Kuenta katlawaw akxni lichuwinanaw Dios
1. ¿Tuku xlakata kuenta natlawayaw akxni nalichuwinanaw Dios?
1 La uku, xlakskujnin Dios lichuwinankgo xlakata xtamapakgsin niku lamakgo latamanin tiku “xaʼakgtsankgatayanin chu na ni lakwan xtayatkan” la «nkalhnilu anta kxlakgstipan xawananin xuwa chichi» (Mat. 10:16; Fili. 2:15). Kʼakglhuwa kachikin anan taʼakglhuwit, lhuwa latamanin tamakxtumikgo xlakata nalatlawanikgo tuku nitlan chu kakgalhankan, nema limasiya pi lakchixkuwin «tlakg lixkajni likatsimakgolh» (2 Tim. 3:13, Traducción del Nuevo Mundo). ¿Tuku tastakyaw xalak Biblia nakinkamakgtayayan xlakata “lakgskgalalan nawanaw” akxni nalichuwinanaw Dios? (Mat. 10:16.)
2. ¿Tuku max naʼakxilhaw xlakata alakatanu naʼanaw lichuwinanaw Dios?
2 Skgalala kiliwanatkan. Anta kProverbios 22:3 lichuwinan pi xaskgalala wantiku tatsekga akxni akxilha pi naʼakgspula tuku nitlan. Wa xlakata, putum kilhtamaku kuenta katlawaw. Maski kʼakgtum kachikin ni anan taʼakglhuwit pero max kaj lakapala natalakgpali. Max kaj lakapala naminkgo lhuwa policías o natamakxtumikgo ktiji latamanin. O max chatum tiku xalak kachikin nakinkawaniyan nialh nalichuwinanaw Dios anta. Ni anta natamakgxtakgaw xlakata naʼakxilhputunaw tuku lama, tlakg tlan nawan tunkun naʼanaw chu alakatanu nalichuwinanaw Dios (Pro. 17:14; Juan 8:59; 1 Tes. 4:11).
3. ¿La namakgantaxtiyaw tuku wan Eclesiastés 4:9 akxni lichuwinanaw Dios?
3 Ni ki’akstukan na’anaw. Eclesiastés 4:9 wan: «Tlakg tlan chatiy nixawa kaj chatum». Max akinin lakpuwanaw pi komo kiʼakstukan nalichuwinanaw Dios nitu kintikaʼakgspulan, pero ¿xlikana nitu katilalh? Max wi niku tlanku chuna tlawakan, pero max wilakgo kachikinin niku nialh tlan pi chatum tala puskat o kgawasa akstu naʼan lichuwinan Dios liwaka komo katsisnita. Liwana katsiyaw pi akxni wi tiku taʼanaw lichuwinanaw Dios tlakg tlan kinkakitaxtuniyan (Ecl. 4:10, 12). Putum kuenta nakatlawayaw tiku lichuwinamakgolh Dios chu nalismaniyaw pi akxni naʼanawa kkinchikkan nakamakatsiniyaw tiku kataʼanitaw.
4. ¿Tuku natlawayaw kimputumkan xlakata kuenta natlawayaw akxni lichuwinanaw Dios?
4 Lakgkgolotsin xalak congregación, tiku «kuentajtlawamakgolh kilatamatkan», wa tiku nawankgo tuku xtitlawat xlakata kuenta natlawayaw anta kkachikin (Heb. 13:17). Komo tataktujuyaw chu tlawayaw tuku kinkawanikanan, Jehová nakinkasikulunatlawayan (Miq. 6:8; 1 Cor. 10:12). Klakpuwanaw pi putum xlakskujnin Dios chuntiya liwana nalichuwinankgo niku kalakgchan, pero kuenta xlitlawatkan.