ARTÍCULO NEMA NATALIKGALHTAWAKGA 7
TAKILHTLIN 15 ¡Kamalankiw xaPuxku xkgawasa Jehová!
¿Tuku kilhchanima pi Jehová tapatinan?
«Wix xlikana tapatinana» (SAL. 130:4).
TUKU NAʼAKXILHAW
Biblia maklakaskin tipalhuwa liʼakxilhtit xlakata nakinkamakgtayayan naʼakgatekgsaw chu xtapalh naliʼakxilhaw chuna la Jehová kinkatapatiyan xlakata nitu tuku xtachuna.
1. Akxni chatum lataman kinkawaniyan pi kinkatapatiyan, ¿tuku xlakata tuwa kitaxtu nakatsiyaw tuku xlikana makgkatsima?
LU TLAN limakgkatsiyaw akxni chatum tiku nitlan mamakgkatsininitaw kinkawaniyan: «Ktapatiyan». Pero ¿tuku xlakata tuwa kitaxtu nakatsiyaw tuku xlikana makgkatsima? Xlakata min kilhtamaku ni putum latamanin watiya tuku akgatekgskgo pi kilhchanima tapatinankan. Max uma lataman kinkawaniyan pi kinkatapatiyan chu tlan nakinkatalalimparayan. O max wamputun pi nialh katilakapastakli tuku lalh pero nialhla kintikatalalin chuna la xapulana.
2. ¿Tuku wan Biblia xlakata la tapatinan Jehová? (Na kaʼakxilhti nota).
2 ¡Jehová nichuna likatsi! Nipara chatum lataman tapatinan chuna la xla tlawa. Chatum salmista wanilh Jehová: «Wix xlikana tapatinana, chu chuna tlawaya pi nakakninaniputunkana» (Sal. 130:4).a Xlikana pi chuna la tapatinan Jehová ni anan tuku xtachuna, xla “xlikana tapatinan”. Komo katsiputunaw tuku kilhchanima xlikana tapatinankan, talakaskin nastalaniyaw xliʼakxilhtit Jehová. Anta kTatsokgni xaʼHebreo min kilhtamaku maklakaskinkan akgtum tachuwin nema kajwatiya kilhchanima chuna la tapatinan Jehová chu nichuna la tapatinankgo latamanin.
3. ¿Tuku xlakata wanaw pi chuna la tapatinan Jehová ni xtachuna la akinin tapatinanaw? (Isaías 55:6, 7).
3 Akxni Jehová wi tiku tapati, xapa putum xtalakgalhin chu maxki talakaskin tlan natalalimpara. ¡Lu tlan pi Jehová xatapaxuwan tapatinan chu makgtuminika chuna tlawa! (Kalikgalhtawakga Isaías 55:6, 7).
4. ¿Tuku tlawanit Jehová xlakata nakinkamakgtayayan naʼakgatekgsaw tuku kilhchanima xlikana tapatinankan?
4 Kiʼakstukan nila liwana xʼakgatekgswi chuna la Jehová tapatinan, xlakata chuna la xla tapatinan ni xtachuna la tapatinankgo latamanin. Pero xla kinkamakgtayayan naʼakgatekgsaw uma chu maklakaskin makgapitsi liʼakxilhtit nema min kxTachuwin. Kʼuma artículo nalichuwinanaw makgapitsi umakgolh liʼakxilhtit. Uma nakinkamakgtayayan naʼakxilhaw putum tuku Jehová tlawa xlakata namapanu talakgalhin nema tlawanitaw chu xlakata tlan natalalimparayaw. Uma tuku nalichuwinanaw nakinkamakgtayayan tlakg liwana naʼakgatekgsaw chuna la Jehová kinkatapatiyan chu tlakg xtapalh naliʼakxilhaw tuku tlawa xapaxkina kinTlatkan, Jehová.
JEHOVÁ LIN KINTALAKGALHINKAN
5. ¿Tuku tlawa Jehová akxni kinkatapatiyan?
5 Biblia tamalakxtumi kintalakgalhinkan xtachuna la akgtum tsinka takuka. Mapakgsina David chuna tamalakxtumilh. Xla wa: «Kintalakgalhin wi kkiʼakgxakga, akgtum tsinka takuka litaxtu, lu tsinka chu nila kkukalin» (Sal. 38:4). Pero Salmo 25:18 chu 32:5 wan pi Jehová katapati tiku nitlan limakgkatsikgo xtalakgalhinkan chu nialh tlawakgo. Tachuwin xaʼhebreo nema kʼumakgolh versículos matitaxtikanit «tapatinankan» kilhchanima «linkan». Uma kinkamalakpuwaniyan pi Jehová xtachuna la chatum tliwakga chixku tiku kinkamakglhtiyan chu lin kintakukakan, uma kilhchanima kintalakgalhinkan.
«Kintapati [o “kalipi”] » (Sal. 25:18).
6. ¿Niku lin Jehová kintalakgalhinkan?
6 ¿Chu niku lin Jehová kintalakgalhinkan? Anta kSalmo 103:12 lichuwinan akgtum liʼakxilhtit nema kinkamakgtayayan naʼakgatekgsaw. Uma texto wan: «Chuna la xlimakgat lawilanikgolh niku taxtu chichini chu niku tatsekga, chuna xlimakgat wilinit kintalakgalhinkan». Niku taxtu chichini chu niku tatsekga lu makgat lawilanikgo. Tlan nawanaw pi nikxnila katilatalakatsuwinilh. Uma versículo kinkamasiyaniyan pi akxni Jehová kinkatapatiyan, makgat lin kintalakgalhinkan. ¡Lu tlan limakgkatsiyaw xlakata katsimaw pi Jehová xlikana kinkatapatiyan!
«Chuna la xlimakgat lawilanikgolh niku taxtu chichini chu niku tatsekga» (Sal. 103:12).
7. ¿Tukuya liʼakxilhtit limaklakaskin Biblia xlakata nakinkamakgtayayan naʼakgatekgsaw tuku Jehová tlawani kintalakgalhinkan? (Miqueas 7:18, 19).
7 Akxni wanaw pi Jehová makgat lin kintalakgalhinkan, ¿wamputun pi maki? Nichuna, mapakgsina Ezequías wanilh Jehová: «Makapinita kminkgen putum kintalakgalhin», o chuna la wan xnota uma texto, «mapanunita kmilakatin putum kintalakgalhin» (Is. 38:9, 17; nota). Wa xlakata, akxni nitlan limakgkatsiyaw kintalakgalhinkan chu makgxtakgaw, Jehová makgat makan xlakata nialh naʼakxilhpara. Uma versículo na tlan xmatitaxtika: «Kmilakatin xtachuna la komo nikxni ktlawalh talakgalhin». Biblia maklakaskimpara atanu liʼakxilhtit xlakata nakinkamakgtayayan naʼakgatekgsaw uma (kalikgalhtawakga Miqueas 7:18, 19). Biblia wan pi Jehová lhkgen makan kintalakgalhinkan kxtampun pupunu. Makgasata, akxni wi tuku xtajuyacha kxtampun pupunu, nialhla xmakutukan.
«Makapinita kminkgen putum kintalakgalhin» (Is. 38:17).
«Wix lhkgen namakapina xtalakgalhinkan kxtampun pupunu» (Miq. 7:19).
8. ¿Tuku kinkamasiyanikgoyan liʼakxilhtit nema lichuwinawa?
8 Liʼakxilhtit nema kalichuwinawa, kinkamasiyanikgoyan pi akxni Jehová kinkatapatiyan, lin kintalakgalhinkan chu chuna kinkamakglhtiyan uma tsinka takuka. Lu xlikana tuku wa David: «Paxuwakgo tiku tlawakgonit tuku nitlan chu katapatikanit chu xtalakgalhinkan kamatsankgenanikanit; paxuwa ama chixku tiku lakgalhinalh, xlakata Jehová nialh katilakapastakli xtalakgalhin» (Rom. 4:6-8). ¡Jehová xlikana tapatinan!
JEHOVÁ XAPA KINTALAKGALHINKAN
9. ¿Tuku liʼakxilhtit limaklakaskin Jehová xlakata nakinkamakgtayayan naʼakgatekgsaw chuna la kinkatapatiyan?
9 Kalichuwinaw atanu liʼakxilhtit nema min kBiblia nema kinkamakgtayayan naʼakgatekgsaw la maklakaskin Jehová talakgmaxtut xlakata naxapa xtalakgalhinkan tiku makgxtakgkgo tuku nitlan tlawamakgo. Biblia wan pi chakgemakgan o xaka talakgalhin, chu chuna maskulunki tiku tlawanit talakgalhin (Sal. 51:7; Is. 4:4; Jer. 33:8). Jehová kinkalitachuwinanan tuku kitaxtu akxni chuna tlawa: «Maski mintalakgalhinkan xtachuna la escarlata, xasnapapa nawankgo la miki; maski xaspinini xtachuna la lhakgat xla carmesí, nawankgo la lana» (Is. 1:18). Akxni maktum lhakgat tawakani lu xaspinini pintura lu tuwa kitaxtu namaktinikan. Jehová limaklakaskin uma liʼakxilhtit xlakata nakinkamaʼakgatekgsniyan pi xla tlan chakgemakgan kintalakgalhinkan chu nialhpara tsinu natasiya.
«Maski mintalakgalhinkan xtachuna la escarlata, xasnapapa nawankgo la miki» (Is. 1:18).
10. ¿Tuku atanu liʼakxilhtit limaklakaskin Jehová xlakata nakinkamakgtayayan naʼakgatekgsaw pi xatapaxuwan kinkatapatiyan?
10 Kxapulana artículo lichuwinaw pi talakgalhin, xtachuna la tuku “laklinkan” (Mat. 6:12; Luc. 11:4). Makgatunu akxni tlawayaw talakgalhin xtachuna la wi tuku lakliniyaw Jehová. Pero akxni xla kinkatapatiyan, xapa putum tuku laklinaw, uma wamputun pi nialh talakaskin naxokgonaniyaw. Tlan nawanaw pi xla ni kinkamalakgaxokgeyan talakgalhin nema kinkatapatinitana. ¡Lu tlan limakgkatsiyaw akxni akgtekgsaw pi Jehová kinkatapatiyan!
«Kakilatapatiw tuku kkalakliniyan» (Mat. 6:12).
11. ¿Tuku kilhchani Biblia akxni wan pi xapakan kintalakgalhinkan? (Hechos 3:19).
11 Jehová ni kajwatiya lakalhtita tuku nitlan tlawayaw, wata makgtuminika xapa (kalikgalhtawakga Hechos 3:19). Uma max kinkamalakpuwaniyan chatum chixku tiku lakalhtita kmaktum kapsnat tuku laklin chatum lataman. Pero maski lakalhtitka, chuntiyaku tasiya tuku tsokgwilikanit. Pero kliʼakxilhtit nema lichuwinamaw ni kajwatiya lakalhtitkan tuku laklinaw, wata xapakan. Xlakata liwana naʼakgatekgsaw, kalakapastakwi pi makgasata, pintura nema xmaklakaskinkan xlakata wi tuku natsokgwilikan ni tuwa xlixakakan lhakgat nema xmachuwikanit chuchut. Wa xlakata, akxni kxapakan tuku xlaklin chatum lataman makgtuminika xtaxapa, nialhpara tsinu xtasiya tuku xtatsokgtawilanit. Nitila xʼakxilhpara tuku xtatsokgtawilanit anta. Xtachuna la nikxni tsokgwilika tuku xlaklin uma lataman. ¡Lu paxtikatsiniyaw Jehová pi akxni kinkatapatiyan, makgtuminika xapa kintalakgalhinkan! (Sal. 51:9).
«Nakaxapanikanatit mintalakgalhinkan» (Hech. 3:19).
12. ¿Tuku kinkamasiyaniyan liʼakxilhtit nema lichuwinankan kʼIsaías 44:22?
12 Anta kʼIsaías 44:22, Jehová maklakaskin atanu liʼakxilhtit xlakata nalichuwinan tuku tlawani kintalakgalhinkan: «Naktlawa pi nialh natasiya tuku nitlan tlawanita, xtachuna la xaklilakgatlapalh puklhni, chu mintalakgalhin xtachuna la xaklilakgatlapalh xatsitsakga puklhni». Akxni Jehová kinkatapatiyan, xtachuna la xlilakgatlapalh akgtum tsitsakga puklhni kintalakgalhinkan, xlakata nialhtila naʼakxilha.
«Naktlawa pi nialh natasiya tuku nitlan tlawanita, xtachuna la xaklilakgatlapalh puklhni» (Is. 44:22).
13. ¿La makgkatsiya xlakata katsiya pi Jehová tapatiyan mintalakgalhin?
13 ¿Tuku kinkamasiyaniyan putum umakgolh liʼakxilhtit? Akxni Jehová kinkatapatiyan, nialh talakaskin nalakpuwanaw pi kintalakgalhinkan maxkajwinit kilatamatkan chu nila katitaxapalh. Xlakata xkgalhni Jesucristo xokgonit putum tuku xlaklinaw, nialh talakaskin pi akinin naxokgoyaw. Makgtuminika xapakanit, xtachuna la nikxni xlakliniw Jehová. Akxni akinin nitlan limakgkatsiyaw kintalakgalhinkan chu makgxtakgaw, Jehová xlikana kinkatapatiyan.
JEHOVÁ MASTA TALAKASKIN PI XʼAMIGO NALITAXTUPARAYAW
Xlakata kinTlatkan xalak akgapun kinkatapatiyan, tlan talalinaw (Kaʼakxilhti párrafo 14).
14. ¿Tuku xlakata liwana katsiyaw pi Jehová xlikana kinkatapatiyan kintalakgalhinkan? (Na kaʼakxilhti dibujos).
14 Akxni Jehová kinkatapatiyan, kiʼamigojkan litaxtupara. Xlakata katsiyaw uma, kinkamakgtayayan nialh lu nalilipuwanaw tuku nitlan tlawanitaw chu nialh nalakpuwanaw pi Jehová kinkasitsininitan chu lakputsama la nakinkamalakgaxokgeyan. ¡Xla nichuna tlawa! ¿Tuku xlakata liwana katsiyaw uma? Xlakata Jehová wanilh palakachuwina Jeremías: «Nakkatapati tuku nitlan tlawakgolh, chu nialh ktilakapastakli xtalakgalhinkan» (Jer. 31:34). Apóstol Pablo kikilhtiyalh uma versículo akxni wa: «Nialh ktilakapastakli xtalakgalhinkan» (Heb. 8:12). ¿Tuku kilhchanima umakgolh tachuwin?
«Nialh ktilakapastakli xtalakgalhinkan» (Jer. 31:34).
15. ¿Tuku wamputun Jehová akxni wan pi nialh katilakapastakli kintalakgalhinkan?
15 Akxni Biblia maklakaskin tachuwin lakapastakkan, ni kajwatiya kilhchani pi nalakapastaka tuku lanit makgasa. Min kilhtamaku uma tachuwin maʼakgatekgsninan pi wi tuku natlawakan. Kalilakpuwaw chixku tiku xpaxtuwaka Jesús akxni xtokgowakaka. Xla wa: «Jesús, kakilakapastakti akxni natanuyapi kminTamapakgsin» (Luc. 23:42, 43). Liwana katsiyaw pi chixku ni kajwatiya kskinima Jesús pi xlakapastakli. Chu tuku Jesús likgalhtilh masiya pi xla wi tuku xʼama tlawa xpalakata, xʼama malakastakwani. Wa xlakata, akxni Jehová wan pi nialh katilakapastakli kintalakgalhinkan, wamputun pi nialh kintikamalakgaxokgen. Na ni kintikalilakawanin xlakata kinkatapatinitana.
16. ¿Tuku li’akxilhtit limaklakaskin Biblia xlakata nakinkamakgtayayan na’akgatekgsaw la makgkatsiyaw akxni Jehová kinkatapatiyan?
16 Kalichuwinaw atanu liʼakxilhtit nema maklakaskin Biblia xlakata nakinkamakgtayayan naʼakgatekgsaw la makgkatsiyaw akxni Jehová kinkatapatiyan. Xlakata putum akinin makglakgalhinanin, tlan nawanaw pi xlakskujnin talakgalhin xlitaxtuyaw. Pero akxni Jehová kinkatapatiyan, kinkalakgmaxtuyan xlakata «nialh xlakskujnin talakgalhin» nalitaxtuyaw (Rom. 6:17, 18; Apoc. 1:5). Xtachuna la chatum tachin paxuwa akxni makgxtakgkan, akinin lu paxuwayaw xlakata katsiyaw pi Jehová kinkatapatiyan.
«Kalakgmaxtukanitantit xlakata nialh xlakskujnin talakgalhin nalitaxtuyatit» (Rom. 6:18).
17. ¿Tuku xlakata wanaw pi akxni Jehová kinkatapatiyan xtachuna la xkinkamapaksan? (Isaías 53:5).
17 (Kalikgalhtawakga Isaías 53:5). Xaʼawatiya liʼakxilhtit nema nalichuwinanaw, wa akxni Biblia wan pi talakgalhin xtachuna la akgtum tajatat nema makgninan. Pero Jehová limaklakaskin xtamakamastan xKgawasa xlakata nakinkamapaksayan, chu chuna tlawa pi tlan natalalimparayaw maski xtlawanitaw talakgalhin (1 Ped. 2:24). Akxni chatum lataman tiku lu tatatla mapaksakan, lu paxuwa. Nachuna makgkatsiyaw akxni Jehová kinkatapatiyan chu tlawa pi tlan natalalimparayaw.
«Xlakata tuku nitlan tlawanika [Cristo] akinin lipaksnitaw» (Is. 53:5).
¿LA KINKAMAMAKGKATSINIYAN CHUNA LA KINKATAPATIYAN JEHOVÁ?
18. ¿Tuku kinkamasiyaninitan liʼakxilhtit nema kalichuwinanitaw xlakata la kinkatapatiyan Jehová? (Na kaʼakxilhti recuadro «¿La kinkatapatiyan Jehová?»).
18 ¿Tuku kinkamasiyaninitan umakgolh liʼakxilhtit xlakata la kinkatapatiyan Jehová? Akxni Jehová kinkatapatiyan, makgtuminika xapa kintalakgalhinkan. Uma kinkamaxkiyan talakaskin tlan natalalinaw kinTlatkan xalak akgapun. Pero kalakapastakwi pi Jehová ni kinkatapatiyan xlakata chuna xlitlawat. Chu na nila xafuerza skiniyaw pi chuna katlawalh. Akxni Jehová kinkatapatiyan, xtachuna la kinkatlawaniman akgtum tamaskiwin. Chuna tlawa xlakata kinkapaxkiyan chu xlakata tlan likatsi (Rom. 3:24).
19. 1) ¿Tuku xlakata lu paxtikatsiniyaw Jehová? (Romanos 4:8). 2) ¿Tuku naʼakxilhaw kʼatanu artículo?
19 (Kalikgalhtawakga Romanos 4:8). ¡Lu paxtikatsiniyaw Jehová xlakata “xlikana kinkatapatiyan”, chuna la wan Salmo 130:4! Pero komo lakaskinaw pi Jehová nakinkatapatiyan, kuenta kilitlawatkan tuku wa Jesús: «Komo ni katapatiyatit latamanin tiku katlawaniyan tuku nitlan, minTlatkan na ni katikatapatin mintalakgalhinkan» (Mat. 6:14, 15). Wa xlakata, lu xlakaskinka pi natapatinanaw chuna la tlawa Jehová. Kʼatanu artículo nalichuwinanaw la tlan chuna natlawayaw.
TAKILHTLIN 46 Paxtikatsiniyaw Jehová
a Tachuwin nema maklakaskinka ktatsokgni xaʼhebreo, maʼakgatekgsninan pi kajwatiya Jehová tlan xlikana chu makgtuminika tapatinan. Klhuwa amakgapitsi traducciones xalak Biblia akxni matitaxtikan uma versículo, ni liwana lichuwinankan uma.