¡Paraiso lakatsu wi!

Paks tuku ni tlan anama anta nak Katiyatni limasiya pi Paraiso lakatsu wi. Biblia wa makgasaʼ pi naʼakxilhaw kakilhtamaku luxakatuwa akxni talakatsuwima Paraiso. Laʼuku akxilhmaw tama kakilhtamaku. Uma tuku tasiyay unu, Biblia wa pi xʼama lay.

Laklanka guerra. “Natsukuy talalakataki y natatlaway guerra, akgatunu kachikin natalalakatawakay atunuj kachikin.” (Mateo 24:7.) Uma tuku xlichiwinankanit kgantaxtunita. Litsukunit nak 1914 asta uku, ananit akgtuy laklanka guerra chu lhuwa atanuj tlakg laktsu guerra. Nak umakgolh guerra chalhuwa miyon kristiano nikgonita.

Tajatat nema lutalakgatuminit. “Tipakgatsi tajatit wantu namin.” (Lucas 21:11.) ¿Kgantaxtunita uma limasiy? Eje, kanser, tajatat xalaʼ knakuʼ, skaknakujunat, xkgoyalonkgat, sida, chu tipalhuwa tajatat nema kamakgnikgonita chalhuwa miyon kristiano.

Anan aktsu taway. Kxlipaks Katiyatni anan latamanin tiku kgalhikgoy aktsu xtaway. Kata kata tsinksnikgoy chalhuwa miyon kristiano. Uma nawa limasiya pi Paraiso talakatsuwimaja, kBiblia wan: “Nalay tatsinkstat” (Marcos 13:8).

Tachikiy tiyat. “Lakaxtum amaj tachikiy tiyat.” (Mateo 24:7.) Uma nakgantaxtunita nak kinkilhtamakujkan. Likilhtsukunit nak 1914 asta uku, liwakay akgtum miyon kristiano nikgonit xpalakata akxni tachikiy tiyat.

Latamanin lixkan xtayat. Kristiano napaxkikgoy tumin, xakstukan nakapaxkikan chu tlakg napaxkikgoy tuku tlan kalimakgkatsikan nixawa Dios. Lakkaman “niaj katitakgalhakgaxmatli wantu nakalimapekgsiy xtlatkan” (2 Timoteo 3:1-5). ¿Ni kanajlaya pi laʼuku, chuna lhuwa anan latamanin? Ni lakgachixkuwikgoy Dios chu makglhuwikgoy tiku katsiniputunkgoy xlakata Dios.

Talakatsalay limapakgsin. Nachuna “natatsukuy tamakastalay wantu tatlaway amakgolh kristianos wanti ni tlan xtapuwankan” (Mateo 24:12). ¿Kuentajtlawata pi umakgolh kata lhuwankgolh kristiano tiku lakatsalakgoy limapakgsin? Kaniwa anan tamakpuwan xpalakata takgalhan, takgskgawin o ni tlan tuku natlawanikana.

Paks uma limasiyay pi xReino Dios lakatsu wi. KBiblia wan: “Akxni chunu wixinin naukxilhatit pi kgantaxtuma nawan wantu lanchu kkawaniman, pus kakatsitit pi aya lakgchanit kilhtamaku lata laku [xReino, NM] Dios laklhkawilinit nakalakgmaxtuyan” (Lucas 21:31). ¿Tuku ama xReino Dios? Wa xlimapakgsin Dios xalaʼ kʼakgapun; natlaway Katiyatni, akgtum paraiso. XReino Dios namapakgsinan; niaj katiʼanalh xlimapakgsin latamanin (Daniel 2:44).