Chuntiya kalitamakgtaya tuku xapulana katsini

1. ¿La lakgpalilh milatamat akxni katsini tuku masiya Biblia?

AKXNI katsiniw tuku masiya Biblia lakgpalilh kilatamatkan. Kalilakpuwaw akxni katsiw pi Dios wanikan Jehová. Uma kilhtamaku tsukuw talalinaw (Is. 42:8). Na lu tlan makgkatsiw akxni katsiw pi tiku nikgonita nitu patinamakgo chu nialhtu katsikgo (Ecl. 9:10). Chu akxni katsiw pi Dios natlawa pi Katiyatni akgtum paraíso nawan, nialh lilakgaputsaw xlakata tuku x’ama kitaxtu kkilatamatkan xlakata katsiniw pi ni kajwatiya tlan x’amaw latamayaw 70 chu 80 kata, wata tlan xlatamaw putum kilhtamaku (Sal. 37:29; 90:10).

2. ¿Tuku xlakata Pedro kawanilh kstalaninanin Cristo pi xlakapastakkgolh tuku xkatsikgoya? (2 Pedro 1:​12, 13).

² Maski lhuwata kata lakgapasaw xaxlikana, nikxni kapatsankgaw pi tuku pulana katsiniw xpalakata Biblia chuntiya lu litamakgtayayaw. Apóstol Pedro kamalakgachanilh xlimaktiy xcarta natalan tiku “liwana xlakgapaskgoya xaxlikana tamasiy” (kalikgalhtawakga 2 Pedro 1:​12, 13). Pero xlakata kcongregación x’anankgo tiku xmasiyakgo tuku ni xaxlikana chu tiku xtlawakgo tuku nitlan, Pedro kamalakapastakalh tuku xlakan xkatsikgoya xlakata xkamakgtayalh ni namakgxtakgkgo Jehová (2 Ped. 2:​1-3).

3. Kalichuwinanti akgtum liʼakxilhtit nema masiya pi talakaskin pi putum kstalaninanin Cristo nalilakpuwankgo tuku pulana katsinikgolh.

³ Maski titaxtunita lhuwa kilhtamaku lata lakgapasnitaw xaxlikana, tlanku nalitamakgtayayaw tuku xapulana katsiniw. Kalichuwinaw akgtum li’akxilhtit. Chatum tiku makgasata tlawa liwat chu chatum tiku aku katsinima max watiya tuku maklakaskinkgo xlakata natlawakgo pulaktum liwat. Pero tiku tlakg makgasata tlawa liwat, tlakg katsini la liwana namaklakaskin tuku litlawakan chu asta max tlawa xasasti liwat maski watiya tuku maklakaskima. Xtachuna la uma, tiku aku tsukunit likgalhtawakga Biblia max litamakgtaya tuku masiya akgtum texto o pulaktum tuku masiya Biblia, pero tiku makgasata skujnanima Jehová akxilha la tipalhuwa nalitamakgtaya. ¿Tuku xlakata? Xlakata lata tamunulh max talakgpalitilhanit xlatamat o taskujut nema lakgayawakanit kxkachikin Jehová. Komo nalilakpuwanaw tuku xapulana katsiniw, na’akxilhaw pi chuntiyaku tipalhuwa la nalitamakgtayayaw. K’uma artículo nalichuwinanaw pulaktutu tuku pulana katsiniyaw akxni tsukuyaw likgalhtawakgayaw Biblia, chu na’akxilhaw pi tlanku nalitamakgtayayaw maski makgasata lakgapasaw xaxlikana.

JEHOVÁ WA MALAKATSUKINA

4. ¿La lakgpalinit kilatamatkan xlakata katsiyaw pi Jehová wa kiMalakatsukinakan?

⁴ Hebreos 3:4 wan: «Xmalakatsukina putum tuku anan, wa Dios». Katsiyaw pi Katiyatni chu putum tuku anan anta, wa katlawalh xatliwakga chu xaskgalala Malakatsukina. Xlakata wa kinkamalakatsukin, liwana kinkalakgapasan, kinkapaxkiyan chu katsi tuku tlakg tlan nalitamakgtayayaw. ¿La lakgpalinit kilatamatkan uma tamasiy? Xlakata katsiyaw pi wa Jehová kiMalakatsukinakan, kinkamakgtayayan na’akgatekgsaw pi ni kaj akglakgwa lakatsukunitaw, wata wi tiku lakaskilh pi xlatamaw chu uma kinkamakgapaxuwayan.

5. Xlakata katsiyaw pi Jehová wa kiMalakatsukinakan, ¿tuku kinkamasiyaniyan uma? (Isaías 45:​9-12).

⁵ Xlakata katsiyaw pi Jehová wa Malakatsukina, kinkamasiyaniyan pi kilitaktujutkan. Kalilakpuwaw tuku akgspulalh Job. Milh kilhtamaku xla kajwatiya x’akstu xlilakgaputsamaka chu xlimasiyaputun pi ni xlikana tuku xlimawakamaka, pero Jehová malakapastakalh pi xla wa Malakatsukina tiku kgalhi putum limakgatliwakga (Job 38:​1-4). Chuna makgtayalh Job naʼakgatekgsa pi ni xlilat nalita’akglhuwi tuku xla tlawa, xlakata xla ankgalhin tlawa tuku xaʼakgstitum chu tlan likatsi. Na wa uma tuku palakachuwina Isaías xkinkamasiyaniputunan akxni wa: «¿Tlan nawani tiyat tiku liskujma “¿Tuku tlawapat?”?» (kalikgalhtawakga Isaías 45:​9-12, La Biblia. Traducción del Nuevo Mundo, TNM).

6. ¿Tuku xlakata lu tlan pi nalilakpuwanaw xlilanka kiMalakatsukinakan? (Na kaʼakxilhti dibujos).

⁶ Chatum tiku makgasa lakgapasa xaxlikana, max xtsukulh lakpuwan pi xtapuwan tlakg tlan chu nialh xputsalh xtapulalit Jehová chu xtastakyaw Biblia (Job 37:​23, 24). Xlakata nichuna naʼakgspula, talakaskin nalimaxtu kilhtamaku nalilakpuwan pi ni anan tuku tatalakxtumi xliskgalala chu xlilanka Malakatsukina (Is. 40:22; 55:​8, 9). Uma namakgtaya nataktuju, chu namalakapastaka pi nila makgalakgchan xtapuwan Jehová.

7. ¿Tuku makgtayalh Rahela namakgamakglhtinan tuku lakgpalika kxkachikin Jehová?

⁷ Chatum tala puskat xalak Eslovenia tiku wanikan Rahela, lu makgtayalh akxni lilakpuwa pi Jehová wa kiMalakatsukinakan. Xla wan: «Minit kilhtamaku tuwa kmakgkatsi nakmakgamakglhtinan tuku lakkaxwilikgonit lakgkgolotsin tiku kinkapulalinkgoyan. Pulaktum tuku tuwa kmakgkatsilh nakmakgamakglhtinan wa akxni wanka pi lakchixkuwin tlan xʼamakgo mastakakgo xkgalhchixitkan. Maski xakakxilhnita Xlipulaktsayan tamakatsin xla Lakgkgolotsin tiku Pulalinankgo nema taxtulh kkata 2023, tuwa xakmakgkatsi akxni xakakxilha chatum tala tiku xmastama xtaʼakgchuwin pi xmastakanit xkgalhchixit. Wa xlakata kskinilh Jehová pi xkimakgtayalh nakmakgamakglhtinan uma tuku xlakgpalikanit». Rahela akgatekgsli pi xMalakatsukina akgapun chu Katiyatni wa tiku katsi la napulalin xkachikin. Komo wix na tuwa makgkatsiya namakgamakglhtinana akxni lakgpalikan la x’akgatekgsaw pulaktum tuku masiya Biblia o tuku xasasti lakkaxwilikan kxkachikin Jehová, kalimaxtu kilhtamaku nalilakpuwana xliskgalala chu xlitliwakga kiMalakatsukinakan (Rom. 11:​33-36).

KATSIYAW TUKU XLAKATA ANAN TAPATIN

8. ¿La litamakgtayanitaw xlakata katsiyaw tuku xlakata Jehová masta talakaskin kaʼanalh tapatin?

⁸ Lhuwa latamanin lisitsinikgo Dios xlakata ni katsikgo tuku xlakata mastama talakaskin kaʼanalh tapatin o asta nialh kanajlakgo pi lama (Prov. 19:3). Pero akinin katsininitaw pi Jehová ni wa lin kuenta, wata patinanaw xlakata talakgalhin nema kinkamatitaxtinikanitan. Na katsininitaw pi xlakata Jehová lu kgalhkgalhinan chu nina limin lisputni, lhuwa latamanin tlan lakgapaskgonit chu katsinikgonit pi xla namasputu tapatin (2 Ped. 3:​9, 15). Uma lu tlan kinkamamakgkatsiniyan chu tlawanit pi tlan natalalinaw Jehová.

9. ¿Tuku kilhtamaku lu xlakaskinka nalilakpuwanaw tuku xlakata Jehová mastanit talakaskin kaʼanalh tapatin?

⁹ Xlakata Jehová nina masputu tapatin, talakaskin chuntiya nakgalhkgalhinanaw. Pero akxni titaxtuyaw tuku tuwa, kinkatlawanikanan tuku nitlan, niy tiku lu xpaxkiyaw o akxilhaw pi patinama tiku paxkiyaw, max natsukuyaw lilakpuwanaw tuku xlakata Jehová nina masputu tapatin (Hab. 1:​2, 3). Akxni chuna natitaxtuyaw, lu nalitamakgtayayaw komo nalakapastakaw tuku xlakata Jehová chuntiya mastama talakaskin kalalh tuku nitlan chu pi xla namasputu tapatin (Sal. 34:19).a.

10. ¿Tuku makgtayanit Anne nialh lu nalipuwan?

¹⁰ Xlakata liwana katsiyaw tuku xpalakata Dios chuntiya mastama talakaskin kaʼanalh tapatin, kinkamakgtayayan natayaniyaw. Anne, chatum tala puskat tiku lama kʼisla Mayotte nema wi kʼocéano Índico, wan: «Akxni kintse nilh, lu klilipuwa. Pero ankgalhin klakapastaka pi ni wa Jehová tiku kinkamakgapatinanan. Xla masputuputun putum tuku kinkamakgapatinanan chu kamalakastakwaniputun tiku nikgonita. Akxni klilakpuwan uma, skaya kimamakgkatsini chu asta kaks kimalakawani».

11. ¿Tuku kinkamakgpuwantiniyan nalichuwinanaw Dios, chu tuku xlakata?

¹¹ Xlakata katsiyaw tuku xlakata Dios masta talakaskin kaʼanalh tapatin, na kinkamakgpuwantiniyan chuntiya nalichuwinanaw xtachuwin. Akgatekgsaw pi Jehová kgalhkgalhima pi latamanin kamakgxtakgkgolh tuku nitlan tlawamakgo xlakata tlan nalakgtaxtukgo. Akxni Pedro xlichuwinanita pi Dios lu kgalhkgalhinan, wa: «Kalilakpuwantit mintayatkan chu tuku militlawatkan. Xaskulunku miliwanatkan chu militlawatkan tuku limasiya pi tamakamastaninitantit Dios» (2 Ped. 3:11). Pulaktum “tuku limasiya pi tamakamastaninitaw Dios” wa akxni lichuwinanaw xtachuwin. Akinin na lakaskinaw pi latamanin kalatamakgolh kxasasti kakilhtamaku. Jehová kgalhkgalhima pi tiku lamakgo niku wix lichuwinana xtachuwin, kalakgapaskgolh chu kakakninanikgolh. Xlakata nina min lisputni, kgalhiya talakgalhaman pi akxtum nataskuja Jehová chu nakamakgtayaya lhuwa latamanin xlakata nalakgapaskgo (1 Cor. 3:9).

LAMAW «KXAʼAWATIYA KILHTAMAKU»

12. ¿La kinkamakgtayayan akxni akxilhaw la kgantaxtuma tuku xwankanit pi xʼama la «kxaʼawatiya kilhtamaku»?

¹² Biblia liwana lichuwinan la xʼamakgo likatsikgo latamanin «kxaʼawatiya kilhtamaku» (2 Tim. 3:​1-5). Akxni akxilhaw la wi kakilhtamaku chu pi latamanin tlakg nitlan likatsimakgo, akxilhaw pi kgantaxtuma tuku xlichuwinankanit pi xʼama la. Uma kinkamakgtayayan tlakg nakanajlayaw pi tuku wan Biblia xaxlikana (2 Tim. 3:​13-15).

13. ¿Tuku takgalhskinin tlan nalilakpuwanaw? (Lucas 12:​15-21).

¹³ Xlakata katsiyaw pi lamaw kxaʼawatiya kilhtamaku, kinkamakgtayayan skgalalh natawilayaw chu wa pulana nawiliyaw tuku tlakg xlakaskinka. Anta kLucas 12:​15-21 (kalikgalhtawakga) Jesús limaklakaskilh akgtum liʼakxilhtit xlakata xlimasiyalh tuku xlakata lu xlakaskinka liwana namaklakaskinaw kinkilhtamakujkan. ¿Tuku xlakata chixku tiku lhuwa tuku xkgalhi «xatonto» xwanit? Xlakata uma chixku wa xlilakgaputsama “namaʼakgstokgwili tuku lhuwa xtapalh, pero kxlakatin Dios nitu xkgalhi”. ¿Tuku xlakata lu xlakaskinka xwanit liwana xtilimaklakaskilh xkilhtamaku? Dios wanilh: «Uma katsisni pimpat niya». ¿Tuku kinkamasiyaniyan? Xlakata nialh makgas namalakgsputukan uma kakilhtamaku, lu xlakaskinka nalilakpuwanaw umakgolh takgalhskinin: «¿Limasiya tuku ktlawaputun pi liwana kkatsi tuku tlakg xlakaskinka? ¿Tuku kkamakgpuwantini kinkamanan nalakgchamputunkgo? ¿Klimaklakaskin kilitliwakga, kinkilhtamaku chu tuku kkgalhi kaj xlakata nakmaʼakgstokgwili tuku lhuwa xtapalh, o klimaklakaskima xlakata tlakg tlan naktalalin Dios?».

14. Chuna la limasiya tuku titaxtulh Miki, ¿tuku xlakata lu xlakaskinka nalilakpuwanaw pi lamaw kxaʼawatiya kilhtamaku?

¹⁴ Komo nalilakpuwanaw tuku limasiya pi lamaw kxaʼawatiya kilhtamaku, nakinkamakgtayayan wa nalilakgaputsayaw tuku tlakg xlakaskinka. Wa uma tuku makgtayalh chatum tala puskat tiku wanikan Miki. Xla wan: «Akxni kmasputulh preparatoria, xakkamputun kʼuniversidad xlakata xakkgalhtawakgaputun Zoología, akgtum carrera niku tlakg katsinikan xlakata animales. Pero na precursora regular xaklitaxtuputun chu xakmakgtayanamputun niku tlakg xtalakaskin tamakgtay. Makgapitsi natalan kiwanikgolh pi liwana xaklilakpuwa komo xakmatlanilh xakkalh kʼuniversidad chu precursora regular xaklitaxtulh. Kimalakapastakakgolh pi nialh makgas namalakgsputukan uma kakilhtamaku chu pi kParaíso xakkama kgalhi lhuwa kilhtamaku xlakata xakkalakgapasli putum animales. Wa xlakata wi tuku kkatsinilh naktlawa xlakata xaklimakgskujli. Uma kimakgtayalh naktekgsa akgtum taskujut xlakata tlan precursora regular xaklitaxtulh, chu titaxtulh kilhtamaku kkalh kmakgtayanan kʼEcuador». La uku, xchixku Miki superintendente de circuito litaxtu chu akxtum lakgapaxialhnankgo congregaciones kʼuma país.

15. ¿Tuku kinkamasiyaniyan xliʼakxilhtit Santiago? (Na kaʼakxilhti dibujos).

¹⁵ Ni kilitaxlajwanitkan komo latamanin ni makgamakglhtinankgo xatlan tamakatsinin. Max alistalh nalakgpalikgo xtapuwankan. Kalilakpuwaw Santiago, xtutala Jesús. Xla akxilhli la stakli Jesús, akxni Mesías litaxtulh chu la xmasiya. Pero ni tunkun kstalanina litaxtulh, wata kanajlanilh asta akxni malakastakwanika Jesús. Chu Santiago lu tlan kstalanina litaxtulh xlakata lhuwa tuku tlawalh chu lu xatapaxuwan skujnanilh Jehová (Juan 7:5; Gál. 2:9).b Wa xlakata ni kalakpuwaw pi kifamiliajkan nikxni katitalakatsuwinikgolh Jehová, chu chuntiya kakalakgaw tiku nina makgamakglhtinankgo xatlan tamakatsinin. Kalakapastakwi pi lamaw kxaʼawatiya kilhtamaku chu wa xlakata kilimalakapalitkan nalichuwinanaw Dios. Tuku nakawaniyaw la uku max wa tuku nakamakgtaya kkilhtamaku nema aku mima xlakata natalakatsuwinikgo Jehová, asta max akxni lama nawan lhuwa tapatin.c

CHUNTIYA KALITAMAKGTAYAW TUKU KINKAMALAKAPASTAKAYAN JEHOVÁ

16. ¿La litamakgtayanita putum tuku maklakaskin Jehová xlakata nakinkamalakapastakayan xTachuwin? (Na kaʼakxilhti recuadro «Kalimaklakaskinti xlakata nakamakgtayaya amakgapitsin»).

¹⁶ Lhuwa likgalhtawakga nema tlawa xkachikin Jehová wa katlawanikan tiku nina lakgapaskgo tuku masiya Biblia. Taʼakgchuwin nema mastakan ktamakxtumit ksputat semana, makgapitsi artículos chu videos nema min jw.org, chu revistas nema maʼakgpitsikan wa katlawanikanit tiku ni xtatayananin Jehová. Pero ni kajwatiya xlakan litamakgtayakgo uma, wata kimputumkan litamakgtayayaw xlakata tlawa pi tlakg napaxkiyaw Jehová, tlakg nalipawanaw xTachuwin chu tlakg liwana nakamasiyaniyaw latamanin umakgolh tamasiy (Sal. 19:7).

17. ¿La tlan namakgtayayan tuku xapulana katsini?

¹⁷ Tiku makgasata skujnanimaw Jehová max lipaxuwayaw akxni kinkamakatsinikanan pi talakgpalilh chuna la xʼakgatekgsaw pulaktum tuku masiya Biblia. Pero na lu lipaxuwayaw akxni lakapastakaw tuku xapulana katsiniw akxni tsukuw likgalhtawakgayaw Biblia. Chuna la lichuwinanitaw kʼuma artículo, kimputumkan tlan chuntiya nalitamakgtayayaw umakgolh tamasiy. Komo tuwa makgkatsiyaw namakgamakglhtinanaw akxni wi tuku talakgpali kxkachikin Jehová, kaj xlakata akinin nichuna lakpuwanaw, talakaskin nataktujuyaw chu nalakapastakaw pi kiMalakatsukinakan, Jehová, wa tiku kinkapulaliman. Chu xla lu xaskgalala chu kgalhi lhuwa litliwakga. Akxni patinanaw o akxni tiku paxkiyaw titaxtu tuku tuwa, talakaskin nakgalhkgalhinanaw chu nalilakpuwanaw tuku xlakata Jehová chuntiyaku mastama talakaskin kaʼanalh tapatin. Chu akxni nalilakpuwanaw la nalimaklakaskinaw kinkilhtamakujkan chu tuku kgalhiyaw, kalakapastakwi pi lamaw kxaʼawatiya kilhtamaku chu pi lisputni talakatsuwinita. Chuntiya kalitamakgtayaw tuku xapulana katsiniw akxni tsukuw likgalhtawakgayaw Biblia, xlakata chuna nalaksakaw tuku tlan chu nikxni namakgxtakgaw Jehová.