chu putum tuku tlawa pi latamanin napaxkinankgo (Filipenses 4:8). Xlakata chuna natlawayaw, talakaskin liwana nalaksakaw tuku nalilakgastananaw chu nakaputsayaw xatlan amigos (Proverbios 13:20). Na talakaskin pulana nalilakpuwanaw tuku nawanaw. Kalilakpuwanti la nalimakgkatsikgo amakgapitsin tuku nawana. Biblia wan: «Akxni ni liwana lakapastakkan tuku wankan xtachuna la lilhtukunankan kgantum espada, pero xtachuwinkan tiku lakgskgalalan mapaksanan» (Proverbios 12:18).
TLAKG KALAKPUTSANANIW
Kaʼakxilhwi tuku tachuwin kilimaklakaskinatkan nema makgapaxuwa Jehová chu nema kamakgpuwantini amakgapitsin.
4. Kuenta katlawa tuku nawana
Putum akinin wi tuku wanaw nema alistalh nitlan limakgkatsiyaw (Santiago 3:2). Kalikgalhtawakgatit Gálatas 5:22, 23 chu kalichuwinantit uma:
Xlakata namachokgoya tuku wana chu la wana, ¿tuku tayat tlan naskiniya Jehová? ¿La namakgtayayan umakgolh tayat?
Kalikgalhtawakgatit 1 Corintios 15:33 chu kalichuwinantit uma:
¿Lakpuwana pi tiku katalalipina chu talakgastan nema laksaka natlawa pi tlan o nitlan nachuwinana? ¿La tlan chuna natlawa?
¿Tuku natlawa pi tlan o nitlan nachuwinana?
Kalikgalhtawakgatit Eclesiastés 3:1, 7 chu kalichuwinantit uma:
¿Tuku kilhtamaku tlakg tlan nawan ni nachuwinana chu tuku kilhtamaku tlan nachuwinana?
5. Tlan kakalichuwinanti amakgapitsin
¿Tuku nakinkamakgtayayan ni nawanaw tachuwin nema nitlan nakamamakgkatsini amakgapitsin? Kaʼakxilhtit VIDEO chu kalichuwinantit uma:
Kvideo nema akxilhwi, ¿tuku xlakata tala xlakgpaliputun la xkalichuwinan amakgapitsin?
¿Tuku tlawalh xlakata xlakgpalilh la xkalichuwinan amakgapitsin?
Kalikgalhtawakgatit Eclesiastés 7:16 chu kalichuwinantit uma:
¿Tuku kililakapastakatkan akxni nitlan kalichuwinamputunaw amakgapitsin?
Kalikgalhtawakgatit Eclesiastés 7:21, 22 chu kalichuwinantit uma:
Akxni wi tiku nitlan nalichuwinanan, ¿lakpuwana pi umakgolh texto namakgtayayan ni lakapala nasitsiya? ¿Tuku xlakata?
6. Kamaklakaskinti xatlan tachuwin akxni natachuwinana mifamilia
Jehová lakaskin pi akxni nakatachuwinanaw kifamiliajkan, kalitasiyalh pi kapaxkiyaw. Kaʼakxilhtit VIDEO chu kalichuwinantit uma:
¿Tuku namakgtayayan xlakata mintachuwin nalimasiya pi kapaxkiya mifamilia?
Kalikgalhtawakgatit Efesios 4:31, 32 chu kalichuwinantit uma:
¿Tuku tachuwin tlawa pi xatapaxuwan natawila familia?
Jehová xwan tuku xmakgkatsi xpalakata xKgawasa, Jesús. Kalikgalhtawakgatit Mateo 17:5 chu kalichuwinantit uma:
¿La tlan chuna natlawaya la Jehová akxni nakatachuwinana mifamilia?
Kalakputsa la tlan nakawaniya laktlan tachuwin amakgapitsin
MAKGAPITSIN WANKGO: «Akit kwan tuku klakpuwan. Komo amakgapitsin ni lakgatikgo, ni kinkuenta».
¿Nachuna lakpuwana? ¿Tuku xlakata?
TUKU KATSINIW
Tachuwin kgalhi lhuwa litliwakga. Talakaskin nalilakpuwanaw tuku nawanaw, tuku kilhtamaku nawanaw chu la nawanaw.
¿Tuku xkgalhtinanti?
¿La tlan namaklakaskina mintachuwin xlakata nakamakgtayaya amakgapitsin?
¿Tuku tachuwin ni kilimaklakaskinatkan?
¿Tuku nakinkamakgtayayan nawanaw laktlan tachuwin chu tlan nakalimamakgkatsiniyaw amakgapitsin?
TLAKG KAKATSINI
¿Tuku nakinkamakgtayayan xlakata kintachuwinkan nakamatliwakglha amakgapitsin?
Kaʼakxilhti tuku namakgtayayan nalakgmakgana xalixkajni tachuwin.
“¿Qué problema hay en decir malas palabras?” (Artículo xalak jw.org)
Kaʼakxilhti tuku natlawaya xlakata ni nakaʼakgsana amakgapitsin.
Kaʼakxilhti la makgtayalh Jehová chatum chixku xlakata xlakgmakgalh nixatlan tachuwin.
«Liwana klakpuwa la xaklima kilatamat» (Makatsinina, 1 xla agosto kata 2013)