ARTÍCULO NEMA NATALIKGALHTAWAKGA 26
TAKILHTLIN 123 Kakgalhakgaxmatwi xkachikin Jehová
Kataktujuw akxni wi tuku ni liwana akgatekgsaw
«Nila akgatekgsniyaw tiku kgalhi putum litliwakga» (JOB 37:23).
TUKU NA’AKXILHAW
Maski wi tuku ni katsiyaw, tlan nakinkakitaxtuniyan komo nataktujuyaw, wa nalilakpuwanaw tuku katsiyaw chu nalipawanaw Jehová.
1. ¿La kinkamalakatsukinitan Jehová, chu tuku xlakata?
JEHOVÁ kinkamalakatsukin xlakata tlan nalakapastaknanaw, tlan wi tuku nakatsiniyaw chu naʼakgatekgsaw la nalilatamayaw tuku katsiniyaw. ¿Tuku xlakata chuna kinkatlawan? Xlakata lakaskin pi katekgswi xaxlikana takatsin chu chuna nalaksakaw tuku tlan akxni skujnaniyaw (Prov. 2:1-5; Rom. 12:1).
2. 1) ¿Tuku nila tlawayaw? (Job 37:23, 24; na kaʼakxilhti dibujo). 2) ¿La litamakgtayayaw akxni taktujuyaw chu litayayaw pi ni putum katsiyaw?
2 Maski Jehová kinkamalakatsukin xlakata wi tuku tlan nakatsiniyaw, nila putum katsikgoyaw (kalikgalhtawakga Job 37:23, 24). Kalilakpuwaw Job. Jehová tlawanilh makgapitsi takgalhskinin nema limasiyalh pi lhuwa tuku Job ni xkatsi. Uma makgtayalh nalakgpali xtapuwan chu naʼakgatekgsa pi xtalakaskin xtaktujulh (Job 42:3-6). Akinin na lu nalitamakgtayayaw komo nalitayayaw pi wi tuku ni katsiyaw. Akxni taktujuyaw, kinkamakgtayayan nalipawanaw pi Jehová ankgalhin nakinkawaniyan tuku kilikatsitkan xlakata nalaksakaw tuku tlan (Prov. 2:6).
Xtachuna la Job, akinin na litamakgtayayaw xlakata wi tuku ni katsiyaw (Kaʼakxilhti párrafo 2).
3. ¿Tuku nalichuwinanaw kʼuma artículo?
3 Kʼuma artículo nalichuwinanaw makgapitsi tuku ni katsiyaw chu tuku xlakata min kilhtamaku uma tlawa pi tuwa namakgkatsiyaw ni nalakgaputsayaw. Na nalichuwinanaw tuku xlakata litamakgtayayaw akxni wi tuku ni katsiyaw. Tuku nakatsiyaw nakinkamakgtayayan tlakg nalipawanaw pi Jehová, «tiku kgalhi xatakgatsin takatsin», nakinkawaniyan tuku kilikatsitkan (Job 37:16).
NI KATSIYAW TUKU KILHTAMAKU NAMIN LISPUTNI
4. Chuna la wan Mateo 24:36, ¿tuku ni katsiyaw?
4 (Kalikgalhtawakga Mateo 24:36). Ni katsiyaw tuku kilhtamaku namin lisputni. Asta Jesús, akxni xlama kKatiyatni, na ni xkatsi «kilhtamaku chu tukuya hora» xʼama min lisputni.a Alistalh kawanilh xʼapóstoles pi Jehová, xMalana Kilhtamaku, wa lakgchan nalaksaka tuku kilhtamaku wi tuku nala (Hech. 1:6, 7). Jehová lakkaxwilinita kilhtamaku chu hora akxni namin lisputni, chu akinin nila katsiyaw uma.
5. Xlakata ni katsiyaw tuku kilhtamaku namin lisputni, ¿tuku max xtsukuw makgkatsiyaw?
5 Tuku wa Jesús kinkamasiyaniyan pi ni katsiyaw la xlilhuwa kilhtamaku nakgalhkgalhiyaw asta akxni namin lisputni. Wa xlakata max namin kilhtamaku nataxlajwaniyaw o namakgkatsiyaw pi lu makgapalama, liwaka komo akglhuwata kata skujnimaw Jehová. O max tuwa makgkatsiyaw akxni kifamiliajkan o latamanin kinkalikgalhkgamanankgoyan xlakata nina min lisputni (2 Ped. 3:3, 4). Max asta nalakpuwanaw: «Komo xakkatsilh tuku kilhtamaku namin lisputni, tlakg ni tuwa xakmakgkatsilh nakkgalhkgalhi xkilhtamaku Jehová chu naktayani akxni kilikgalhkgamanankan».
6. ¿La litamakgtayayaw xlakata ni katsiyaw tuku kilhtamaku namin lisputni?
6 Xlakata Jehová ni kinkawaninitan tuku kilhtamaku namin lisputni, uma kinkamaxkiyan talakaskin nalimasiyayaw pi skujnanimaw xlakata paxkiyaw chu xlakata lipawanaw. Skujnaniputunaw Jehová putum kilhtamaku, chu ni kajwatiya asta akxni namin lisputni. Akxni lilakpuwanaw «xkilhtamaku Jehová», ni kajwatiya lilakgaputsaputunaw tuku kilhtamaku namin, wata lilakpuwamputunaw tuku natlawa. Uma nakinkamakgtayayan tlakg natalakatsuwiniyaw chu lu naliskujaw xlakata namakgapaxuwayaw (2 Ped. 3:11, 12).
7. ¿Tuku katsiyaw?
7 Lu nalitamakgtayayaw komo wa nalilakpuwanaw tuku katsiyaw. ¿Chu tuku katsiyaw? Jehová matsokgninalh kBiblia tuku xkinkamakgtayan nakatsiyaw pi xlamaw kxaʼawatiya kilhtamaku chu la xʼama wan latamat. Chu lata kkata 1914 tsukulh kgantaxtu uma. Wa xlakata liwana katsiyaw pi «lanka xkilhtamaku Jehová lakatsu wi» (Sof. 1:14). Na katsiyaw pi Jehová lakaskin pi kakalitachuwinaw putum latamanin «xatlan tamakatsinin» (Mat. 24:14). Chu lichuwinamaw uma tamakatsinin kʼ240 países chu kachikinin, chu kliwaka 1,000 tanu tanu tachuwin. Ni talakaskin nakatsiyaw tuku «kilhtamaku chu tukuya hora» namin lisputni xlakata xatapaxuwan namakgtlawayaw uma taskujut.
NI KATSIYAW TUKU NATLAWA JEHOVÁ XLAKATA NAKINKAMAKGTAYAYAN
8. ¿Tuku kilhchanima tachuwin «tuku tlawa xaxlikana Dios»? (Eclesiastés 11:5).
8 Ni ankgalhin katsiyaw putum «tuku tlawa xaxlikana Dios» (kalikgalhtawakga Eclesiastés 11:5). ¿Tuku kilhchanima uma? Wamputun putum tuku Jehová tlawa o masta talakaskin kalalh xlakata nakgantaxtu xtalakaskin. Wa xlakata ni liwana katsiyaw la nakinkamakgtayayan chu tuku xlakata min kilhtamaku masta talakaskin pi wi tuku kalalh (Sal. 37:5). Biblia kinkawaniyan pi nila katsiyaw putum tuku tlawa Dios. Uma xtachuna la nila akgatekgsaw la staka chatum skgata kxpan xtse, nema nipara científicos katsikgo la kitaxtu.
9. ¿Tuku max tuwa namakgkatsiyaw xlakata ni katsiyaw la nakinkamakgtayayan Jehová?
9 Xlakata ni katsiyaw la nakinkamakgtayayan Jehová, max namin kilhtamaku tuwa namakgkatsiyaw wi tuku natlawayaw. Kalilakpuwaw uma, max tuwa namakgkatsiyaw wi tuku nalakgpaliyaw kkilatamatkan xlakata tlakg nalichuwinanaw Dios o na’anaw makgtayananaw niku tlakg talakaskin nalichuwinankan Dios. Nachuna, akxni wi tuku tlawayaw chu nichuna kitaxtu la xlakpuwanitaw, max nalakpuwanaw pi Jehová ni lakgati tuku tlawamaw. Max wi tuku xlakgchamputunaw, pero nila chuna tlawaw. O max lu liskujmaw nalichuwinanaw Dios, pero ni kinkakgaxmatniputunkanan. O max makgtayanamaw niku tlawamaka akgtum Pukgalhtawakga, pero wi tuku malakgachokgoma taskujut. Putum uma max natlawa pi nalakpuwanaw pi Jehová ni kinkamakgtayaman.
10. Xlakata ni katsiyaw la nakinkamakgtayayan Jehová, ¿tuku tayat kinkamakgtayayan nakgalhiyaw?
10 Xlakata ni katsiyaw la nakinkamakgtayayan Jehová, uma tlawa pi nalimasiyayaw tataktujut. Kinkamalakapastakayan pi xtapuwan chu tuku tlawa Jehová ni xtachuna tuku akinin lakpuwanaw chu tlawayaw (Is. 55:8, 9). Na kinkamakgtayayan nalakapastakaw pi tlan nakinkakitaxtuniyan komo wa nalipawanaw. Komo tlan kinkakitaxtuniman akxni lichuwinamaw Dios o akxni makgtlawamaw akgtum taskujut kxkachikin, wa Jehová malankiyaw (Sal. 127:1; 1 Cor. 3:7). Pero komo wi tuku nitlan kinkakitaxtuniman, ni lakgaputsayaw xlakata katsiyaw pi Jehová akxilhma chu katsi putum tuku lama (Is. 26:12). Tlawayaw putum tuku matlaniyaw chu lipawanaw pi Jehová nakinkamakgtayayan. Maski max ni katitlawalh akgtum milagro xlakata nakinkamakgtayayan, chuna la tlawalh makgasa, liwana katsiyaw pi xla nakinkapulalinan (Hech. 16:6-10).
11. ¿Tuku katsiyaw?
11 Akxni lakapastakaw tuku katsiyaw, kinkamakgtayayan. ¿Chu tuku katsiyaw? Katsiyaw pi Jehová lu xapaxkina, xaʼakgstitum chu xaskgalala. Na katsiyaw pi xtapalh liʼakxilha tuku tlawayaw xpalakata chu xpalakatakan natalan, chu ankgalhin kasikulunatlawa tiku ni makgxtakgkgo (Heb. 11:6).
NI KATSIYAW TUKU NALA CHALI TUXAMA
12. Chuna la wan Santiago 4:13, 14, ¿tuku ni katsiyaw?
12 (Kalikgalhtawakga Santiago 4:13, 14). Ni katsiyaw la nakinkakitaxtuniyan kkilatamatkan chali tuxama. Putum akinin max kinkalakgchinan nixatlan kilhtamaku chu wi tuku kaj xalan kinkaʼakgspulayan (Ecl. 9:11). Wa xlakata ni katsiyaw komo tlan nakitaxtu tuku lakkaxwilimaw natlawayaw o komo tlan namakgantaxtiyaw.
13. Xlakata ni katsiyaw tuku nala chali tuxama, ¿tuku max xtsukuw makgkatsiyaw?
13 Max tuwa namakgkatsiyaw natayaniyaw xlakata ni katsiyaw tuku nala chali tuxama. Max nalilakgaputsayaw tuku nikxni katilalh, chu uma natlawa pi nialh napaxuwayaw. Max tuku kaj xalan lay natlawa pi nalakgaputsayaw chu nitlan nakinkamamakgkatsiniyan. O max akxni ni kgantaxtu tuku xlakaskinaw, kinkamakgalipuwanan chu kinkamaxlajwaniyan (Prov. 13:12).
14. ¿Tuku maklakaskinaw xlakata napaxuwayaw? (Na kaʼakxilhti dibujos).
14 Komo natayaniyaw kaxatukawa tuku tuwa natitaxtuyaw, nalimasiyayaw pi skujnanimaw Jehová xlakata paxkiyaw chu ni kaj xlakata wi tuku namakglhtinanaw. Tuku wan Biblia masiya pi Jehová ni ankgalhin wi tuku katitlawalh xlakata ni natitaxtuyaw tuku tuwa chu ni laklhkawili tuku nakinkaʼakgspulayan kkilatamatkan. Xla katsi pi xlakata napaxuwayaw, ni talakaskin nakatsiyaw putum tuku nala kkilatamatkan, wata kajwatiya talakaskin naputsayaw xtapulalit chu nakgalhakgaxmataw (Jer. 10:23). Komo nalipawanaw Jehová akxni wi tuku nalaksakaw, xtachuna la xwaw: «Komo Jehová nalakaskin, nalatamayaw chu natlawayaw uma chu atanu» (Sant. 4:15).
Tuku xlikana litamakgtayayaw wa pi naputsayaw xtapulalit Jehová chu nakgalhakgaxmataw (Kaʼakxilhti párrafos 14 chu 15).b
15. ¿Tuku katsiyaw xlakata kilhtamaku nema aku mima?
15 Maski ni katsiyaw tuku nala chali tuxama, liwana katsiyaw pi Jehová kinkamalaknuninitan pi tlan nalatamayaw putum kilhtamaku. Katsiyaw pi xla nila akgsaninan chu pi ni anan tuku natlawa pi ni namakgantaxti xtamalaknun (Tito 1:2). Kajwatiya Jehová tlan wan: «Akit tiku alisokg lichuwinan tuku nala, chu tiku lata makgasa lichuwinanit tuku nina tatlawa». Putum tuku xla xlichuwinanit pi xʼama la kgantaxtunit, chu na nakgantaxtu tuku kinkamalaknuninitan (Is. 46:10). Liwana katsiyaw pi ni anan tuku natlawa pi nialh nakinkapaxkiyan (Rom. 8:35-39). Xla nakinkamaxkiyan liskgalala, takgoxamixat chu litliwakga nema maklakaskinaw xlakata natayaniyaw kaxatukawa tuku tuwa natitaxtuyaw. Liwana kakatsiw pi Jehová nakinkamakgtayayan chu nakinkasikulunatlawayan (Jer. 17:7, 8).
JEHOVÁ TLAKG LIWANA KINKALAKGAPASAN
16. ¿Tuku liwana katsi Jehová kimpalakatakan? (Salmo 139:1-6).
16 (Kalikgalhtawakga Salmo 139:1-6). KiMalakatsukinakan katsi la lakgnuyaw, tuku makgkatsiyaw chu tuku lakpuwanaw. Xla ankgalhin kinkakuentajtlawayan. Katsi tuku wanaw chu tuku wamputunaw, tuku tlawayaw chu tuku xlakata chuna tlawayaw. Mapakgsina David wa pi Jehová ankgalhin kinkamakgtayaputunan chu kinkakuentajtlawaputunan. Lu kaks kinkamalakawaniyan pi lu kinkalilakgaputsayan kiMalakatsukinakan, Tiku kgalhi putum litliwakga. David wa: «Tuku xla katsi lu kaks kimalakawani. Lu lhuwa chu nila kʼakgatekgsa» (Sal. 139:6, notas).
17. ¿Tuku xlakata max tuwa makgkatsiyaw naʼakgatekgsaw pi Jehová liwana kinkalakgapasan?
17 Max xlakata la kinkamakgastakkan, kintalismaninkan o xlakata tuku xkanajlayaw makgasa, tuwa makgkatsiyaw naliʼakxilhaw Jehová chuna la chatum xapaxkina tlat tiku kinkalilakgaputsayan. O max nitlan limakgkatsiyaw tuku tlawaw makgasa chu lakpuwanaw pi Jehová ni kinkatalalimputunan chu makgat kinkawilanin. Asta David nachuna makgkatsilh (Sal. 38:18, 21). O max wi tiku lu liskujma xlakata nalakgpali ni xatlan xtayat chu tlawaputun tuku Dios lakgati, pero max nalakpuwan: «Komo Dios kiʼakgatekgsni, ¿tuku xlakata kiskini pi kaklakgmakgalh tuku lu tuwa kmakgkatsi naklakgmakgan?».
18. ¿Tuku xlakata tlan kitaxtu akxni akgatekgsaw pi Jehová tlakg liwana kinkalakgapasan nixawa akinin? (Na kaʼakxilhti dibujos).
18 Maski tuwa makgkatsiyaw, kililakapastakatkan pi Jehová tlakg liwana kinkalakgapasan nixawa la akinin kinkalakgapaskanan. Chu kalakapastakwi pi xla akxilha tuku tlan kgalhiyaw maski akinin ni akxilhaw. Jehová akxilha tuku nitlan tlawayaw, pero na akgatekgsa tuku xlakata wi tuku tlawayaw chu tuku xlakata wi tuku makgkatsiyaw, chu kinkapaxkiyan (Rom. 7:15). Akxni akgatekgsaw pi Jehová katsi pi lhuwa tuku tlan tlawayaw, kinkamakgtayayan chuntiya xatapaxuwan naskujnaniyaw chu ni namakgxtakgaw.
Maski la uku lhuwa tuku ni katsiyaw, liwana katsiyaw pi Jehová kinkamalaknuninitan akgtum xastlan latamat, chu uma kinkamakgtayayan natayaniyaw tuku tuwa (Kaʼakxilhti párrafos 18 chu 19).c
19. ¿Tuku liwana katsiyaw xlakata Jehová?
19 Liwana katsiyaw pi Jehová tapaxkit (1 Juan 4:8). Katsiyaw pi tuku xla kinkalimapakgsiyan limasiya pi lu kinkapaxkiyan chu ankgalhin lakaskin pi tlan kakinkakitaxtunin. Na katsiyaw pi xla lakaskin kalatamaw putum kilhtamaku, chu wa xlakata mastalh talakgmaxtut. Xlakata kinkamaxkin uma tamaskiwin, katsiyaw pi tlan namakgapaxuwayaw maski makglakgalhinanin akinin (Rom. 7:24, 25). Chu katsiyaw pi «Dios tlakg lanka nixawa kinakujkan chu putum katsi» (1 Juan 3:19, 20). Jehová liwana kinkalakgapasan chu katsi pi tlan natlawayaw xtalakaskin.
20. ¿Tuku nakinkamakgtayayan ni nalilakgaputsayaw tuku ni katsiyaw?
20 Chuna la lichuwinanitaw, Jehová kinkamakatsiniyan tuku kilikatsitkan. Wa xlakata ni kalilakgaputsaw tuku ni katsiyaw, wata wa kalilakgaputsaw tuku tlakg xlakaskinka. Akxni chuna tlawayaw limasiyayaw pi taktujuyaw chu lipawanaw Jehová, «tiku kgalhi xatakgatsin takatsin» (Job 36:4). Maski lhuwa tuku ni katsiyaw, lu paxuwayaw akxni lilakpuwanaw pi kkilhtamaku nema aku mima lhuwa tuku tlan nakatsiniyaw xpalakata kiDioskan (Ecl. 3:11).
TAKILHTLIN 104 Espíritu santo xtamaskiwin Dios
a Jesús wa tiku lakgayawakanit namasputu xkakilhtamaku Satanás. Wa xlakata tlan nawanaw pi la uku xla katsi tuku kilhtamaku namin Armagedón chu tuku kilhtamaku “nakamakgatlaja xtalamakgasitsin” (Apoc. 6:2; 19:11-16).
b TUKU TASIYA KDIBUJO: Chatum chixku chu xkgawasa mujumakgo kmochila tuku namaklakaskinkgo komo wi tuku kaj lakapala nala.
c TUKU TASIYA KDIBUJO: Chatum tala tiku titaxtuma tuku tuwa, lilakpuwan la nawan xlatamat kxasasti kakilhtamaku.