¿Xkuenta tumin putum tuku nitlan?

Biblia kinkamaxkiyan xatakgalhtin

Ni. Biblia ni wan pi tumin nitlan, na ni wan pi putum tuku nitlan lama wa xkuenta tumin. Wi akgtum refrán nema wan pi tumin anta kilhtsuku putum tuku nitlan chu latamanin lakpuwankgo pi uma refrán kBiblia takilhtinit. ¿Pero xlikana uma? Ni chuna wamputun. Wata Biblia wan: «Akxni paxkikan tumin anta kilhtsuku lhuwa tuku lakglakgalhinan» (1 Timoteo 6:10).

¿Tuku wan Biblia xlakata tumin?

Biblia wan pi komo liwana namaklakaskinaw tumin tlan nalitamakgtayayaw (Eclesiastés 7:12). Na tlan kalichuwinan tiku xatapaxuwan limakgtayanankgo xtuminkan (Proverbios 11:25).

Biblia kinkamalakapastakniyan pi tumin ni wa tlakg xlakaskinka nali’akxilhaw kkilatamatkan. Hebreos 13:5 wan: «Ni lu kakgalhiputuntit tumin kmilatamatkan, chu kalipaxuwatit tuku kgalhiyatit». ¿Tuku kinkamasiyaniyan uma? Pi tumin xlakaskinka, pero nikxni pulana nawiliyaw. Tuku nakinkamakgtayayan wa nalipaxuwayaw tuku xlikana maklakaskinaw: liwat, lhakgat chu chiki (1 Timoteo 6:8).

**¿Tuku tuwa kitaxtu akxni paxkikan tumin?**

Latamanin tiku lhuwa tuku kgalhiputunkgo ni katikgalhikgolh latamat nema nikxni nasputa (Efesios 5:5). Pulana, xlakata tiku lhuwa tuku kgalhiputun, xtachuna la kakninani tatlawamakgxtu, o nixaxlikana takaknin (Colosenses 3:5). Chu xlipulaktiy, xlakata nakgalhikgo tuku lakaskinkgo, tiku lhuwa tuku kgalhiputunkgo makglhuwa lakatsalakgo xlimapakgsin Dios. Nachuna, Proverbios 28:20 liwana wan: «Chixku tiku xa’akgstitum namakgamakglhtinan lhuwa tasikulunalin, pero tiku lakapala kgalhiputun lhuwa tumin max natlawa tuku nitlan». Max nakgalhanamputun na’akgskgawimakglhtinamputun tumin o max nakgalhan chatum lataman o asta max namakgni.

Chu maski ni natlawayaw tuku nitlan, paxkikan tumin limin lhuwa ta’akglhuwit. Biblia wan: «Tiku lhuwa tumin kgalhiputunkgo tlawakgo tuku nitlan kamatlawiputunkan chu tawakakgoyacha kʼakgtum liʼakgsiyat chu nitlan tuku kakitaxtuni xlakata tlawaputunkgo lhuwa tuku nitu litaxtu chu tuku kalakglakgalhi» (1 Timoteo 6:9).

Tuku tlan kitaxtu akxni tlawakan tuku wan Biblia

Komo ankgalhin maxkiyaw kakni wantu lakpuwan Dios chu ni lakatsalayaw xtastakyaw xlakata naputsayaw tumin, ni katitlawaw tuku nalimaxananaw chu namakgapaxuwayaw Dios. Chu komo lu naliskujaw kuenta natlawayaw uma, Dios kinkamalaknuniyan: «Nikxni ktimakgxtakgni chu ankgalhin nakmakgtayayan» (Hebreos 13:5, 6). Chu nakinkawaniyan pi: «Chixku tiku xa’akgstitum namakglhtinan lhuwa tasikulunalin» (Proverbios 28:20).

Tastakyaw nema limin Biblia xlakata tumin

Eclesiastés 7:12: «Tumin litamakgtayakan».

Tuku kinkamasiyaniyan: Komo liwana namaklakaskinaw tumin tlan nakinkamakgtayayan chu tlan nakinkamamakgkatsiniyan.

Lucas 12:15: «Akxni chatum lataman lhuwa tuku kgalhi, tuku kgalhi nila maxki latamat».

Tuku kinkamasiyaniyan: Tumin ni wa tuku tlakg xlakaskinka kkilatamatkan chu ni wa tuku nakinkalakgmaxtuyan.

1 Timoteo 6:10: «Akxni paxkikan tumin anta kilhtsuku lhuwa tuku lakglakgalhinan, chu makgapitsi xlakata paxkikgo tumin, makgxtakgkgonit takanajla chu xʼakstukan tlawakgonit pi napatikgo tipalhuwa takatsanajwat».

Tuku kinkamasiyaniyan: Nila wanaw pi tumin nitlan. Pero latamanin tiku paxkikgo tumin wa tuku xlakaskinka akxilhkgo kxlatamatkan, ni katsikgo tuku natlawakgo. Mapitsikgo xfamiliajkan chu tatatlakgo xlakata lhuwa skujkgo.

Hebreos 13:5: «Ni lu kakgalhiputuntit tumin kmilatamatkan, chu kalipaxuwatit tuku kgalhiyatit».

Tuku kinkamasiyaniyan: Kalipaxuwaw tuku xlikana maklakaskinaw ni lu kaliskujwi xlakata nakgalhiputunaw lhuwa tumin.

Mateo 19:24: «Tlakg ni tuwa nawan pi tantum camello natanu kxʼakgxakga litsapan, nixawa tiku kgalhi lhuwa tumin natanu kxTamapakgsin Dios».

Tuku kinkamasiyaniyan: Jesús aku xwaninit chatum kgawasa tiku lhuwa xkgalhi tumin pi kstalanina xlitaxtulh. Pero uma kgawasa lu xpaxki wantuku xkgalhi wa xlakata ni kstalanina litaxtulh. Xtachuwin Jesús litaxtu akgtum tastakyaw: komo tlakg napaxkiyaw tumin ni xawa Dios, namakgatsankgayaw latamat nema ni kgalhi xlisputni.