Kakanajla pi Jehová paxkiyan

1. ¿Tuku xlakata tamakamastani Jehová? (Na kaʼakxilhti dibujos).

¿LAKAPASTAKA akxni tamakamastani Jehová? Chuna tlawa xlakata lakgapasti chu tsuku paxkiya. Wa xlakata malaknuni pi xpimpat tlawaya xtalakaskin chu xpimpat paxkiya xliputum minaku, milatamat, mintalakapastakni chu militliwakga (Mar. 12:30). Chuna la titaxtunit kilhtamaku, tlakg paxkinita Jehová. Komo wi tiku xkgalhskin: «¿Xlikana paxkiya Jehová?». Max tunkun xwani: «¡Chuna! Ni anan atanu tiku tlakg kpaxki nixawa Jehová».

2, 3. ¿Tuku lakaskin Jehová, chu tuku naʼakxilhaw kʼuma artículo? (Jeremías 31:3).

² Pero ¿tuku xkgalhtinanti komo wi tiku xkgalhskin: «¿Kanajlaya pi Jehová paxkiyan?»? Max tuwa xmakgkatsi nakgalhtinana pi chuna, xlakata max lakpuwana pi ni lakgchanan napaxkiyan. Chatum tala puskat tiku nitlan likatsinika akxni aktsujku xwanit, wa: «Akit liwana kkatsi pi kpaxki Jehová. Pero min kilhtamaku ni liwana kkatsi komo xla kimpaxki». ¿Tuku namakgtayayan liwana nakatsiya pi Jehová paxkiyan?

³ Jehová lakaskin kakanajla pi xla paxkiyan (kalikgalhtawakga Jeremías 31:3). Jehová tlawalh pi xtalakatsuwini xlakata xlakaskin pi xʼamigo xlitaxtu. Chu akxni tamakamastani chu tamunu, xla tsukulh limasiyaniyan xtapaxkit nema ni makgxtakgnan. Uma tapaxkit kajwatiya kalimasiyani xlakskujnin, chuna la wix. Uma tapaxkit tlawa pi lu lhuwa “xtapalh nalitaxtuya” kxlakatin (Mal. 3:​17, nota, TNM). Jehová lakaskin kakanajla pi xla paxkiyan chuna la kanajlalh apóstol Pablo, tiku tsokgwililh: «Liwana kkatsi pi nipara linin, nipara latamat, nipara ángeles, nipara mapakgsinanin, nipara tuku anan uku, nipara tuku aku namin, nipara litliwakga, nipara tuku anan talhman, nipara tuku anan tutsu, nipara atanu tamalakatsukin natlawa pi Dios nialh nakinkapaxkiyan» (Rom. 8:​38, 39). Kʼuma artículo, naʼakxilhaw tuku xlakata xlakaskinka nakanajlayaw pi Jehová kinkapaxkiyan chu tuku nakinkamakgtayayan ankgalhin nakanajlayaw uma.

¿TUKU XLAKATA KILIKANAJLATKAN PI JEHOVÁ KINKAPAXKIYAN?

4. ¿Tuku liʼakgsiyat limaklakaskin Satanás, chu tuku talakaskin natlawayaw xlakata nalakatitayayaw?

⁴ Komo kanajlayaw pi Jehová kinkapaxkiyan, tlan “natayaniyaw xliʼakgsiyat” Satanás (Efes. 6:11). ¿Tuku liʼakgsiyat limaklakaskin Satanás xlakata natlawa pi nialh naskujnaniyaw Dios? Kinkamalakpuwaniputunan pi Jehová ni kinkapaxkiyan. Ni kapatsankgaw pi Satanás skgalalh wi chu akxilhma tiku tlan naʼakgchipa. Biblia wan pi Satanás xtachuna tantum león (1 Ped. 5:​8, 9). Leones kaputsakgo animales nema ni lakgtliwakgan o nema nila tatlankanikgo xlakata nakaʼakgchipa. Xtachuna la uma, Akgskgawini kinkaʼakgchipaputunan akxni lu litlakgwanitaw kintaʼakglhuwitkan o lu lilakgaputsamaw tuku aku nala (Prov. 24:10). Xlakata tlan natayaniyaw xliʼakgsiyat Satanás chu tlan nalakatitayayaw, talakaskin nakanajlayaw pi Jehová kinkapaxkiyan (Sant. 4:7).

5. ¿Tuku xlakata xlakaskinka namakgkatsiyaw pi Jehová kinkapaxkiyan chu pi xtapalh kinkaliʼakxilhan?

⁵ Komo kanajlayaw pi Jehová kinkapaxkiyan, tlakg natalakatsuwiniyaw. ¿Tuku xlakata chuna wanaw? Akxni Jehová kinkamalakatsukin, tlawalh pi akinin tlan xpaxkinaw chu na xlakaskiw pi xkinkapaxkikan. Akxni wi tiku kinkalimasiyaniyan pi kinkapaxkiyan, akinin na tsukuyaw paxkiyaw uma lataman. Wa xlakata, akxni makgkatsiyaw pi Jehová kinkapaxkiyan chu xtapalh kinkaliʼakxilhan, tlakg tsukuyaw paxkiyaw (1 Juan 4:19). Chu akxni akinin tlakg paxkiyaw, xla tlakg kinkapaxkiyan, xlakata Biblia wan: «Katalakatsuwinitit Dios, chu xla nakatalakatsuwiniyan» (Sant. 4:8). Kaʼakxilhwi tuku nakinkamakgtayayan kinchatunukan nakanajlayaw pi Jehová kinkapaxkiyan.

¿TUKU NAMAKGTAYAYAN NAKANAJLAYA PI JEHOVÁ PAXKIYAN?

6. ¿Tuku tlan naskiniya Jehová komo tuwa makgkatsiya nakanajlaya pi xla paxkiyan?

⁶ Makglhuwa kaskini Jehová pi kamakgtayan naʼakgatekgsa tuku xlakata paxkiyan (Luc. 18:1; Rom. 12:12). Max natalakaskin makglhuwa naskiniya Jehová pi kamakgtayan naʼakxilhkana chuna la xla akxilhan. Komo minaku malakpuwaniyan pi Jehová ni paxkiyan, kalakapastakti pi xla tlakg lanka nixawa minaku (1 Juan 3:​19, 20). Jehová tlakg liwana lakgapasan nixawa la wix lakgapaskana chu xla akxilha xatlan tayat nema kgalhiya (1 Sam. 16:7; 2 Crón. 6:30). Wa xlakata, kawani putum tuku makgkatsiya chu kaskini pi kamakgtayan nakanajlaya pi xla paxkiyan (Sal. 62:8). Chu alistalh, kaliskujti natlawaya tuku skinti kmiʼoración. Kaʼakxilhwi makgapitsi tuku tlan natlawaya.

7, 8. ¿La kinkamakgtayayan tuku wan Salmos nakanajlayaw pi Jehová kinkapaxkiyan?

⁷ Wa kakanajlani Jehová. Dios limaklakaskilh xʼespíritu santo xlakata tiku tsokgwilikgolh Biblia liwana xlichuwinankgolh la likatsi. Kalilakpuwaw tuku wa David: «Jehová lakatsu katawi tiku lu lipuwamakgolh; chu kalakgmaxtu tiku makgkatsikgo pi katlajama xtaʼakglhuwitkan» (Sal. 34:​18, TNM). Komo chuna makgkatsiya, max lakpuwana pi nitila akgatekgsniyan o nitila makgtayayan. Pero Jehová malaknu pi ankgalhin namakgtayayan, xlakata xla katsi pi akxni titaxtuya tuku tuwa, tlakg maklakaskina xtamakgtay. Atanu salmo nema tsokgwililh David, wan: «Kawili kilakgpixtajat anta kmiodre» (Sal. 56:​8, TNM). Akxni latamanin wi niku makgat xʼankgo, lu xlakaskinka xliʼakxilhkgo nalinkgo chuchut. Wa xlakata xmakikgo kʼakgtum odre xlakata xkatsikgo pi anta ni xʼama tamakgan. Xtachuna la uma, akxni wix titaxtupat tuku tuwa, Jehová na katsani. Xtachuna la xmakilh akgatunu milakgpixtajat kʼakgtum odre xlakata nalimasiya pi lu lilakgaputsayan. David na wanilh Jehová: «Liwana lakgapasa putum kintiji» (Sal. 139:​3, TNM). Jehová akxilha putum mintiji, uma wamputun pi xla akxilha putum tuku tlawaya, pero tuku tlakg xlakaskinka akxilha wa tuku tlan tlawaya (Heb. 6:10). ¿Tuku xlakata? Xlakata lu xtapalh liʼakxilha putum tuku tlawaya xlakata namakgapaxuwaya.a

⁸ Jehová limaklakaskin textos nema aku lichuwinaw xlakata nawaniyan: «Klakaskin kakatsi pi kpaxkiyan chu lu klilakgaputsayan». Pero na lichuwinanitaw pi Satanás lakaskin kalakpuwanti pi Jehová ni paxkiyan. Wa xlakata, komo tuwa makgkatsiya nakanajlaya pi Jehová paxkiyan, kalilakpuwanti uma takgalhskinin: «¿Tiku nakkanajlani: “xtlat taʼakgsanin” o “Dios tiku wan tuku xaxlikana”?» (Juan 8:44; Sal. 31:5).

9. ¿Tuku kamalaknuni Jehová tiku paxkikgo? (Éxodo 20:6).

⁹ Kalilakpuwanti tuku makgkatsi Jehová xpalakatakan tiku paxkikgo. Kalilakpuwanti tuku kawanilh Moisés chu israelitas (kalikgalhtawakga Éxodo 20:6). Dios malaknu pi chuntiya nakalimasiyani tapaxkit nema ni makgxtakgnan tiku paxkikgo. Xlakata Jehová ni makgxtakgnan, ankgalhin nakapaxki tiku paxkikgo (Neh. 1:5). Wa xlakata, komo min kilhtamaku tuwa makgkatsiya nakanajlaya pi Jehová paxkiyan, kalilakpuwanti uma: «¿Kpaxki Jehová?». Komo wix paxkiya chu liskuja xlakata namakgapaxuwaya, liwana kakatsi pi xla na lu paxkiyan (Dan. 9:4; 1 Cor. 8:3). Komo wix liwana katsiya pi paxkiya Jehová, na milikanajlat pi xla paxkiyan chu nikxni katimakgxtakgni.

10, 11. ¿La lakaskin Jehová pi kaliʼakxilhti talakgmaxtut? (Gálatas 2:20).

¹⁰ Kalilakpuwanti talakgmaxtut. Xtamakamastan Jesús wa tlakg xalanka tamaskiwin nema Jehová kamaxkinit latamanin (Juan 3:16). Pero kalakapastakti pi xla makamastalh xKgawasa mimpalakata, ni kajwatiya xpalakata putum latamanin. Kalilakpuwanti tuku tlawalh apóstol Pablo. Akxni nina kstalanina Cristo xlitaxtu lhuwa tuku nitlan tlawalh, chu akxni kstalanina Cristo xlitaxtuya chuntiya makglakgalhina xlitaxtu (Rom. 7:​24, 25; 1 Tim. 1:​12-14). Maski chuna, liʼakxilhli talakgmaxtut la akgtum tamaskiwin nema Jehová xmaxkinit (kalikgalhtawakga Gálatas 2:20). Kalakapastakti pi Dios maklakaskilh xʼespíritu santo xlakata xmalakpuwanilh Pablo xtsokgwililh umakgolh tachuwin. Chu komo Jehová mastalh talakaskin pi xtatsokgtawilalh kBiblia, wi tuku kinkamasiyaniputunan (Rom. 15:4). Xla lakaskin pi kaliʼakxilhti talakgmaxtut la akgtum tamaskiwin nema xla maxkinitan. Komo chuna naliʼakxilha, tlakg nakanajlaya pi Jehová paxkiyan.

¹¹ Lu paxtikatsiniyaw Jehová pi malakgachalh xKgawasa xlakata xmastalh xlatamat kimpalakatakan. Pero Jesús ni kajwatiya milh masta xlatamat, wata na milh masiya tuku xaxlikana xlakata Dios. Pulaktum tuku masiyalh wa la xlilhuwa kapaxki Jehová xkamanan. Tlakg kalichuwinaw uma (Juan 18:37).

JESÚS MASIYALH PI JEHOVÁ PAXKIYAN

12. ¿Tuku xlakata tlan nalipawanaw tuku Jesús wa xpalakata Jehová?

¹² Akxni Jesús xlama kKatiyatni, lu xlakgati xlichuwinan xpalakata Jehová (Luc. 10:22). Chu tlan nalipawanaw pi putum tuku wa Jesús xpalakata xTlat, xaxlikana. Ni anan atanu tiku tlakg lakgapasa Jehová nixawa Jesús, xlakata akglhuwa mil kata xtawilacha kʼakgapun (Col. 1:15). Jesús akxilhnit chu asta makgkatsinit la xlilhuwa kapaxki Jehová xkamanan tiku ni makgxtakgkgo. Ni kajwatiya tiku lamakgo kʼakgapun, nachuna tiku lamakgo kKatiyatni. Kaʼakxilhwi la kinkamakgtayayan tuku Jesús masiyalh nakanajlayaw pi Jehová kinkapaxkiyan.

13. ¿La lakaskin Jesús pi kaliʼakxilhwi Jehová?

¹³ Jesús lakaskin kaliʼakxilhwi Jehová chuna la xla liʼakxilha: chatum xalakgalhamana Tlat tiku lu kinkapaxkiyan. Anta kʼEvangelios, liwaka 160 xlimakglhuwa min tachuwin «Tlat». Chu wa Jesús tiku maklakaskilh uma tachuwin xlakata xlichuwinalh Jehová. Akxni xkatachuwinan kstalaninanin, limaklakaskilh tachuwin «MinTlatkan» chu «minTlatkan xalak akgapun» (Mat. 6:​8, 26). Nota de estudio xaʼespañol xla Mateo 5:​16, wan: «Xlakskujnin Dios xala makgasa limaklakaskinkgolh xlakaskinka tachuwin akxni xlichuwinankgo Jehová chu akxni xtachuwinankgo. Makgapitsi wa uma: “Tiku kgalhi putum litliwakga”, “Tiku tlakg xalanka” chu “Lanka Malakatsukina” […]. Pero xlakata Jesús makglhuwa maklakaskilh tachuwin “Tlat”, limasiya pi Dios lu tlan katalalin tiku kakninanikgo». Kalichuwinaw pulaktiy niku Jesús maklakaskilh tachuwin «Tlat» xlakata nalichuwinan Jehová.

14. ¿La limasiyalh Jesús pi Jehová lu xtapalh kinkaliʼakxilhan kinchatunukan? (Mateo 10:​29-31; na kaʼakxilhti dibujo).

¹⁴ Pulana kalichuwinaw tuku wa Jesús kMateo 10:​29-31 (kalikgalhtawakga). Jesús wa pi kinTlatkan katsi akxni tantum aktsu tsiktsi tamayacha kKatiyatni. Komo xla lu kakuentajtlawa laktsu tsiktsi nema ni kakninanikgo chu ni paxkikgo, xlikana pi tlakg kapaxki chatunu kskujnin, tiku kakninanikgo chu paxkikgo. Anta kversículo 30 niku wan, «asta minchixitkan xalak miʼakgxakgakan katsi chuna la xlikganlhuwa», limin akgtum nota de estudio xaʼespañol niku wan: «Xlakata Jehová katsi la xlikganlhuwa kgalhiyaw kinchixitkan, limasiya pi xla kalilakgaputsa chatunu kstalaninanin Cristo». Putum tuku lichuwinanitaw limasiya pi Jesús lakaskin kakanajlaw pi kinTlatkan xalak akgapun lu xtapalh kinkaliʼakxilhan kinchatunukan.

15. ¿Tuku masiyaniyan xpalakata Jehová tuku wan Juan 6:44?

¹⁵ Kalichuwinaw atanu tuku Jesús masiyalh pi tlawalh kinTlatkan Jehová (kalikgalhtawakga Juan 6:44). Chuna la wan uma texto, minTlat xalak akgapun tlawalh pi xtalakatsuwini xlakata akxilhli pi wi tuku tlan xkgalhiya kminaku (Hech. 13:48). Nota de estudio xa’español xla Juan 6:​44, wan pi max Jesús xlichuwinama tuku wan texto niku takilhtiyanit uma artículo: «Klimasiyaninitan tapaxkit nema ni makgxtakgnan chu ktlawalh pi xkintalakatsuwini». Uma versículo na tlan xwanka: «Chuntiya klimasiyanin tapaxkit nema ni makgxtakgnan» (Jer. 31:3; nota, TNM; katamalakxtupi Oseas 11:4). Kalilakpuwanti: kinTlatkan xalak akgapun chuntiya paxkiyan, uma wamputun pi xla chuntiya akxilhma laktlan tayat nema kgalhiya, maski wix nila akxilha.

16. 1) ¿Tuku kinkamasiyanin Jesús, chu tuku xlakata tlan nalipawanaw? 2) ¿Tuku nakinkamakgtayayan nakanajlayaw pi ni anan atanu tlakg tlan Tlat nixawa Jehová? (Kaʼakxilhti recuadro «Wa tlakg xatlan Tlat»).

¹⁶ Xtachuna la Jesús xkinkawanin: «Jehová ni kajwatiya kinTlat litaxtu; na minTlat litaxtu. Chu liwana kkatsi pi xla paxkiyan chu lu lilakgaputsayan». Wa xlakata komo namin kilhtamaku tuwa namakgkatsiya nakanajlaya pi Jehová paxkiyan, kalakapastakti pi tlan nalipawana tuku wa Jesús, tiku ankgalhin wan xaxlikana chu tiku tlakg lakgapasa Jehová (1 Ped. 2:22).

KALISKUJTI NAKANAJLAYA PI JEHOVÁ PAXKIYAN

17. ¿Tuku xlakata kiliskujatkan xlakata tlakg nakanajlayaw pi Jehová kinkapaxkiyan?

¹⁷ Chuna la lichuwinanitaw, Satanás lu katsini akgskgawinan chu natlawa putum tuku matlani xlakata nialh naskujnaniyaw Jehová. Pulaktum liʼakgsiyat nema xla maklakaskin wa pi kinkamakanajliputunan pi Jehová ni kinkapaxkiyan. ¡Ni kamastaw talakaskin pi chuna natlawa! (Job 27:5). Wa xlakata, chuntiya kaliskujwi xlakata chali chali tlakg nakanajlayaw pi Jehová kinkapaxkiyan.

18. ¿Tuku namakgtayayan nakanajlaya pi Jehová paxkiyan?

¹⁸ K’uma artículo akxilhnitaw tuku tlan namakgtayayan tlakg nakanajlaya pi Jehová paxkiyan. Akxilhwi pi tlan naskiniya Jehová pi kamakgtayan na’akxilhkana chuna la xla akxilhan. Kalilakpuwanti textos niku masiya pi Jehová kapaxki xlakskujnin. Na kalakapastakti pi xla ankgalhin nakapaxki tiku paxkikgo. Ni kapatsankga pi talakgmaxtut akgtum tamaskiwin nema Jehová maxkinitan. Chu kalakapastakti tuku wa Jesús, Jehová minTlat. Komo chuna natlawaya, akxni wi tiku nakgalhskinan «¿Liwana katsiya pi Jehová paxkiyan?», tunkun nakgalhtinana: «¡Chuna! Chu kliskujma chali chali naklimasiyani pi akit na kpaxki».