ARTÍCULO NEMA NATALIKGALHTAWAKGA 34
TAKILHTLIN 3 Wix kimaxkiya litliwakga chu klipawanan
Kakanajla pi Jehová tapatinitan
«Wix kintapati kintalakgalhin» (SAL. 32:5, La Biblia. Traducción del Nuevo Mundo, TNM).
TUKU NAʼAKXILHAW
Nalichuwinanaw makgapitsi textos nema kinkamasiyaniyan pi Jehová katapati tiku nitlan limakgkatsikgo xtalakgalhinkan chu makgxtakgkgo. Na nakatsiniyaw tuku xlakata lu xlakaskinka nakanajlayaw pi Jehová kinkatapatiyan.
1, 2. 1) ¿Tuku tlawa Jehová akxni makgxtakgaw kintalakgalhinkan? 2) ¿La limakgkatsiyaw xlakata Jehová kinkatapatiyan? (Na kaʼakxilhti dibujo).
MAPAKGSINA David lu nitlan xlimakgkatsi tuku nitlan xtlawanit makgasa (Sal. 40:12; 51:3; tuku litsuku). Pero makgxtakgli xtalakgalhin chu Jehová tapatilh (2 Sam. 12:13). Akxni David akgatekgsli pi Dios xtapatinit, paxuwalh chu skaya makgkatsilh (Sal. 32:1).
2 Akinin na tlan napaxuwayaw chu skaya namakgkatsiyaw chuna la David. Lu tlan limakgkatsiyaw xlakata katsiyaw pi Jehová kinkatapatiyan, asta maski tlawanitaw laklanka talakgalhin. Pero talakaskin nitlan nalimakgkatsiyaw kintalakgalhinkan chu namakgxtakgaw, nalitayayaw tuku tlawanitaw chu nialh natlawaparayaw (Prov. 28:13; Hech. 26:20; 1 Juan 1:9). Na lu tlan kinkamamakgkatsiniyan xlakata katsiyaw pi akxni Jehová kinkatapatiyan kintalakgalhinkan, makgtuminika xapa, xtachuna la komo nikxni xtlawaw uma talakgalhin (Ezeq. 33:16).
Mapakgsina David tsokgwililh lhuwa salmos nema lichuwinan xlakata la tapatinan Jehová (Kaʼakxilhti párrafos 1 chu 2).
3, 4. 1) ¿La xmakgkatsi Jennifer? 2) ¿Tuku naʼakxilhaw kʼuma artículo?
3 Max min kilhtamaku tuwa makgkatsiyaw nakanajlayaw pi Jehová kinkatapatinitan. Kalichuwinaw Jennifer. Xnatlatni xtatayananin Jehová xlitaxtukgo, pero xla tsukulh tlawa tuku nitlan chu ni kawanilh xnatlatni. Pero titaxtulh makgapitsi kata makgxtakgli tuku nitlan xtlawama chu tamunulh. Jennifer wan: «Lu xaklakgati tumin chu tuku lhuwa xtapalh, chu xaktlawa talakgxtumit nema ni xlitatlawat. Na xakwa lhuwa kuchu chu xasitsin xakwanit. Xakkatsi pi Biblia masiya pi xtamakamastan Cristo tlawa pi nakinkatapatikanan kintalakgalhinkan. Pero maski xakmakgxtakgnita kintalakgalhin chu xakskininit Jehová pi xkintapatilh, tuwa xakmakgkatsi nakkanajla pi xlikana xkintapatinit».
4 ¿Na tuwa makgkatsiya nakanajlaya pi Jehová tapatinitan xlakata wi tuku nitlan tlawa makgasa? Kalakapastakti pi Jehová lakaskin kakanajla, chuna la tlawalh David, pi xla xalakgalhamana chu tapatinan. Kʼuma artículo nalichuwinanaw tuku xlakata lu xlakaskinka nakanajlayaw pi Jehová kinkatapatiyan chu tuku nakinkamakgtayayan nakanajlayaw uma.
¿TUKU XLAKATA KILIKANAJLATKAN PI JEHOVÁ KINKATAPATINITAN?
5. ¿Tuku lakaskin Satanás pi kalakpuwaw? Kalichuwinanti akgtum liʼakxilhtit.
5 Komo kanajlayaw pi Jehová kinkatapatinitan, ni kintikaliʼakgskgawin xliʼakgsiyat Satanás. Kalakapastakwi pi xla natlawa kaxatukawa tuku namatlani xlakata nialh naskujnaniyaw Jehová. Pulaktum tuku maklakaskin wa pi kinkamakanajliputunan pi talakgalhin nema tlawayaw lu lanka pi nikxnila kintikatapatikan. Kalilakpuwaw chixku xalak Corinto tiku xtlawama talakgxtumit nema ni xlitatlawat chu tamakxtuka kcongregación (1 Cor. 5:1, 5, 13). Uma chixku makgxtakgli xtalakgalhin, pero Satanás ni xlakaskin pi natalan xtapatikgolh chu xmakgamakglhtinamparakgolh kcongregación. Komo natalan ni xtapatikgolh, Satanás max xmakanajlilh uma chixku pi nikxnila xʼamaka tapatikan tuku xtlawanit. Chu xla “lu xlilipuwa asta nialhla xtayanilh” chu nialh kskujnanilh Jehová. La uku, Satanás watiya tuku maklakaskin xlakata nakinkaʼakgskgawiyan. Pero lu tlan pi akinin «liwana katsiyawa tuku kinkaliʼakgskgawiputunan» (2 Cor. 2:5-11).
6. ¿Tuku nakinkamakgtayayan napaxuwaparayaw?
6 Komo kanajlayaw pi Jehová kinkatapatinitan, napaxuwaparayaw. Xlikana pi putum nitlan limakgkatsiyaw akxni wi tuku nitlan tlawayaw (Sal. 51:17). Chu uma kinkamakgtayayan, xlakata kintalakapastaknikan kinkawaniyan pi wi tuku kililakgpalitkan chu tsukuyaw tlawayaw tuku tlan (2 Cor. 7:10, 11). Pero komo lu namalakatsaliyaw chuna la nitlan limakgkatsiyaw tuku nitlan tlawanitaw, asta maski makgxtakgnitawa, uma nakinkamakgatlajayan. Pero akxni kanajlayaw pi Jehová kinkatapatinitan, kinkamakgtayayan nialh lu nalilakgaputsayaw uma. Chu xatapaxuwan tsukuparayaw skujnaniyaw chuna la xla lakaskin (Col. 1:10, 11; 2 Tim. 1:3). Kalichuwinaw tuku nakinkamakgtayayan kinchatunukan nakanajlayaw pi Jehová kinkatapatinitan.
¿TUKU NAMAKGTAYAYAN NAKANAJLAYA PI JEHOVÁ TAPATINITAN?
7, 8. Chuna la wan Éxodo 34:6, 7, ¿tuku wa Jehová xpalakata la likatsi, chu tuku kinkamasiyaniyan uma?
7 Kalilakpuwanti tuku Jehová wa xpalakata la likatsi. Kaʼakxilhti tuku wanilh Moisés ksipi Sinaí (kalikgalhtawakga Éxodo 34:6, 7).a Jehová tlan lhuwa tuku xlitachuwinalh Moisés akxni wanilh la likatsi, pero nichuna tlawalh, wata wanilh pi «chatum Dios xalakgalhamana chu tlan likatsi». Wa xlakata, komo Jehová chuna likatsi, ¿lakpuwana pi ni katitapatiputulh chatum tiku paxki chu lu nitlan limakgkatsi tuku tlawanit chu makgxtakgnita xtalakgalhin? Xlikana pi Jehová natapati.
8 Akxni Jehová wan pi xla xalakgalhamana, kilikanajlanitkan, xlakata xla ankgalhin wan xaxlikana (Sal. 31:5). Wa xlakata, komo tuwa makgkatsiya nakanajlaya pi Jehová tapatinitan, kalilakpuwanti uma: komo liwana kanajlaya pi Jehová xalakgalhamana, tlan likatsi chu katapati putum tiku makgxtakgkgo xtalakgalhinkan, na milikanajlat pi Jehová tapatiyan.
9. ¿Tuku kinkamasiyaniyan Salmo 32:5 xlakata la tapatinan Jehová?
9 Kalilakpuwanti tuku masiya Biblia xlakata la tapatinan Jehová. Akgtum liʼakxilhtit, David wanilh Jehová: «Wix kintapati kintalakgalhin» (kalikgalhtawakga Salmo 32:5, TNM). Tachuwin nema unu matitaxtikanit «kintapati», ktachuwin xaʼhebreo na kilhchanima «namakglhtikana» o «nalinkan». Wa xlakata, akxni Jehová tapatilh David, xtachuna la xmakglhtilh chu xlilh tsinka xtakuka. Xlakata Jehová chuna tlawalh, David skaya makgkatsilh chu paxuwalh (Sal. 32:2-4). Komo akinin namakgxtakgaw tuku nitlan tlawamaw, na tlan namakgkatsiyaw chuna la David. Nialh talakaskin chuntiya nakukalinaw kintalakgalhinkan xlakata Jehová kinkamakglhtinitan uma takuka chu linita.
10, 11. ¿Tuku kinkamasiyaniyan Salmo 86:5 xpalakata Jehová?
10 (Kalikgalhtawakga Salmo 86:5). David wa pi Jehová lu “tapatinamputun”. Uma wamputun pi Jehová ni lakapala sitsi akxni tlawayaw tuku nitlan, chu xatapaxuwan katapatiputun tiku makgxtakgkgo xtalakgalhinkan. ¿Tuku xlakata chuna likatsi? Watiya uma versículo wampara: «Lu lanka mintapaxkit nema ni makgxtakgnan nema kakgalhiniya xliputum tiku kilhanikgoyan». Kʼatanu artículo, akxilhwi pi Jehová kalimasiyani xlakskujnin tapaxkit nema ni makgxtakgnan. Uma tapaxkit lu tliwakga chu nikxni sputa. Wa uma tuku tlawa pi Jehová xatapaxuwan nakatapati tiku makgxtakgkgo xtalakgalhinkan (Is. 55:7). Komo tuwa makgkatsiya nakanajlaya pi Jehová tapatinitan, kalilakpuwanti uma: komo wix kanajlaya pi Jehová katapati tiku makgxtakgkgo xtalakgalhinkan chu tasaskinikgo pi kakatapatilh, na milikanajlat pi xla tapatin akxni wix makgxtakgti mintalakgalhin chu tasaskini pi xtapatin.
11 Biblia na kinkamasiyaniyan pi Jehová katsi la lakgnuyaw chu akgatekgsa pi akinin makglakgalhinanin, chu uma lu tlan kinkamamakgkatsiniyan (Sal. 139:1, 2). Kalichuwinaw atanu salmo xlakata tlakg naʼakgatekgsaw uma, chu chuna nakanajlayaw pi Jehová kinkatapatiputunan.
KALAKAPASTAKTI TUKU JEHOVÁ LAKAPASTAKA
12, 13. Chuna la wan Salmo 103:14, ¿tuku lakapastaka Jehová, chu tuku tlawa?
12 (Kalikgalhtawakga Salmo 103:14, TNM). David wa pi Jehová «lakapastaka pi akinin pokgxni». Uma tachuwin kinkamasiyaniyan pulaktum tuku xlakata Dios xatapaxuwan kinkatapatiyan kintalakgalhinkan: xla ankgalhin lakapastaka pi akinin makglakgalhinanin. Tlakg kalichuwinaw tuku wan uma texto.
13 David tsokgwililh pi Jehová «katsi la lakatsukunitaw». Akxni malakatsukilh Adán, limaklakaskilh «pokgxni». Chu maski ni xkgalhikgo talakgalhin wi tuku nila xtlawakgo, chu na wi tuku xmaklakaskinkgo xlakata tlan xlatamakgolh, chuna la xjaxanankgolh, xwayankgolh chu klhtatakgolh (Gén. 2:7). Pero lata Adán chu Eva makglakgalhinankgolh, lhuwa tuku nitlan kitaxtulh xlakata «akinin pokgxni»: putum akinin makglakgalhinanin chu tlawaputunaw tuku nitlan. Pero David ni kajwatiya wa pi Jehová katsi pi akinin makglakgalhinanin, wata wa pi «lakapastaka» pi akinin pokgxni. Akxni Salmo 103:14 wan «lakapastaka», ktachuwin xaʼhebreo ni kajwatiya kilhchanima pi Jehová lakapastaka pi akinin pokgxni, wata na wi tuku tlawa. Tlan xwaw pi uma versículo wamputun pi Jehová akgatekgsa pi namin kilhtamaku natlawayaw tuku nitlan. Pero komo namakgxtakgaw kintalakgalhinkan, xla nakinkalimasiyaniyan talakgalhaman chu nakinkatapatiyan (Sal. 78:38, 39).
14. 1) ¿Tuku kinkamasiyaniyan Salmo 103:12 xlakata la tapatinan Jehová? 2) ¿La limasiya xliʼakxilhtit David pi akxni Jehová tapatinan, makgtuminika kinkatapatiyan? (Kaʼakxilhti recuadro «Jehová tapatinan chu patsankga»).
14 ¿Tuku atanu kinkamasiyaniyan Salmo 103 xlakata la tapatinan Jehová? (Kalikgalhtawakga Salmo 103:12, TNM). David wa pi akxni Jehová kinkatapatiyan, lu makgat wili kintalakgalhinkan, «chuna la xlimakgat lawilanikgolh niku taxtu chichini chu niku tatsekga». Katsiyaw pi niku taxtu chichini chu niku tatsekga, lu lakgamakgat lawilanikgo. ¿Tuku kinkamasiyaniyan uma? Chatum tiku lakputsanani Biblia, wan: «Komo lu makgat linkan kintalakgalhinkan, nialhpara tsinu tasiya pi wi tuku nitlan tlawaw, xtachuna la xlakgskupli chu nialh lakapastakkan» (El tesoro de David, de Charles Spurgeon, volumen 2, traducción de Samuel Vila). Min kilhtamaku, akinin lhuwa tuku kilakapastakaw akxni wi tuku kgankgawananaw. Pero akxni Jehová kinkatapatiyan, kintalakgalhinkan lakgskupa, xtachuna la nialh xtakgankgawanalh. Nialh anan tuku natlawa pi Jehová nakilakapastaka chu nakinkalilakawaniyan (Ezeq. 18:21, 22; Hech. 3:19).
15. ¿Tuku tlan natlawayaw komo chuntiya nitlan limakgkatsiyaw kintalakgalhinkan?
15 Komo wix chuntiya nitlan limakgkatsiya talakgalhin nema tlawa makgasa, kalakapastakti tuku wan Salmo 103. Uma namakgtayayan nakanajlaya pi Dios tapatinitan. Kalilakpuwanti: «Komo Jehová lakapastaka pi akit makglakgalhina chu xatapaxuwan kintapatiputun xlakata kmakgxtakgnita kintalakgalhin, nachuna kililakpuwanat la Jehová. Chu komo xla patsankganita kintalakgalhin chu ni kililakawani, xlilat pi akit na nakpatsankga». Jehová nialh lakapastaka talakgalhin nema kinkatapatinitan. Wa xlakata, wix na nialh kalakapastakti (Sal. 130:3). Akxni wix nakanajlaya pi Jehová tapatinitan, nialh katilakapastaktawila uma, chu tlan xatapaxuwan naskujniparaya.
16. ¿Tuku xlakata lu nitlan kitaxtu akxni kajwatiya lilakpuwantawilayaw tuku nitlan tlawaw makgasa? (Na kaʼakxilhti dibujo).
16 Kalakapastakti pi komo kajwatiya nalilakpuwantawilaya tuku nitlan tlawa makgasata, nalitaxtuya chuna la chatum tiku matlawani putlaw chu puntsu puntsu akxilha x’espejo xlakata nakatsi tuku lama kxchakgen. Xlikana pi uma espejo makgtayanan xlakata nakatsi komo wi tuku nitlan lama, chu nitu naʼakgspula. Pero tlakg kuenta xlitlawat tuku wi kxlakatin, kuenta xlitlawat xtiji. Xtachuna la uma, komo namin kilhtamaku wix nalakapastaka tuku nitlan tlawa makgasa, namakgtayayan xlakata nialh natlawaparaya. Pero komo kajwatiya nalilakpuwantawilaya, lu nitlan katilimakgkatsi chu nila katitlawa putum tuku matlaniya xlakata naskujnaniya Jehová. Wa xlakata, tlakg tlan wa kuenta natlawaya tuku wi kmilakatin: tiji nema nalinan kxasasti kakilhtamaku, niku “nialh katilakapastakwi” tuku lalh makgasa (Is. 65:17, TNM; Prov. 4:25).
Xtachuna la tiku matlawani putlaw tlakg kuenta xlitlawat tuku anan kxlakatin chu ni wa tuku tasiya kxʼespejo, akinin wa tlakg kuenta kilitlawatkan tasikulunalin nema namakgamakglhtinanaw chu ni wa tuku nitlan tlawaw makgasa (Kaʼakxilhti párrafo 16).
CHUNTIYA KAMAKANAJLI MINAKU
17. ¿Tuku xlakata talakaskin naliskujaw nakanajlayaw pi Jehová kinkapaxkiyan chu kinkatapatiyan?
17 Talakaskin pi putum akinin chuntiya naliskujaw xlakata nakanajlayaw pi Jehová kinkapaxkiyan chu ankgalhin xatapaxuwan kinkatapatiyan (1 Juan 3:19, nota). ¿Tuku xlakata chuna kilitlawatkan? Xlakata Satanás chuntiya lu liskujma nakinkamakanajliyan pi Dios ni kinkapaxkiyan chu pi nikxni kintikatapatin. Xla lakaskin pi nialh kaskujnaniw Jehová. Chu xlakata la uku katsi pi nialh lhuwa kilhtamaku kgalhi, tlakg liskujma xlakata namakgxtakgaw Jehová (Apoc. 12:12). ¡Ni kamaxkiw talakaskin pi chuna natlawa!
18. ¿Tuku tlan natlawaya xlakata nakanajlaya pi Jehová paxkiyan chu tapatinitan?
18 Kʼatanu artículo lichuwinaw tuku nakinkamakgtayayan nakanajlayaw pi Jehová kinkapaxkiyan. Chu kʼuma artículo lichuwinanitaw tuku nakinkamakgtayayan nakanajlayaw pi xla kinkatapatinitan. Kalilakpuwanti tuku wan Jehová xlakata la likatsi chu tuku masiya Biblia xlakata la tapatinan. Ni kapatsankga pi xla lakapastaka pi wix makglakgalhina chu limasiyaniyan talakgalhaman. Na kalakapastakti pi akxni Jehová tapatinan, nialh lakapastaka kintalakgalhinkan. Komo natlawaya putum tuku lichuwinanitaw, na tlan nawana chuna la David: «¡Paxtikatsinilh Jehová, xlakata kintapatinita “kintalakgalhin”!» (Sal. 32:5, TNM).
TAKILHTLIN 1 Laktlan xtayat Jehová
a Kalikgalhtawakga artículo «Acérquese a Dios: Jehová se describe a sí mismo», nema min krevista La Atalaya 1 xla mayo kata 2009.