¿Tuku kilitlawatkan xlakata tlan nalatamayaw kxasasti kakilhtamaku?

Kʼartículo nema titaxtulh, katsiw pi uma kakilhtamaku talakatsuwima xlisputni, uma wamputun, pi Dios namasputu uma xalixkajnit kakilhtamaku chu putum taʼakglhuwit. ¿Tuku xlakata katsiyaw pi chuna nala? Xlakata Biblia, xTachuwin Dios, chuna wan:

«Kakilhtamaku nasputa» (1 JUAN 2:17).

Pero na liwana katsiyaw pi naʼanankgo latamanin tiku nalakgtaxtukgo xlakata watiya uma texto kinkawaniyan:

«Tiku tlawa xtalakaskin Dios putum kilhtamaku nalatama».

Wa xlakata, talakaskin nakgalhakgaxmataw Dios xlakata tlan nalakgtaxtuyaw, pero xlakata tlan nakgalhakgaxmataw, pulana talakaskin nalakgapasaw.

KALAKGAPASWI DIOS XLAKATA TLAN NALAKGTAXTUYAW

Makgapitsi dibujos: 1. Kʼakgtum hospital tasiya chatum enfermera tiku tlakgwanit chu lu lakgaputsa. 2. Anta skuja, akxilha pi chatum tiku akxtum taskuja tasiya pi paxuwa akxni likgalhtawakgama maktum revista. 3. Tiku taskuja likgalhtawakgani akgtum texto xalak Biblia chu maxki maktum tarjeta de contacto xla jw.org.

Jesús wa: «Uma kilhchanima latamat nema ni kgalhi xlisputni pi nalakgapaskgoyan wix, kajwatiya xaxlikana Dios» (Juan 17:3). Xlakata nalakgtaxtuyaw kxlisputni uma kakilhtamaku chu putum kilhtamaku nalatamayaw, talakaskin nalakgapasaw Dios, ni kajwatiya talakaskin nakanajlayaw pi Dios xlikana lama chu atanu tuku nakatsiyaw xpalakata, talakaskin xʼamigos nalitaxtuyaw. Akxni xʼamigo litaxtuputunaw chatum lataman, talakaskin nalimaxtuniyaw kilhtamaku. Nachuna kitaxtu komo xʼamigo Dios litaxtuputunaw, kaʼakxilhwi makgapitsi tamasiy xalak Biblia nema nakinkamakgtayayan xʼamigo Dios nalitaxtuyaw.

Tuku Biblia masiya

Dios ankgalhin lakaskinit pi kalatamaw kʼakgtum paraíso.

Dios kamalakatsukilh xapulana latamanin, Adán chu Eva, chu kawililh kʼakgtum xakalilakgatit jardín nema xlilakgapaskan Edén. Ni xkgalhikgo talakgalhin, chu xlakata xpaxuwakgolh, Dios kamaxkilh putum tuku xmaklakaskinkgo. Komo chuntiya xʼamigo Dios xlitaxtukgolh tlan putum kilhtamaku xlatamakgolh, pero laksakkgolh ni nakgalhakgaxmatkgo akgtum ni xatuwa limapakgsin nema Dios xkamaxkinit.

Tuku xlakata patinanaw chu kgalhiyaw taʼakglhuwit.

Akxni Adán, xapulana chixku, kgalhakgaxmatmakgalh Dios, makgatsankgalh tuku lanka xtapalh: nalatama putum kilhtamaku, chu putum latamanin na makgatsankgakgolh uma talakgalhaman. Biblia wan: «Kaj xpalakata chatum chixku talakgalhin tanulh kkakilhtamaku, chu linin xpalakata talakgalhin, chu wa xlakata linin kaʼakgchipalh putum latamanin» (Romanos 5:12). Chuna la chatum tlat, tlan kamatitaxtini xkamanan akgtum tajatat, Adán na kinkamatitaxtinin talakgalhin, wa xlakata kimputumkan kgolonaw chu niyaw.

Wi tuku tlawanita Dios xlakata nakinkamakgtayayan.

Biblia wan: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16). Dios makamilh Jesús kKatiyatni xlakata xmastalh xlatamat kimpalakatakan. Akxni Prabhakar, chatum chixku tiku kgalhi 86 kata lilakpuwa tuku Dios tlawanit, wa: «Uma kilimasiyani pi Jehováa lu kimpaxki. Xtapaxkit kimaxki takgalhkgalhin xlakata naklatama putum kilhtamaku».

Tlan nalimasiyayaw pi paxtikatsiniyaw tuku Dios tlawanit kimpalakatakan.

Biblia wan pi akxni “kgalhakgaxmataw xlimapakgsin” Dios limasiyayaw pi paxtikatsiniyaw tuku tlawanit kimpalakatakan (1 Juan 2:3). Jehová Dios xatapaxuwan kinkamasiyaniyan tuku tlan natlawayaw xlakata nalipaxuwayaw latamat la uku (Isaías 48:17, 18, nota). Dios ni lakaskin napatinanaw. Wa xlakata, kinkamalaknuniyan pi komo nakgalhakgaxmataw, napaxuwayaw la uku chu tlan putum kilhtamaku nalatamayaw.

CHALI CHALI KALIKGALHTAWAKGAW BIBLIA

Akxni lakgchan nawayan, enfermera likgalhtawakga Biblia chu lakan talhman. — Tlan nalakgtaxtuniyaw xlisputni uma kakilhtamaku komo naskiniyaw xtamakgtay Dios chu komo natlawayaw tuku xla lakgati.

Xlikana pi xlakata nalatamayaw, talakaskin chali chali nawayanaw. Pero Jesús wampa: «Ni kajwatiya kaxtalanchu nalilatama chixku, wata putum tachuwin nema taxtu kxkilhni Jehová» (Mateo 4:4).

La uku, kBiblia tekgsaw xTachuwin Jehová. Chuna la likgalhtawakgatilhayaw uma xasanto libro, katsiniyaw tuku Dios tlawalh makgasa, tuku tlawama la uku chu tuku natlawa kkilhtamaku nema aku mima.

KASKINIW XTAMAKGTAY DIOS

Komo tuwa makgkatsiyaw nialh natlawayaw tuku nitlan, ¿tuku tlan natlawayaw komo kgalhakgaxmatputunaw Dios? Komo liwana nalakgapasaw Dios, uma nakinkamakgtayayan xlakata nakgalhakgaxmataw.

Kaʼakxilhwi tuku titaxtulh chatum puskat tiku wanikan Sakura. Xla xtlawa talakgxtumit nema ni xlitatlawat, pero akxni tsukulh likgalhtawakga Biblia, katsinilh pi Dios limapakgsinan: «¡Katsalanitit talakgxtumit nema ni xlitatlawat!» (1 Corintios 6:18). Sakura skinilh xlitliwakga Dios chu uma makgtayalh nalakgpali xlatamat. Maski lakgmakganita uma tayat, chuntiya liskujma. Xla wan: «Akxni min tuku nitlan kkintalakapastakni, klitachuwinan Jehová xlakata kkatsi pi nila kiʼakstu nakmakgatlaja uma. Oración tlawanit pi tlakg naktalakatsuwini Jehová». Chuna la Sakura, lhuwa latamanin lakgapasmakgo Dios, chu xla kamaxkima litliwakga nema maklakaskinkgo xlakata tlan natlawakgo talakgpalit chu nalatamakgo chuna la xla lakaskin (Filipenses 4:13).

Akxni tlakg nalakgapasaw Dios, xla na tlakg nakinkalakgapasan chu xatlan xʼamigos nakinkaliʼakxilhan (Gálatas 4:9; Salmo 25:14). Chuna tlan nalakgtaxtuniyaw xlisputni uma kakilhtamaku chu tlan nalatamayaw kxasasti xkakilhtamaku Dios. ¿La nawan uma kakilhtamaku? Kʼartículo nema stala nalichuwinan.

a Biblia wan pi xtukuwani Dios wa Jehová.