¿Tuku xlakata lu paxtikatsiniyaw Jehová chuna la kinkatapatiyan?

1, 2. ¿Tuku xlakata wanaw pi akinin latamanin chuna kinkaʼakgspulaman la kgawasa tiku lichuwinan párrafo akgtum?

KALILAKPUWAW chatum kgawasa tiku xnatlatni lu kgalhikgo tumin. Pero akgtum kilhtamaku makatsinikan pi xnatlatni nikgolh. Chu ni kajwatiya uma. Na makatsinikan pi xnatlatni laktlawamikgolh xtuminkan. Wa xlakata ni tumin makgxtakgnika, wata kaj lhuwa tuku xlilakgxokgot. Chu wanimaka pi tunkun xlixokgot. Pero lhuwa tuku laklin chu nikxnila katixokgokgolh.

² Latamanin tatekgsaw la kgawasa nema lichuwinamanaw. Xapulana kinatlatnikan, Adán chu Eva, ni xkgalhikgo talakgalhin chu xlamakgo kxakastlan paraíso (Gén. 1:27; 2:​7-9). Tlan ankgalhin xlipaxuwakgolh latamat. Pero putum talakgpalilh. Makgatsankgakgolh xastlan xpulatamatkan chu nialhla latamakgolh putum kilhtamaku. ¿Tuku kamakgxtakgnikgolh xkamanankan? Biblia kinkawaniyan: «Kaj xpalakata chatum chixku [Adán] talakgalhin tanulh kkakilhtamaku, chu linin xpalakata talakgalhin, chu wa xlakata linin kaʼakgchipalh putum latamanin xlakata putum xlakgalhinankgonit» (Rom. 5:12). Adán kinkamakgxtakgnin talakgalhin, chu wa xlakata niyaw. Talakgalhin nema kinkamakgxtakgnikan, xtachuna la lhuwa tuku laklinaw chu nila xokgoyaw (Sal. 49:8).

3. ¿Tuku xlakata wankan pi talakgalhin xtachuna la tuku “laklinkan”?

³ Jesús tamalakxtumilh talakgalhin la akxni wi tuku “laklinkan” (Mat. 6:12; Luc. 11:4). Tlan nawanaw pi akxni lakgalhinanaw xtachuna la wi tuku lakliniyaw Jehová nema kilixokgotkan. Komo xla nitu xtlawalh xlakata kxokgolh tuku laklinaw, kajwatiya kilatamatkan tlan xlixokgow (Rom. 6:​7, 23).

4. 1) ¿La xkinkakitaxtunin komo niti xkinkamakgtayan? (Salmo 49:​7-9). 2) Akxni Biblia lichuwinan talakgalhin, ¿tuku kilhchanima? (Kaʼakxilhti recuadro «Talakgalhin»).

⁴ Kiʼakstukan nila xkgalhiparaw putum tuku Adán chu Eva makgatsankgakgolh (kalikgalhtawakga Salmo 49:​7-9). Ni xkgalhiw takgalhkgalhin xlakata nalatamayaw putum kilhtamaku chu nalakastakwananaw komo niti xkinkamakgtayan. Xlakgsputwi, chuna la animales (Ecl. 3:19; 2 Ped. 2:12).

5. ¿La kinkamakgtayanitan Jehová naxokgoyaw kintalakgalhinkan? (Kaʼakxilhti dibujo).

⁵ Kalichuwinamparaw kgawasa nema lichuwinaw kpárrafo akgtum. ¿La xmakgkatsilh komo chatum chixku tiku kgalhi lhuwa tumin, xmalaknunilh nalakgxokgo putum tuku xlaklinkgo xnatlatni? Max lu xpaxtikatsinilh chu xmastalh talakaskin pi xmakgtayaka. Xtachuna la uma, Jehová, kinTlatkan tiku lu kinkapaxkiyan, kinkamaxkinitan akgtum tamaskiwin nema xokgo talakgalhin nema kinkamakgxtakgnin Adán. Jesús lichuwinalh tuku uma tamaskiwin: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16). Uma tamaskiwin na kinkamakgtayayan tlan natalalinaw Jehová.

6. ¿Tuku nalichuwinanaw kʼuma artículo, chu tuku xlakata?

⁶ ¿La tlan nalitamakgtayayaw tamaskiwin nema Jehová tlawanit xlakata nakinkatapatiyan kintalakgalhinkan o tuku lakliniyaw? Xlakata nakatsiyaw, kʼuma artículo nalakputsananiyaw umakgolh tachuwin nema minkgo kBiblia: tlan latalalimparakan, xapakan talakgalhin, talakgmaxtut, lakgmaxtunankan chu xaʼakgstitum litaxtukan kxlakatin Dios. Komo nalilakpuwanaw umakgolh tachuwin, nakinkamakgtayayan tlakg napaxtikatsiniyaw Jehová putum tuku tlawanit xlakata nakinkatapatiyan.

TUKU JEHOVÁ LAKASKIN: TLAN LATALALIMPARAKAN

7. 1) ¿Tuku atanu makgatsankgakgolh Adán chu Eva? 2) ¿Tuku xtalakaskin pi xtlawaka kimpalakatakan? (Romanos 5:​10, 11).

⁷ Adán chu Eva ni kajwatiya nialhla latamakgolh putum kilhtamaku, wata na nialhla talalinkgolh xTlatkan, Jehová. Akxni nina xlakgalhinankgo, xmakgtapakgsikgo kxfamilia Jehová (Luc. 3:38). Pero akxni nialh kgalhakgaxmatkgolh Jehová, nialh makgtapakgsikgolh kxfamilia. Chu uma chuna lalh akxni nina xkgalhikgo xkamanankan (Gén. 3:​23, 24; 4:1). Wa xlakata, talakaskin pi akinin xkamanan Adán, tlan natalalimparayaw Jehová (kalikgalhtawakga Romanos 5:​10, 11). Maktum libro wan pi akxni uma texto maklakaskin tachuwin «tlan talalinkan», maklakaskin akgtum tachuwin xagriego nema wamputun «natlawaya pi chatum mintalamakgasitsin miʼamigo nalitaxtu». Tuku kaks malakawaninan wa pi Jehová wa tiku pulana tlawalh pi tlan natalalimparayaw. ¿La chuna tlawalh?

TUKU LAKKAXWILIKANIT: XAPAKAN TALAKGALHIN

8. ¿Tuku kilhchanima xapakan talakgalhin?

⁸ Jehová lakkaxwilinit pi naxapakan kintalakgalhinkan xlakata tlan natalalimparayaw. Tachuwin xapakan kilhchanima pi wi tuku lilakgpalikan atanu tuku na watiya kgalhi xtapalh. Akxni chuna tlawakan tlan kgalhiparakan o lakgxokgowilikan tuku xmakgatsankgakanit o xlakxlanit. Tatsokgni xaGriego na lichuwinan tuku tlawalh Jehová xlakata latamanin tlan xtalalinkgolh (Rom. 3:25).

9. ¿Tuku lakkaxwililh Jehová kxkilhtamakujkan israelitas xlakata tlan xkatapatilh xtalakgalhinkan?

⁹ Kxkilhtamakujkan israelitas, Jehová wi tuku lakkaxwililh xlakata tlan xkatapatilh xtalakgalhinkan chu chuna tlan xtalalinkgolh. Kkilhtamaku akxni kxapakan Talakgalhin, sacerdote tiku tlakg xkgalhi limapakgsin xmakamasta animales xpalakata kachikin. Pero umakgolh tamakamastan nema xtlawakan nila kxapa xtalakgalhinkan israelitas putum kilhtamaku, xlakata tantum animal ni xtachuna xtapalh chatum lataman. Maski chuna, Jehová tlan xʼama katapati xtalakgalhinkan israelitas komo xlakan xmakgxtakgkgolh tuku nitlan xtlawamakgolh chu komo xmastakgolh tamakamastan nema xla xkaskini (Heb. 10:​1-4). Nachuna, tamakamastan nema xtlawakan kKilhtamaku akxni kxapakan Talakgalhin chu atanu kilhtamaku, xkamalakapastaka israelitas pi xlakan makglakgalhinanin xwankgonit chu pi xtalakaskin atanu tuku tlakg tlan nema kxapalh xtalakgalhinkan putum kilhtamaku.

10. ¿Tuku lakkaxwililh Jehová xlakata tlan xkatapatilh xtalakgalhinkan latamanin putum kilhtamaku?

¹⁰ ¿Tuku lakpuwa Jehová natlawa xlakata tlan xkatapatilh xtalakgalhinkan latamanin putum kilhtamaku? Makamilh xKgawasa tiku lu xpaxki xlakata “kaj makgtum xʼakstu xtamakamastalh xlakata xlilh xtalakgalhinkan lhuwa latamanin” (Heb. 9:28). Jesús milh «xlakata namasta xlatamat chu nakalilakgmaxtu lhuwa latamanin» (Mat. 20:28). Pero ¿tuku talakgmaxtut?

TUKU LIXOKGONANKA: TALAKGMAXTUT

11. 1) Akxni Biblia lichuwinan talakgmaxtut, ¿tuku kilhchanima? 2) ¿Tuku xlitamakgatsit xwanit xlakata tlan kxokgoka talakgmaxtut?

¹¹ Akxni kBiblia maklakaskinkan tachuwin talakgmaxtut, kilhchanima tuku xokgokan xlakata naxapakan tuku nitlan tlawakanit chu xlakata tlan nalatalalimparakan.a Wa uma tuku Jehová kskin xlakata nakgalhiparakan tuku Adán chu Eva makgatsankgakgolh. Kalakapastakwi pi xlakan makgatsankgakgolh latamat nema ni xkgalhi talakgalhin chu nialhla latamakgolh putum kilhtamaku. Wa xlakata, talakgmaxtut nema xtalakaskin, xtachuna xtapalh xliwanat xwanit chuna la nema xmakgatsankgakgonit (1 Tim. 2:6). Kajwatiya tlan kxokgolh chatum chixku tiku xmakgatsilh uma pulaktutu: ni xkgalhilh talakgalhin, tlan xlatamalh putum kilhtamaku kkatiyatni chu xmakamastaputulh xlatamat kimpalakatakan. Kajwatiya uma tlan xlakgxokgowililh latamat nema xmakgatsankgakanit chu tlan kxapalh talakgalhin.

12. ¿Tuku xlakata Jesús tlan xokgolh talakgmaxtut?

¹² Kalichuwinaw tuku xlakata Jesús tlan xokgolh talakgmaxtut: 1) ni xkgalhi talakgalhin chu «nipara akgtum talakgalhin tlawalh», 2) tlan xtilatamalh putum kilhtamaku kkatiyatni chu 3) xatapaxuwan mastalh xlatamat kimpalakatakan (1 Ped. 2:22; Heb. 10:​9, 10). Jesús ni xkgalhi talakgalhin. Xtachuna xwanit la xapulana chixku, Adán, akxni nina xmakglakgalhinan (1 Cor. 15:45). Xlakata Jesús nilh, tlan xapalh xtalakgalhin Adán, uma wamputun pi lakgxokgowililh tuku Adán xmakgatsankganit (Rom. 5:19). Jesús litaxtulh «xaʼawatiya Adán». Nialh talakaskin pi namin atanu lataman tiku ni kgalhi talakgalhin chu naxokgo tuku Adán makgatsankgalh. Jesús «kaj makgtum» nilh, chu xtamakamastan «putum kilhtamaku» litamakgtayamaw (Heb. 7:27; 10:12).

13. ¿Tuku litalakgpali xapakan talakgalhin chu talakgmaxtut?

¹³ ¿Tuku litalakgpali xapakan talakgalhin chu talakgmaxtut? Akxni wanaw pi xapakan talakgalhin kilhchanima tuku tlawa Dios xlakata tlan nakatalalimpara latamanin. Talakgmaxtut wa tuku xokgoka xlakata naxapakan xtalakgalhinkan latamanin. Xkgalhni Jesús nema stajmakgalh kimpalakatakan wa tuku lixokgonanka (Efes. 1:7; Heb. 9:14).

TUKU KITAXTULH: LAKGMAXTUNANKAN CHU XAʼAKGSTITUM LITAXTUKAN KXLAKATIN DIOS

14. ¿Tuku nalichuwinanaw la uku, chu tuku xlakata?

¹⁴ ¿La litamakgtayayaw xlakata xapakan kintalakgalhinkan? Biblia tanu tanu tachuwin maklakaskin xlakata nalichuwinan la litamakgtayayaw uma. Maski tasiya pi umakgolh tachuwin watiya tuku wamputunkgo, pulakatunu pulakatunu lichuwinan tanu tanu tuku lakkaxwilinit Jehová xlakata nakinkatapatiyan. Kalichuwinaw umakgolh tachuwin, chu uma nakinkamakgtayayan tlakg xtapalh naliʼakxilhaw la litamakgtayayaw xlakata Jehová kinkatapatiyan.

15, 16. 1) ¿Tuku kilhchanima Biblia akxni wan pi kinkalakgmaxtukan? 2) ¿La makgkatsiyaw akxni lilakpuwanaw pi kinkalakgmaxtukan ktalakgalhin chu klinin?

¹⁵ Akxni Biblia wan pi kinkalakgmaxtukan, kilhchanima pi nialh laklinaw talakgalhin xlakata xokgoka talakgmaxtut. Apóstol Pedro lichuwinalh uma akxni wa: «Wixin katsiyatit pi ni limaklakaskinka tuku lakxla xlakata nakalilakgmaxtukanatit, chuna la oro o plata, ni wa tlawalh pi nalakgtaxtuniyatit chuna la xlinkgo xlatamatkan nema nitu litaxtu xalakgmakgan minatlatnikan, nema xlakan kamatitaxtinikgon. Wata kalilakgmaxtukantit xkgalhni Cristo nema kgalhi lhuwa xtapalh, xtachuna la xkgalhni tantum borrego nema ni kgalhi tuku nitlan chu xaskulunku» (1 Ped. 1:​18, 19).

¹⁶ Xlakata mastaka talakgmaxtut, tlan kinkalilakgmaxtukan ktalakgalhin chu klinin nema kinkamakgapatinanan (Rom. 5:21). Xlikana pi lu kapaxtikatsiniyaw Jehová chu Jesús xlakata kinkalakgmaxtukgon (1 Cor. 15:22).

17, 18. 1) ¿Tuku kilhchanima pi Jehová xaʼakgstitum kinkaliʼakxilhan? 2) ¿La litamakgtayayaw uma?

¹⁷ Biblia wan pi Jehová xaʼakgstitum kinkaliʼakxilhan, uma wamputun pi nialh talakaskin naxokgoyaw talakgalhin nema tlawanitaw. ¿Wamputun uma pi Jehová lakatsala xaʼakgstitum xlimapakgsin? Nichuna. Xla xaʼakgstitum kinkaliʼakxilhan pero ni kaj xlakata tlawayaw tuku tlan. Tuku tlawa pi Jehová nakinkatapatiyan, wa pi kanajlayaw pi xapaka kintalakgalhinkan chu xokgoka tuku nakinkalilakgmaxtukanan (Rom. 3:24; Gál. 2:16).

¹⁸ ¿La litamakgtayayaw xlakata Jehová xaʼakgstitum kinkaliʼakxilhan? Makgapitsi kstalaninanin Cristo kalaksakkanit xlakata natamapakgsinankgo Jesús kʼakgapun chu xkamanan Dios litaxtukgonit (Tito 3:7; 1 Juan 3:1). Katapatikanit xtalakgalhinkan, xtachuna la nikxni tlawakgolh talakgalhin. Wa xlakata tlan makgtapakgsikgo kxTamapakgsin Dios (Rom. 8:​1, 2, 30). Amakgapitsin kstalaninanin Cristo kgalhkgalhimakgo nalatamakgo kkatiyatni putum kilhtamaku chu xʼamigos Dios litaxtukgonit. Na katapatikanit xtalakgalhinkan (Sant. 2:​21-23). Lhuwa latamanin tiku nalakgtaxtukgo kʼArmagedón, kgalhikgo takgalhkgalhin pi nikxni nanikgo (Juan 11:26). «Tiku xaʼakgstitum chu tiku ni xaʼakgstitum» nema nikgonita nalakastakwanankgo (Hech. 24:15; Juan 5:​28, 29). Chuna la natitaxtu kilhtamaku, putum kskujnin Jehová tiku nalatamakgo kkatiyatni «xkamanan [...] nalitaxtukgo, xlakata nakgalhikgo lakgtaxtut nema kgalhi kakni» (Rom. 8:21). Chuna la akxilhaw, akgtum lanka tasikulunalin tuku lakkaxwilinit Jehová xlakata naxapa kintalakgalhinkan, xlakata uma kinkamaxkiyan talakaskin natalalinaw chuna la xtalalinkgo xapulana latamanin.

19. ¿La litamakgtayayaw tuku tlawakgolh Jehová chu Jesús kimpalakatakan? (Na kaʼakxilhti recuadro «Tuku kilhchanima pi Jehová kinkatapatiyan chu tuku kitaxtu»).

¹⁹ Nachuna xkinkaʼakgspulaman chuna la kgawasa tiku makgatsankgalh putum tuku xkgalhi chu lhuwa tuku xlaklin chu nikxnila xʼama xokgonankgo. Pero uma talakgpalilh xlakata Jehová kinkamakgtayan. Lakkaxwililh xlakata naxapakan kintalakgalhinkan chu xokgolh talakgmaxtut. Xlakata kanajlaniyaw Jesucristo, kinkamakgtayayan nakinkalakgmaxtukanan ktalakgalhin chu klinin. Nachuna, xapakan kintalakgalhinkan xtachuna la nikxni tlawaw. Pero tuku tlakg xlakaskinka la uku wa pi tlan talalinaw xapaxkina kinTlatkan xalak akgapun, Jehová.

20. ¿Tuku naʼakxilhaw kʼatanu artículo?

²⁰ Lu kapaxtikatsiniyaw Jehová chu Jesús akxni lilakpuwanaw putum tuku tlawakgonit kimpalakatakan (2 Cor. 5:15). Komo xlakan ni xkinkamakgtayakgon, ni xkgalhiw takgalhkgalhin. Kʼatanu artículo nalichuwinanaw makgapitsi liʼakxilhtit xalak Biblia xlakata tlakg naʼakgatekgsaw la litamakgtayayaw pi Jehová kinkatapatiyan chatunu akinin.