¿La kinkamakgtayayan Jehová natayaniyaw?

1. ¿Tuku xlakata talakaskin natayaniyaw, chu tiku tlan nakinkamakgtayayan? (1 Pedro 5:10).

LAMAW kxakatuwa kilhtamaku chu putum akinin titaxtuyaw tuku tuwa. Wilakgo tiku kgalhikgo akgtum tajatat, amakgapitsin max nilh tiku xpaxkikgo, max tiku xalak xfamilia ni lakgatikgo pi skujnanimakgo Jehová o mapakgsinanin kaputsastalanimakgo xpalakata xtakanajlakan (Mat. 10:​18, 36, 37). Putum uma limasiya pi talakaskin natayaniyaw, chu liwana kakatsiw pi Jehová nakinkamakgtayayan natayaniyaw, xlakata xla kamakgtaya putum kskujnin (kalikgalhtawakga 1 Pedro 5:10).

2. ¿Tuku kinkamakgtayayan natayaniyaw?

² Tayanikan kilhchanima pi ni napatsankgayaw kintakgalhkgalhinkan chu chuntiya xatapaxuwan naskujnaniyaw Jehová maski natitaxtuyaw tuku tuwa, nakinkaputsastalanikanan chu nakinkamatlawiputunkanan tuku nitlan. ¿Tuku kinkamakgtayayan natayaniyaw? Kiʼakstukan nila xtayaniw, pero Jehová kinkamakgtayayan, kinkamaxkiyan «litliwakga tuku latamanin nila kgalhikgo» (2 Cor. 4:7). Kʼuma artículo nalichuwinanaw pulaktati tuku Jehová kinkamaxkiyan xlakata nakinkamakgtayayan, chu naʼakxilhaw tuku kilitlawatkan xlakata nalitamakgtayayaw pulakatunu uma.

ORACIÓN

3. ¿Tuku xlakata wanaw pi akgtum milagro pi tlan tachuwinanaw Jehová?

³ Maski makglakgalhinanin akinin, Jehová tlawanit pi tlan natachuwinanaw. Chu wa uma pulaktum tuku maklakaskin xlakata nakinkamakgtayayan natayaniyaw (Heb. 4:16). Kalilakpuwaw putum tuku kilhchanima pi tlan tachuwinanaw Jehová. Tlan natachuwinanaw kaxatukawa hora chu nawaniyaw kaxatukawa tuku lilakgaputsamaw. Xla akgatekgsa maski tanu tanu tachuwin chuwinanaw chu kinkakgaxmatniyan kaxanikawa niku lamaw, asta maski kpulachin wilaw o makgat kinkawilikanitan (Jon. 2:​1, 2; Hech. 16:​25, 26). Kinkaʼakgatekgsniyan asta maski nila liwana wanaw putum tuku makgkatsimaw xlakata lu lakgaputsamaw (Rom. 8:​26, 27). Putum uma limasiya pi akgtum milagro pi tlan tachuwinanaw Jehová.

4. ¿Tuku xlakata tlan naskiniyaw Jehová pi kakinkamakgtayan natayaniyaw?

⁴ Jehová kinkawaniyan kBiblia pi tlan naskiniyaw kaxatukawa tuku lakaskinaw, “pero chuna la xtalakaskin, chu xla nakinkakgaxmatniyan” (1 Juan 5:14). Wa xlakata, ¿tlan naskiniyaw pi kakinkamakgtayan natayaniyaw? Chuna, xlakata na wa uma tuku lakaskin. ¿La likatsiyaw? Biblia wan pi akxni tayaniyaw tuku tuwa, makgtayananaw xlakata Jehová nalimasiya pi Satanás xaʼakgsanina (Prov. 27:11). Biblia na wan pi Jehová limaklakaskinputun «xlitliwakga xlakata nakalimakgtaya tiku xliputum xnaku skujnanikgo» (2 Crón. 16:​9, La Biblia. Traducción del Nuevo Mundo, TNM). Wa xlakata tlan nalipawanaw pi Jehová tlan nakinkamakgtayayan natayaniyaw, chu chuna tlawaputun (Is. 30:18; 41:10; Luc. 11:13).

5. ¿La kinkamakgtayayan oración nakgalhiyaw takaksni? (Isaías 26:3).

⁵ Biblia wan pi katlawaniw oración Jehová xlakata nawaniyaw putum tuku lilakgaputsayaw, chu chuna xla nakinkamaxkiyan «takaksni nema latamanin nila akgatekgskgo» xlakata “nakuentajtlawa kinakujkan chu kintapuwankan” (Filip. 4:7). ¡Lu paxtikatsiniyaw pi Jehová chuna tlawa! Tiku ni skujnanikgo Jehová na titaxtukgo tuku tuwa, chu xlakan tipalhuwa tuku tlawakgo xlakata nialh lu nalakgaputsakgo o nakgalhikgo takaksni. Pero takaksni nema kinkamaxkiyan Jehová akxni tlawaniyaw oración, ni xtachuna tuku xlakan kgalhikgo. Akinin lipawanaw Jehová xliputum kinakujkan chu xla kinkamaxkiyan «takaksni nema ni sputa» xlakata nakuentajtlawa kintalakapastaknikan chu kintapuwankan (kalikgalhtawakga Isaías 26:3). Pulaktum la kinkamaxkiyan takaksni wa pi kinkamalakapastakayan textos nema kinkamasiyaniyan pi xla lu kinkapaxkiyan chu kinkamakgtayaputunan (Sal. 62:​1, 2).

6. ¿Tuku kilitlawatkan xlakata liwana nalitamakgtayayaw oración? (Na kaʼakxilhti dibujo).

⁶ ¿La liwana nalitamakgtayayaw uma? Akxni natitaxtuyaw tuku tuwa, katlawaniw oración Jehová xlakata namakamaxkiyaw tuku lilakgaputsamaw chu kaskiniw pi kakinkamaxkin takaksni chu liskgalala xlakata nakatsiyaw tuku natlawayaw (Sal. 55:22; Prov. 2:​10, 11). Ni kajwatiya katasaskiniw pi kakinkamakgtayan natayaniyaw, na kapaxtikatsiniw (Filip. 4:6). Kuenta katlawaw xlakata naʼakxilhaw la kinkamakgtayaman akxni titaxtumaw tuku tuwa chu kapaxtikatsiniw. Ni kamastaw talakaskin pi tuku tuwa titaxtumaw natlawa pi nialh naʼakxilhaw la kinkasikulunatlawaman Jehová (Sal. 16:​5, 6).

BIBLIA

7. ¿La kinkamakgtayayan Biblia natayaniyaw?

⁷ Jehová kinkamaxkinitan xTachuwin xlakata nakinkamakgtayayan natayaniyaw. Biblia makglhuwa wan pi Jehová kinkamakgtayayan. Kalilakpuwaw tuku wan Mateo 6:8: «MinTlatkan katsi tuku wixin maklakaskinatit asta akxni nina skiniyatit». Wa Jesús tiku wa umakgolh tachuwin, chu ni anan atanu tiku tlakg lakgapasa Jehová nixawa Jesús. Wa xlakata, akxni patinanaw, liwana kakatsiw pi Jehová katsi tuku maklakaskinaw chu nakinkamakgtayayan. Biblia lichuwinan tipalhuwa xtamalaknun Jehová nema kinkamaxkiyan litliwakga xlakata natayaniyaw (Sal. 94:19).

8. 1) Kalichuwinanti akgtum tastakyaw xalak Biblia nema kinkamakgtayayan natayaniyaw. 2) ¿Tuku nakinkamakgtayayan nakilakapastakaw akgtum tastakyaw akxni namaklakaskinaw?

⁸ Biblia limin lhuwa tastakyaw nema kinkamakgtayayan natayaniyaw. Umakgolh tastakyaw, kinkamakgtayayan skgalala nawanaw xlakata nakatsiyaw tuku natlawayaw (Prov. 2:​6, 7). Kalichuwinaw akgtum tastakyaw, Biblia wan pi ni lu kalilakgaputsaw tuku nala kkilhtamaku nema aku mima, wata kinkawaniyan pi kajwatiya kalilakgaputsaw tuku xala chali chali (Mat. 6:34). Komo lismaninitaw likgalhtawakgayaw Biblia chu lilakpuwanaw, tlakg ni tuwa katikilakapastakwi akgtum tastakyaw nema nakinkamakgtayayan akxni titaxtumaw tuku tuwa.

9. ¿La nakinkamakgtayayan komo nalilakpuwanaw xliʼakxilhtitkan tiku kalichuwinankan kBiblia?

⁹ Biblia na kalichuwinan latamanin tiku chuna xwankgonit la akinin chu lipawankgolh Jehová, chu xla kamakgtayalh (Heb. 11:​32-34; Sant. 5:17). Akxni lilakpuwanaw xlatamatkan, kinkamakgtayayan tlakg nalipawanaw Jehová chu naliʼakxilhaw la “kilitatsekgnikan chu kilitliwakgakan, akgtum tamakgtay nema tunkun tlan natekgsaw akxni natitaxtuyaw tuku tuwa” (Sal. 46:​1, TNM). Komo nalilakpuwanaw la limasiyakgolh takanajla chu la tayanikgolh kskujnin Dios xala makgasa, nachuna natlawaputunaw (Sant. 5:​10, 11).

10. ¿Tuku kilitlawatkan xlakata liwana nalitamakgtayayaw Biblia?

¹⁰ ¿La liwana nalitamakgtayayaw uma? Ankgalhin kalikgalhtawakgaw Biblia chu katsokgwiliw textos nema akxilhaw pi nakinkamakgtayayan. Lhuwa natalan na likgalhtawakgakgo tsisa texto xala chali chali xlakata makgkatsikgo pi uma tantaku kamakgtaya. Wa uma tuku makgtayalh chatum tala tiku wanikan Marie.a Xla lichuwinan pi xtlat chu xtse akxtum litatatlakgolh cancer chu nialh lhuwa papaʼ latamakgolh. Marie kakuentajtlawalh xchatiykan asta akxni nikgolh. Xla wan tuku makgtayalh natayani: «Ankgalhin xaklikgalhtawakga tsisa Texto xala chali chali chu xaklilakpuwan tuku xwan. Uma kimakgtayalh tlakg naklilakpuwan xpalakata Jehová chu tuku xla kimasiyani kxTachuwin, chu ni kaj wa xaklilakpuwan tuku tuwa xaktitaxtuma» (Sal. 61:2).

KINATALANKAN

11. ¿Tuku xlakata kinkamakgtayayan xliʼakxilhtitkan natalan tiku tayanimakgo tuku tuwa?

¹¹ Atanu tuku Jehová kinkalimakgtayayan wa kinatalankan tiku lamakgo kxlikalanka katiyatni. Akxni lilakpuwanaw pi xlakan “patinamakgolh chuna la akinin”, kinkamakgoxamixiyan (1 Ped. 5:9). ¿Tuku xlakata? Akxni akxilhaw pi xlakan titaxtumakgo tuku tuwa chuna la akinin pero tayanimakgo, kinkamalakapastakayan pi akinin na tlan natayaniyaw kaxatukawa tuku natitaxtuyaw (Hech. 14:22).

12. ¿La tlan nalamakgtayayaw kinchatunukan? (2 Corintios 1:​3, 4).

¹² Kinatalankan tipalhuwa la tlan nakinkamakgtayakgoyan. Chuna tlawakgolh xpalakata apóstol Pablo. Akxni xla xatachin xwi kxchik, chalhuwa natalan tipalhuwa la makgtayakgolh, chu Pablo kamapakuwilh umakgolh natalan akxni tsokgwililh xcarta chu kapaxtikatsinilh xlakata xmakgoxamixikgonit chu xmatliwakglhkgonit (Filip. 2:​25, 29, 30; Col. 4:​10, 11). La uku kinatalankan na kinkamakgtayakgoyan xlakata natayaniyaw, chu akinin nachuna kilitlawatkan akxni xlakan maklakaskinkgo tamakgtay (kalikgalhtawakga 2 Corintios 1:​3, 4).

13. ¿Tuku makgtayalh Maya natayani?

¹³ Kalichuwinaw tuku titaxtulh chatum tala xalak Rusia tiku wanikan Maya. Kkata 2020, makgapitsi policías tanukgolh kxchik chu lakputsanankgolh. Alistalh linka kxlakatin mapakgsina xlakata xkalitachuwinama amakgapitsin tuku xkanajla. ¿Tuku tlawakgolh natalan xpalakata Maya? Xla wan: «Akgtum kilhtamaku akxni xakmakgkatsi pi nialhla xaktayani, natalan kintachuwinankgolh, kintsokgnanikgolh chu kiwanikgolh pi lu xkimpaxkikgo. Akit xakkatsi pi xkachikin Jehová xtachuna la akgtum lanka familia tiku lu lapaxkikgo, pero lata kkata 2020 kkakxilhnit pi uma xlikana xlakata natalan kimakgtayakgonit».

14. ¿Tuku kilitlawatkan xlakata liwana nalitamakgtayayaw tuku tlawakgo kinatalankan? (Na kaʼakxilhti dibujo).

¹⁴ ¿La liwana nalitamakgtayayaw uma? Akxni titaxtuyaw tuku tuwa, ni kakatamakgatliniw natalan. Kalakapastakwi pi tlan nakaskiniyaw xtamakgtaykan lakgkgolotsin xlakata xlakan litaxtukgo chuna «la putatsekgni akxni min un chu litatsekgni akxni lipekua senan» (Is. 32:​2, TNM). Pero kalakapastakwi pi kinatalankan na titaxtumakgo tuku tuwa. Komo namakgtayayaw chatum tala tiku titaxtuma tuku tuwa, tlakg napaxuwayaw chu nakinkamakgtayayan natayaniyaw tuku titaxtumaw (Hech. 20:35).

TUKU JEHOVÁ KINKAMALAKNUNINITAN

15. ¿La makgtayalh Jesús xtakgalhkgalhin, chu la litamakgtayayaw akinin kintakgalhkgalhinkan? (Hebreos 12:2).

¹⁵ Atanu tuku kinkamakgtayayan natayaniyaw, wa tuku Jehová kinkamalaknuninitan (Rom. 15:13). Kalakapastakwi pi Jesús tayanilh xaʼawatiya kilhtamaku nema latamalh kkatiyatni maski lu tuwa tuku titaxtulh xlakata akxilhlakachalh tuku xʼama makgamakglhtinan (kalikgalhtawakga Hebreos 12:2). Xla xkatsi pi komo ni xmakgxtakgli xTlat, xʼama makgtayanan xmasantujlika xtukuwani. Na lu xkgalhkgalhima pi xlakgchalh kilhtamaku akxni xʼakxilhpa xTlat kʼakgapun chu pi xtsukulh katamapakgsinan tiku xatalaksakni. Xtachuna la Jesús, komo akinin nalilakpuwanaw pi nalatamayaw putum kilhtamaku kxasasti katiyatni, nakinkamakgtayayan natayaniyaw kaxatukawa tuku natitaxtuyaw kʼuma kakilhtamaku.

16. ¿La makgtayalh takgalhkgalhin chatum tala, chu tuku kinkamasiyaniyan tuku wan uma tala?

¹⁶ Tamalaknun pi naʼanan akgtum xasasti kakilhtamaku, makgtayalh chatum tala xalak Rusia tiku wanikan Alla. Xchixku chipaka chu tamaknuka kpulachin asta akxni xlakgchalh kilhtamaku nalakputsananikan. Akxni chuna lalh, Alla wa: «Oración chu tuku Jehová kinkamalaknuninitan kimakgtayalh ni naktaxlajwani. Kkatsi pi uma tuku tuwa, ni putum kilhtamaku katimakgapalalh. Jehová natlajanan chu akinin na natlajananaw».

17. ¿La limasiyayaw pi xtapalh liʼakxilhaw tuku kgalhkgalhimaw pi nakgantaxtu? (Na kaʼakxilhti dibujo).

¹⁷ ¿La liwana nalitamakgtayayaw uma? Kalimaxtuw kilhtamaku nalilakpuwanaw tuku kinkamalaknuninitan Jehová. Kaʼakxilhlakachaw la nalipaxuwayaw tasikulunalin nema namakgamakglhtinanaw kxasasti kakilhtamaku. Komo chuna natlawayaw, nakinkamakgtayayan nalilakpuwanaw pi tuku titaxtumaw la uku ni lu tuwa chu ni putum kilhtamaku katimakgapalalh (2 Cor. 4:17). Na lu kaliskujwi nakalitachuwinanaw amakgapitsin tuku kanajlayaw. Kalilakpuwaw pi tiku ni lakgapaskgo tuku Dios natlawa kkilhtamaku nema aku mima, max lu tuwa makgkatsikgo natayanikgo tuku titaxtumakgo. Maski ni lhuwa tuku nakawaniyaw, max wi tuku natlawa pi nakatsiputunkgo xlakata xtamalaknun Jehová.

18. ¿Tuku xlakata tlan nalipawanaw tuku Jehová kinkamalaknuniyan?

¹⁸ Akxni Job xtayaninita tuku tuwa, wanilh Jehová: «La uku kkatsi pi wix putum tlan matlaniya, chu ni anan tuku wix lakapastaknita nema nila natlawaya» (Job 42:​2, TNM). Job akgatekgsli pi ni anan tuku natlawa pi Jehová ni namakgantaxti xtamalaknun. Komo akinin nalakapastakaw pi Jehová ankgalhin makgantaxti tuku malaknu, nakinkamakgtayayan natayaniyaw. Kalilakpuwaw uma liʼakxilhtit, chatum puskat lu tatatla chu lu lilakgaputsa xlakata kakilakglanit lhuwa makuchinanin pero nila makgtayakgonit. Pero alistalh kitekgsa chatum makuchina tiku wani tuku tajatat kgalhi chu wani tuku tlan nalikuchun. Maski uma puskat chuntiyaku tatatla, skaya makgkatsi chu tlakg ni tuwa makgkatsi natayani xlakata katsi pi napaks. Xtachuna la uma, akinin tlakg ni tuwa makgkatsiyaw natayaniyaw xlakata katsiyaw pi nialh makgas, nalatamayaw kParaíso.

19. ¿Tuku talakaskin xlakata natayaniyaw?

¹⁹ Chuna la lichuwinanitaw, xlakata natayaniyaw Jehová kinkalimakgtayayan oración, Biblia, kinatalankan chu tuku kinkamalaknuninitan natlawa. Komo lu naliskujaw xlakata nalitamakgtayayaw uma, Jehová nakinkamakgtayayan natayaniyaw kaxatukawa tuku tuwa natitaxtuyaw, asta akxni nachan kilhtamaku namalakgsputukan xkakilhtamaku Satanás chu putum tapatin (Filip. 4:13).