¿Tuku kilhtamaku namapakgsinan xTamapakgsin Dios kKatiyatni?

Makgapitsi kstalaninanin Jesús xkatsiputunkgo tuku kilhtamaku xʼama mapakgsinan xTamapakgsin Dios kKatiyatni. Jesús kawanilh pi ni xkalakgchan nakatsikgo tuku kilhtamaku chuna xʼama lay (Hechos 1:6, 7). Pero xkawaninita pi akxni xʼakxilhkgolh makgapitsi tuku xlama, xkatsikgolh pi xTamapakgsin Dios talakatsuwinita chu pi xlakgchanita kilhtamaku xlakata xmapakgsinalh xlikalanka Katiyatni (Lucas 21:31).

¿TUKU LICHUWINALH JESÚS PI XʼAMA LAY?

Jesús wa: «Nalalakatakiy akgatunu tiyat, chu laktlanka napuxkun nalatalatlawakgoy. Na lipikua natachikiy nkatuxawat, chu makgapitsin nkaniwa naʼanan ntatsinkstat» (Lucas 21:10, 11). Xtachuna la chatum lataman litalakgapasa xhuella, akxni xtsukulh kgantaxtu putum uma tuku xlichuwinankanit xʼama limasiya pi xTamapakgsin Dios lakatsu xwi. ¿Wa uma tuku akxilhmaw? ¿Kgantaxtunit uma kxlikalanka katiyatni? ¿Tuku limasiya tuku lanit?

1. GUERRAS

Makgapitsi aviones nema maklakaskinkan xlakata natlawakan guerra, akgtum tanque chu makgapitsi litalatni

Kkata 1914 tsukulh akgtum guerra nema nikxni xlanit. Tiku putsanankgo tuku lanit wankgo pi uma kata lalh tuku lakgpalilh kakilhtamaku, xlakata akxni tsukulh xaPulana Guerra xLikalanka Katiyatni. Uma kilhtamaku maklakaskinka tanques, bombas nema xmakgosokgo aviones, ametralladoras, gases nema makgninan chu atanu tuku limakgninankan. Alistalh, akxni tlawaka xliʼAkgtiy Guerra xLikalanka Katiyatni, maklakaskinka bombas atómicas. Lata kkata 1914, latamanin akxilhkgonit guerras lakatum lakatum kachikinin chu uma kamakgninit millones latamanin.

2. TACHIKI TIYAT

Akgtum lanka chiki lakxla akxni tachiki tiyat

Enciclopedia Britannica Academic wan pi akgatunu kata akgtum ciento xlimakglit lu tliwakga tachiki tiyat chu lhuwa masputunan. Nachuna, Servicio Geológico de Estados Unidos wan: «Chuna la lhkawilitilhakanit, lata kkata 1900, akgatunu kata kgalhkgalhikan pi max makgkuchaxan lu tliwakga natachiki tiyat». Makgapitsi max nalakpuwankgo pi uma ni wamputun pi makglhuwa tachiki tiyat wata alisokg katsiyaw akxni nina chuna lay. Pero tuku xlikana wa pi nikxni xʼakxilhnitaw lhuwa tapatin chu linin kaj xpalakata tachiki tiyat.

3. NI ANAN TAWAY

Ni lhuwa anan taway xlikalanka katiyatni xpalakata guerras, xlakata tlawakan tuku nitlan, ni lhuwa tumin anan, ni liwana maklakaskinkan niku chananankan chu ni liwana kakuentajtlawakan animales chu xlakata ni kuenta tlawakanit akxni lay tuku masputunan. Akgtum tamakatsin xla Programa Mundial de Alimentos wan: «Kkakilhtamaku 821 millones latamanin ni kgalhikgo tuku nawakgo chu 124 millones umakgolh latamanin kalipekua wi xlatamatkan» (2018 Year in Review). Akgatunu kata 3,1 millón laktsu kamanan nikgo xpalakata ni liwana wayankgo. Kkata 2011, max 45% laktsu kamanan nikgolh xpalakata tatsinksni.

4. LAKLIXKAJNIT TAJATAT

Tuku kalipekua wili kilatamatkan chu makgapitsi bacterias

Akgtum tamakatsin xla Organización Mundial de la Salud wan: «Siglo puxamatum litalakgapasa xlakata anan lhuwa tajatat. Xamakgan tajatat la cólera, peste chu fiebre amarilla litatatlamaparaka amakgtum, chu na taxtuparakgonit xasasti tajatat la nema tlawa pi nila najaxananaw, taʼakgalham nema lakapala talakgatumi, síndrome respiratorio de Oriente Medio, ébola chu zika». Chu tajajat xla COVID-19 wa nema tlakg xasasti. Maski científicos chu makuchinanin lhuwa tuku katsikgonit xlakata tajatat, nila tekgskgonit xalikuchun putum tajatat.

5. LICHUWINANKAN DIOS XLIKALANKA KATIYATNI

Tiyat nema litastilinit akgtum flecha chu xpaxtun wi maktum Biblia nema talakgakgenit

Jesús lichuwinampara atanu tuku litasiya akxni wa: «Taliʼakgchuwinanit nawan xlikatlanka nkatuxawat yuma xatlan tamakatsinin xla [Tamapakgsin]; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni nkatuxawat» (Mateo 24:14). Maski anan lhuwa taʼakglhuwit kkakilhtamaku, liwaka akgtsayan millones latamanin xalak tanu tanu kachikinin lichuwinamakgo xalakwan tamakatsin xla Tamapakgsin k240 países chu liwaka kʼakgtum mil tanu tanu tachuwin. Nikxni xtlawakanit chuna la uma.

¿TUKU XLAKATA XLAKASKINKA KILIʼAKXILHATKAN UMA?

Putum tuku Jesús lichuwinalh kgantaxtuma la uku. ¿Tuku xlakata lu xlakaskinka uma kimpalakatakan? Kalakapastakwi tuku Jesús wa: «Akxni naukxiIhatit nalay yuma nkatuwaj, kaʼakgatakgstit mpi wa [xTamapakgsin] Dios talakatsuwinitta» (Lucas 21:31).

Jesús wi kxputawilh chu akxilhma katiyatni akxni akgtum paraíso litaxtu — Nialh makgas, Tamapakgsin natlawa pi kalalh xtalakaskin Dios kKatiyatni.

Tuku Jesús lichuwinalh pi xʼama lay chu tuku kilhtamaku nema lichuwinan Biblia, masiya pi Dios lakkaxwililh xTamapakgsin kʼakgapun kkata 1914.a Ama kata mapakgsina limaxtulh xKgawasa, Jesucristo (Salmo 2:2, 4, 6-9). Nialh makgas xTamapakgsin Dios namapakgsinan kKatiyatni, nakamasputu putum tamapakgsin xalak kakilhtamaku chu natlawa pi Katiyatni akgtum paraíso nawan niku putum kilhtamaku nalatamayaw.

Nialh makgas nakgantaxtu oración nema Jesús kinkamasiyanin kʼoración xla padrenuestro: «Kamilh [minTamapakgsin] wa nkatatlawalh ntu mintalakaskin, xtachuna lantla nkakgapun, na chuna kawa nkatiyatna» (Mateo 6:10). Pero ¿tuku tlawama xTamapakgsin Dios lata kkata 1914? ¿Chu tuku natlawa akxni nakamapakgsi putum latamanin?

a Komo tlakg katsiputuna xlakata kata 1914, kaʼakxilhti takgalhtawakga 32 xla libro Kalipaxuwa latamat (nema tlawakgonit xtatayananin Jehová).