Josías liwana kalaksakli xʼamigos

¿Lakpuwana pi ni tuwa natlawaya tuku Jehová lakaskin?... Lhuwa latamanin lakpuwankgo pi tuwa. Pero Biblia lichuwinan pi ni tuwa. Lichuwinan chatum kgawasa tiku xwanikan Josías, lhuwa liskujli xlakata natlawa tuku Dios lakaskin. Tuku makgtayalh wa pi liwana laksakli xʼamigos. Tlakg kakatsiw xlakata Josías chu xatlan xʼamigos.

Xtlat Josías xwanikan Amón, mapakgsina xalak Judá. Amón lu nitlan xlikatsi chu xkakninani ídolos. Akxni nilh, Josías xmapakgsina Judá wa. ¿Katsiya niku akglit kata xkgalhi akxni mapakgsina tlawaka? ¡Kajku akgtsayan kata xkgalhi! ¿Na nitlan likatsilh chuna la xtlat?... Ni, xla tlan likatsilh.

Lata akxni lu aktsujku xwanit, Josías kskujnaniputun Jehová. Wa xlakata kalaksakli xʼamigos xwankgolh tiku xpaxkikgo Jehová. Chu xlakan makgtayakgolh xkgalhakgaxmatli Jehová. ¿Tiku xʼamigos Josías xwankgonit?

Chatum xʼamigo wa palakachuwina Sofonías. Xlakgayawakanit xkawanilh xalak Judá: «Komo chuntiyaku nakakninaniyatit nixaxlikana dioses nitlan tuku nakaʼakgspulayan». ¿Tuku tlawalh Josías? ¿Kgaxmatnilh Sofonías? Kgalhakgaxmatnilh. Wa xlakata putum kilhtamaku kakninanilh Jehová chu ni ídolos.

Atanu xʼamigo Josías xwanikan Jeremías. Watiya kata xkgalhikgo chu akxni lakgkgawasan xwankgonit, lakatsu xwilakgolh. Jeremías chu Josías lamakgtayakgolh xlakata kskujnikgolh Jehová. Lu tlan xlatalalin wa xlakata akxni Josías nilh, Jeremías tsokgli akgtum lu stlan takilhtlin niku xwan la lu xlakapastaka.

¿Tuku kinkamasiyaniyan xliʼakxilhtit Josías?... Lata akxni aktsinajku xwanit, Josías xkgalhakgaxmatputun Jehová. Pero xkatsi pi xtalakaskin xʼamigos xwankgolh tiku xpaxkikgo Jehová. ¿Wix na skujnaniputuna Jehová? Wa xlakata lu xlakaskinka liwana nakalaksaka miʼamigos tiku paxkikgo Jehová.