TAKGALHSKININ XLAKATA BIBLIA
¿Tuku xlakata kililakapastakatkan akxni nilh Jesús?
¿Tuku takgalhkgalhin kgalhiyaw xlakata Jesús nilh? (Isaías 25:8; 33:24)
Tuku lu xlakaskinka titaxtunit, wa akxni nilh Jesús, xlakata uma tlawalh pi latamanin xkgalhiparakgolh tuku makgatsankgakgonit. Chixku ni tlawaka xlakata natlawa tuku nitlan, natatatla o nani (Génesis 1:31). Pero, kgalhiw talakgalhin xlakata xapulana chixku, Adán. Jesús mastalh xlatamat xlakata nakinkalakgmaxtuyan ktalakgalhin chu klinin. (Kalikgalhtawakga Mateo 20:28 chu Romanos 6:23.)
Dios limasiyalh lanka tapaxkit akxni malakgachalh xKgawasa kKatiyatni xlakata xnilh kimpalakatakan (1 Juan 4:9, 10). Jesús kalimapakgsilh kstalaninanin xlakapastakkgolh akxni nilh chu ni lhuwa tuku xmaklakaskinkgolh kaj kaxtalanchu chu vino. Tlawakan uma tuku limapakgsinankanit kata kata limasiyayaw pi paxtikatsiniyaw Dios chu xKgawasa xlakata xtapaxkit nema kinkalimasiyanin. (Kalikgalhtawakga Lucas 22:19, 20.)
¿Tiku xliwat kaxtalanchu chu vino?
Xapulana akxni kawanilh kstalaninanin nalakapastakkgo akxni nilh, lichuwinalh akgtum talakkaxlan (Mateo 26:26-28). Uma talakkaxlan tlawalh pi xlakan chu atanu latamanin mapakgsinanin chu sacerdotes xwankgolh anta kʼakgapun. Maski millones latamanin nalakapastakkgo akxni nilh Jesús, pero kajwatiya tiku makgtapakgsikgo kʼuma talakkaxlan tlan nawakgo kaxtalanchu chu vino. (Kalikgalhtawakga Apocalipsis 5:10.)
Atsinu ni akgtiy mil kata, Jehová kalaksakma tiku natamapakgsinankgo xKgawasa (Lucas 12:32). Uma ni lhuwa, ni xtachuna latamanin tiku nalatamakgo putum kilhtamaku kKatiyatni. (Kalikgalhtawakga Apocalipsis 7:4, 9, 17.)