Xatapaxuwan kaskujnani Jehová

¿TUKU kilhtamaku xwanti pi tlakg paxuwa kmilatamat? Makgapitsi nawankgo pi akxni tamakgaxtokgkgolh. Amakgapitsi nawankgo pi akxni lakachilh xapulana xkgawasakan. Pero max wix, kilhtamaku akxni tlakg paxuwa wa akxni tamunu. Minatalan tiku na kstalaninanin Cristo lu paxuwakgolh akxni limasiya pi paxkiya Dios xliputum minaku, xliputum milatamat, mintapuwan chu xliputum militliwakga (Mar. 12:30).

Xlikana pi lata tamununita, lhuwa tapaxuwan kgalhinita xlakata skujnanipat Jehová. Pero makgapitsi kstalaninanin Cristo nialh lu lipaxuwakgo la skujnanikgo Dios. ¿Tuku xlakata? ¿Tuku xlakata chuntiya xatapaxuwan naskujnaniyaw Dios? Kaʼakxilhwi.

MAKGAPITSI NIALH PAXUWAKGO

Xtamakatsinin Tamapakgsin kinkamakgapaxuwayan, xlakata Jehová kinkawaniyan pi xTamapakgsin nialh makgas namasputu uma xalixkajni kakilhtamaku chu nakinkaliminiyan paraíso. Sofonías 1:14 «¡Lanka xkilhtamaku Jehová lakatsu wi! ¡Lakatsu wi, chu lu lakapala talakatsuwima! Xtamakasan xkilhtamaku Jehová makgalipuwanan. Anta chatum tliwakga chixku katasa.» Maski chuna, max namakgkatsiyaw pi xkilhtamaku Jehová lu makgapalama. Komo chuna lakpuwanaw, nialh katikgalhiw tapaxuwan akxni naskujnaniyaw Dios (Prov. 13:12).

Akxni akxtum katatawilayaw kinatalankan kinkamakgtayayan xatapaxuwan naskujnaniyaw Dios. Max xtatayananin Jehová litaxtuw xlakata akxilhwi la kgalhikgo xtayatkan kskujnin Dios (1 Ped. 2:12). Pero komo natlawa tuku nitlan chatum tala chu naʼakgastakyawakan max uma natlawa pi naxlajwananaw chu nialh napaxuwayaw.

Atanu tuku nakinkamaxlajwaniyan wa lhuwa tuku nakgalhiputunaw chu tumin. Satanás chu xkakilhtamaku kinkamalakpuwaniputunkgoyan pi natamawayaw tuku ni maklakaskinaw. Pero kalakapastakwi tuku wa Jesús: «Ti ni lay lakgachixkuwiy nchatuy malana, sampi mpala nalakgmakgan nchatum, wata wa nchu achatum napaxkiy; su wata nalakgachixkuwiy nchatum, chi nchu wa achatum nalakgachixkuwimakgan. Ni lay lakgachixkuwiyatit Dios, chu wa ntumin» (Mat. 6:24). Komo nakgalhiputunaw tuku masta kakilhtamaku, nila xatapaxuwan naskujnaniyaw Jehová.

TUKU XLAKATA XATAPAXUWAN NASKUJNANIYAW JEHOVÁ

Akxni paxkiyaw Jehová, ni lakpuwanaw pi la akgtum tsinka takuka skujnanikan (1 Juan 5:3). Jesús wa: «Kakilakgtantit xlipaks wixin wa nti skujtamakganitantit, chu nkukananitantit, lakimpi kit nakkamajaxayan. Kalipitit nkimukiwi kmiokgspunkan, chu na kakinkatsinitit, mpi luwa xasmalhwa nkit, chu na tsatata nkinaku. Na natakgsniyatit ntajaxni milistaknakan. Sampi wa nkimukiwi, luwa ni tuwa liyankan, chu wa nkintakuka, skapaka» (Mat. 11:28-30). Xaxlikana kstalaninanin Cristo litaxtuyaw kinkamakgapaxuwayan chu tlan limakgkatsiyaw kkilatamatkan. Liwana katsiyaw tuku xlakata xtapaxuwan skujnaniyaw Jehová. Kalichuwinaw pulaktutu (Hab. 3:18).

Skujnaniyaw xapaxuwana Dios (Hech. 17:28; 1 Tim. 1:11). Kimputumkan katsiyaw pi wa Jehová tiku kinkamaxkinitan latamat. Akxni lakpuwanaw uma tlawa pi chuntiya xatapaxuwan naskujnaniyaw, maski makgasata tamununitaw.

Kalilakpuwanti chatum tala wanikan Héctor. Superintendente viajante xwanit 40 kata. Maski la uku lina kata, chuntiya lipaxuwa la skujnani Jehová (Sal. 92:12-14). Xpuskat lu tatatla, wa xlakata nialh lu la lichuwinan Dios la xapulana. Pero chuntiya paxuwa. Wan pi nitlan limakgkatsi xlakata xpuskat tlakg tatatla chuna la titaxtutilha kilhtamaku. Maski tuwa makgkatsinit nakuentajtlawa, ni masta talakaskin pi uma namaxlajwani xlakata nialh xatapaxuwan naskujnani Dios. Akxni lakpuwan tuku xlakata Jehová kintlawalh, uma tlawa pi tlakg napaxki chu xliputum xnaku naskujnani. Wa xlakata chuntiya liskuja nalichuwinan Dios chu lilakpuwan takgalhkgalhin xlakata Paraíso. Uma makgtaya chuntiya xatapaxuwan naskujnani Jehová.

Jehová malakgachalh xkgawasa xlakata nani kimpalakatakan. Biblia wan «sampi luwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliankgaIhin» (Juan 3:16). Komo kgalhiyaw takanajla, xla tlan nakinkatapatiyan kintalakgalhinkan chu nakinkamaxkiyan latamat nema ni kgalhi xlisputni. ¿Ni xlikana pi uma xlitlawat namastayaw paxtikatsinit? Komo napaxtikatsiniyaw Dios natlawa pi xatapaxuwan naskujnaniyaw.

Anta kMéxico chatum tala wanikan Jesús wan pi lu lhuwa kskuja. Xmin kilhtamaku kskuja asta akgkitsis turnos xlakata tlakg natlaja tumin. Pero lakgapasli Jehová chu katsinilh pi xmastanit xkgawasa tiku lu xpaxki kimpalakatakan. Lu skujnaniputulh Jehová asta wanilh pi xʼama makamaxki xlatamat. Nachuna maski 28 kata xlin niku kskujma, makgxtakgli xtaskujut. Chuna la Jesús xatapaxuwan skujnanima Dios.

Kstalaninanin Cristo xaskulunku linaw kilatamatkan. ¿Lakapastaka milatamat akxni nina xlakgapasa Jehová? Apóstol Pablo kamalakapastakalh natalan xalak Roma pi akxni nina kstalaninanin Cristo xlitaxtukgo «xtastaninitantit ntalakgalhin», pero la uku «ntamakamastaninitantit [...] ntu akgstitum». Xlakata xaskulunku xlimakgolh xlatamatkan, tlan xlatamakgolh putum kilhtamaku (Rom. 6:17-22). Akinin na kgalhakgaxmataw xlimapakgsin Dios. Wa xlakata ni katikgalhiw xalixkajni latamat chu niku anan tuku nitlan. ¿Ni xlikana pi uma lu lipaxuwayaw?

Kalichuwinan chatum tala wanikan Jaime. Akxni nina xtatayana Jehová xlitaxtu boxeador xwanit. Nachuna, ni xkanajlani Dios, xkanajla evolución. Akxni tsukulh an ktamakxtumit, kaks lakawa akxni akxilhli tapaxkit nema xlakgalhinikgo natalan. Lakpuwa nalakgpali la xlima xlatamat, pero skinilh Jehová pi xmakgtayalh xlakata xkanajlanilh. Jaime wan: «Tsinu tsinu tsukulh kaʼakxilha pi Jehová chatum tlat tiku lu xapaxkina chu xalakgalhamana». Katsi pi xlakata kgalhakgaxmatli Dios makgtayanit. Wan pi komo ni xlakgpalilh la xlikatsi max nialh xlatamalh, la kakitaxtunilh makgapitsi xapulana xʼamigos tiku na boxeadores xlitaxtukgo. Liwana katsi pi kilhtamaku akxni tsukulh skujnani Jehová wa tlakg lipaxuwanit.

NI TLAKGWANAW

Xlakata kgalhkgalhiyaw xlisputni uma nitlan kakilhtamaku, ¿tuku kilitlawatkan? Tlawamawa tuku Dios kinkawaniyan chu kgalhkgalhimaw nalatamayaw putum kilhtamaku. Wa xlakata chuntiya kakgalhakgaxmatwi xtastakyaw Gálatas 6:8, 9: «Ni anu titlakgwanaw natlawayaw wa ntu ntlan; sampi kxkilhtamaku, namakgalayaw, wa lapi ni natalaktuwajaw». Kalitamakgtayaw Jehová chu kaliskujwi natayaniyaw, xlakata nakgalhiyaw tayat nema namaklakaskinaw klanka takatsanajwat chu xlakata chuntiya xatapaxuwan naskujnaniyaw Jehová (Apocalipsis [Revelación] 7:9, 13, 14; Sant. 1:2-4).

Komo natayaniyaw, liwana katsiyaw pi Jehová nakinkamaxkiyan tuku kinkawaninitan. ¿Tuku xlakata? Xlakata putum katsi tuku tlawamaw xpalakata na katsi pi paxkiyaw chu xtukuwani. Komo chuntiya xatapaxuwan naskujnaniyaw, namakgkatsiyaw la David akxni wa umakgolh tachuwin: «Putum kilhtamaku kwili Jehová kkilakatin. Xlakata wi kkimpakgstakat, nikxni kintilakchikika. Wa xlakata kinaku xlikana paxuwa» (Sal. 16:8, 9).