¿Tiku arcángel Miguel?

Biblia kinkamaxkiyan xatakgalhtin

Miguel o «san Miguel», chuna la lilakgapaskgo makgapitsi takanajla, wa tukuwani nema Biblia maklakaskin xlakata nalichuwinan Jesús akxni nina xmin kKatiyatni chu akxni taspitpa kʼakgapun.a Biblia wan pi Miguel talakilhnilh Satanás akxni Moisés xninita chu pi makgtayalh chatum ángel namaxki palakachuwina Daniel akgtum xtamakatsinin Dios (Daniel 10:13, 21; Judas 9). Miguel masiya pi kajwatiya Jehová lakgchan namapakgsinan chu katalatlawa xtalamakgasitsin Dios. Wa xlakata lakgchan nalilakgapaskan uma tukuwani, nema wamputun «¿Tiku xtachuna la Dios?» (Daniel 12:1; Apocalipsis 12:7).

Kaʼakxilhwi tuku xlakata tlan wanaw pi Jesús wa arcángel Miguel.

• Miguel wa «arcángel» (Judas 9). Título arcángel wamputun «xpuxkukan ángeles», chu uma tachuwin kajwatiya min kʼakgtiy versículos xalak Biblia. Kʼuma versículos tachuwin arcángel kaj chatum tiku kilhchanima, uma masiya pi kajwatiya chatum ángel tiku lakgchan uma título. Biblia lichuwinan pi Jesús, tiku lakastakwananita, la «Malana naminacha chu pixlanka nachuwinan xtachuna la xtachuwin xpuxkukan ángeles» (1Tesalonicenses 4:16). Uma versículo masiya pi Jesús chuwinan la chatum xpuxkukan ángeles. Wa xlakata tlan wanaw pi Jesús wa arcángel Miguel.

• Miguel kapulalin lhuwa ángeles xalak akgapun. «Miguel chu xʼángeles talatlawakgolh lanka luwa», uma kilhchanima Akgskgawini (Apocalipsis 12:7). Kgalhi lhuwa limapakgsin kʼakgapun. Biblia limapakuwi la «chatum príncipe tiku tlakg kgalhi limapakgsin» chu «xalanka príncipe» (Daniel 10:13, 21; 12:1). Umakgolh títulos masiya pi litaxtu «xpuxkukan lhuwa ángeles xalak akgapun». David E. Aune, chatum tiku lu lakgapasa Nuevo Testamento wan pi Miguel xpuxkukan lhuwa ángeles.

  Biblia masiya atanu tukuwani akxni lichuwinan xpuxkukan lhuwa ángeles. Wan pi «Malana Jesús naminacha kʼakgapun chu akxtum nakataminacha lakgtliwakga xʼángeles klanka lhkuyat» (2 Tesalonicenses 1:7, 8; Mateo 16:27). Nachuna, 1 Pedro 3:21, 22 wan pi Jesús «alh kʼakgapun», chu Dios tlawalh pi nakgalhakgaxmatkgo «ángeles, mapakgsinanin chu tiku kgalhikgo litliwakga». Nila wanaw pi Dios kaliyawalh Jesús chu Miguel la xpuxkukan ángeles xlakata xlatlajakgolh. Wata liwana tasiya pi Jesús wa Miguel.

• Miguel «natayayacha» akxni «naʼanan talakgaputsit» chuna la ni makgstum chuna lanit (Daniel 12:1). Anta klibro xla Daniel, tachuwin «natayayacha» maklakaskinkan akxni chatum mapakgsina wi tuku lu xlakaskinka natlawa (Daniel 11:2-4, 21). Jesucristo, tiku na limapakuwikan «xTachuwin Dios», natsuku mapakgsinan la «xMapakgsinakan mapakgsinanin» xlakata nakamalakgsputu putum xtalamakgasitsin Dios chu namakgtaya xkachikin Dios (Apocalipsis 19:11-16). Chuna natlawa akxni «naʼanan lhuwa tapatin chuna la ni makgstum chuna lanit lata kxkilhtsukut kakilhtamaku asta uku» (Mateo 24:21, 42).