«Kajwatiya Jehová tlan makgatlajanan ktatalachipat»

Uma taʼakglhuwit lakatsukulh kkata 1990, akxni mapakgsina xalak Francia tsukulh skini sucursal pi xlakgaxokgolh xliputuminika donaciones nema xmakglhtinankgonit lata kkata 1993 asta 1996. Xaklakaskinaw pi tribunales xalak Francia xkinkamakgtayakgon, pero nichuna lalh. Wa xlakata mapakgsina makglhtilh sucursal liwaka 4,500,000 euros (127 millones de pesos) nema xwi kbanco. Xaʼawatiya tribunal tiku tlan xkinkamakgtayan xlakata xlakkaxtlawalh uma ta’akglhuwit wa Tribunal Europeo. Pero uma tribunal kinkaskinin pi xʼabogados mapakgsina chu akinin xaktatamakxtumiw chatum xrepresentante xlakata xakkakxilhwi komo tlan xaklakkaxlaw, chu alistalh xakkaw kxlakatin tribunal.

Xaklakpuwanaw pi xrepresentante Tribunal Europeo xʼama kinkawaniyan pi xakmastaw tsinu tumin nema xkinkaskiniman mapakgsina xalak Francia xlakata chuna xlakkaxlalh taʼakglhuwit. Pero akinin xakkatsiyaw pi komo xakxokgow maski kaj tsinu, xaklakatsalaw tuku wan Biblia. Natalan xatapaxuwan xmastakgonit xdonacioneskan xlakata xlimakgtayanankgolh natlawakan xtaskujut Dios. Wa xlakata, uma tumin ni xtapakgsini mapakgsina (Mat. 22:21). Maski chuna, kkaw kʼuma tamakxtumit xlakata chuna xkinkaskiniman Tribunal Europeo.

Xrepresentante Tribunal Europeo kinkamamakxtumin k’akgtum lu stlan salón, chu lalh tuku xaklakpuwanitaw: xrepresentante tribunal kinkawanin pi xtatayananin Jehová xmaxkikgolh maski kaj tsinu lilakgaxokgon mapakgsina xalak Francia. Pero kaj xalan kkgalhskiw: «¿Katsiyata pi mapakgsina xalak Francia kamakglhtinita liwaka akgtati millones a’itat euros xtatayananin Jehová?».

Akxni kwaniw uma, xrepresentante tribunal lu kaks lilakawa xlakata xla ni xkatsi. Kakgalhskilh xʼabogados mapakgsina komo xlikana xwanit. Akxni wanika pi chuna, lisitsilh chu tsukulh kakilhni, chu alistalh kinkawanin pi tlantiya xakkaw. Kakxilhli pi Jehová kinkamakgtayan chu lalh tuku nikxni xaklakpuwanitaw. ¡Lu kpaxuwaw!

Tribunal Europeo kinkatatayan 30 xla junio kata 2011, chu wa pi lilakgaxokgon nema kskima mapakgsina xalak Francia xlakatsalama limapakgsin. Kawanika pi xmaspitkgolh tumin nema xkamakglhtikgonit natalan chu pi xmastakgolh xaskgata tumin. Tuku lalh ama kilhtamaku chuntiya litamakgtayamakgo natalan xalak Francia asta la uku. Takgalhskinin nema ktlawaniw xrepresentante tribunal, xtachuna litaxtulh la chiwix nema liʼaktalaka Goliat. ¿Tuku xlakata? Xlakata chuna lalh la David wanilh Goliat: «Kajwatiya Jehová tlan makgatlajanan ktatalachipat» (1 Sam. 17:​45-47, TNM).

Chu ni kajwatiya kFrancia kinkatatayakgonitan tribunales. Maski makgapitsi xpulalinanin takanajla chu mapakgsinanin malakgachokgoputunkgonit kintaskujutkan, 1,225 xlimakglhuwa la kinkatatayakgonitan tribunales ksetenta países, chu na makglhuwa kinkatatayakgonitan tlakg xlakaskinka tribunales nema lakkaxtlawakgo taʼakglhuwit xlikalanka Katiyatni. Tuku wankgonit tribunales tlawanit pi mapakgsinanin natsokgwilikgo pi xtatayananin Jehová akgtum religión litaxtukgo chu kamaxkikanit talakaskin natlawakgo xtaskujutkan. Na kinkamaxkinitan talakaskin nalichuwinanaw Dios, ni namakgtlawayaw fiestas niku malankikan akgtum kachikin chu ni namakgamakglhtinanaw kgalhni.

Pero komo xakmakgtayanama niku xpulalinkan kintaskujutkan (kNueva York, Estados Unidos), ¿tuku xlakata akit chu amakgapitsi abogados xakkanitaw kkapalakachuwinanaw natalan kʼEuropa?

KINATLATNI MISIONEROS XLITAXTUKGO

Kintlat chu kintse, George chu Lucille, kilakgolh kclase 12 xla Escuela de Galaad, chu kkata 1956 akxni klakachilh, xlakan xmakgtayanamakgo kʼEtiopía. Kinatlatni laksakkgolh pi xkiwanika Philip, chuna la «Felipe» tiku lichuwinankan kBiblia (Hech. 21:8). Akgtum kata alistalh, mapakgsina xala anta malakgachokgolh kintaskujutkan. Maski aktsujku xakwanit, liwana klakapastaka pi kifamilia chu akit tsekg xakkanaw ktamakxtumit chu tsekg xaklichuwinanaw Dios. ¡Akit lu xaklakgati akxni chuna xaktlawayaw! Pero kkata 1960 kinkatlakgaxtukan k’uma kpaís.

Kifamilia chu akit kkaw latamayaw kWichita (Kansas, Estados Unidos). Kinatlatni chuntiya lu xlakgatikgo xlichuwinankgo Dios, chuna la akxni misioneros xlitaxtukgo. Xlilatamakgo tuku masiya Biblia, chu kinkamakgpuwantinikgon akit, xalankata kintala tsumat, Judy, chu xaʼaktsujku kintala kgawasa, Leslie, tiku na lakachinkgolh kʼEtiopía. Ktamunulh akxni xakkgalhi 13 kata chu akgtutu kata alistalh kkaw latamayaw kʼArequipa (Perú), niku tlakg xtalakaskin xlichuwinanka Dios.

Kkata 1974, akxni xakkgalhi 18 kata, natalan tiku xpulalinkgo taskujut ksucursal xalak Perú, precursores especiales kinkalimaxtun akit chu atanu kgalhtati natalan. Kinkamalakgachakan kxkasipijni Andes, niku ninapara makgtum xlichuwinankanit Dios. Anta na kkalitachuwinaw Dios tiku chuwinankgo quechua chu aimara. Xaklhtatayaw kputlaw nema xaklinaw chu xaklimapakuwiyaw Arca xlakata xtasiya chuna la akgtum caja. Klakapastaka pi xaklimaklakaskin Biblia xlakata xakkamasiyanilh tiku chuwinankgo quechua chu aimara pi Jehová nialh makgas namasputu talimaxkget, tajatat chu linin (Apoc. 21:​3, 4). Lhuwa tiku makgamakglhtinankgolh xaxlikana.

KIWANIKA PI XAKKALH SKUJA KBETEL

Kkata 1977, Albert Schroeder kilalh kPerú. Uma tala xkatatapakgsi Lakgkgolotsin tiku Pulalinankgo, chu kiwanilh pi xakmalakgatsamalh maktum solicitud xlakata xakkalh makgtayanan kBetel niku pulalinkan kintaskujutkan. Chu chuna ktlawalh. Ni xlimakgas, 17 xla junio kata 1977, ktsukulh makgtayanan kBetel xalak Brooklyn. Akgtati kata kskujli kdepartamentos de Limpieza chu Mantenimiento.

Junio kata 1978 klakgapasli Elizabeth Avallone kʼakgtum asamblea internacional nema tlawaka kNueva Orleans (Luisiana). Xnatlatni na kskujnimakgo Jehová chuna la kinatlatni. Akgtati kata lata Elizabeth precursora regular xlitaxtu chu tlakg kskujniputun Jehová. Tlakg ktsukuw latakgalhchuwinanaw chu ktamakgaxtokgwi 20 xla octubre kata 1979 chu akxtum ktsukuw makgtayananaw kBetel.

Kxapulana congregación niku ktsukuw makgtayananaw xwanikan Brooklyn Spanish, chu natalan xalak uma congregación lu tlan kinkalikatsinikgon. Chuna la titaxtunit kilhtamaku, lakatutu congregaciones niku kmakgtayananitaw, chu natalan xalak umakgolh congregaciones na lu tlan kinkalikatsinikgonitan chu kinkamakgpuwantinikgonitan chuntiya nakmakgtayananaw kBetel. Lu kkapaxtikatsiniyaw umakgolh natalan, kiʼamigoskan chu kifamiliajkan xlakata lu kinkamakgtayakgon akxni kinatlatni chu xnatlatni kimpuskat xlinkgoya kata.

KMAKGTAYANAN KDEPARTAMENTO DE ASUNTOS LEGALES

Enero kkata 1982 kiwanika pi xaktsukulh kmakgtayanan kDepartamento de Asuntos Legales kBetel. Titaxtulh akgtutu kata, kiwanika pi xakkalh k’universidad xlakata abogado xaklitaxtulh. Akxni xakkgalhtawakgama k’universidad lu kaks klilakawa akxni kakxilhli pi xlakata tribunales katatayakgonit xtatayananin Jehová, makgtayananit nalakkaxwilikan makgapitsi limapakgsin nema kamaxki talakaskin latamanin xalak Estados Unidos chu k’amakgapitsin países wi tuku natlawakgo, chuna la namakgtapakgsikgo kreligion nema xlakan tapakgsiputunkgo, ni natlawakgo tuku xtalakapastaknikan ni kamaxki talakaskin chu tlan nawankgo tuku lakpuwankgo. Lhuwa horas xaklimaxtuyaw xlakata naklakputsananiyaw pulakatunu tuku xtlawakanit.

Kkata 1986, akxni xakkgalhi 30 kata, kilakgayawaka nakpulalin taskujut kDepartamento de Asuntos Legales. Lu kpaxuwalh xlakata kilakgayawaka uma taskujut maski kgawasaku xakwanit, pero na lu xaklilakgaputsa xlakata uma lanka taskujut xwanit.

Kkata 1988 kimaxkika kinkapsnat xlakata abogado xaklitaxtulh, pero ni kuenta ktlawalh pi universidad xlaktlawanit chuna la xaktalalin Jehová. Akxni lhuwa nakgalhtawakgaya namalakpuwaniyan pi lakgchanan tuku tlakg tlan chu pi amakgapitsin tiku ni kgalhtawakgakgonit chuna la wix, ni lu xlakaskinka litaxtukgo. Pero Elizabeth kimakgtayalh xlakata tlakg tlan xaktsukupa talalin Jehová. La uku kkatsi pi tuku tlakg xlakaskinka ni wa pi lhuwa tuku nakatsiya, wata wa pi lu tlan natalalipina Jehová, napaxkiya chu na nakapaxkiya natalan.

KKGALHMAKGTAYAYAW XATLAN TAMAKATSININ

Akxni kmasputulh universidad, tlakg ktsukulh makgtayanan kDepartamento de Asuntos Legales kBetel chu na ktsukulh kgalhmakgtaya xkachikin Jehová kxlakatin tribunales. Uma lu xkimakgapaxuwa, pero na tuwa xakmakgkatsi xlakata lhuwa tuku xtalakgpalima kxkachikin Jehová. Klakapastaka pi kkata 1990 kawanika natalan tiku xmakgtayanamakgo kDepartamento de Asuntos Legales pi xlakputsanankgolh chu xlakkaxwilikgolh tuku xlitatlawat xwanit xlakata nialh xmaxokgenaw akxni xmastaw likgalhtawakga. Lata ama kilhtamaku, xtatayananin Jehová nialh maxokgenanaw akxni mastayaw likgalhtawakga. Uma lu makgtayanalh xlakata kBetel chu kcongregaciones nialh x’analh lu lhuwa taskujut, chu na kinkamakgtayan pi ni xkinkaskinikan lilakgaxokgon. Makgapitsin lakpuwankgolh pi nialh x’amaw kgalhiyaw tumin chu uma x’ama laktlawa la lichuwinanaw Dios. Pero nichuna lalh. La uku tlakg lhuwa xlakskujnin Jehová anan nixawa kkata 1990, chu ni talakaskin pi latamanin naxokgokgo xlakata nakgalhikgo tuku nakamakgtaya nalakgapaskgo Dios. Kakxilhnit pi akxni wi tuku talakgpali kxkachikin Jehová nema lu tuwa tasiya, tlan kitaxtu xlakata Jehová kinkamakgtayaman chu limaklakaskima skujni xatalipaw xlakata nakinkapulalinan (Éx. 15:2; Mat. 24:45).

Abogados lu tlan tlawakgonit xtaskujutkan, pero tuku na kinkamakgtayanitan xlakata tribunales nakinkatatayakgoyan wa xatlan xtayatkan kinatalankan. Klakapastaka akxni kgalhtutu natalan tiku xkatatapakgsikgo Lakgkgolotsin tiku Pulalinankgo kilakgolh k’asambleas nema katlawaka kCuba kkata 1998. Xlakata umakgolh natalan tlan kalikatsinikgolh mapakgsinanin chu kalimasiyanikgolh kakni, makgtayanalh na’akxilhkgo pi xlikana ni makgtanuyaw kpolítica. Uma tlakg makgtayanalh nixawa tuku akinin xakkawaninitaw akxni xakkatatamakxtuminitaw.

Pero min kilhtamaku talakaskin nakkanaw ktribunales chu “nakmaklakaskinaw limapakgsin xlakata nakkgalhmakgtayayaw xatlan tamakatsinin” (Filip. 1:7). Klakapastaka pi akglhuwa kata, mapakgsinanin xalak Europa chu Corea del Sur xafuerza xkamatlawiputunkgo servicio militar natalan lakgkgawasan. Wa xlakata max 18,000 natalan xalak Europa chu max 19,000 natalan xalak Corea del Sur katamaknuka kpulachin xlakata ni tlawaputunkgolh servicio militar.

Ta’akglhuwit nema xlakkaxtlawamaka nema xlimapakuwikan Bayatyan contra Armenia lakkaxlalh 7 xla julio kata 2011, akxni Tribunal Europeo de Derechos Humanos wa pi xtlawaka tuku nikxni chuna xtlawakanit. Limapakgsinalh pi putum países xalak Europa xmastakgolh talakaskin pi tiku ni xtlawaputun servicio militar tlan xlimakgtayanalh atanu taskujut kkachikin. Alistalh, 28 xla junio kata 2018, Tribunal Constitucional xalak Corea del Sur na watiya uma tuku limapakgsinalh kkachikinin nema tapakgsinikgo. Pulaktum tuku kinkamakgtayanitan xlakata tribunales nakinkatatayakgoyan wa pi natalan lakgkgawasan ni makgxtakgkgonit Jehová chu ni tlawaputunkgonit tuku xafuerza kamatlawiputunkan.

Departamento de Asuntos Legales nema wilakgo ksucursales chu niku pulalinkan kintaskujutkan, lu palha skujkgo xlakata nakgalhmakgtayakgo kintakanajlakan. Akgtum lanka talakgalhaman kliʼakxilha pi kkakgalhmakgtaya kinatalankan tiku titaxtumakgo tuku tuwa xpalakata mapakgsinanin. Maski tribunales kinkatatayakgoyan o ni kinkatatayakgoyan, ankgalhin kmalankiyaw Jehová kxlakatin mapakgsinanin chu amakgapitsin latamanin (Mat. 10:18). Jueces, xlakskujnin mapakgsinanin, periodistas chu putum latamanin, maski ni lakgatikgo, likgalhtawakgakgo textos xalak Biblia nema ktsokgwiliyaw kkapsnat nema kinkaskinikgoyan jueces, chu kgaxmatkgo akxni klikgalhtawakgayaw makgapitsi textos nema kmaklakaskinaw akxni kkgalhmakgtayayaw kintakanajlakan. Uma kamakgtayanit latamanin tiku tlan likatsikgo nakalakgapaskgo xtatayananin Jehová chu na’akxilhkgo pi tuku kanajlayaw anta kilhtiyayaw kBiblia, chu asta makgapitsin makgamakglhtinankgonit xaxlikana.

¡PAXTIKATSINILH JEHOVÁ!

Titaxtunita 40 kata chu kkgalhinit talakgalhaman akxtum nakkataskuja natalan tiku makgtayanamakgo kDepartamento de Asuntos Legales ktanu tanu sucursales kxlikalanka Katiyatni. Chu na kkgalhinit talakgalhaman nakkakgalhmakgtaya natalan kxlakatin xlakaskinka tribunales chu kxlakatinkan xlakaskinka kskujnin mapakgsinanin. Kkapaxki natalan chu lu klakgati taskujut nema tlawakgo kDepartamento de Asuntos Legales nema wi niku pulalinkan kintaskujutkan chu nema wilakgo kxlikalanka Katiyatni. Lhuwa tasikulunalin kmakglhtinanit chu lu kpaxuwa.

Kimpuskat, Elizabeth, lu xatapaxuwan kimakgtayanit umakgolh 45 kata, maski minit kilhtamaku ktitaxtunitaw tuku tuwa. Xla kgalhi akgtum tajatat nema maxlajwani chu min kilhtamaku ni kgalhi lhuwa litliwakga. ¡Lu kpaxtikatsini tuku tlawanit!

Elizabeth chu akit kakxilhnitaw pi tuku kinkamakgtayanitan naktayaniyaw chu nakkakgalhmakgtayayaw natalan ni wa xlakata lhuwa tuku kkatsiniyaw tlawayaw, wata klakpuwanaw chuna la David: «Jehová matliwakglha xkachikin» (Sal. 28:8). Xlikana pi «kajwatiya Jehová tlan makgatlajanan ktatalachipat».