Xaʼawatiya xatlan mapakgsina xalak Israel

JOSÍAS kajku akgtsayan kata kgalhiy akxni chan xlimapakgsina kpulaktiy laklanka familia wantiku wilakgolh anta kxapakgalhu li Israel. Lu aktsinajku xlakata mapakgsina nawan. Wa xlakata akxni tsukulh mapakgsinan, wantiku linkgoya kata tsukukgolh makgtayakgoy kxtamapakgsin.

Akxni Josías xmapakgsinanitta akgtujun kata, tsukulh putsay Jehová. Nachuna tlaway la tlawakgolh xatlan mapakgsinanin David, Josafat (Jehosafat) chu Ezequías. Chu akxni kajku kgawasa xwanit, wi tuku tlawalh nema limasiyalh pi nixpekuan.

Akglhuwa kilhtamaku atsinu ni putum li Israel lu lixkajni likatsikgolh. Kakninanikgoy dioses nema nixaxlikana. Takilhputanikgoy ídolos. Wa xlakata Josías chu lakchixkuwin tiku makgtayakgoy tsukukgolh mapanukgoy takanajla nixaxlikana. Uma lu lanka taskujut xlakata lhuwa tiku kakninanikgoy dioses nema nixaxlikana. Unu kdibujo akxilhpat Josías chu lakchixkuwin lakgpakglhmakgolh ídolos.

Alistalh Josías kawanilh kgalhtutu lakchixkuwin kapulalinkgolh taskujut xlakata nakaxtlawakgoy xtemplo Jehová. Tsukuka pukikan tumin anta kkachikin chu kamaxkika lakchixkuwin xlakata nakaxokgonikan tiku skujmakgolh. Akxni kskujmaka ktemplo, xapuxku sacerdote Hilquías tekgsli tuku lu xlakaskinka: Wa libro niku wi xlimapakgsin Jehová nema timatsokgnika Moisés xamakgan. Uma libro xtsankganit.

Akxni Josías linika libro, wa pi wintiku kalikgalhtawakganilh. Akxni Josías kgaxmatli, katsilh pi kachikin nitu kgalhakgaxmatma xlimapakgsin Jehová. Lu lilipuwa chu xtitli xlhakgat chuna la akxilhpat kdibujo. Chu wan: Jehová lu kinkasitsininitan, xlakata kinatlatnikan nitu tlawakgolh xlimapakgsin Jehová nema tatsokgnit unu klibro.

Josías malakgachay sacerdote Hilquías pi kakgalhskininalh tuku nakatlawaniy Jehová. Hilquías alh akxilha Huldá xpalakachuwina Jehová chu kgalhskilh tuku natlaway Jehová. Huldá wanilh xtamakatsin Jehová xlakata nawaniy Josías: Jerusalén chu putum kachikin nakamalakgaxokgekan xlakata kakninanikgonit dioses nema nixaxlikana chu katiyatni litatsamanit tuku nitlan. Pero xlakata wix Josías, tlawapat tuku xatlan, uma tuku namin nikatimilh akxni wix lapat, nakkamalakgaxokgey akxni nialhtu lapat nawan.