¿Xlikana lama Dios?

Biblia kinkamaxkiyan xatakgalhtin

Xlikana. Biblia limasiya pi chuna. Nachuna, kinkamasiyaniyan pi komo kanajlaniputunaw Dios, talakaskin “namaklakaskinaw kintalakapastaknikan” chu ni kajwatiya wi tuku nakanajlayaw kaj xlakata chuna wankgo lhuwa latamanin (1 Juan 5:20; Romanos 12:1). Kaʼakxilhwi makgapitsi tuku wan Biblia nema limasiya pi Dios xlikana lama:

• Xlakata anan latamat chu putum liwana talakkaxtawilanit kʼakgapun chu kkatiyatni, masiya pi wi tiku malakatsukilh. Biblia wan: «Xlikana, akgatunu chiki wi tiku tlawanit, pero xMalakatsukina putum tuku anan, wa Dios» (Hebreos 3:4). Maski max wi tiku xwankgolh pi uma wa xtapuwankan tiku ni lakgskgalalan, lhuwa latamanin tiku lu kgalhtawakgakgonit kanajlakgo uma.a

• Akinin latamanin, katsiputunaw tuku xlakata minitaw latamayaw. Chu maski kgalhiyaw putum tuku maklakaskinaw kkilatamatkan, komo ni katsiyaw tuku xlakata minitaw latamayaw, nitlan limakgkatsiyaw. Biblia wan pi kajwatiya tlan namakgkatsiyaw chu napaxuwayaw komo namastayaw talakaskin pi Dios kakinkapulalin, uma wamputun pi nalakgapasaw chu nakakninaniyaw Dios (Mateo 5:3; Apocalipsis [Revelación] 4:11). Uma masiya pi wi chatum xapaxkina Dios, tiku kinkamalakatsukin xlakata nakatsiputunaw tuku xlakata minitaw latamayaw chu napaxuwayaw (Mateo 4:4).

• Lhuwa tuku Biblia lichuwinanit pi xʼama la kgantaxtunita, chu liwana kgantaxtulh maski akglhuwata kata xtitaxtunit lata tsokgwilika. Uma limasiya pi tuku min kBiblia ni xla chatum lataman (2 Pedro 1:21).

• 

  Tiku tsokgwilikgolh Biblia xkatsikgo makgapitsi tuku científicos katsikgo la uku nema nina xkatsikan kxkilhtamakujkan. Akgtum liʼakxilhtit, lhuwa kachikinin xala makgasa xwankgo pi Katiyatni xwi kstipun tantum elefante, tantum kiwipaxni, tantum toro o atanu animal. Pero Biblia wan pi Dios «wilinit katiyatni niku nitu chipawilinit» (Job 26:7). Nachuna, akxni Biblia lichuwinan la tasiya Katiyatni wan pi «xakgololo» o la akgtum «globo» (Isaías 40:22, Martín Nieto). Lhuwa latamanin lakpuwankgo pi tiku tsokgwilikgolh Biblia katsikgolh putum uma xlakata Dios kamakatsinilh.

• Biblia kgalhti lhuwa takgalhskinin nema tlawakgo tiku ni kanajlanikgo Dios. Makgapitsi wa umakgolh: Komo Dios tlan likatsi chu kgalhi putum litliwakga, ¿tuku xlakata anan lhuwa tapatin chu tuku nitlan? ¿Tuku xlakata takanajla kalimininit lhuwa taʼakglhuwit latamanin? (Tito 1:16). Takgalhtin nema masta Biblia namakgtayayan nakanajlaniya Dios.