Lakgkgolotsin, kastalanitit xliʼakxilhtit Gedeón

1. Chuna la wan 1 Pedro 5:2, ¿tuku kalakgayawakanit lakgkgolotsin?

JEHOVÁ kalakgayawanit lakgkgolotsin xalak congregación nakakuentajtlawakgo xlakskujnin. Xlakan lu xtapalh liʼakxilhkgo nakamakgtayakgo xnatalankan chu lu liskujkgo xlakata tlan pulalinanin nalitaxtukgo (Jer. 23:4; kalikgalhtawakga 1 Pedro 5:2). ¡Lu tlan limakgkatsiyaw pi kcongregaciones wilakgo natalan tiku lu skujkgo!

2. ¿Tuku tuwa titaxtukgo makgapitsin lakgkgolotsin?

² Lakgkgolotsin lhuwa tuku tuwa titaxtukgo xlakata namakgantaxtikgo xtaskujutkan. Akgtum liʼakxilhtit, lu lhuwa xliskujatkan xlakata nakuentajtlawakgo congregación. Kalilakpuwaw tuku titaxtulh Tony, chatum kgolotsin xalak Estados Unidos. Akxilhli pi xtalakaskin nalitaya pi nila x’ama makgantaxti putum tuku xlakgayawaka. Tony lichuwinan: «Akxni tsukulh pandemia xla COVID-19, xʼanan lhuwa taskujut xlakata xlakkaxwilika la natlawakan tamakxtumit chu la nalichuwinankan Dios, chu akit putum xaktlawaputun. Pero maski lu xakliskuja, nila xakmasputu taskujut. Uma tlawalh pi nialh lu xaklikgalhtawakgalh Biblia chu kilikgalhtawakgakan, chu nialh lu xaktlawalh oración». Ilir, chatum kgolotsin xalak congregación xalak Kosovo, tanu tuku titaxtulh. Xlama anta niku xʼanan guerra chu lu tuwa xmakgkatsi namakgantaxti tuku xwan xkachikin Jehová. Xla wan: «Akxni sucursal kiwanilh pi xakkamakgtayalh natalan tiku xlamakgo niku tlakg katuwa xwanit, lu kpekualh. Lu tuwa xakmakgkatsi, chu ni lu tlan xtakgaxmata tuku xkachikin Jehová xkiwani pi xaktlawalh». Chu chatum misionero xalak Asia tiku wanikan Tim lu tuwa xmakgkatsi namakgantaxti putum tuku xlakgayawakanit. Xla wan: «Xmin kilhtamaku xakmakgkatsi pi lu xaktlakgwanit xlakata nakkamakgtaya natalan». ¿Tuku tlan natlawakgo lakgkgolotsin akxni chuna natitaxtukgo?

3. ¿La tlan kimputumkan nalitamakgtayayaw xliʼakxilhtit Gedeón?

³ Lakgkgolotsin lhuwa tuku tlan nakatsinikgo xlakata xliʼakxilhtit Gedeón (Heb. 6:12; 11:32). Xla xkuentajtlawa chu xpulalin xkachikin Dios (Juec. 2:16; 1 Crón. 17:6). Xtachuna la Gedeón, lakgkgolotsin xalak kinkilhtamakujkan kalakgayawakanit nakuentajtlawakgo xkachikin Dios kʼuma lu xatuwa kilhtamaku (Hech. 20:28; 2 Tim. 3:1). Lhuwa tuku nakatsinikgo xlakata la xtayani, xtaktuju, xkgalhakgaxmatninan chu xlitaya pi ni putum xmatlani. Nachuna, xli’akxilhtit Gedeón nakamakgtaya putum congregación xlakata xtapalh naliʼakxilhkgo xtaskujutkan lakgkgolotsin chu xatapaxuwan nakamakgtayakgo (Heb. 13:17).

AKXNI TUWA TAMAKGKATSI TAKTUJUKAN CHU LITAYAKAN PI NILA PUTUM TLAWAKAN

4. ¿La limasiyalh Gedeón pi xtaktuju chu pi nila putum xtlawa?

⁴ Gedeón taktujulh chu litayalh pi nila putum xtlawa.b Akxni chatum ángel wanilh pi Jehová xlaksaknit xlakata xkalakgmaxtulh israelitas, xlakata madianitas xkaʼakgchipakgonit, xla kgalhtinalh: «Kinchik wa tiku tlakg xaʼaktsu nema tapakgsini Manasés, chu akit tiku tlakg ni xlakaskinka kxchik kintlat» (Juec. 6:15). Xla xlakpuwan pi nila xʼama makgantaxti uma taskujut. Pero Jehová xkatsi pi tlan xʼama makgantaxti, chu makgtayalh xlakata tlan xkitaxtunilh.

5. ¿Tuku max natlawa pi lakgkgolotsin tuwa namakgkatsikgo nalimasiyakgo tataktujut chu nalitayakgo pi nila putum tlawakgo?

⁵ Lakgkgolotsin lu liskujkgo nataktujukgo chu nalimasiyakgo pi nila putum tlawakgo (Miq. 6:8; Hech. 20:18, 19). Ni litlankajwanankgo tuku katsinikgo tlawakgo chu tuku tlan makgantaxtikgo, chu akxni wi tuku nitlan kakitaxtuni ni lakpuwankgo pi nialhla tuku tlawakgo. Pero min kilhtamaku, titaxtukgo tuku tlawa pi tuwa namakgkatsikgo nalimasiyakgo tataktujut chu nalitayakgo pi nila putum tlawakgo. Kalichuwinaw makgapitsi liʼakxilhtit, max lakgkgolotsin makglhtinankgo lhuwa taskujut chu alistalh akxilhkgo pi nila putum tlawakgo. O max nitlan kalichuwinankan xlakata la tlawakgolh akgtum taskujut kcongregación, o max kamalankikan xlakata tlawakgolh akgtum lu tlan taskujut. Akxni lakgkgolotsin chuna natitaxtukgo, ¿la tlan nakamakgtaya xliʼakxilhtit Gedeón?

6. Chuna la Gedeón, ¿la tlan nalimasiyakgo lakgkgolotsin pi nila putum tlawakgo? (Na kaʼakxilhti dibujo).

⁶ Kaskintit tamakgtay. Chuna la Gedeón, tiku katsi pi nila putum tlan tlawa, kaskini xtamakgtaykan amakgapitsin (Juec. 6:27, 35; 7:24). Lakgkgolotsin tiku limasiyakgo liskgalala nachuna tlawakgo. Tony, tiku lichuwinaw kpárrafo 2, wan: «Xlakata tuku kkatsinilh akxni aktsujku xakwanit, xakmakgamakglhtinan putum taskujut maski ni putum xakmatlani. Xtalakaskin xaklimasiyalh pi nila putum tlan xaktlawa. Wa xlakata klakpuwa pi akxni xakkakninaniw Dios kfamilia xakkamaw lichuwinanaw uma tayat chu kskinilh kimpuskat pi xkiwanilh tuku xlakpuwan. Na kakxilhli akgtum video kjw.org nema wanikan Chuna la Jesús, kakamasiyaniw chu kakalipawaw». Tony tsukulh kaskini tamakgtay amakgapitsin chu kinkawaniyan tuku tlan kitaxtulh: «Liwana tlawamaka putum taskujut xalak congregación chu la uku tlakg kkgalhi kilhtamaku xlakata nakmatliwakglha chuna la ktalalin Jehová».

7. ¿La tlan nastalanikgo lakgkgolotsin xliʼakxilhtit Gedeón akxni wi tiku nitlan kalichuwinan? (Santiago 3:13).

⁷ Ni kasitsitit akxni nitlan nakalichuwinankanatit. Akxni chatum kgolotsin nitlan lichuwinankan, max natlawa pi tuwa namakgkatsi nataktuju. Xliʼakxilhtit Gedeón tlan chuntiya nakamakgtaya lakgkgolotsin. Xla xkatsi pi makglakgalhina xwanit chu ni lisitsilh akxni lakchixkuwin xalak xtribu Efraín nitlan lichuwinankgolh (Juec. 8:1-3). Gedeón taktujulh chu kakgaxmatnilh, chu uma tlawalh pi xlakan nialh ksitsikgolh. Lakgkgolotsin tlan nastalanikgo xliʼakxilhtit Gedeón, akxni wi tiku nitlan nakalichuwinan, kaks xlikgaxmatatkan chu ni xatasitsi nakakgalhtikgo (kalikgalhtawakga Santiago 3:13). Akxni chuna tlawakgo makgtayanankgo naʼanan takaksni kcongregación.

8. ¿Tuku xlitlawatkan lakgkgolotsin akxni kamalankikan? Kawili akgtum liʼakxilhtit.

⁸ Wa kamalankitit Jehová. Akxni malankika Gedeón xlakata kamakgatlajalh madianitas, xla ni makgamakglhtinalh, wata wa malankilh Jehová (Juec. 8:22, 23). ¿La tlan nastalanikgo lakgkgolotsin xliʼakxilhtit Gedeón? Namalankikgo Jehová akxni wi tuku tlan nakakitaxtuni (1 Cor. 4:6, 7). Akgtum liʼakxilhtit, komo chatum kgolotsin nawanikan pi lu tlan la masiya, max tlan nakgalhtinan pi tuku lichuwinalh kilhtiyalh kxTachuwin Jehová chu pi xlakata xkachikin Jehová liwana kinkamasiyaniyan, kimputumkan lu tlan makgalhtawakgenanin nalitaxtuyaw. Lakgkgolotsin na tlan nalilakpuwankgo komo wa Jehová limalankimakgo chuna la masiyakgo o komo kaj xʼakstukan kalimalankikan. Kalilakpuwaw tuku titaxtulh chatum tala tiku wanikan Timothy. Akxni kgolotsin xalak congregación limaxtuka, lu xlakgati xmasta taʼakgchuwin. Xla wan: «Lu liwana xaklakkaxwili tuku xaklimatsuki kintaʼakgchuwin chu xaklichuwinan laklhman liʼakxilhtit, chu wa xlakata natalan xkiwanikgo lu laktlan tachuwin. Pero uma xlimasiya pi ni wa Jehová xakmalankima, wata ki’akstu xkimalankimaka». Titaxtulh kilhtamaku, Timothy akxilhli pi xlilakgpalit xwanit la xmasta xtaʼakgchuwin xlakata ni wa xmalankika (Prov. 27:21). ¿La kitaxtunilh? Xla wan: «La uku lhuwa natalan kiwanikgo pi kintaʼakgchuwin kamakgtayalh natayanikgo akxni xkgalhikgo akgtum taʼakglhuwit, akxni tuwa xtitaxtumakgo chu kamakgtaya tlakg tlan natalalinkgo Jehová. Umakgolh tachuwin tlakg kimakgapaxuwa nixawa tachuwin nema xkilimalankikgo xapulana».

AKXNI TUWA TAMAKGKATSI KGALHAKGAXMATNANKAN CHU NI PEKUANKAN

9. ¿Tuku titaxtulh Gedeón niku xtalakaskin xlimasiyalh pi xkgalhakgaxmatninan chu ni xpekuan? (Kaʼakxilhti xmakni revista).

⁹ Akxni Jehová aku xlaksaknit Gedeón xlakata juez xlitaxtulh, wi tuku titaxtulh niku xtalakaskin pi xlimasiyalh pi xkgalhakgaxmatninan chu ni xpekuan. Lakgayawaka akgtum lu tuwa taskujut: xlimalakgsputut xwanit pumakamastan nema xtlat xtlawaninit Baal (Juec. 6:25, 26). Alistalh Gedeón kamastokgli ksoldados, pero Jehová wanilh pi lhuwa soldados xkgalhi (Juec. 7:2-7). Chu wanilh pi itat tsisni xʼalh katalatlawa xtalamakgasitsin (Juec. 7:9-11).

10. ¿Tuku max natlawa pi lakgkgolotsin tuwa namakgkatsikgo nakgalhakgaxmatnankgo?

¹⁰ Lu xlakaskinka pi lakgkgolotsin nakgalhakgaxmatnankgo (Sant. 3:17). Akxni chatum kgolotsin kgalhakgaxmatnan, xatapaxuwan stalani xtapulalit Biblia chu xkachikin Dios, chu chuna kawilini tlan li’akxilhtit amakgapitsin. Pero max min kilhtamaku tuwa makgkatsi nakgalhaxmatnan. Max tuwa makgkatsi namakgamakglhtinan tuku xasasti lakkaxwili xkachikin Dios o nalilakpuwan komo xlikana tlan nakitaxtu komo nakgalhakgaxmatninan. O max naskinikan pi katlawalh tuku max nalitamaknukan kpulachin. Akxni chuna la, ¿la tlan nastalanikgo lakgkgolotsin xli’akxilhtit Gedeón chu nakgalhakgaxmatnankgo?

11. ¿Tuku nakamakgtaya lakgkgolotsin nakgalhakgaxmatnankgo?

¹¹ Kuenta katlawatit tuku kawanikanatit chu kamakgantaxtitit. Dios wanilh Gedeón la xlimalakgsputut xwanit pumakamastan nema xtlawanit xtlat, niku xʼama tlawa xpumakamastan Jehová chu tuku animal xʼama makamasta. Gedeón ni kgalhskininalh tuku xlakata chuna xlitlawat xwanit, wata tunkun kgalhakgaxmatnalh. La uku, xkachikin Jehová kamalakgachani cartas lakgkgolotsin xlakata nakawani tuku xlitlawatkan. Uma kamakgtaya xlakata nakinkakuentajtlawakgoyan. Lu xtapalh kaliʼakxilhaw lakgkgolotsin xlakata tlawakgo putum tuku kawani xkachikin Jehová. Xlakata xlakan kgalhakgaxmatnankgo, putum congregación litamakgtaya (Sal. 119:112).

12. Akxni xkachikin Jehová wan pi wi tuku xlitalakgpalit, ¿la namakgantaxtikgo lakgkgolotsin Hebreos 13:17?

¹² Kamakgamakglhtinantit tuku talakgpali. Kalakapastakwi pi Jehová wanilh Gedeón pi kaj ni lhuwa soldados xkatatamakgxtakgli (Juec. 7:8). Max Gedéon lakpuwa: «¿Xlikana talakaskin chuna naktlawa? ¿Tlan nakitaxtu?». Maski chuna, Gedeón kgalhakgaxmatnalh. La uku lakgkgolotsin stalanikgo xliʼakxilhtit Gedeón akxni makgantaxtikgo tuku xkachikin Jehová wan pi xlitalakgpalit (kalikgalhtawakga Hebreos 13:17). Kalilakpuwaw tuku lalh kkata 2014 akxni Lakgkgolotsin tiku Pulalinankgo lakgpalikgolh la xʼamaka xokgokan akxni xtlawaka akgtum Pukgalhtawakga (2 Cor. 8:12-14). Makgasa, xkamasakuanikan tumin congregaciones xlakata xtlawakgolh xpukgalhtawakgakan, chu alistalh xlimaspitatkan xwanit uma tumin. Pero la uku mastokgwilikan tumin nema mastakgo congregaciones xlikalanka katiyatni xlakata natlawakan Pukgalhtawakga niku talakaskin, maski congregación nema natlawanikan xPukgalhtawakga max nila lhuwa tumin masta. Akxni chatum kgolotsin tiku wanikan José katsilh pi xlakkaxwilikanit uma, lakpuwa pi max nitlan xʼama kitaxtu. Xla wa: «Uma max tlan nakitaxtu kʼalakatanu kachikinin, pero unu ni. Nipara akgtum Pukgalhtawakga katitlawaka». Maski chuna xlakpuwan, kgalhakgaxmatnalh. ¿Tuku xlakata? Xla kinkawaniyan: «Klakapastakli tuku wan Proverbios 3:5, 6, niku wan pi talakaskin naklipawan Jehová. ¡Chu lu tlan kitaxtunit! Ni kajwatiya tlawanitaw lhuwa Pukgalhtawakga, wata na katsininitaw nalimakgtayananaw tuku matlaniyaw».

13. 1) ¿Tuku liwana xkatsi Gedeón? 2) ¿Tuku tlan natlawakgo lakgkgolotsin xlakata nalimasiyakgo tayat chuna la Gedeón? (Na ka’akxilhti dibujo).

¹³ Ni kapekuantit chu kamakgantaxtitit xtalakaskin Jehová. Gedeón kgalhakgaxmatli Jehová maski xpekuan chu maski katuwa xwi xlatamat (Juec. 9:17). Akxni Jehová limasiyanilh pi xʼama makgtaya, Gedeón liwana katsilh pi Jehová xmakgtayalh nakuentajtlawa xkachikin. Lakgkgolotsin tiku lamakgo niku ni mastakan talakaskin natlawayaw kintaskujutkan limasiyakgo tayat nema xkgalhi Gedeón. Limasiyakgo pi ni pekuankgo akxni lakkaxwilikgo tamakxtumit chu lichuwinankgo Dios maski nakalitamaknukan kpulachin, nakakgalhputsakan, nakamakglhtikan xtaskujutkan o asta nakawilinikan.c Akxni lama nawan lhuwa tapatin, natalakaskin pi lakgkgolotsin ni napekuankgo xlakata nakgalhakgaxmatkgo tuku nakawani xkachikin Jehová asta maski kalipekua nawilikgo xlatamatkan. Max nakawanikan la nalichuwinankgo nixatlan tamakatsinin, nema xtachuna la laklanka chijit nawankgo. O max nakawanikan tuku xlitatlawat nawan xlakata nalakgtaxtuyaw akxni Gog xalak Magog nakinkamasputuputunan (Ezeq. 38:18; Apoc. 16:21).

AKXNI TUWA TAMAKGKATSI TAYANIKAN

14. ¿La limasiyalh Gedeón pi lhuwa kskuja chu nitu xmalakgachokgo?

¹⁴ Xlakata Gedeón juez xalak Israel xlitaxtu, lu lhuwa skujli. Akxni madianitas tsalakgolh katsisni akxni xkatalatlawamaka, xla kaputsastalanilh lata kJezreel asta kkgalhtuchokgo Jordán, niku max lu xʼanan lhtukun (Juec. 7:22). ¿Tuku tlawalh Gedeón? ¿Talakgachokgolh? ¡Nichuna! Maski xla chu 300 ksoldados xtlakgwankgonit, patakutkgolh kgalhtuchokgo chu chuntiya kaputsastalanikgolh xtalamakgasitsinkan. Kamataxtukkgolh madianitas chu kamakgatlajakgolh (Juec. 8:4-12).

15. ¿Tuku tuwa titaxtukgo lakgkgolotsin?

¹⁵ Chatum kgolotsin tiku kuentajtlawa congregación chu xfamilia, max lu tlakgwanit namakgkatsi. ¿La tlan nastalanikgo xliʼakxilhtit Gedeón lakgkgolotsin tiku lu tlakgwankgonit makgkatsikgo?

16, 17. 1) ¿Tuku makgtayalh Gedeón natayani? 2) ¿Tuku tlan nalipawankgo lakgkgolotsin? (Isaías 40:28-31; na kaʼakxilhti dibujo).

¹⁶ Kalipawantit pi Jehová nakamaxkiyan litliwakga. Wa uma tuku tlawalh Gedeón, chu Jehová makgtayalh (Juec. 6:14, 34). Makgtum, Gedeón chu ksoldados katantun kaputsastalanikgolh chatiy mapakgsinanin xalak Madián tiku xtsalamakgo kxcamelloskan (Juec. 8:12, 21). Pero umakgolh israelitas ni talakgachokgokgolh chu xlakata Jehová kamakgtayalh, tlan kamataxtukkgolh umakgolh mapakgsinanin chu kamakgatlajakgolh. Lakgkgolotsin xala uku na tlan nalipawankgo Jehová, Dios tiku «ni xlajwanan chu ni tlakgwan». Xla nakamaxki litliwakga akxni namaklakaskinkgo (kalikgalhtawakga Isaías 40:28-31).

¹⁷ Kalichuwinaw xliʼakxilhtit Matthew, tiku makgtapakgsi kComité de Enlace con los Hospitales. ¿Tuku makgtaya natayani? Xla wan: «Kgantaxtunit kkilatamat tuku wan Filipenses 4:13. Makglhuwa, akxni lu ktlakgwanit chu kmakgkatsi pi nialhla tuku ktlawa, ktasaskini Jehová pi kakimaxkilh litliwakga xlakata tlan nakkamakgtaya natalan. Ama kilhtamaku kmakgkatsi pi Jehová kimaxki litliwakga xlakata naktayani». Chuna la Gedeón, lakgkgolotsin lu liskujkgo xlakata nakakuentajtlawakgo kskujnin Jehová maski titaxtukgo tuku tuwa. Xlikana, xlakan xlilakapastakatkan pi nila katitlawakgolh putum tuku tlawaputunkgo. Maski chuna, lakgkgolotsin lipawankgo pi Jehová nakgaxmata akxni natasaskinikgo tamakgtay chu nakamaxki litliwakga xlakata chuntiya natlawakgo xtaskujutkan (Sal. 116:1; Filip. 2:13).

18. Chuna la akxilhnitaw, ¿la tlan nastalanikgo lakgkgolotsin xliʼakxilhtit Gedeón?

¹⁸ Chuna la akxilhnitaw, lakgkgolotsin lhuwa tuku tlan nakatsinikgo xlakata xliʼakxilhtit Gedeón. Talakaskin nalitayakgo pi nila putum tlawakgo chu nataktujukgo akxni nakalakgayawaputunkan tlakg lhuwa taskujut kcongregación chu akxni kawanikan laktlan tachuwin xlakata wi tuku tlan tlawakgolh o akxni nitlan kalichuwinankan. Na talakaskin nakgalhakgaxmatnankgo chu ni napekuankgo, liwaka la uku xlakata talakatsuwima xlisputni uma kakilhtamaku. Chu talakaskin nalipawankgo pi maski kaxatukawa tuku nala, Jehová nakamaxki litliwakga xlakata natayanikgo. Xlikana pi lu xtapalh kaliʼakxilhaw umakgolh natalan tiku lu palha skujkgo (Filip. 2:29).