¿Tuku xlakata anan lhuwa tasitsi?

Kakilhtamaku litsama lhuwa tasitsi. ¿Tuku xlakata? Xlakata nakatsiyaw talakaskin naʼakgatekgsaw tuku kilhchanima tasitsi, tuku xlakata latamanin sitsikgo chu la talakgatumi.

¿Tuku tasitsi?

Tasitsi wa tuku makgkatsiyaw xpalakata chatum lataman o lhuwa latamanin. Chu uma tasitsi ni kaj puntsu makgapala.

¿TUKU XLAKATA LATAMANIN LU SITSIKGO?

Latamanin pulaklhuwa tuku xlakata sitsikgo. Makglhuwa, kasitsinikgo amakgapitsin ni kaj xlakata tuku tlawakgo, wata xlakata tuku litaxtukgo. Max lakpuwankgo pi nitlan likatsikgo chu pi katuwa wilikgo xlatamatkan amakgapitsin, o lakpuwankgo pi ni katitalakgpalikgolh. O max lakpuwankgo pi nitu litaxtukgo, pi tlawaputunkgo tuku nitlan o wa malakatsukikgo lhuwa taʼakglhuwit. Nachuna, lhuwa tiku sitsikgo xlakata katlawanika tuku nitlan kxlatamatkan, tuku ni xaʼakgstitum o atanu tuku lu nitlan.

¿LA TALAKGATUMI TASITSI?

Min kilhtamaku, latamanin kasitsinikgo tiku nipara lakgapaskgo. Akgtum liʼakxilhtit, max chatum lataman na natsuku lakpuwan tuku lakpuwan tiku maxki kakni o paxki xlakata amakgapitsi latamanin. Chu akxni lhuwa tiku nachuna lakpuwankgo, tasitsi lakapala talakgatumi.

Akxni akgatekgsaw la lakapala talakgatumi tasitsi, akgatekgsaw tuku xlakata lhuwa latamanin sitsikgo. Pero, xlakata namachokgoyaw tasitsi, xlakaskinka nakatsiyaw niku lakatsukulh. Biblia lichuwinan niku lakatsukulh.

BIBLIA LICHUWINAN NIKU LAKATSUKULH TASITSI

Akgtum diagrama nema kgalhi flechas masiya la talakgatumi tasitsi. 1. Ni xaxlikana tamakatsin kilhtsuku akxni lamatlawikan tuku nitlan, kredes sociales chu niku wi tuku makatsininanka. 2. Tuku ni katsikan xlakata akgtum kachikin, xlakata la tasiyakgo o xlakata akgtum takanajla. 3. Tapekua xlakata tuku talakgpali, xlakata wi tuku namakgatsankgakan o xlakata wi tuku ni liwana lakgapaskan. 4. Tasitsi tlawa pi nalalaksakpaxkikan, nalalakgmakgankan chu nalatlawanikan tuku nitlan.

LATAMANIN NI WA PULANA LIMASIYAKGOLH TASITSI. Tasitsi lakatsukulh kʼakgapun, akxni chatum ángel tiku lilakgapaskan Satanás, talalakatawakalh Dios. Akxni chuna tlawalh, makgnina litaxtulh. Xlakata «xaʼakgsanina chu xtlat taʼakgsanin» chuntiya tlawama pi kaʼanalh tasitsi chu tuku nitlan (Juan 8:44; 1 Juan 3:11, 12). Biblia masiya pi lu nitlan likatsi chu lu sitsinit (Job 2:7; Apocalipsis 12:9, 12, 17).

SITSIYAW XLAKATA KINKAMATITAXNIKANITAN UMA. Xapulana chixku, Adán, stalanilh xliʼakxilhtit Satanás, chu xlakata uma putum latamanin kinkamatitaxtinikanitan talakgalhin (Romanos 5:12). Caín, xapuxku xkgawasa Adán, ksitsini Abel chu, maski xtala xwanit, makgnilh (1 Juan 3:12). Maski latamanin paxkinanaw chu lakgalhamaninanaw, xlakata kinkamatitaxtinikanitan talakgalhin, ni tuwa pi latamanin xʼakstukan nakapaxkikan, lakgkatsalakanankgo chu tlankajwa kamakgkatsikan, umakgolh tayat tlawa pi tlakg naʼanan tasitsi (2 Timoteo 3:1-5).

NI LAKGATIKAN LA LIKATSIKGO AMAKGAPITSIN TLAWA PI NAʼANAN TASITSI. Kakilhtamaku tlawa pi nakgalhikan nitlan tayat chu nitlan talismanin nema tlawa pi kaʼanalh tasitsi. Xlakata «putum kakilhtamaku wi kxmakan Akgskgawini» uma wamputun, Satanás, ni lakgatikan la likatsikgo amakgapitsin, lalaksakpaxkikan, lawanikan chu lamatlawiputunkan tuku nitlan, chu tlawanikan tuku nitlan tapakgsini achatum wa uma tuku chali chali chuna la (1 Juan 5:19).

Pero Biblia ni kaj kinkawaniyan niku lakatsukulh uma taʼakglhuwit, na kinkawaniyan la namasputukan.