Tlan namakgatlajaya tuku nitlan tlawaputuna

1. ¿Tuku kinkaʼakgspulayan kimputumkan?

¿MINIT kilhtamaku tlawaputunita tuku katsiya pi Jehová ni lakgati? Komo chuna, max lakpuwana pi kajwatiya wix chuna akgspulayan chu max uma maxlajwaniyan. Pero Biblia wan: «Tatsakgsan nema kalakgchinan[,] na kalakgchin putum latamanin» (1 Cor. 10:13). Uma wamputun pi ni kajwatiya wix tlawaputuna tuku nitlan. Wilakgo amakgapitsin natalan tiku na liskujmakgo xlakata ni natlawakgo tuku nitlan tlawaputunkgo. Na kalakapastakti pi Jehová namakgtayayan xlakata ni natlawaya tuku nitlan tlawaputuna.

2. ¿Tuku tatsakgsan max kgalhikgo makgapitsi kstalaninanin Cristo o tiku kalimakgalhtawakgemaka Biblia? (Na kaʼakxilhti dibujos).

² Biblia na wan: «Tuku chatunu chatunu lu lakgati[,] litaxtuni chuna la liʼakgsiyat» (Sant. 1:14). Uma wamputun pi ni putum akinin watiya tuku kinkalitsakgsakanan. Kalilakpuwaw uma, makgapitsi kstalaninanin Cristo o tiku kalimakgalhtawakgemaka Biblia, max tlawaputunkgo talakgxtumit nema ni xlitatlawat. Pero makgapitsin max tatalakgxtumiputunkgo xtachixku o xtapuskat. Amakgapitsin max xapulana xʼakxilhkgo pornografía, chu maski makgxtakgkgonita, min kilhtamaku akxilhputumparakgo. Chu wilakgo tiku waputumparakgo kuchu o drogas. Maski tanu tanu tatsakgsan tuku kgalhiyaw, max kimputumkan makgkatsinitaw chuna la wa apóstol Pablo: «Akxni ktlawaputun tuku tlan, kmakgkatsi pi wata wa ktlawaputun tuku nitlan» (Rom. 7:21).

3. ¿Tuku max xtsukulh lakpuwan chatum lataman tiku nila makgtuminika lakgmakgan tuku nitlan tlawaputun?

³ Komo wix lu liskujpat xlakata nalakgmakgana tuku nitlan tlawaputuna, max makgkatsiya pi ni kgalhiya litliwakga xlakata makgtuminika nalakgmakgana, chu wa xlakata lakpuwana pi Jehová nitlan akxilhan. ¡Pero uma ni xlikana! Kʼuma artículo nalichuwinanaw tuku xlakata chuna wanaw. Nakgalhtiyaw akgtiy takgalhskinin: 1) ¿tiku lakaskin kalakpuwaw pi ni kgalhiyaw litliwakga xlakata nalakgmakganaw tuku nitlan chu pi Jehová nitlan kinkaʼakxilhan? chu 2) ¿la tlan namakgatlajayaw tuku nitlan tlawaputunaw?

TUKU LAKASKIN SATANÁS KALAKPUWAW

4. 1) ¿Tuku lakaskin Satanás pi kalakpuwaw? 2) ¿Tuku xlakata liwana katsiyaw pi tlan namakgatlajayaw tuku nitlan tlawaputunaw?

⁴ Akxni kinkalakgchinan akgtum tatsakgsan, Satanás lakaskin kalakpuwaw pi ni kgalhiyaw litliwakga xlakata nalakgmakganaw. Jesús xkatsi uma, wa xlakata kinkamasiyanin naskiniyaw Jehová kkiʼoracionkan: «Ni kamasta talakaskin naktlawayaw tuku nitlan, wata kakinkakuentajtlawa xlakata Satanás nitu nakinkatlawaniyan» (Mat. 6:13). Satanás wan pi akxni latamanin nakamatlawiputunkan tuku nitlan, ni katitayanikgolh chu ni katikgalhakgaxmatkgolh Jehová (Job 2:​4, 5). Pero wata wa Satanás tiku chuna tlawalh, ni makgatlajalh tuku nitlan xtlawaputun chu ni kgalhakgaxmatli Dios. Wa xlakata, xla lakpuwan pi akinin nachuna likatsiyaw. ¡Asta lakpuwa pi xKgawasa Dios, tiku ni xkgalhi talakgalhin, xʼama tlawa tuku nitlan! (Mat. 4:​8, 9). Pero ¿xlikana ni kgalhiyaw litliwakga xlakata natayaniyaw chu ni natlawayaw tuku nitlan tlawaputunaw? Nichuna, akinin tlan natayaniyaw. Apóstol Pablo wa: «Putum tlan ktlawa xlakata Dios kimaxki litliwakga» (Filip. 4:13).

5. ¿Tuku xlakata wanaw pi Jehová liwana katsi pi tlan namakgatlajayaw tuku nitlan tlawaputunaw?

⁵ Jehová nichuna likatsi la Satanás. Xla liwana katsi pi tlan namakgatlajayaw tuku nitlan tlawaputunaw. ¿Tuku xlakata chuna wanaw? Xlakata xla lichuwinalh pi kkilhtamaku nema aku mima, lhuwa latamanin tiku ni makgxtakgkgo nalakgtaxtukgo klhuwa tapatin. Jehová, tiku nila akgsaninan, liwana kinkawaniyan pi lhuwa latamanin tiku lilhakganankgonit «laklhman laksnapapa lhakgat», natanukgoyacha kxasasti kakilhtamaku. Uma wamputun pi kxlakatin Dios, umakgolh latamanin xaskulunku litaxtukgo (Apoc. 7:​9, 13, 14). Uma limasiya pi Jehová liwana katsi pi tlan namakgatlajayaw tuku nitlan tlawaputunaw.

6, 7. ¿Tuku atanu lakaskin Satanás pi kalakpuwaw?

⁶ Nachuna, Satanás lakaskin kalakpuwaw pi xlakata min kilhtamaku tlawaputunaw tuku nitlan, Jehová tunkun kinkalakgmakganan chu nialhla katikgalhiw latamat nema ni kgalhi xlisputni. Pero wata wa Satanás tiku nialh kgalhi takgalhkgalhin chu nialhla katilatamalh putum kilhtamaku, xlakata Jehová wanita pi namalakgsputu (Gén. 3:15; Apoc. 20:10). Akinin tlan namakgamakglhtinanaw tuku xla nialhla katimakgamakglhtinalh, wa xlakata kinkasitsiniyan chu lakaskin kalakpuwaw pi nialh kgalhiyaw takgalhkgalhin. Pero Biblia liwana kinkawaniyan pi Jehová kinkamakgtayaputunan xlakata nakgalhiyaw xtasikulunalin chu tlan nalatamayaw putum kilhtamaku. Jehová «ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (2 Ped. 3:9). Wa xlakata, akinin kgalhiyaw takgalhkgalhin.

⁷ Putum uma kinkamasiyaniyan pi wa Satanás tiku lakaskin kalakpuwaw pi nila katitayaniw akxni tlawaputunaw tuku nitlan. Na lakaskin kalakpuwaw pi Jehová kinkalakgmakganan xlakata min kilhtamaku tlawaputunaw tuku nitlan. Komo ankgalhin nalakapastakaw pi wa Satanás tiku lakaskin chuna kalakpuwaw, nakinkamakgtayayan ni nakinkamakgatlajayan umakgolh tapuwan (1 Ped. 5:​8, 9).

TUKU KINKAMALAKPUWANIYAN TALAKGALHIN

8. ¿Tuku atanu tlawa pi nalakpuwanaw pi nila katimakgatlajaw tuku nitlan tlawaputunaw chu pi Jehová kinkalakgmakganan? (Salmo 51:5; na kaʼakxilhti niku wan: «Tuku lu xlakaskinka»).

⁸ Ni kajwatiya Satanás tlawa pi kalakpuwaw pi nila katimakgatlajaw tuku nitlan tlawaputunaw chu pi Jehová kinkalakgmakganan. Wata talakgalhin nema kinkamatitaxtinikgon Adán chu Eva, na tlawa pi chuna kalakpuwaw (Job 14:4; kalikgalhtawakga Salmo 51:5).a

9, 10. 1) ¿La makgkatsikgolh Adán chu Eva akxni makglakgalhinankgolh? (Na kaʼakxilhti dibujo). 2) ¿La kinkamamakgkatsiniyan talakgalhin?

⁹ Kalilakpuwaw la makgkatsikgolh Adán chu Eva akxni makglakgalhinankgolh. Akxni xkgalhakgaxmatmakgankgonita Jehová, tatsekgkgolh chu putsakgolh tuku xlitatlapakgolh. ¿Tuku xlakata chuna tlawakgolh? Libro Perspicacia para comprender las Escrituras, wan: «Talakgalhin tlawalh pi Adán chu Eva xmakgkatsikgolh pi xlinkgo kuenta, tsukukgolh lakgaputsakgo, pekuankgolh chu maxanankgolh». Adán chu Eva nialhla xʼamaparakgo talalalinkgo Jehová. Maski lu xliskujkgolh xtlawakgolh tuku tlan, ankgalhin xʼamakgo makgkatsikgo pi xlinkgo kuenta, xlimaxanankgolh chu xlilakgaputsakgolh xtalakgalhinkan.

¹⁰ Pero akinin nichuna tatekgsaw la Adán chu Eva. Akinin kgalhiyaw talakgmaxtut, nema kinkamakgtayayan nakinkatapatikanan kintalakgalhinkan chu tlan natalalinaw Jehová (1 Cor. 6:11). Maski chuna, xlakata makglakgalhinanin akinin, min kilhtamaku makgkatsiyaw pi linaw kuenta, lakgaputsayaw, pekuanaw chu maxananaw. Biblia wan pi talakgalhin chuntiya kaʼakgchipanit latamanin asta maski ni lakgalhinankgonit «chuna la Adán lakgalhinalh» (Rom. 5:14). Pero ni kamastaw talakaskin pi uma nakinkamalakpuwaniyan pi ni kgalhiyaw litliwakga xlakata natlawayaw tuku tlan chu pi nikxnila katimakgapaxuwaw Jehová. ¿Tuku nakinkamakgtayayan nichuna nalakpuwanaw?

11. Komo lakpuwanaw pi nila katimakgatlajaw tuku nitlan tlawaputunaw, ¿tuku kinkawaniyan Romanos 6:12 pi ankgalhin kilitlawatkan?

¹¹ Xlakata akinin makglakgalhinanin, min kilhtamaku lakpuwanaw: «Nila ktimakgatlajalh tuku nitlan ktlawaputun, ni kkgalhi litliwakga». Kalakgmakgaw uma tapuwan. Kalakapastakwi pi Biblia kinkamasiyaniyan pi ni kamastaw talakaskin pi talakgalhin chuntiya “namapakgsinan” kkimaknikan (kalikgalhtawakga Romanos 6:12). Uma wamputun pi tlan nalaksakaw ni natlawayaw tuku nitlan chu namakgatlajayaw tuku nitlan tlawaputunaw (Gál. 5:16). Jehová katsi pi tlan natayaniyaw tatsakgsan. Komo xla xkatsilh pi nila chuna tlawayaw ni xkinkawanin pi katayaniw (Deut. 30:​11-14; Rom. 6:6; 1 Tes. 4:3). Wa xlakata, kalakapastakwi pi tlan namakgatlajayaw tuku nitlan tlawaputunaw.

12. ¿Tuku kilitlawatkan komo lakpuwanaw pi Jehová kinkalakgmakganan, chu tuku xlakata?

¹² Talakgalhin na natlawa pi nalakpuwanaw: «Xlakata tlawaputuna tuku nitlan, Jehová lakgmakganan». Pero nichuna kililakpuwanatkan. Kalakapastakwi pi Jehová katsi pi akxni lakachiw, makglakgalhinanin xlitaxtuyawa (Sal. 103:​13, 14). Xla liwana kinkalakgapasan. Katsi pi talakgalhin tlawa pi natlawaputunaw tuku nitlan (1 Juan 3:​19, 20). Pero komo chuntiya naliskujaw xlakata namakgatlajayaw tuku nitlan tlawaputunaw, chu ni natlawayaw tuku xla ni lakgati, xla xaskulunku nakinkaliʼakxilhan. ¿Tuku xlakata tlan nalipawanaw pi uma xlikana?

13, 14. ¿Tuku xlakata liwana katsiyaw pi Jehová ni kinkalakgmakganan maski tlawaputunaw tuku nitlan?

¹³ Biblia masiya pi ni watiya wamputun nalakpuwana tuku nitlan chu nakitlawaya tuku nitlan. Nipara chatum lataman tlan malakgachokgo tuku lakpuwan, pero tlan namalakgachokgo tuku tlawa. Kakalilakpuwaw kstalaninanin Cristo xalak Corinto. Makgapitsi xtatalakgxtumikgo xtachixkukan akxni nina xlakgapaskgo xaxlikana. Apóstol Pablo wa: «Makgapitsi wixin xapulana chuna xwanitantit». ¿Wamputun uma pi umakgolh kstalaninanin Cristo nialh makgtum lakpuwamparakgolh natlawakgo tuku nitlan? Nila chuna nawanaw, xlakata lu tuwa tamakgkatsi nialh natlawaputumparakan umakgolh nixatlan talismanin. Pero kstalaninanin Cristo tiku xmalakgachokgokgo chu xmakgatlajakgo tuku nitlan xtlawaputunkgo, Jehová tlan xkaʼakxilha. Xtachuna la “xkachakgekanit” chu xaskulunku xlitaxtukgo (1 Cor. 6:​9-11). Nachuna kitaxtu mimpalakata.

¹⁴ Maski chuntiyaku liskujpat xlakata namakgatlajaya tuku nitlan tlawaputuna, liwana kakatsi pi tlan natayaniya. Max nila makgtuminika katimapanu tuku lakpuwampat, pero tlan namalakgachokgoya tuku tlawaputuna chu ni natlawaya “tuku tlawaputun mimakni” chu “mintapuwan” (Efes. 2:3). Kalichuwinaw la tlan namakgatlajaya tuku nitlan tlawaputuna.

¿LA TLAN NAMAKGATLAJAYA TUKU NITLAN TLAWAPUTUNA?

15. Komo makgatlajaputuna tuku nitlan tlawaputuna, ¿tuku militlawat?

¹⁵ Komo makgatlajaputuna tuku nitlan tlawaputuna, pulana talakaskin pi ni miʼakstu nataʼakgskgawiya chu nalitayaya pi wi tuku nitlan tlawaputuna. Kuenta katlawa xlakata ni nalitaʼakgskgawiya “ni xaxlikana mintalakapastakni” (Sant. 1:22). Kalilakpuwanti uma, max wi tiku xwa: «Amakgapitsi tlakg wakgo kuchu nixawa akit». O wi tiku atanu limawakakgo tuku nitlan tlawaputunkgo. Max wi tiku xlakpuwa: «Komo kimpuskat tlakg xkimpaxkilh, akit ni xakakxilhputulh pornografía». Pero umakgolh tapuwan tlawa pi tlakg ni tuwa nakitlawaya tuku nitlan. Wa xlakata ni kaputsa tuku nalikilhpina, nipara kaj kalilakpuwanti. Kalakapastakti pi tuku natlawaya, wix nalipina kuenta (Gál. 6:7).

16. ¿Tuku atanu militlawat xlakata ni nakitlawaya tuku nitlan?

¹⁶ Ni kajwatiya talakaskin nalitayaya pi wi tuku nitlan tlawaputuna, na talakaskin nalakkaxwiliya pi ni katitlawa tuku nitlan (1 Cor. 9:​26, 27; 1 Tes. 4:4; 1 Ped. 1:​15, 16). Kalilakpuwanti tuku max xtlawalh o tuku kilhtamaku tlakg tuwa xmakgkatsi namakgatlajaya tuku nitlan. Max akxni tlakgwanita o akxni katsisnita chu miʼakstu wila. Kalilakpuwanti tuku natlawaya chu la nalakgmakgana komo natlawaputuna tuku nitlan. Komo alisokg nalilakpuwana tuku natlawaya akxni nalakgchinan akgtum tatsakgsan, tlakg ni tuwa katimakgkatsi namakgatlajaya (Prov. 22:3).

17. ¿Tuku kinkamasiyaniyan xliʼakxilhtit José? (Génesis 39:​7-9; na kaʼakxilhti dibujos).

¹⁷ Kalilakpuwaw tuku tlawalh José akxni xpuskat Potifar xtatalakgxtumiputun. José ni makgtiy lilakpuwa chu tunkun wa pi ni (kalikgalhtawakga Génesis 39:​7-9). Tuku tlawalh José limasiyalh pi akxni uma puskat nina xwani pi xtatalakgxtumilh, José liwana xlilakpuwanita pi ni xʼama tatalakgxtumi xpuskat atanu chixku. ¿Tuku kinkamasiyaniyan xliʼakxilhtit? Pi talakaskin alisokg nalilakpuwanaw tuku natlawayaw akxni nina kinkalakgchinan tatsakgsan. Komo chuna natlawayaw, akxni nakinkamatlawiputunkanan tuku nitlan, tlakg ni tuwa katimakgkatsiw nalakgmakganaw xlakata liwana lakkaxwilinitaw tuku natlawayaw.

«CHUNTIYA KAKALAKPUTSANANIKANTIT»

18. ¿Tuku atanu tlan natlawaya xlakata namakgatlajaya tuku nitlan tlawaputuna? (2 Corintios 13:5).

¹⁸ Xlakata tlan namakgatlajaya tuku nitlan tlawaputuna, na talakaskin pi ankgalhin miʼakstu nalakputsananikana (kalikgalhtawakga 2 Corintios 13:5). Ni xmakgasni kalakputsanani tuku lakpuwana chu tuku tlawaya, chu kalakgpali tuku talakaskin. Komo tayaninita akgtum tatsakgsan, ¿la xlilhuwa makgapala xlakata xlakgmakganti? Komo ni tunkun lakgmakganti ni kalitaxlajwani, pero wi tuku katlawa xlakata alimakgtum tlakg lakapala nalakgmakgana. Miʼakstu kalilakpuwanti umakgolh takgalhskinin: «¿Tlan tlakg lakapala nakmapanu kkintalakapastakni tuku nitlan klakpuwama? ¿Kimakgstuntlawa tuku klilakgastanan xlakata tlakg tuwa nakmakgkatsi naklakgmakgan tuku nitlan? ¿Tunkun ktalakapanu akxni ktelevisión o kteléfono taxtuyachi pi tlawamaka tuku xalimaxana? ¿Ankgalhin klakapastaka pi komo nakkgalhakgaxmata xlimapakgsin Jehová tlan nakinkitaxtuni maski namin kilhtamaku tuwa nakmakgkatsi chuna naktlawa?» (Sal. 101:3).

19. ¿Tuku xlakata lu xlakaskinka nalakgmakganaw tuku tasiya pi ni lu laklanka talakgalhin?

¹⁹ Kalakapastakti pi «kinakujkan tlakg akgskgawinan nixawa atanu» chu lakapala tuku tlawa (Jer. 17:​9, La Biblia. Traducción del Nuevo Mundo). Chu Jesús wa pi «knaku taxtuyacha xalaklixkajni talakapastakni» (Mat. 15:19). Wa xlakata, kuenta katlawa xlakata ni natsukuya putsaya tuku nalikilhpina xlakata natlawaya tuku nitlan. Kalilakpuwanti uma, max chatum tiku makgasa xʼakxilha pornografía, natsuku lakpuwan pi nitu katitlawanilh naʼakxilha fotos niku latamanin lhtank kachipa klhakgatkan o lu laktsu lhakganankgonit xlakata lakpuwan pi ni tlawamakgo tuku xalimaxana. Pero max uma natsuku malakpuwani tuku nitlan. O max nalakpuwan: «Ni talakgalhin naklilakpuwan talakgxtumit, xlakata nitu ktlawama, kaj klakapastakma». Pero umakgolh tapuwan limasiya pi uma lataman lakkaxwilima kxnaku “natlawa tuku lakaskin xamakglakgalhina xmakni” (Rom. 13:14). ¿Tuku tlan natlawaya xlakata ni nalita’akgskgawiya uma nixatlan tapuwan? Kalakapastakti pi komo nalaksaka natlawaya tuku tasiya pi ni lu lanka talakgalhin, alistalh nakinkamatlawiyan tuku lu nitlan.b Kalakgmakganti «xalaklixkajni talakapastakni» nema namatlawiyan pi naputsaya tuku nalikilhpina xlakata natlawaya tuku nitlan.

20. ¿Tuku nala kkilhtamaku nema aku mima chu tuku tamakgtay kgalhiyaw la uku?

²⁰ Chuna la lichuwinanitaw k’uma artículo, Jehová kinkamaxkiyan litliwakga xlakata natayaniyaw tatsakgsan. Nachuna, xlakata makamastalh talakgmaxtut, kgalhiyaw takgalhkgalhin pi tlan nalatamayaw putum kilhtamaku kxasasti kakilhtamaku. ¡Lu xatapaxuwan naskujnaniyaw Jehová xlakata nialh katitalakaskilh namakgatlajayaw tuku nitlan tlawaputunaw! Pero xlakata nina chin uma kilhtamaku, kalakapastakwi pi komo la uku lu naliskujaw xlakata ni nakinkamakgatlajayan tuku nitlan tlawaputunaw, Jehová nakinkasikulunatlawayan.