Nialh katamakgapali, katamunu

1. Kalichuwinanti makgapitsi tuku tlan nakitaxtu komo natamunuya.

¿PAXKIYA Jehová, tiku maxkinitan latamat chu putum tuku kgalhiya? ¿Limasiyaniputuna pi paxkiya? Pulaktum la tlan nalimasiyaniya wa pi natamakamastaniya chu natamunuya. Akxni chuna natlawaya, namakgtapakgsiya kxfamilia Jehová. Wix natapakgsiniya, chu xla minTlat chu miʼamigo nalitaxtu. Chu wa xlakata napulalinan chu nakuentajtlawayan (Sal. 73:24; Is. 43:​1, 2). Nachuna, xlakata natamakamastaniya chu natamunuya, nakgalhiya takgalhkgalhin xlakata tlan putum kilhtamaku nalatapaya (1 Ped. 3:21).

2. ¿Tuku nalichuwinanaw kʼuma artículo?

² Komo makgkatsiya pi wi tuku tlawa pi ninajla natamunuya, ni kalilakgaputsa. Lhuwa latamanin nachuna xmakgkatsikgo. Talakaskilh pi xlakgpalikgolh xtayatkan chu xtapuwankan xlakata tlan xtamunukgolh, chu la uku xatapaxuwan skujnanimakgo Jehová. Kʼuma artículo nakalichuwinanaw makgapitsi latamanin tiku tamunukgolh kxapulana siglo. Naʼakxilhaw tuku tuwa titaxtukgolh chu tuku kamakgpuwantinilh natamunukgo. Kalilakpuwanti tuku tlawakgolh chu la tlan nastalaniya xliʼakxilhtitkan.

SAMARITANOS TAMUNUKGOLH

3. ¿Tuku max tuwa makgkatsikgolh samaritanos nalakgpalikgo xlakata tlan xtamunukgolh?

³ Kxkilhtamaku Jesús, samaritanos na xkgalhikgo xtakanajlakan chu xlamakgo kxalakgmakgan kachikinin nema xwanikan Siquem chu Samaria, kxnorte Judea. Xlakata tlan xtamunukgolh xtalakaskin tlakg xlakgapaskgolh xTachuwin Dios. Xlakan kajwatiya xkanajlakgo pi xapulana makkitsis libro xalak Biblia, Génesis asta Deuteronomio, wa Dios xmatsokgninanit chu na xlakpuwankgo pi max xlibro Josué na wa Dios xmatsokgninanit. Pero xkatsikgo tuku Dios xmalaknunit kDeuteronomio 18:​18, 19, chu wa xlakata xkgalhkgalhimakgo pi xchilh Mesías (Juan 4:25). Xlakata tlan xtamunukgolh, samaritanos xlikanajlatkan xwanit pi Jesús wa Mesías nema xlichuwinankanit pi xʼama min. Chu «lhuwa samaritanos» chuna tlawakgolh (Juan 4:39). Pero max amakgapitsi samaritanos tuwa makgkatsikgolh nialh nalaksakpaxkinankgo (Luc. 9:​52-54).

4. Chuna la wan Hechos 8:​5, 6, 14, ¿tuku tlawakgolh makgapitsi samaritanos akxni Felipe kalitachuwinalh Cristo?

⁴ ¿Tuku kamakgtayalh samaritanos natamunukgo? Akxni Felipe kalitachuwinalh «xpalakata Cristo», makgapitsi samaritanos makgamakglhtinankgolh «xtachuwin Dios» (kalikgalhtawakga Hechos 8:​5, 6, 14). Maski Felipe judío xwanit, samaritanos kgaxmatnikgolh. Max lakapastakkgolh makgapitsi versículos niku wan pi Dios ni laksakpaxkinan (Deut. 10:​17-19). Maski ni liwana katsiyaw tuku xlakpuwamakgo, samaritanos “lu kuentajtlawakgolh tuku Felipe xwan” xpalakata Cristo. Kanajlakgolh pi Dios xmalakgachanit Felipe xlakata lhuwa milagros tlawalh, kamapaksalh tiku xtatatlakgo chu kalaktamakxtulh demonios latamanin (Hech. 8:7).

5. ¿Tuku masiyaniyan tuku tlawakgolh samaritanos?

⁵ Xlakata samaritanos xlaksakpaxkinankgo chu lhuwa tuku ni liwana xkatsikgo, max uma tlan xtitlawalh pi nila xtamunukgolh. Pero ni mastakgolh talakaskin pi uma xkamalakgachokgolh. Akxni samaritanos liwana kanajlakgolh pi tuku Felipe xmasiyama xaxlikana xwanit, tunkun tamunukgolh. Biblia wan: «Akxni kanajlanikgolh Felipe, tiku xlichuwinama xatlan tamakatsinin xla xTamapakgsin Dios chu xtukuwani Jesucristo, putum lakchixkuwin asta lakpuskatin xtamunumakgolh» (Hech. 8:12). ¿Chu mimpalakata? ¿Kanajlaya pi xTachuwin Dios xaxlikana? ¿Kanajlaya pi xtatayananin Jehová liskujkgo xlakata nalimasiyakgo tapaxkit nema Jesús wa pi xʼamakgo kgalhikgo tiku xaxlikana kstalaninanin xlitaxtukgolh? (Juan 13:35). Komo chuna, nialh katamakgapali, katamunu. Komo chuna natlawaya, liwana kakatsi pi Jehová nasikulunatlawayan.

6. ¿Tuku masiyaniyan tuku tlawalh Ruben?

⁶ Ruben, tiku xalak Alemania, lakgapasli Jehová lata akxni aktsujku xwanit, pero ni liwana xkanajla komo xʼanan chatum Dios. ¿Tuku makgtayalh nialh chuna nalakpuwan? Akxilhli pi lhuwaku tuku xlikatsinit xwanit. Wa xlakata, liskujli tlakg nalakputsanan. Xla wan: «Wi tuku ktlawalh xlakata tlakg naklakputsanani tuku ni xakkatsi. Kmaklakaskilh kilhtamaku akxni kiʼakstu xakkgalhtawakga. Talakaskilh makglhuwa xaklakputsananilh xlakata evolución». Likgalhtawakgalh libro ¿Existe un Creador que se interese por nosotros?, chu uma lu matliwakglhi xtakanajla. Ruben wan: «Klakapastaka pi klakpuwa: “¡Guau! Jehová xlikana lama”». Nachuna, Ruben lakgapaxialhnalh sucursal niku pulalinkan kintaskujutkan chu lu kaks lilakawa akxni akxilhli pi kskujnin Jehová kxlikalanka katiyatni lu lapaxkikgo. Akxni taspitli kʼAlemania, tamunulh akxni kajku 17 kata xkgalhi. Komo wi tuku wix ni liwana kanajlaya nema katsininita kxTachuwin Dios, kalakputsanani kilikgalhtawakgakan. Akxni liwana nakatsiya tuku masiya Biblia natatliwakglha mintakanajla (Efes. 4:​13, 14). Nachuna, akxni nakgaxpata la lalimasiyani tapaxkit natalan kxlikalanka katiyatni chu akxni naʼakxilha pi kmincongregación chuna lalikatsinikan, namakgtayayan xlakata tlakg nakapaxkiya natalan chu namakgkatsiya pi tlakg makxtum katawila.

SAULO XALAK TARSO TAMUNULH

7. ¿Tuku xtalakaskin pi xlakgpalilh Saulo?

⁷ Kalilakpuwaw Saulo xalak Tarso, chatum judío tiku lu liwana xkgalhtawakganit chu xlakgapasa xLimapakgsinkan judíos, chu lu xlakaskinka xlitaxtu (Gál. 1:​13, 14; Filip. 3:5). Ama kilhtamaku, lhuwa judíos xlakpuwankgo pi kstalaninanin Cristo apóstatas xlitaxtukgo. Wa xlakata, Saulo lu xkaputsastalanima chu nipara tsinu xkalakgalhaman. Xlakpuwan pi chuna xtlawama xtalakaskin Dios (Hech. 8:3; 9:​1, 2; 26:​9-11). Komo Saulo xkanajlanilh Jesús chu xtamunulh xlakata kstalanina Cristo xlitaxtulh, xtalakaskin pi xtayanilh taputsastalanit.

8. 1) ¿Tuku makgtayalh Saulo natamunu? 2) Chuna la wan Hechos 22:​12-16, ¿tuku tlawalh Ananías xlakata xmakgtayalh Saulo? (Na kaʼakxilhti dibujo).

⁸ ¿Tuku makgtayalh Saulo natamunu? Akxni Jesús tachuwinalh lata kʼakgapun, akgtum xkgakganat tlawalh pi Saulo nialhla xʼakxilhli (Hech. 9:​3-9). Akgtutu kilhtamaku ni wayalh chu max xlilakpuwama tuku xʼakgspulanit. Kanajlalh pi Jesús wa Mesías xwanit chu pi kstalaninanin Cristo xaxlikana takanajla xlitaxtukgo. Na max lu nitlan limakgkatsilh xlakata mastalh talakaskin pi xmakgnika Esteban (Hech. 22:20). Akxni xtitaxtunita akgtutu kilhtamaku, chatum xtamakgalhtawakgen Jesús tiku xwanikan Ananías, alh akxilha Saulo, limasiyanilh talakgalhaman, malakawanipa chu makgpuwantinilh pi tunkun xtamunulh (kalikgalhtawakga Hechos 22:​12-16). Saulo taktujulh, makgamakglhtinalh xtamakgtay Ananías chu lakgpalilh xlatamat (Hech. 9:​17, 18).

9. ¿Tuku masiyaniyan tuku tlawalh Saulo?

⁹ Lhuwa tuku kinkamasiyaniyan xliʼakxilhtit Saulo. Komo xla xtitalankilh chu xtipekualh, max nila xtamunulh. Pero ni mastalh talakaskin pi uma xmalakgachokgolh. Akxni akgatekgsli tuku xaxlikana xlakata Cristo, taktujulh chu xatapaxuwan lakgpalilh chuna la xlima xlatamat (Hech. 26:​14, 19). Kstalanina Cristo litaxtulh maski xkatsi pi xʼamaka putsastalanikan (Hech. 9:​15, 16; 20:​22, 23). Akxni xtamununita, chuntiya lipawa Jehová akxni titaxtulh tuku tuwa (2 Cor. 4:​7-10). Akxni wix natamunuya xlakata xtatayana Jehová nalitaxtuya, max na natitaxtuya tuku tuwa o naputsastalanikana, pero nikxni miʼakstu katitawila. Jehová chu Jesús ankgalhin namakgtayakgoyan (Filip. 4:13).

10. ¿La makgtayayan xliʼakxilhtit Anna?

¹⁰ Kalichuwinaw tuku titaxtulh Anna, tiku lama kʼEuropa del Este. Akxni xtse nina makgas xtamununit, Anna skinilh xtlat pi xmaxkilh talakaskin nalikgalhtawakga Biblia. Uma kilhtamaku, 9 kata xkgalhi. Xfamilia Anna kurda litaxtukgo, chu umakgolh latamanin lismanikgo pi putum tiku xalak familia kaj kʼakgtum chiki akxtum tawilakgo. Wa xlakata, akxni tiku xalak xfamilia Anna katsikgolh pi xla xkatakgalhtawakgama xtatayananin Jehová, ni lakgatikgolh. Xlakpuwankgo pi lu limaxana xwanit pi chatum lataman xlakgmakgalh xtakanajlakan xalakgmakgan xnatlatni. Akxni Anna xkgalhi 12 kata, tachuwinalh xtlat xlakata xtamunuputun. Xtlat kgalhskilh komo xʼakstu xlaksakma chuna natlawa o komo wi tiku xwanima pi chuna katlawalh. Anna kgalhtilh: «Kpaxki Jehová». Wa xlakata xtlat wanilh pi tlan xtamunulh. Akxni Anna xtamununita, tiku xalak xfamilia chuntiya xlikgalhkgamanankgo chu nitlan xlikatsinikgo. Chatum tiku xalak xfamilia wanilh: «Tlakg tlan xkitaxtunin komo xtlawa talakgxtumit nema ni xlitatlawat chu kxkuli, nixawa pi laksakti xtatayana Jehová nalitaxtuya». ¿Tuku makgtayalh Anna natayani? Xla wan: «Jehová kimaxkilh litliwakga. Chu kintse chu kintlat na lu kimakgtayakgolh». Anna tsokgwilinit kʼakgtum lista la makgtayanit Jehová, chu ni xmakgasni akxilha xlakata ni napatsankga. Komo wix pekuana pi naputsastalanikana, kalakapastakti pi Jehová na namakgtayayan (Heb. 13:6).

CORNELIO TAMUNULH

11. ¿Tuku max xtitlawalh pi Cornelio ni xtamunulh?

¹¹ Atanu lu tlan liʼakxilhtit wa Cornelio. Xla «chatum centurión» xlitaxtu, uma wamputun pi chatum xapuxku soldado xwanit tiku xkapulalin 100 soldados (Hech. 10:​1, nota). Wa xlakata, max lu xlakaskinka xlitaxtu kxkachikin chu kxlakatinkan soldados. Biblia na wan pi Cornelio «lhuwa xtlawa tuku tlan xpalakata tiku nitu xkgalhikgo» (Hech. 10:2). Jehová malakgachalh apóstol Pedro xlakata xlitachuwinalh xatlan tamakatsinin. ¿Tuku tlawalh Cornelio? ¿Lakpuwa pi nila xtamunulh xlakata lu xlakaskinka xlitaxtu?

12. ¿Tuku makgtayalh Cornelio natamunu?

¹² ¿Tuku makgtayalh Cornelio natamunu? Biblia wan pi xla chu «putum tiku xalak xchik» xkgalhinikgo tapekua Dios chu pi Cornelio «ankgalhin xtlawani oración Dios» (Hech. 10:2). Akxni Pedro litachuwinalh xatlan tamakatsinin, Cornelio chu xfamilia kanajlanikgolh Cristo chu tunkun tamunukgolh (Hech. 10:​47, 48). Cornelio xatapaxuwan lakgpalilh tuku xtalakaskin xlakata xla chu xfamilia akxtum xkakninanikgolh Jehová (Jos. 24:15; Hech. 10:​24, 33).

13. ¿Tuku masiyaniyan xliʼakxilhtit Cornelio?

¹³ Xtachuna la Saulo, Cornelio lu xlakaskinka chixku xlitaxtu, chu max uma tlan xtitlawalh pi ni kstalanina Cristo xlitaxtulh. Pero ni mastalh talakaskin pi chuna xʼakgspulalh. ¿Chu wix? ¿Lhuwa tuku mililakgpalit kmilatamat xlakata tlan natamunuya? Liwana kakatsi pi Jehová namakgtayayan. Xla nasikulunatlawayan xlakata lu liskujpat nalilatapaya xtastakyaw Biblia.

14. ¿La makgtayayan xliʼakxilhtit Tsuyoshi?

¹⁴ Tsuyoshi, chatum tala chixku xalak Japón, wi tuku lakgpalilh nema xtlawa kxtaskujut xlakata tlan xtamunulh. Xla xmakgtaya director xla escuela Ikenobo, akgtum lu xlakaskinka escuela niku kamasiyanikan latamanin la nalikaxtlawanankgo xanat. Xmin kilhtamaku, director xlin xanat akxni wi tiku xniy chu xmakgtlawa talismanin nema tlawakgo budistas akxni wi tiku niy. Akxni director nila xʼan, Tsuyoshi xʼan xlakgxokgo chu xmakgtlawa umakgolh talismanin. Pero akxni katsinilh tuku wan Biblia xlakata tiku nikgonita, akxilhli pi nila xtamunulh komo chuntiya xmakgtlawalh umakgolh talismanin. Wa xlakata lakkaxwililh pi nialh xʼama makgtlawa (2 Cor. 6:​15, 16). Litachuwinalh director xlakata uma, chu xla maxkilh talakaskin pi chuntiya xtaskujli maski nialh xmakgtlawalh umakgolh talismanin. Tsuyoshi tamunulh max akxni kajku akgtum kata xtitaxtunit lata xtsukunit likgalhtawakga Biblia.a Komo talakaskin pi wi tuku nalakgpaliya nema tlawaya kmintaskujut xlakata namakgapaxuwaya Jehová, liwana kakatsi pi xla nakuentajtlawayan wix chu mifamilia xlakata ankgalhin nakgalhiyatit tuku maklakaskinatit (Sal. 127:2; Mat. 6:33).

TIKU XALAK CORINTO TAMUNUKGOLH

15. ¿Tuku max tlan xtitlawalh pi corintios ni xtamunukgolh?

¹⁵ Latamanin xalak Corinto xkalilakgapaskan pi lu xlakaskinka xliʼakxilhkgo tumin chu xtlawakgo talakgxtumit nema ni xlitatlawat. Lhuwa umakgolh latamanin xtlawakgo tuku xlakatsala xlimapakgsin Jehová. Wa xlakata lu tuwa xʼama kitaxtuni chatum lataman tiku xalak Corinto xwanit pi xmakgamakglhtinalh xaxlikana. Pero akxni apóstol Pablo chalh kʼuma kachikin chu kalitachuwinalh xatlan tamakatsinin xlakata Cristo, «lhuwa xalak Corinto tiku kgaxmatkgolh kanajlakgolh chu tamunukgolh» (Hech. 18:​7-11). Pero ni kajwatiya uma, Malana Jesucristo tasiyanilh Pablo chu wanilh: «Lhuwa latamanin kistalanimakgolh kʼuma kachikin». Wa xlakata, apóstol tamakgxtakgli anta akgtum kata aitat xlakata xkalitachuwinalh xatlan tamakatsinin.

16. ¿Tuku kamakgtayalh corintios natamunukgo? (2 Corintios 10:​4, 5).

¹⁶ ¿Tuku kamakgtayalh corintios natamunukgo? (Kalikgalhtawakga 2 Corintios 10:​4, 5). Dios maklakaskilh xTachuwin chu xʼespíritu santo xlakata xkamakgtayalh nalakgpalikgo putuminika xlatamatkan (Heb. 4:12). Corintios tiku makgamakglhtinankgolh xatlan tamakatsinin, lakgmakgankgolh xalixkajni xtalismaninkan. Makgapitsi umakgolh corintios kgotnin xwankgonit, xkatatalakgxtumikgo xtalakchixkuwinkan chu xkgalhanankgo (1 Cor. 6:​9-11).b

17. ¿Tuku masiyaniyan xliʼakxilhtitkan corintios?

¹⁷ Xlikana pi talakaskilh pi corintios lhuwa tuku xlakgpalikgolh kxlatamatkan xlakata tlan xtamunukgolh, pero nikxni lakpuwankgolh pi nikxnila chuna xʼamakgo tlawakgo. Lu liskujkgolh xlakata tlan xlakgchankgolh latamat nema ni kgalhi xlisputni (Mat. 7:​13, 14). ¿Chu wix? ¿Lu liskujpat xlakata nalakgmakgana akgtum nixatlan talismanin o tuku smanipasanitan? ¡Chuntiya kaliskujti! Kaskini Jehová pi kalimakgtayan xʼespíritu santo xlakata nialh natlawaya tuku nitlan.

18. ¿La makgtayayan xliʼakxilhtit Monika?

¹⁸ Kalichuwinaw Monika, tiku lama kʼGeorgia. Akxni aktsujku xwanit, lu liskujli xlakata xlakgmakgalh nixatlan lilakgastan chu nialh xmaklakaskilh xalaklixkajni tachuwin xlakata xtamunuputun. Xla wan: «Oración xkimatliwakglha. Jehová xkatsi pi akit xaktlawaputun tuku tlan chu ankgalhin kimakgtayalh chu kimpulalilh». Monika tamunulh akxni xkgalhi 16 kata. ¿Na wi tuku talakaskin nialh natlawaya xlakata namakgapaxuwaya Jehová chu naskujnaniya? Chuntiya kaskini xʼespíritu santo xlakata namakgtayayan nalakgpaliya tuku talakaskin, chu xla xatapaxuwan namaxkiyan (Juan 3:34).

MINTAKANAJLA TLAN NAMALAKXIJA SIPI

19. ¿Tuku namakgtayayan maski tuwa tuku natitaxtuya? (Na kaʼakxilhti dibujo).

¹⁹ Maski lhuwa tuku tuwa natitaxtuya xlakata tlan natamunuya, kalakapastakti pi Jehová paxkiyan chu lakaskin pi kamakgtapakgsi kxfamilia. Jesús kawanilh makgapitsi xtamakgalhtawakgen: «Komo kgalhiyatit mintakanajlakan xtachuna xlilanka xtalhtsi mostaza, nawaniyatit uma lanka sipi “Katalakxijti unu chu amacha kapit”, chu natalakxija, chu ni katiʼanalh tuku nila katitlawatit» (Mat. 17:20). Umakgolh tamakgalhtawakgen ni akglhuwa kata akxtum xtalatamakgonit Jesús, wa xlakata xtalakaskin pi tlakg xmatliwakglhkgolh xtakanajlakan. Jesús kamalaknunilh pi, komo tliwakga xkgalhikgolh xtakanajlakan, Jehová xʼama kamakgtaya xlakata nitu xkamalakgachokgolh, asta maski tuku tuwa xtitaxtukgolh xtachuna xtasiyalh la lanka sipi. ¡Chu wix na namakgtayayan!

20. ¿La makgtayanitan liʼakxilhtit nema kalichuwinanitaw kʼuma artículo?

²⁰ Komo akxilha pi wi tuku tlawama pi nila natamunuya, kaliskujti xlakata uma nialh namalakgachokgoyan. Chuna la akxilhnitaw, kgalhiyaw xliʼakxilhtitkan lhuwa kskujnin Dios xalak pulana siglo chu xala uku, nema tlan nakinkamakgtayayan chu tlan nakinkamatliwakglhan. Kalilakpuwanti umakgolh liʼakxilhtit, chu uma namakgpuwantiniyan natamakamastaniya Jehová chu natamunuya. ¡Wa tuku tlakg tlan nalaksaka kmilatamat!