Mapakgsina nema Dios lipulalima xʼespíritu kinkasikulunatlawayan
«Nakgalhi xʼespíritu Jehová.» (ISA. 11:2)
1. ¿Tuku lichuwinankgonit makgapitsi latamanin xlakata tuku lama kkakilhtamaku?
«KAKILHTAMAKU anan lhuwa taʼakglhuwit, kpolítica, xla latamanin chu katiyatni lhuwa tuku nitlan tlawanimaka, chu chuna la wi kakilhtamaku, ¿la natlawakgo latamanin xlakata tlan nalatamakgo a akgtum ciento kata?», chuna lichuwinalh chatum astrofísico nema wanikan Stephen Hawking kkata 2006. Chu maktum periódico lichuwinalh: «Nitu kmasputumaw talimaxkgen chu chuntiya anan guerra xlikalanka kakilhtamaku. Wata tlawanitaw pi tlakg kaʼanalh talimaxkgen chu guerra. Chu ni wamputun pi kaj ni tuku ktlawamaw: lhuwa tuku klitsakgsanitaw la umakgolh, niku mapakgsina wan tuku tlan natamawakan chu tuku nila natamawakan chu asta niku putum tlan nastanankan chu natawanankan, na taputsanit xtamakgtay Sociedad de Naciones chu klimaklakaskinitaw armas nucleares nema klimasputuputunaw tuku nitlan. Makglhuwa ktlawanitaw “guerra nema nalimasputuyaw putum guerras” pero uma tlawanit pi nialhti nakanajla pi tlan namasputuyaw guerras» (New Statesman).
2. ¿La nalimasiya Jehová pi kajwatiya lakgchan namapakgsinan?
2 Putum uma tuku wankgo latamanin, akinin xtatayananin Jehová katsiyawa pi chuna xʼama la, xlakata Biblia liwana kinkamasiyaniyan pi latamanin ni katlawaka xlakata xakstukan natapakgsikgo (Jer. 10:23). Kajwatiya Jehová lakgchan namapakgsinan chu nakinkawaniyan la nalinaw kilatamatkan, na kinkawaniyan tuku kilitlawatkan kkilatamatkan chu nakinkapulalinan xlakata tlan namakgantaxtiyaw. Nialh makgas nalimasiya pi kgalhi limapakgsin, akxni namasputu putum políticos tiku litsakgsakgo nakamapakgsikgo latamanin. Chu na nakamasputu putum tiku ni skujnikgo chu tiku paxkikgo uma kakilhtamaku, niku latamanin kaʼakgchipanit talakgalhin chu Satanás, «xmalana [o xdios] katuxawat» (2 Cor. 4:4).
3. ¿Tuku lichuwinalh Isaías xlakata Mesías?
3 Kxasasti kakilhtamaku, Jehová nalimasiya pi xla lakgchan namapakgsinan chu nalimaklakaskin xTamapakgsin Mesías (Dan. 7:13, 14). Xlakata uma mapakgsina palakachuwina Isaías wa: «Jesé nakgalhapun; chu kxtankgaxekg nataxtu tuku namasta lhuwa tawakat. Chu nakgalhi xʼespíritu Jehová, xʼespíritu liskgalala chu xʼespíritu takgatekgsnit, xʼespíritu tastakyaw chu litliwakga, xʼespíritu takatsin chu nakgalhini xatlan tapekua Jehová» (Isa. 11:1, 2). «Jesé nakgalhapun» wa kilhchanima Cristo. Pero ¿la tanu tanu makgtaya espíritu santo xlakata nakamapakgsi latamanin? ¿Tukuya tasikulunalin nalimin xtamapakgsin chu tuku kilitlawatkan xlakata namakglhtinanaw?
Dios lilaksaknit Mapakgsina nawan
4-6. ¿Tuku liwana katsi Jesús xlakata tlan Mapakgsina, xaPuxku Sacerdote chu Juez xaskgalala chu xalakgalhamana nawan?
4 Jehová lakaskin pi xlakskujni xalak katiyatni kachalh kilhtamaku akxni nialh kakgalhikgolh talakgalhin. Pero xlakata nialh nakgalhikgo talakgalhin lakaskinkgo nakamakgtaya chatum Mapakgsina, xaPuxku Sacerdote chu Juez nema lu skgalala chu xalakgalhamana. Wa xlakata Dios lilaksakli Jesús xʼespíritu santo, chu masiyaninit la namakgantaxti tuku liyawanit. Kaʼakxilhwi tuku xlakata tlan wanaw pi Cristo tlan namakgantaxti tuku xTlat lakgayawanit.
5 Kajwatiya Jesús tlakg lakgapasa Dios. Ni anan atanu tiku akglhuwata kata o max millones kata akxtum tawi xtlat chuna la Jesús. Putum uma kilhtamaku, xapuxku xKgawasa lhuwa tuku masiyaninit xTlat, wa xlakata Jesús limapakuwikan «xaliʼukxilhtit wa lantla Dios wa nti ni la ntaʼukxilha» (Col. 1:15). Chu Jesús wa: «Wa nti nkiʼukxilhnitta, ukxilhnitta xaTlat» (Juan 14:9).
6 Jehová wantiku tlakg lakgapasa tuku anan pero Jesús na lu lakgapasa chu kalakgapasa latamanin. Colosenses 1:16, 17 uma tuku wan xlakata xKgawasa Dios: «Xampi wa xpalakata, litamalakatsukulh xlipaks ntu anan nkakgapun, chu ntu anan nkatiyatna; wantu ntasiyukgoy, chu ntu ni tasiyukgoy [...]. Na wa xapulanaja xwanit lantla xlipaks nkatuwaj, chu na wa xpalakata xlitliwakga liʼanan xlipaks nkatuwaj» ¡Kaj kalakpuwanti! Xlakata Jesús «xapuxku skujni», makgtayalh Jehová xlakata natlawa putum tuku anan. Wa xlakata liwana lakgapasa tuku anan chu asta tuku lu tuwa la xʼakskitit latamanin. Xlikana, lhuwa liskgalala kgalhi (Pro. 8:12, 22, 30, 31).
7, 8. ¿La makgtayalh Jesús espíritu santo akxni xlichuwinama Dios?
7 Jesús lilaksakka espíritu santo. Jesús lichuwinalh: «Wa kSpiritu kimPuchinakan nkintalama, Wa cha nkililaksakwililh naklimaxkikgoy limaxkganin xatlan tamakatsinin; Wa nkilimalakgachalh nakmakgtsiyajkgoy wa nti nkgalhikgoy ntalipuwan kxnakukan; chu nakliʼakgchuwinanikgoy ntalakgtaxtun mpatinanin; chu lakgatsinin nalakawanankgoy. Chu nakmalakgtaxtikgoy wa nti xakatsajwananin; chu wa nakliʼakgchuwinan nkata akxni namatlaniy nkimPuchinakan» Jehová (Luc. 4:18, 19). Max akxni Jesús tamunulh, espíritu malakapastakalh tuku xkatsininit kʼakgapun uma wamputun wantuku xlakaskin Dios natlawa Mesías akxni xlama unu Katiyatni (kalikgalhtawakga Isaías 42:1, Lucas 3:21, 22 chu Juan 12:50).
8 Jesús ni xkgalhi talakgalhin kxmakni chu kxtalakapastakni, chu xkgalhi litliwakga nema xmaxki espíritu santo. Wa xlakata ni kaj lu xlakaskinka litaxtulh, wa tlakg xatlan makgalhtawakgena tiku latamalh Katiyatni. Biblia wan pi latamanin “kaks xlakawankgo kaj xpalakata xtakgalhchuwin wantu xla xmasiyu” (Mat. 7:28). Jesús xkatsi niku xlakatsuku xtaʼakglhuwit latamanin: xlakata lakgalhinanin chu ni xkatsikgo xlakata Dios. Nachuna, xkatsi tuku xwi kxnaku latamanin chu xkalikatsini chuna la xakxilha kxnakujkan (Mat. 9:4; Juan 1:47).
9. Akxni lilakpuwanaw xlatamat Cristo, ¿tuku xlakata tlakg kanajlayaw pi wa tlakg tlan Mapakgsina?
9 Jesús chixku kilatamacha kkatiyatni. Wantuku tlawa pi lu tlan Mapakgsina nawan wa xlakata kilatamacha kKatiyatni chu kitalatamakgocha latamanin tiku makglakgalhinanin. Chuna la wa apóstol Pablo, lu xlakaskinka pi «xtachuna xliwanat xwanit lantla xnatalanin, lakimpi chuna ntlan xkilhachuwinakan nawan nti nakgalhinikgoy ntalakgalhaman, chu namakgantaxtiy xtaskujut kxlakatin Dios lantla napalakachuwinankgoy, chu lakimpi tlan napalakgaxokgokgoy xpalakata xtalakgalhinkan. Xampi wa lantla ntilitatokglhli [o liʼakxilhka] xpalakata ntu ntipatilh, chuna nama likgalhiy xlitliwakga nalilakgalhamankgoy namakgtayakgoy wanti nitlan ntu litatokglhmakgo» (Heb. 2:17, 18). Chuna la akxilhaw xlakata lhuwa «ntu ntilitatokglhli», tlan nakalakgalhaman tiku patinamakgolh. Akxni xlama unu kKatiyatni masiyalh pi xkamakgtayaputun amakgapitsin. Putum xtalakatsuwinikgo chu xlipawankgo: tatatlanin, tiku nila xtlawankgo o atanu tuku xkalalinit, tiku xkgalhikgo taʼakglhuwit chu asta laktsu kaman (Mar. 5:22-24, 38-42; 10:14-16). Na xtalakatsuwinikgo tiku tlan xlikatsikgo chu xkatsiputunkgo tuku xaxlikana. Kajwatiya tiku ni xaʼakxilhputunkgo, ksitsinikgo chu xtlawaniputunkgo tuku nitlan wa tiku tlanka xkamakgkatsikan chu tiku “ni xkgalhikgo xtapaxkit Dios” (Juan 5:40-42; 11:47-53).
10. ¿La limasiyalh Jesús pi lu xlikana kinkapaxkiyan?
10 Jesús mastalh xlatamat kimpalakatakan. Xlakata Cristo mastalh xlatamat kimpalakatakan max wa uma litasiya pi ni anan atanu Mapakgsina la xla (kalikgalhtawakga Salmo 40:6-10). Jesús wa: «Ti ni chatum mpala tlakg tlanka nkgalhiy ntapaxkit lantla yuma mpala wi nti napalakamastaniy xlatamat nti mpaxkiy xʼamigo» (Juan 15:13). Mapakgsinanin xala uku lhuwa tuku kgalhikgo xpalakata xtuminkan tiku kamapakgsikgo pero Jesús wata makamastalh xlatamat xpalakata latamanin (Mat. 20:28).
Dios liyawanit xlakata nalimaklakaskin talakgmaxtut
11. ¿Tuku xlakata lu xlikana nalipawanaw Jesús pi kilakgmaxtunakan?
11 Xlikana, lu tlan pi Jesús wa xaPuxku Sacerdote nawan tiku nakinkalimakgtayayan xtamakamastan. Chu tuku tlawalh akxni lichuwinalh Dios unu kKatiyatni masiyalh tuku natlawa xlakata wa Lakgmaxtuna akxni namapakgsinan Akgtum Mil Kata, chu komo akinin ni namakgxtakgaw Dios tlan nalipaxuwayaw uma tasikulunalin. Cristo kamapaksalh tatatlanin, tiku nila xtlawankgo o atanu tuku xkalaninit, kamalakastakwanilh tiku xnikgonita, kamawilh lhuwa latamanin chu asta makaksalh un chu sen (Mat. 8:26; 14:14-21; Luc. 7:14, 15). Chu chuna tlawalh ni nikaj xlakata nalimasiya pi tlan xtlawa chu xkgalhi litliwakga, chuna tlawalh xlakata xpaxkinan chu xlakgalhamanan. Akxni chatum tiku xkgalhi lepra kgalhskilh komo xmakuchiputun, Jesús lakapara kgalhtilh: «Klakaskin, lanchuj tunkan kapaksti» (Mar. 1:40, 41). Akxni namapakgsinan Akgtum Mil Kata na nalimasiya pi lakgalhamanan, pero putum latamanin.
12. ¿La nakgantaxtu tuku wan Isaías 11:9?
12 Jesús chu xcompañeros tiku natamapakgsinankgo, chuntiyaku nakamasiyanikgo latamanin xtalakaskin Dios, uma taskujut titaxtunita max akgtiy mil kata akxni matsukika. Chuna nakgantaxtu tuku tatsokgnit kʼIsaías 11:9: «Katiyatni nalitatsama xtamasiy Jehová chuna la chuchut litsama pupunu». Max nakinkawanikanan la tlan natlawayaw taskujut nema pulana maxkika Adán, xlakata la nakuentajtlawayaw Katiyatni chu lhuwa animales. Akxni nakgalhsputa Akgtum Mil Kata, kgantaxtunita nawan tuku Dios pulana xlakapastaknit, nema lichuwinan Génesis 1:28, chu namakglhtinanaw putum tuku tlan, kaj xpalakata xtamakamastan Jesús.
Dios masiyanilh xlakata juez nawan
13. ¿La limasiyalh Jesús pi xpaxki tuku xaʼakgstitum?
13 «Dios nti liwilinit lijuez naputsananikgoy nti staknankgoyku, chu nti xanina.» (Hech. 10:42.) ¡Lu tlan nalimakgkatsiyaw pi laksakkanit Jesús Juez nawan, xlakata ni kgalhi tuku nitlan, putum kilhtamaku tlawa tuku xaʼakgstitum, ni makgxtakgnan, xtachuna la akgtum cinturón nema litatampachinit! (Isa. 11:5.) Nachuna limasiyanit pi ni akxilhputun tiku lhuwa tuku kgalhiputun, tiku kaj limasiya pi tlan likatsi chu na ni akxilhputun putum tuku nitlan chu kakilhnilh tiku xkamakgapatinankgo amakgapitsin (Mat. 23:1-8, 25-28; Mar. 3:5). Chu ni litaʼakgskgawilh kaj xlakata tuku xakxilha xlakata «stalanka xkatsiy xla wa ntu [xwi kxnaku] [...] nchixku» (Juan 2:25).
14. ¿La limasiya la uku Jesús pi tlawa tuku xaʼakgstitum, chu tuku takgalhskinin natlawayaw?
14 Jesús putum kilhtamaku paxki tuku xaʼakgstitum, chuna litasiya xlakata la uku pulalima tlakg xalanka taskujut, xlakata talichuwinama chu kamasiyanimaka latamanin xlakata Dios. Niti la machokgo uma taskujut nema Dios makgantaxtima chu makgapaxuwa, nipara mapakgsinanin chu nipara demonios. Wa xlakata lu katsiyaw pi kʼArmagedón natatlawa xtalakaskin Dios (kalikgalhtawakga Isaías 11:4 chu Mateo 16:27). Kilitlawatkan umakgolh takgalhskinin: «Akxni kkan lichuwinan Dios, ¿nachuna ktlawa la Jesús? ¿Putum kilatamat klimaxtu xlakata naklichuwinan Dios maski tlan o ni lu tlan klama?».
15. ¿Tuku nakinkamakgtayayan xliputum kilatamatkan naskujniyaw Dios?
15 ¿Tuku nakinkamakgtayayan xlakata xliputum kilatamatkan nalichuwinanaw Dios? Wa nalakapastakaw pi uma taskujut xla Jehová. Xlikana, wa Jehová tiku limapakgsinalh natlawayaw uma taskujut, kinkamaxkiyan espíritu santo xlakata tlan namakgantaxtiyaw chu Jehová limaklakaskin xKgawasa xlakata lipulalima uma taskujut. ¿Lanka talakgalhaman akxilhaw naskujnaniyaw Dios chu Mapakgsina tiku lipulalinkan espíritu? Kajwatiya Jehová tiku tlan tlawa pi liwaka akgtujun millones kstalaninanin Cristo tiku kakilhtamaku kaliʼakxilha la «ni xakgalhtawakganin, kaj xalakchunata» nalichuwinankgo xlakata Tamapakgsin kʼ236 países chu kachikinin (Hech. 4:13).
Kaliskujwi xlakata namakglhtinanaw tasikulunalin xpalakata Cristo
16. ¿Tuku kinkawaniyan Génesis 22:18 nema xlikana nakgantaxtu?
16 Jehová wanilh Abrahán: «Minkamanan natalisikulunatlawa putum kachikinin xalak kkatiyatni xlakata kgalhakgaxmatnita kintachuwin» (Gén. 22:18). Uma tuku wanika Abrahán, tiku paxkikgo Dios kamakgtaya nakanajlakgo pi namakglhtinankgo xtasikulunalin Mesías. Xlakata liwana katsikgo pi namakglhtinankgo umakgolh tasikulunalin, lu xatapaxuwan skujnikgo Dios.
17, 18. ¿Tuku wa Jehová kDeuteronomio 28:2 xlakata israelitas, chu tuku na tlan namakglhtinanaw akinin?
17 Israelitas xkamanan Abrahán xwankgonit chu wa uma tuku Dios kawanilh: «Putum umakgolh tasikulunalin [nema lichuwinan Limapakgsin] nalakgchanan, xlakata chuntiya kgaxmatpat xtachuwin Jehová miDios» (Deu. 28:2). Umakgolh tachuwin na kakilhchanima xkachikin Dios xalak uku. Wa xlakata komo makglhtinamputunaw xtasikulunalin Dios, “chuntiya kakgaxmatwi xtachuwin Jehová”. Komo chuna natlawayaw naʼakxilhaw la nakgantaxtu umakgolh tachuwin: «Umakgolh tasikulunalin nalakgchanan». Pero ¿la nalimasiyayaw pi “kgaxmatmaw xtachuwin Jehová”?
18 Nakgaxmatniyaw Jehová kilhchanima pi lu xlakaskinka naʼakxilhaw xtachuwin chu liwat nema limatliwakglhaw kintakanajlakan nema kinkamaxkiyan (Mat. 24:45). Na nakgalhakgaxmataw Dios chu xKgawasa. Jesús lichuwinalh: «Ni xlipaks wa nti nkiwaniy: “Tlati, Tlati”, natanuy kxtapakgsin akgapun, wampi xman wa nti xtlawalh xtalakaskin nkin Tlat wa nti wi nkakgapun» (Mat. 7:21). Nakgaxmataw Dios na kilhchanima xatapaxuwan nakgalhakgaxmataw xkachikin nema xla lakkaxwilinit: congregación xla kstalaninanin Cristo, niku “kinkamaxkiyan lakchixkuwin” tiku lakgkgolotsin litaxtukgo (Efe. 4:8).
19. ¿Tuku kilitlawatkan xlakata Dios nakinkasikulanatlawayan?
19 Lakchixkuwin nema Dios “kinkamaxkinitan”, wa Lakgkgolotsin tiku Pulalinkgo xTatayananin Jehová, wantiku palakachuwinankgo putum congregación xla kstalaninanin Cristo (Hech. 15:2, 6). Putum kilhtamaku kalilakapastakwi pi chuna la nakalikatsiniyaw umakgolh xnatalan Cristo, wa uma tuku naʼakxilhkan akxni nakinkaputsananikanan klanka tapatin (Mat. 25:34-40). Xlakata Dios nakinkasikulunatlawayan lu xlakaskinka ni nakamakgxtakgaw chu nakamakgtayayaw tiku kalaksakkanit naʼankgo kʼakgapun.
20. 1) ¿Tuku lu xlakaskinka taskujut kalakgayawakanit “lakchixkuwin nema kinkamaxkinitan Dios”? 2) ¿La tlan nalimasiyayaw pi paxtikatsiniyaw xlakata kinkamaxkikanitan umakgolh natalan?
20 “Lakchixkuwin nema kinkamaxkinitan Dios” na kilhchanima tiku tapakgsikgo kComité xla Sucursal, superintendentes viajantes chu lakgkgolotsin tiku pulalinkgo congregación, putum umakgolh kalilaksakkan espíritu santo (Hech. 20:28). Umakgolh natalan tuku tlakg xlakaskinka kalakgayawakanit wa nakuentajtlawakgo xtakanajlakan xkachikin Dios «asta ni liwaya nakgalhiyaw nkilipakskan ntu watiya ntipatum ntakanajla, chu lakatanks [o liwana] nalakgapasaw xKam Dios, chu asta ni liwaya xakatla kanajlanin nawanaw, chu lantla lakatanks nawanaw lantla xtachuna nCristo» (Efe. 4:13). Pero umakgolh tiku kuentajtlawakgo xkachikin Dios kgalhikgo talakgalhin chuna la akinin. Pero akxni xatapaxuwan makglhtinanaw xtamakgtay, makglhtinanaw tasikulunalin.
21. ¿Tuku xlakata lu xlakaskinka nakgalhakgaxmataw xKgawasa Dios?
21 Nialh makgas, Jesús namasputu xkakilhtamaku Satanás. Akxni namasputu, kilatamatkan kxmakan natawila, xlakata Dios lakgayawakanit nakalin «lhuwa tachixkuwitat» o lhuwa latamanin asta niku «anan ntaxtunu nchuchut xla latamat» (Apo. 7:9, 16, 17). Wa xlakata xatapaxuwan katapakgsiniw Cristo, Mapakgsina nema Jehová lipulalin xʼespíritu.
¿Tuku kinkamasinikgoyan umakgolh textos?
• Isaías 11:1-5
[Epígrafe xla página 19]
Jesús limasiyalh pi xlakgalhamanan akxni malakastakwanilh xtsumat Jairo
[Epígrafe xla página 20]
Jesucristo pulalima tlakg xalanka taskujut, xlakata talichuwinama chu kamasiyanimaka latamanin xlakata Dios