¿Tuku kinkamasiyaniyan tuku wa Jacob? (Xlipulaktiy)

1. ¿Tuku naʼakxilhaw kʼuma artículo?

XLAKGKGAWASAN Jacob xtamakxtumikgonit xlakata xkgaxmatputunkgo tuku xʼamaka kawanikan. Kxapulana artículo akxilhwi pi tuku kawanika Rubén, Simeón, Leví chu Judá xputumkan lu kaks kamalakawanilh chu xlilakgaputsamakgo. ¿Tuku xʼama kawani Jacob atanu kgalhtsayan xlakgkgawasan? Kaʼakxilhwi tuku kinkamasiyaniyan tuku kawanika Zabulón, Isacar, Dan, Gad, Aser, Neftalí, José chu Benjamín.a

ZABULÓN

2. ¿Tuku lichuwinalh Jacob xpalakata Zabulón, chu la kgantaxtulh? (Génesis 49:13; na kaʼakxilhti recuadro).

² (Kalikgalhtawakga Génesis 49:13). Jacob lichuwinalh pi xkamanan Zabulón xʼamakgo tawilakgo kxilhtun pupunu, kxnorte tiyat nema xkamalaknunikanit israelitas. Titaxtulh liwaka 200 kata, xtribu Zabulón kamaxkika tiyat nema xwi kxkilhtun pupunu xla Galilea chu kxkilhtun pupunu Mediterráneo. Nachuna, Moisés lichuwinalh xpalakata Zabulón: «Kapaxuwa, oh Zabulón, niku laktaxtuya, chu wix Isacar, klaktsu minchik» (Deut. 33:18). ¿Tuku xwamputun Moisés? Max xwamputun pi xlakata xtribu Zabulón xwi kxlakgstipan akgtiy pupunu, ni tuwa kstanankgo chu xtamawanankgo. Maski ni liwana katsiyaw tuku xwamputun Moisés, xtribu Zabulón lhuwa tuku tlan xlipaxuwalh.

3. ¿Tuku nakinkamakgtayayan chuntiya napaxuwayaw?

³ ¿Tuku kinkamasiyaniyan? Kaxanikawa niku lamaw o tuku titaxtumaw, ankgalhin naʼanan tuku nalipaxuwayaw, wa xlakata wa kalilakpuwaw tuku tlan kgalhiyaw (Sal. 16:6; 24:5). Max min kilhtamaku ni lipaxuwayaw tuku tlan kgalhiyaw xlakata kajwatiya lilakpuwamaw tuku ni kgalhiyaw. Wa xlakata, wa kalilakpuwaw tuku tlan kinkakitaxtuniyan chu tuku kinkamakgapaxuwayan (Gál. 6:4).

ISACAR

4. ¿Tuku lichuwinalh Jacob xpalakata Isacar, chu la kgantaxtulh? (Génesis 49:​14, 15; na kaʼakxilhti recuadro).

⁴ (Kalikgalhtawakga Génesis 49:​14, 15). Jacob wanilh laktlan tachuwin Isacar xlakata palha kskuja, chu wanilh pi xtachuna xwanit tantum burro nema kgalhi lakgtliwakga xlukut, tantun animal nema tlan lin tsinka takuka. Na wa pi Isacar xʼama latama kxatlan tiyat, chu uma kgantaxtulh akxni xkamanan Isacar kamaxkika tiyat lakatsu kkgalhtuchokgo Jordán, anta niku lu tlan xmakgalanankan (Jos. 19:22). Xlakan max lu palha skujkgolh xlakata xchananankgolh, pero na lu liskujkgolh xlakata xkamakgtayakgolh amakgapitsin (1 Rey. 4:​7, 17). Kalilakpuwaw tuku lalh kxkilhtamakujkan juez Barac chu palakachuwina Débora. Xlakan skinkgolh tamakgtay xlakata x’amakgo talatlawakgo Sísara, chu xtribu Isacar talaknukgolh xlakata namakgtayanankgo (Juec. 5:15).

5. ¿Tuku xlakata palha kiliskujnanitkan Jehová?

⁵ ¿Tuku kinkamasiyaniyan? Jehová lu xtapalh liʼakxilha tuku tlawayaw xlakata naskujnaniyaw, chuna la xtapalh liʼakxilhli tuku tlawalh xtribu Isacar (Ecl. 2:24). Kakalilakpuwaw lakgkgolotsin xalak congregación (1 Tim. 3:1). Lu palha skujkgo xlakata nakakuentajtlawakgo natalan. Maski xlakan ni ankgo kʼguerra chuna la xtribu Isacar, lu kakuentajtlawakgo xlakskujnin Jehová xlakata nitu nalaktlawa chuna la talalinkgo (1 Cor. 5:​1, 5; Jud. 17-23). Na lu liskujkgo xlakata nalakkaxwilikgo chu namastakgo taʼakgchuwin xlakata nakamatliwakglhkgo natalan (1 Tim. 5:17).

DAN

6. ¿Tuku taskujut lakgayawaka xtribu Dan? (Génesis 49:​17, 18; na kaʼakxilhti recuadro).

⁶ (Kalikgalhtawakga Génesis 49:​17, 18). Jacob wa pi Dan xʼama litaxtu chuna la tantum luwa nema tlan matakgawi tantum kawayu nema linkan kʼguerra chu soldado nema kgetawila. Xtachuna la uma, Dan xʼama kamakgatlaja xtalamakgasitsin maski tlakg laklanka chu lakgtliwakgan xwankgolh nixawa xla. Uma tribu ni xʼama pekuan chu xʼama katalatlawa xtalamakgasitsin Israel. ¿La kgantaxtulh uma? Akxni israelitas xʼamakgo akgchipakgo tiyat nema xkamalaknunikanit, xtribu Dan xʼama kxchakgen putuminika kachikin xlakata xkakuentajtlawama (Núm. 10:25). Maski amakgapitsin israelitas nila xʼakxilhkgo tuku xtlawama uma tribu, xtaskujutkan lu xlakaskinka xwanit.

7. Akxni wi tuku tlawayaw xlakata naskujnaniyaw Jehová, ¿tuku ankgalhin kililakapastakatkan?

⁷ ¿Tuku kinkamasiyaniyan? Xliputum tuku tlawayaw xlakata naskujnaniyaw Jehová, wilakgo makgapitsi taskujut tuku tlawayaw nema ni tasiya, chuna la akxni kaxakayaw o makgtayananaw akxni wi tuku kaxtlawakan kPukgalhtawakga chu akxni makgtayananaw kʼakgtum asamblea. Komo wix makgtlawanita umakgolh taskujut, kkawaniputunan pi tlan tuku tlawanita. Pero nikxni kapatsankga pi Jehová xlakaskinka liʼakxilha putum tuku tlawaya. Xla katsi pi chuna tlawaya xlakata paxkiya chu ni kaj xlakata lakaskina pi amakgapitsin namalankikgoyan (Mat. 6:​1-4).

GAD

8. ¿Tuku xlakata lu kalipekua xwanit niku xwi xtribu Gad? (Génesis 49:19; na kaʼakxilhti recuadro).

⁸ (Kalikgalhtawakga Génesis 49:19). Jacob lichuwinalh pi kgalhananin xʼamakgo tlawanikgo tuku nitlan Gad. Titaxtulh liwaka 200 kata, uma tribu kamaxkika tiyat kxʼeste Jordán, lakatsu niku xwilakgo lhuwa xtalamakgasitsinkan. Wa xlakata max xtalamakgasitsinkan xkatlawaniputunkgo tuku nitlan. Pero uma tribu anta xtawilaputunkgo xlakata xʼanan lhuwa sekget niku tlan xwayankgolh xʼanimaleskan (Núm. 32:​1, 5). Uma tribu ni xpekuankgo chu xlipawankgo pi Jehová xʼama kamakgtaya nakamakgatlajakgo xtalamakgasitsinkan, xlakata wa xkamaxkinit uma tiyat. Nachuna, akglhuwa kata uma tribu kamalakgachakgolh ksoldados kxaʼalakgaputu Jordán xlakata xkamakgtayakgolh amakgapitsi tribus xʼakgchipakgolh tiyat nema xkalakgchan (Núm. 32:​16-19). Liwana xkatsikgo pi Jehová xʼama kakuentajtlawa xfamiliaskan akxni xlakan xʼankgolh kʼguerra. Chu xla kasikulunatlawalh xlakata ni xpekuankgo chu kamakgtayakgolh amakgapitsin maski xlakan na tuwa tuku xtitaxtumakgo (Jos. 22:​1-4).

9. ¿Tuku xatapaxuwan natlawayaw komo nalipawanaw Jehová?

⁹ ¿Tuku kinkamasiyaniyan? Talakaskin ankgalhin nalipawanaw Jehová, liwaka akxni titaxtumaw tuku tuwa (Sal. 37:3). La uku, lhuwa natalan xatapaxuwan wi tuku limakgxtakgkgonit xlakata naʼankgo makgtayanankgo niku katlawakan Pukgalhtawakga o atanu tuku tlawa xkachikin Jehová. Na ankgo makgtayanankgo niku tlakg talakaskin nalichuwinankan Dios, o makgantaxtikgo atanu taskujut nema kalakgayawakan kxkachikin Jehová. ¿Tuku xlakata chuna tlawakgo? Xlakata lipawankgo Jehová chu katsikgo pi xla ankgalhin nakakuentajtlawa (Sal. 23:1).

ASER

10. ¿Tuku nitlan tlawalh xtribu Aser? (Génesis 49:20; na kaʼakxilhti recuadro).

¹⁰ (Kalikgalhtawakga Génesis 49:20). Jacob wa pi xtribu Aser lhuwa tuku xʼama kgalhi, chu chuna lalh. Makgapitsi tiyat nema kamaxkika wa nema tlakg xmakgalanankgo kxliputum Israel (Deut. 33:24). Nachuna, xtiyatkan xkitapakgta kpupunu Mediterráneo, niku xwi Sidón. Uma kachikin lu xlakaskinka xwanit xlakata anta xchinkgo barcos nema xliminkgo chu xlinkgo listat. Pero xtribu Aser lu nitlan tuku tlawakgolh, ni katamakxtukgolh putum cananeos k’umakgolh kachikinin, chu xlakan kamapasikgolh nixatlan xtapuwankan (Juec. 1:​31, 32). Xlakata lhuwa tumin xkgalhikgo chu xlakata kapasalh xtapuwankan cananeos, nialh lu xlakaskinka liʼakxilhkgolh naskujnanikgo Jehová. Akxni juez Barac skilh tamakgtay xlakata xʼankgolh katalachipakgo cananeos, xtribu Aser ni ankgolh makgtayanankgo. Wa xlakata ni akxilhkgolh putum tuku Jehová tlawalh xlakata xkalakgmaxtulh xkachikin «lakatsu kxchuchut Meguidó» (Juec. 5:​19-21). Chu max lu lakamaxanankgolh akxni katsikgolh tuku Barac chu Débora xlikilhtlinikgonit Jehová xlakata xkamakgtayanit natlajanankgo. Uma takilhtlin xwan pi «Aser tamakgxtakgli kxkilhtun pupunu» chu nitu tlawalh (Juec. 5:17).

11. ¿Tuku xlakata ni lu xlakaskinka naliʼakxilhaw tuku lhuwa xtapalh?

¹¹ ¿Tuku kinkamasiyaniyan? Akinin maxkiputunaw Jehová putum tuku tlan kgalhiyaw, wa xlakata ni mastayaw talakaskin nakinkapasayan nixatlan xtapuwankan latamanin xalak kakilhtamaku, tiku lakpuwankgo pi tumin chu tuku lhuwa xtapalh tlakg xlakaskinka (Prov. 18:11). Maski maklakaskinaw tumin, ni lakpuwanaw pi wa tlakg xlakaskinka nixawa naskujnaniyaw Jehová (Ecl. 7:12; Heb. 13:5). Na ni limakgatsankgayaw kinkilhtamakujkan chu kilitliwakgakan xlakata nakgalhiyaw tuku lhuwa xtapalh nema ni maklakaskinaw, xlakata uma natlawa pi nialh naskujnaniyaw Jehová. Wata maxkiyaw Jehová kilitliwakgakan, kinkilhtamakujkan chu putum tuku tlakg tlan kgalhiyaw xlakata katsiyaw pi kkilhtamaku nema aku mima nakinkamaxkiyan tlakg xatlan latamat (Sal. 4:8).

NEFTALÍ

12. ¿La max kgantaxtulh tuku lichuwinalh Jacob xpalakata Neftalí? (Génesis 49:21; na kaʼakxilhti recuadro).

¹² (Kalikgalhtawakga Génesis 49:21). Jacob wa pi Neftalí xʼama maklakaskin «lakglilakgatit tachuwin» akxni xchuwinalh. Uma max kgantaxtulh kxlatamat Jesús, xlakata akxni xmasiya xmaklakaskin lakglilakgatit tachuwin chu lu liwana xmasiya (Juan 7:46). Xla lhuwa kilhtamaku latamalh kCapernaúm, nema xmakgtapakgsi kxtiyat Neftalí, chu wa xlakata Biblia wan pi wa xkachikin Jesús xwanit (Mat. 4:13; 9:1). Nachuna, Isaías wa pi Jesús xʼama litaxtu «lanka xkgakganat» xpalakata xtribu Zabulón chu Neftalí (Is. 9:​1, 2). Jesús litaxtulh «xaxlikana makgskgot nema makaxkgakgenani putum lakchixkuwin» xlakata lu tlan xmasiya (Juan 1:9).

13. ¿Tuku kilitlawatkan komo makgapaxuwaputunaw Jehová?

¹³ ¿Tuku kinkamasiyaniyan? Jehová lu xlakaskinka liʼakxilha tuku wanaw chu la wanaw. Komo makgapaxuwaputunaw, kilimaklakaskinatkan «lakglilakgatit tachuwin». ¿Chu la natlawayaw? Ankgalhin nawanaw tuku xaxlikana (Sal. 15:​1, 2). Nachuna, kakawaniw amakgapitsin tuku tlan nakamamakgkatsini chu kalismaniw nakawaniyaw laktlan tachuwin akxni wi tuku tlan tlawakgo. Ni wa kalichuwinaw tuku ni lakgatiyaw nema tlawakgo o nema kinkalimakgasitsikgoyan (Efes. 4:29). Na tlan naliskujaw xlakata tlakg tlan nakatachuwinanaw latamanin xlakata nakalitachuwinanaw Biblia.

JOSÉ

14. ¿La kgantaxtulh tuku xlichuwinanit Jacob xpalakata José? (Génesis 49:​22, 26; na kaʼakxilhti recuadro).

¹⁴ (Kalikgalhtawakga Génesis 49:​22, 26). Jacob lu tlan xlimakgkatsi xlakata José xkgawasa xlitaxtu, xlakata Jehová xlaksaknit «kxlakgstipan xnatalan» chu wi tuku xlakaskinka xlakgayawanit. Jacob wa pi José xlitaxtu «xʼakgapu akgatum kiwi nema masta lhuwa xtawakat». Jacob wa uma kiwi xwanit chu José xʼakgapu xlitaxtu. José wa xapuxku xkgawasa Raquel xwanit, puskat tiku Jacob tlakg xpaxki. Jacob lichuwinalh pi José xʼama makglhtinan tuku xlakgchan Rubén, xapuxku xkgawasa Lea, atanu xpuskat Jacob (Gén. 48:​5, 6; 1 Crón. 5:​1, 2). Uma kgantaxtulh akxni chatiy xkamanan José, Efraín chu Manasés, akgtiy tribus litaxtukgolh kʼIsrael chu kamaxkika xtiyatkan (Gén. 49:25; Jos. 14:4).

15. ¿Tuku tlawalh José akxni tlawanika tuku lu nitlan?

¹⁵ Jacob na lichuwinalh pi makgapitsi tiku xmaskujukgo arco «litalakgolh flecha» José chu «chuntiya sitsinikgolh» (Gén. 49:23). Umakgolh lakchixkuwin wa xnatalan xwankgonit, tiku milh kilhtamaku sitsinikgolh chu lu nitlan tuku tlawanikgolh. Maski chuna, José nikxni kasitsinilh xnatalan chu na ni sitsinilh Jehová. Chuna la wa Jacob: «Ni malakxilhli xʼarco chu xmakan tliwakga xwanit chu lakapala xmaskuju» (Gén. 49:24). Akxni xtitaxtuma tuku lu nitlan, José lipawa chu litatsekgli Jehová. Nachuna, ni kajwatiya kamatsankgenanilh xnatalan, wata na lu tlan kalikatsinilh (Gén. 47:​11, 12). Mastalh talakaskin pi tuku lu nitlan xtitaxtuma xmakgtayalh tlakg tlan nalikatsi (Sal. 105:​17-19). Wa xlakata, Jehová maklakaskilh xlakata lhuwa tuku tlan xtlawalh.

16. ¿La tlan nastalaniyaw xliʼakxilhtit José akxni natitaxtuyaw tuku tuwa?

¹⁶ ¿Tuku kinkamasiyaniyan? Nikxni kilimastatkan talakaskin pi tuku tuwa titaxtuyaw natlawa pi natamakgatliniyaw Jehová chu kinatalankan. Kalakapastakwi pi Jehová max namasta talakaskin pi natitaxtuyaw tuku tuwa xlakata uma nakinkamakgtayayan nakgalhiyaw tlakg tlan tayat chu tlakg tlan kskujnin nalitaxtuyaw (Heb. 12:​7, nota). Akxni titaxtuyaw tuku tuwa, kinkamakgtayayan tlakg liwana nalimasiyayaw xatlan tayat, chuna la talakgalhaman chu namatsankgenaninanaw (Heb. 12:11). Chu liwana katsiyaw pi Jehová nakinkasikulunatlawayan komo natayaniyaw chuna la José.

BENJAMÍN

17. ¿La kgantaxtulh tuku lichuwinalh Jacob xpalakata Benjamín? (Génesis 49:27; na kaʼakxilhti recuadro).

¹⁷ (Kalikgalhtawakga Génesis 49:27). Jacob wa pi tiku xalak xtribu Benjamín xʼamakgo talatlawanankgo chuna la tantum lipekuanit lobo (Juec. 20:​15, 16; 1 Crón. 12:2). Jacob na wa: «Tsisa nawa xtachipa». Tachuwin «tsisa» kilhchanima akxni tawilalh xapulana mapakgsina kʼIsrael, Saúl. Uma mapakgsina xminacha kxtribu Benjamín, chu limasiyalh pi xtachuna tantum lipekuanit lobo xwanit akxni katalatlawalh filisteos (1 Sam. 9:​15-17, 21). Alistalh Jacob wampa: «Kakgotanun namaʼakgpitsi xtatlaja». Tachuwin «kakgotanun» kilhchanima tuku lalh akglhuwa kata alistalh akxni nialh x’anankgo mapakgsinanin k’Israel, akxni mapakgsina Ester chu Mardoqueo, tiku xalak xtribu Benjamín xwankgonit, makgtayanankgolh xlakata tamapakgsin xalak Persia ni xkamasputulh israelitas (Est. 2:​5-7; 8:3; 10:3).

18. ¿La tlan nastalaniyaw xliʼakxilhtit xtribu Benjamín?

¹⁸ ¿Tuku kinkamasiyaniyan? Xtribu Benjamín max lu paxuwakgolh akxni kgantaxtulh tuku Jacob xwanit, akxni chatum tiku xalak xtribujkan mapakgsina litaxtulh. Pero alistalh, Jehová laksakli David, tiku xalak xtribu Judá xwanit, xlakata mapakgsina xlitaxtulh. Maski chuna, benjaminitas tatayakgolh xasasti mapakgsina (2 Sam. 3:​17-19). Titaxtulh kilhtamaku, akxni amakgapitsi tribus lakgmakgankgolh mapakgsina tiku Jehová xlaksaknit, xtribu Benjamín chuntiya tatayakgolh xtribu Judá chu mapakgsina tiku Jehová xlaksaknit (1 Rey. 11:​31, 32; 12:​19, 21). La uku, Dios kalaksaknit lakchixkuwin xlakata napulalinkgo xkachikin. Xtachuna la uma tribu, kakamakgtayaw chu kalimasiyaw pi katatayayaw (1 Tes. 5:12).

19. ¿Tuku kinkamasiyaninitan tuku wa Jacob akxni xʼamaja niy?

¹⁹ ¡Lu lhuwa tuku katsininitaw xlakata tuku wa Jacob akxni xʼamaja niy! Komo nalilakpuwanaw la kgantaxtulh tuku wa, tlakg nakanajlayaw pi putum tuku Jehová wanit kxTachuwin na nakgantaxtu. Chu komo nalilakpuwanaw tasikulunalin nema makglhtinankgolh xlakgkgawasan Jacob, nakinkamakgtayayan naʼakgatekgsaw tuku kilitlawatkan akinin xlakata namakgapaxuwayaw Jehová.