Tlakg kakatsini la nalichuwinana Dios: Kakatsini natlawaya cartas

TUKU XLAKATA XLAKASKINKA. Pablo tsokgli 14 cartas xlakata nakamakgpuwantini xnatalan kstalaninanin Cristo, chu xapulana carta nema katsokgnika Corintios na anta makgtanuma. Wi tuku tlan kitaxtu tsokgkan carta: tiku tsokga tlan liwana nalaksaka xtachuwin chu tiku makglhtinan tlan makglhuwa nalikgalhtawakga. Uma pulaktum la tlan nakalitachuwinankan Dios tiku xalak familia, tiku kalakgapasaw chu tiku ni katekgsaw kxchikkan. Akgtum liʼakxilhtit, max tuwa nakatekgsparayaw tiku lakgatilh akxni litachuwinaw Dios o tuwa nakatachuwinanaw tiku wilakgolh kchiki niku lu kuentajtlawakan o niku ni mastakan talakaskin natanukan o niku lu makgat. ¿Tuku kuenta kilitlawatkan akxni tsokgniyaw maktum carta tiku ni lakgapasaw?

LA NATLAWAYAW

• 

  Katsokgti tuku xwanti akxni xtachuwinanti chatum lataman. Pulana kawanti tiku wix chu tuku xlakata tsokgti uma carta. Max tlan natlawaniya akgtum takgalhskinin nema namalakpuwani chu nawaniya pi katanulh kkisitiojkan xla Internet. Alistalh tlan nalitachuwinana takgalhtawakga nema mastakan kʼInternet o takgalhtawakga nema mastayaw kʼakgatunu chiki o tlan nawaniya xtítulo akgtum capítulo xla likgalhtawakga nema maklakaskinaw xlakata namakgalhtawakgenanaw. Tlan namalakgachaniya maktum tarjeta de contacto, maktum invitación o tratado.

• Ni lhuwa tuku katsokgti. Komo chuna xtlawa, lataman max natlakgwan chu ni katilikgalhtawakgolh (kaʼakxilhti carta).

• Kaʼakxilhti pi putum tlan tsokgnita chu ni tuwa likgalhtawakgakan. Kuenta katlawa pi tlan takgaxmata, matliwakglhnan chu masta kakni. Wix kaxokgo tuku nalimalakgachakan carta.