¿Litaxtu la monkganat akxni lichuwinana Dios?
LU XLAKASKINKA nalichuwinanaw Dios, pero wilakgolh tiku ni chuna akxilhkgo. Maski wilakgolh tiku katsiputunkgo tuku wan Biblia, ni lakpuwankgo pi xlakaskinka nakinkatalikgalhtawakgakgoyan Biblia.
Kalichuwinaw Gavin. Xla xʼan ktamakxtumit kPukgalhtawakga xla xTatayananin Jehová, pero xmakglhtinamputun takgalhtawakga xalak Biblia. Gavin wan pi ni lu xkatsini xlakata Biblia chu ni xlakaskin pi amakgapitsin xkatsikgolh. Xpekuan pi kskinika xmakgtapakgsilh akgtum takanajla, chu ni xlakaskin xʼakgskgawika. ¿Tuku lakpuwana? ¿Tlan xmakgtayaka Gavin? Kalakpuwanti la tlan wi tiku makgtaya tuku Biblia masiya. Jehová kawanilh israelitas: «Kintachuwin natakta la monkganat, la akxni xwayaj min sen kxakgspun sekget» (Deut. 31:19, 30; 32:2). Kakatsiniw xlakata monkganat chu katamalakxtumiw akxni lichuwinanaw Dios xlakata liwana nakamakgtayayaw putum latamanin xlakata «naʼakgaputaxtukgoy» (1 Tim. 2:3, 4).
¿TUKU XLAKATA LA MONKGANAT LITAXTU AKXNI LICHUWINANAW DIOS?
Monkganat xwayaj takta. Monkganat wa chuchut nema xwayaj takta katsisni chu akgatawakakgo tuwan. ¿Tuku xlakata wan Biblia pi xTachuwin Jehová xlitaxtu «la monkganat»? Xlakata lu kuenta xtlawa chu tlan tachuwin xmaklakaskin akxni xkatachuwinan kskujnin. Tlawayaw la Jehová akxni maxkiyaw kakni tuku kanajlakgo amakgapitsin. Kamakgpuwantiniyaw xʼakstukan nalilakpuwankgo chu nalaksakgo tuku natlawakgo. Akxni limasiyayaw pi xlikana kamakgtayaputunaw, latamanin tlakg kinkakgaxmatnikgoyan chu tlakg tlan kitaxtu akxni lichuwinanaw Dios.
Monkganat skgawiwi. Komo tlan nakamamakgkatsini latamanin akxni nakalitachuwinanaw Dios, nalitaxtu la monkganat. ¿La chuna natlawayaw? Kalilakpuwaw la nakamakgtayayaw latamanin xlakata nalakgapaskgo Biblia. Kalichuwinamparaw Gavin. Xapulana, chatum tala wanikan Chris wanilh komo xlikgalhtawakgaputun Biblia, pero ni fuerza wanilh. Wata xlitsakgsa pi Gavin tlakg tlan xmakgkatsilh akxni xlichuwinalh Biblia. Chris wanilh pi Biblia kgalhi pulaktum tema nema tlakg xlakaskinka chu wanilh pi akxni xkatsilh uma tema xʼama makgtaya tlakg xʼakgatekgsli tuku xwankan ktamakxtumit. Nachuna, Chris wanilh Gavin pi tuku Biblia wan pi xʼama la, makanajlilh pi tuku lichuwinan xaxlikana. Makglhuwa lichuwinankgolh xlakata tuku Biblia wan pi xʼama la. Gavin tlakg tlan makgkatsilh chu makglhtinalh takgalhtawakga.
Monkganat masta latamat. Anta kʼIsrael, akxni ni senan lu lhkaknan chu titaxtu makgapitsi papaʼ asta akxni senan. Komo ni anan monkganat, tuwan skakkgo chu nikgo. Biblia wan pi kkinkilhtamakujkan latamanin xʼamakgo kgaxmatputunkgo «xtachuwin Jehová» (Amós 8:11). Xʼama litaxtu la komo xkgalhputimakgo, pero xlakata takanajla. Wa xlakata, Biblia wan pi akxni xatalaksakni lichuwinankgo xTamapakgsin Dios litaxtu la xmonkganat Jehová (Miq. 5:7). Kamakgtayakgo atanu grupo xla kstalaninanin Cristo nema kawanikan amakgapitsi borregos (Juan 10:16). Tuku lichuwinanaw na makgtanu tuku Jehová masta xlakata nakamaxki latamat tiku lakgapasputunkgo. ¿Lu xlakaskinka akxilhaw uma tamakatsinin?
Monkganat xtasikulunalin Jehová. (Deut. 33:13). Akxni lichuwinanaw Dios litaxtu la akgtum tasikulunalin o akgtum tamaskiwin xpalakata tiku makglhtinankgo xaxlikana. Akgtum tasikulunalin kitaxtunilh Gavin takgalhtawakga xalak Biblia, xlakata makgtayalh nakgalhti putum xtakgalhskinin. Ni lhuwa kilhtamaku titaxtulh tamunulh. La uku xla chu xpuskat, Joyce, akxtum lichuwinankgo xalakwan xalaksasti.
Xtatayananin Jehová limatsamamakgolh katiyatni xalakwan xalaksasti tamakatsin.
LU XLAKASKINKA KAʼAKXILHWI LA LICHUWINANAW DIOS
Komo tamalakxtumiyaw monkganat chuna la lichuwinanaw Dios, naʼakxilhaw pi lu xlakaskinka taskujut nema tlawayaw. ¿Tuku xlakata? Xlakata kaj akgtum slankgat ni lhuwa tuku tlawa pero akxni lhuwa millón slankgat akxtum lakgo, makakawikgo. Nachuna, max nalakpuwanaw pi kiakstukan ni lu lhuwa tuku tlawayaw. Pero akxni lhuwa millones xtatayananin Jehová makxtum skujaw, tlawayaw pi tuku lichuwinanaw nachan «kputum laklanka kachikinin» (Mat. 24:14, TNM). Chuna la akxilhaw, akgtum xtasikulunalin Jehová nalichuwinanaw xalakwan xalaksasti. Chu litaxtu la monkganat nema xwayaj takta, nema tlan mamakgkatsininan chu masta latamat.