Kalakapastaknaw chuna la Jehová chu Jesús

1, 2. 1) ¿Tuku kilhchanima napaxkiyaw Jehová? 2) ¿La limasiyalh Jesús pi xpaxki Jehová xliputum xtalakapastakni?

JESÚS limasiyalh tuku limapakgsin tlakg xlakaskinka nema xmin kxLimapakgsin Moisés akxni wa: «Milipaxkit Jehová miDios xliputum minaku chu xliputum milatamat chu xliputum mintalakapastakni chu xliputum militliwakga» (Mar. 12:30). Wa xlakata kilipaxkitkan Jehová xliputum kilatamatkan, xliputum tuku kgalhiyaw. Uma na kilhchanima tuku tlawaputunaw, tuku makgkatsiyaw chu kilitliwakgakan. Nachuna tuku lakapastakaw o chuna la lakapastaknanaw. Xlakata paxkiyaw Jehová lakpuwamputunaw chuna la xla lakpuwan. Xlikana pi nikxnila katiʼakgatekgswi la lakapastaknan. Pero pulaktum tuku nakinkamakgtayayan wa pi nalilakpuwanaw la xlakapastaknan Cristo, xlakata xla liwana limasiyalh pi xlakapastaknan chuna la xTlat (1 Cor. 2:16).

² Jesús xpaxki Jehová xliputum xtalakapastakni. Xkatsi tuku xlakaskin pi xtlawalh chu liwana xlakkaxwilinit namakgantaxti uma maski xkatsi pi xʼama lipatinan. Xlakata kajwatiya xlilakpuwan namakgapaxuwa xTlat, ni atanu tuku liʼakgatuyulh.

3. ¿Tuku katsinilh apóstol Pedro xlakata Jesús, chu tuku kamakgpuwantinilh natalan pi xtlawakgolh? (1 Pedro 4:1).

³ Pedro chu amakgapitsi apóstoles akxtum talatamakgolh Jesús chu katsinikgolh la xlakapastaknan. Akxni Pedro tsokgwililh xapulana xcarta, kamakgpuwantinilh kstalaninanin Cristo pi xlimasiyakgolh watiya talakapastakni nema xkgalhi Cristo (kalikgalhtawakga 1 Pedro 4:1). Akxni Pedro tsokgwililh tachuwin nema unu matitaxtikanit «kalimasiyatit», maklakaskilh akgtum tachuwin nema kilhchanima chuna la soldados litakaxtayakgo tuku naʼankgo litalatlawanankgo. Chuna limaʼakgatekgsninalh pi komo nalimasiyayaw watiya talakapastakni nema xkgalhi Jesús, nakinkamakgtayayan namakgatlajayaw xkakilhtamaku Satanás chu tuku nitlan tlawaputunaw (2 Cor. 10:​3-5; Efes. 6:12).

4. ¿Tuku nalichuwinanaw kʼuma artículo?

⁴ Kʼuma artículo nalichuwinanaw la xlakapastaknan Jesús chu la tlan nastalaniyaw xliʼakxilhtit. Pulaktutu tuku naʼakxilhaw: 1) la tlan nakatsiniyaw nalakapastaknanaw chuna la Jehová, 2) nataktujuyaw, chu 3) liwana nalakapastaknanaw.

KALAKAPASTAKNAW CHUNA LA JEHOVÁ

5. Kalichuwinanti akxni Pedro limasiyalh pi ni xlakapastaknan chuna la Jehová.

⁵ Kalichuwinaw akxni Pedro limasiyalh pi ni xlakapastaknan chuna la Jehová. Jesús kawanilh xʼapóstoles pi xʼama an kJerusalén, niku xpulalinanin takanajla xʼamakgo chipakgo, xʼamakgo makgapatinankgo chu alistalh xʼamakgo makgnikgo (Mat. 16:21). Pedro xkatsi pi Jesús wa Mesías tiku xwankanit pi xʼama min chu xʼama lakgmaxtu xkachikin Dios, wa xlakata max tuwa makgkatsilh naʼakgatekgsa pi Jehová xʼama masta talakaskin pi Jesús xmakgnika (Mat. 16:16). Wa xlakata, Pedro alakatanu lilh chu wanilh: «Miʼakstu kalakgalhamankanti Malana, nichuna katiʼakgspulan» (Mat. 16:22). Xlakata Pedro ni limasiyalh pi xlakapastaknan chuna la Jehová, ni watiya talakapastakni xkgalhi la xla Jesús.

6. ¿La limasiyalh Jesús pi xlakapastaknan chuna la Jehová?

⁶ Jesús xlakapastaknan chuna la xTlat. Wanilh Pedro: «¡Kakintapanuni Satanás! Kilakgapaxtokgpat kkintiji, xlakata ni kgalhiya xtalakapastakni Dios, wata xtalakapastaknikan lakchixkuwin» (Mat. 16:23). Jesús xkatsi pi xlakata xmakgantaxtilh xtalakaskin Jehová tuwa xʼama kitaxtuni kxlatamat, xʼamaka makgapatinankan chu xʼamaka makgnikan. Wa xlakata lakgmakgalh tuku wanilh Pedro, maski max xla kaj xlakgalhamama. Tuku Jesús wanilh Pedro makgtayalh naʼakgatekgsa pi xtalakaskin xlakapastaknalh chuna la Jehová, chu akinin nachuna kilitlawatkan.

7. ¿La limasiyalh Pedro pi xliskujma xlakata nalakapastaknan chuna la Jehová? (Na kaʼakxilhti dibujo).

⁷ Titaxtulh kilhtamaku, Pedro limasiyalh pi xliskujma nalakapastaknan chuna la Jehová. Jehová limasiyalh pi xchanita kilhtamaku xlakata xkamakgamakglhtinalh kxkachikin latamanin tiku xalak alakatanu kachikinin xwankgonit. Chu wanilh Pedro pi xʼalh litachuwinan xatlan tamakatsinin Cornelio, chatum tiku xapulana kstalanina Cristo xʼama litaxtu nema ni judío xwanit. Judíos ni xkatalalinkgo latamanin xalak atanu kachikinin, wa xlakata Pedro max tuwa makgkatsilh namakgantaxti uma taskujut. Pero akxni akgatekgsli tuku xlakaskin Jehová, lakgpalilh chuna la xlakapastaknan. Akxni Cornelio wanilh Pedro pi xlakgapaxialhnalh, xla “ni wa pi ni xʼama an” (Hech. 10:​28, 29). Litachuwinalh xatlan tamakatsinin Cornelio chu tiku xalak xchik, chu xlakan tamunukgolh (Hech. 10:​21-23, 34, 35, 44-48).

8. ¿La nalimasiyayaw pi lakapastaknanaw chuna la Jehová? (1 Pedro 3:8).

⁸ Titaxtulh kilhtamaku, Pedro kamaxkilh uma tastakyaw kstalaninanin Cristo: «Wixin watiya talakapastakni kakgalhitit» (kalikgalhtawakga 1 Pedro 3:8). Xlakata putum xtatayananin Jehová watiya talakapastakni nakgalhiyaw, talakaskin nalakapastaknanaw chuna la Jehová, chu xTachuwin kinkamakgtayayan nalakapastaknanaw chuna la xla. Akgtum liʼakxilhtit, Jesús kamakgpuwantinilh kstalaninanin pi wa pulana xwilikgolh xTamapakgsin Dios kxlatamatkan (Mat. 6:33). Xlakata katsiyaw uma, kalilakpuwaw pi chatum tala xalak congregación laksaka naskujnani Jehová putum kilhtamaku. ¿Xmaxlajwaniw chu xwaniw xtachuna tuku Pedro wanilh Jesús? Nichuna, wata xwaniw pi lu tlan tuku laksaknit chu xwaniw pi makgtayaputunaw.

KATAKTUJUW

9, 10. ¿La limasiyalh Jesús pi xtaktuju?

⁹ Katsisni akxni xʼamaka makgnikan, Jesús kamasiyanilh Pedro chu amakgapitsin xʼapóstoles pi lu xlakaskinka xwanit pi xtaktujukgolh. Jesús xkawaninit Pedro chu Juan pi xlakkaxwilikgolh tuku xʼama tamaklakaskin xlakata xkatatlawalh xtamakgalhtawakgen xaʼawatiya Pascua. Max Pedro chu Juan lu liskujkgolh xlakata xʼanalh putum tuku xʼama tamaklakaskin chuna la pumakgachakga chu toallas xlakata xkatuchakgeka tiku xʼamakgo wayankgo. ¿Pero tiku xʼama katuchakge?

¹⁰ Uma taskujut wa xtlawakgo skujnin. Pero uma kilhtamaku, Jesús ni makglhuwa lilakpuwa, wa katuchakgelh. ¡Apóstoles max lu kaks lilakawankgolh akxni akxilhkgolh pi Jesús maktaktalh xlimaktiy klhakgat, litatampulakgchilh toalla, mujulh chuchut kpumakgachakga chu tsukulh katuchakge! (Juan 13:​4, 5). Kalilakpuwanti la xlilhuwa kilhtamaku litlawalh uma. Katuchakgelh kgalhkutiy apóstoles, asta Judas, tiku xʼama stamakgan. ¡Jesús limasiyalh pi xtaktuju! Alistalh kawanilh: «¿Akgatekgsatit tuku xlakata kkatuchakgen? Wixin kilimapakuwiyatit “Makgalhtawakgena” chu “Malana” chu xlikana tuku wanatit xlakata chuna klitaxtu. Wa xlakata, maski akit Malana chu Makgalhtawakgena, kkatuchakgen, nachuna kalakgchanan nalatuchakgeyatit minchatunukan» (Juan 13:​12-14).

11. ¿La limasiyalh Pedro pi xkatsininit nataktuju? (1 Pedro 5:5; na kaʼakxilhti dibujo).

¹¹ Tuku Jesús tlawalh, limasiyanilh Pedro pi xlitaktujut xwanit. Akxni Jesús xtaspitnita kʼakgapun, Pedro tlawalh akgtum milagro chu mapaksalh chatum chixku tiku nila xtlawan lata akxni xlakachinit (Hech. 1:​8, 9; 3:​2, 6-8). Uma tuku tlawalh, lu kaks kamalakawanilh latamanin (Hech. 3:11). ¿Tuku xʼama tlawa Pedro? Kalakapastakwi pi niku xla xmakgastakkanit, latamanin lu xlakaskinka xliʼakxilhkgo pi xkalakgapaska. ¿Tuku xʼama tlawa Pedro? ¿Xʼama litalanki tuku xtlawanit? Nichuna tlawalh, wata taktujulh chu kamalankilh Jehová chu Jesús. Lichuwinalh Jesús akxni wa: «Xpalakata xtukuwani chu xlakata kkanajlaniyaw xtukuwani, tatliwakglhli uma chixku tiku wixin akxilhatit chu lakgapasatit» (Hech. 3:​12-16). Titaxtulh kilhtamaku, Pedro kawanilh kstalaninanin Cristo pi lu xlakaskinka xwanit pi xtaktujukgolh. Tachuwin nema maklakaskilh max kinkamalakapastakayan akxni Jesús litatampulakgchilh maktum toalla chu katuchakgelh xʼapóstoles (kalikgalhtawakga 1 Pedro 5:5).

12. Xtachuna la Pedro, ¿la tlan nalimasiyayaw pi taktujuyaw?

¹² Xtachuna la Pedro, akinin na tlan nataktujuyaw. Pulaktum tuku nakinkamakgtayayan wa pi nalakapastakaw pi tiku xlikana taktuju ni kaj wan pi taktuju, lata kxnaku chuna makgkatsi. Tachuwin nema maklakaskilh Pedro akxni tsokgwililh xcarta, nema unu matitaxtikan «tataktujut» chuna maʼakgatekgsninan. Wi tuku tlawayaw xpalakatakan amakgapitsin xlakata paxkiyaw Jehová chu kapaxkiyaw kintalatamankan, nichuna tlawayaw kaj xlakata nakinkamalankikanan. Komo xatapaxuwan naskujnaniyaw Jehová chu nakamakgtayayaw kinatalankan, pero ni nakgalhkgalhiyaw pi amakgapitsin nakinkaʼakxilhkgoyan, nalimasiyayaw pi xlikana taktujuyaw (Mat. 6:​1-4).

KAKGALHIW «TLAN TALAKAPASTAKNI»

13. ¿Tuku kilhchanima kgalhikan «tlan talakapastakni»?

¹³ ¿Tuku kilhchanima kgalhikan «tlan talakapastakni»? (1 Ped. 4:7). Kilhchanima pi tuku nalaksakaw nalimasiya pi lakapastaknanaw chuna la Jehová. Na kilhchanima pi ni anan atanu tuku tlakg xlakaskinka naliʼakxilhaw nixawa la talalinaw Jehová. Komo kgalhiyaw tlan talakapastakni, ni katimalakatsaliw tuku lakpuwanaw kimpalakatakan chu ni katilakpuwaw pi putum katsiyaw. Nachuna, ankgalhin nalipawanaw Jehová chu naskiniyaw pi kakinkapulalin.a

14. Kalichuwinanti akxni Pedro ni lipawa Jehová.

¹⁴ Katsisni akxni Jesús xʼamaka makgnikan, kawanilh xtamakgalhtawakgen: «Uma katsisni mimputumkan nakamaʼakgchakgxnikanatit kimpalakata». Pedro xlakpuwan pi xla ni xpekuan chu kgalhtinalh: «Maski amakgapitsin nakamaʼakgchakgxnikan mimpalakata, ¡akit nikxni kintimaʼakgchakgxnika!». Uma katsisni, Jesús kamaxkilh uma tastakyaw makgapitsin xtamakgalhtawakgen: «Skgalalh katawilatit chu katlawatit mioracionkan» (Mat. 26:​31, 33, 41). Komo Pedro xtimakgantaxtilh uma tastakyaw, max ni xtipekualh chu tlan xtikgalhtinalh pi xtamakgalhtawakgen Jesús xlitaxtu. Pero xlakata nichuna tlawalh, lakgmakgalh xMalana… ¡chu lu nitlan limakgkatsilh uma alistalh! (Mat. 26:​69-75).

15. ¿Tuku makgtayalh Jesús nakgalhi tlan talakapastakni katsisni akxni xʼamaka makgnikan?

¹⁵ Jesús lu lipawa Jehová uma kilhtamaku. Maski ni xkgalhi talakgalhin, makglhuwa tlawalh oración katsisni akxni xʼamaka makgnikan. Uma makgtayalh ni napekuan chu namakgantaxti xtalakaskin xTlat (Mat. 26:​39, 42, 44; Juan 18:​4, 5). Pedro akxilhli la xlimakglhuwa tlawalh oración Jesús, chu uma max nikxni patsankgalh.

16. ¿La limasiyalh Pedro pi xliskujnit nakgalhi tlan talakapastakni? (1 Pedro 4:7).

¹⁶ Titaxtulh kilhtamaku, Pedro katsinilh nalipawan Jehová chu ankgalhin natlawani oración. Akxni Jesús xlakastakwananita, kawanilh Pedro chu amakgapitsin apóstoles pi xʼamaka kamaxkikan espíritu santo xlakata xlichuwinankgolh xatlan tamakatsinin. Pero kawanilh pi xkgalhkgalhikgolh kJerusalén asta akxni xchalh uma kilhtamaku (Luc. 24:49; Hech. 1:​4, 5). ¿Tuku tlawalh Pedro xlakata nina xkgantaxtu uma? Biblia wan pi xla chu amakgapitsin kstalaninanin Cristo chuntiya xtlawamakgo oración (Hech. 1:​13, 14). Alistalh, akxni tsokgwililh xapulana xcarta, kamakgpuwantinilh pi xkgalhikgolh tlan talakapastakni chu ankgalhin xlipawankgolh Jehová chu xtlawanikgolh oración (kalikgalhtawakga 1 Pedro 4:7). Pedro tsukulh lipawan Jehová chu uma tlawalh pi tlan xkamakgtayalh chu xkamatliwakglhli natalan xalak congregación (Gál. 2:9).

17. Maski wi tuku ni tuwa makgkatsiyaw natlawayaw, ¿tuku ankgalhin kilitlawatkan? (Na kaʼakxilhti dibujo).

¹⁷ Xlakata nakgalhiyaw tlan talakapastakni, talakaskin natlawaniyaw lhuwa oración Jehová. Katsiyaw pi ankgalhin kiliskinitkan xtapulalit, asta maski lakpuwanaw pi katsiyaw tuku kilitlawatkan. Tlakg kiliskinitkan xtamakgtay akxni lu xlakaskinka tuku kililaksakatkan kkilatamatkan xlakata liwana katsiyaw pi xla katsi tuku tlakg tlan kimpalakatakan.

18. Xtachuna la Pedro, ¿tuku kilitlawatkan?

¹⁸ Lu paxtikatsiniyaw Jehová pi kinkamalakatsukin xlakata tlan nalimasiyayaw tayat nema xla kgalhi (Gén. 1:26). Katsiyaw pi xlakata akinin makglakgalhinanin, nikxnila katimakgalakgchaw chuna la xla likatsi (Is. 55:9). Pero xtachuna la Pedro, tlan nakatsiniyaw nalakapastaknanaw chuna la Jehová, nataktujuyaw chu nakgalhiyaw tlan talakapastakni.