Jehová kinkamasiyaniyan pi kinkapaxkiyan

1. 1) ¿Tuku kinkamakgpuwantinin apóstol Juan nalakpuwanaw? 2) ¿Chu tuku xlakata kililakpuwanatkan la xlilhuwa kinkapaxkiyan Jehová?

APÓSTOL Juan wa: «Kaʼakxilhtit, kana tlanka tapaxkit nkinkakgalhinin xaTlat» (1 Juan 3:1). Umakgolh tachuwin limaklakaskilh apóstol xlakata nalilakpuwanaw la xlilhuwa kinkapaxkiyan Jehová chu la limasiya. Komo nalilakpuwanaw uma, tlakg tlan natalalinaw Dios chu tlakg napaxkiyaw.

2. ¿Tuku xlakata makgapitsi nila kanajlakgo pi Dios kapaxki?

² Lu nitlan, pero lhuwa latamanin ni kanajlakgo pi Jehová kapaxki. Lakpuwankgo pi Dios ni kakuentajtlawa. Lakpuwankgo pi kajwatiya lakgati wan tuku natlawakan chu ni natlawakan chu kamalakgaxokge tiku ni kgalhakgaxmatkgo. Makgapitsi takanajla kamasiyanikgo latamanin pi Dios lu nitlan likatsi. Wa xlakata makgapitsi lakpuwankgo pi nila katipaxkiw. Pero makgapitsi lakpuwankgo pi Dios kapaxki putum latamanin maski natlawakgo putum tuku lakaskinkgo. Pero akinin likgalhtawakganitaw Biblia chu katsiyaw tuku xaxlikana xlakata Jehová. Biblia wan pi Dios tapaxkit chu xlakata paxkinan makamilh xKgawasa xlakata nakinkapalakaniyan (Juan 3:16; 1 Juan 4:8). Maski chuna, max makgapitsi xlakskujnin Jehová nila kanajlakgo pi Dios kapaxki. Max chuna lakpuwankgo xlakata wi tuku nitlan kaʼakgspulalh kxlatamatkan.

3. ¿Tuku xlakata tlan wanaw pi Jehová kinkapaxkiyan?

³ ¿Tuku xlakata tlan wanaw pi Jehová kinkapaxkiyan? Xlakata wa kinkatlawan chu kinkamaxkin latamat (kalikgalhtawakga Salmo 100:3, SXP). Wa xlakata Biblia wan pi «xtlat Adán wa Dios» (Luc. 3:38). Nachuna, akxni Jesús kinkamasiyanin natlawayaw oración, kinkamasiyanin pi Jehová wa kinTlatkan (Mat. 6:9). Wa xlakata Jehová kinkapaxkiyan chuna la chatum tlat kapaxki xkaman.

4. 1) Jehová chatum tlat, ¿la likatsi? 2) ¿Tuku naʼakxilhaw kʼuma artículo chu nema aku mima?

⁴ Makgapitsi latamanin akxni laktsujku xwankgonit katlawanilh tuku nitlan xtlatkan. Wa xlakata max tuwa makgkatsikgo nalakpuwankgo pi chatum tlat xapaxkina. Pero Jehová nikxni chuna kintikamapatinin. Wa tlakg xatlan Tlat nema kgalhiyaw (Sal. 27:10). Xla lu kinkapaxkiyan chu pulaklhuwa la kinkakuentajtlawayan. Chu la tlakg namakgkatsiyaw pi kinkapaxkiyan, tlakg napaxkiyaw (Sant. 4:8). Kʼuma artículo naʼakxilhaw pulaktati la Jehová kinkalimasiyaniyan pi kinkapaxkiyan. Chu kʼartículo nema aku mima, naʼakxilhaw pulaktati la tlan nalimasiyaniyaw Jehová pi paxkiyaw.

JEHOVÁ LU LAKGATI LHUWA TUKU KINKAMAXKIYAN

5. ¿Tuku kinkamaxkiyan Jehová putum akinin?

⁵ Akgtum kilhtamaku, Pablo kilalh kʼAtenas. Akxilhli pi kʼama kachikin lu xlitsama ídolos chu latamanin xlakpuwankgo pi xdioseskan wa xkamaxkikgo latamat. Wa xlakata Pablo kawanilh pi Jehová «ntlawalh nkatuxawat, chu xlipaks ntu ananiy». Na tiwa pi Dios «maxki latamat nkaxati kawaj, ntajaxan», chu na «wa lilamaw, na wa litatsuwajiyaw» (Hech. 17:24, 25, 28). Jehová kinkamaxkiyan putum tuku lakaskinaw xlakata tlan nalatamayaw. Kaʼakxilhwi makgapitsi tuku kinkamaxkinitan xlakata kinkapaxkiyan.

6. ¿La tasiya niku lamaw nema Jehová kinkamaxkinitan? (Kaʼakxilhti xapulana dibujo.)

⁶ Akgtum liʼakxilhtit, Jehová tlawalh lu lilakgatit niku nalatamayaw (Sal. 115:15, 16). Xliputum planetas nema tlawalh, tasiya pi Katiyatni wa tlakg xlakaskinka. Científicos tekgskgonit lhuwa planetas kʼakgapun. Pero nina tekgskgo niku kgalhi putum tuku talakaskin xlakata tlan nalatamakan. Jehová tlawalh Katiyatni xlakata tlan nalatamakan, chu na tlawalh pi stlan xtasiyalh, lu tlan xtamakgkatsilh chu xlipaxuwaka (Is. 45:18). Akxni lilakpuwanaw la xlistlan Katiyatni, likatsiyaw pi Jehová xlikana kinkapaxkiyan (kalikgalhtawakga Job 38:4,a 7,b chu Salmo 8:3-5, SXP).

7. ¿Tuku apulaktu kinkalimasiyanin Jehová pi kinkapaxkiyan?

⁷ Jehová kinkatlawan pi na tlan nakgalhiyaw tayat nema kgalhi, uma, na kinkalimasiyanin pi kinkapaxkiyan (Gén. 1:27). Wa xlakata tlan makgkatsiyaw pi kinkapaxkiyan chu na tlan paxkiyaw. Xla katsi pi uma xlikana kinkamakgapaxuwayan, kamanan lu paxuwakgo akxni makgkatsikgo pi lu kapaxki xnatlatnikan. Nachuna, Jesús kinkamasiyanin pi napaxuwayaw komo lu tlan natalalinaw Jehová (Mat. 5:3). Biblia wan pi Dios «nkinkamaxkiyan xlipaks nkatuwa ntu lilatamayaw» (1 Tim. 6:17). Liwana akxilhaw pi Jehová lu lakgati lhuwa tuku kinkamaxkiyan chu kinkapaxkiyan (Sal. 145:16).

JEHOVÁ KINKAMASIYANIYAN

8. ¿Tuku xlakata lakaskinaw pi Jehová kakinkamasiyanin?

⁸ Chatum tlat tiku paxki xkamanan kamasiyani xlakata tlan nakakitaxtuni kxlatamatkan. Pero lhuwa natlatni xala uku ni lakgachixkuwilikgo tuku wan Biblia. Wa xlakata nila kamasiyanikgo xkamanankan tuku tlan chu tuku nitlan. Wa xlakata kamanan ni akgatekgskgo tuku xlitlawatkan chu ni paxuwakgo (Prov. 14:12). Pero Jehová kamaxki xkamanan tlakg tlan tastakyaw, xlakata wa «tiku xaxlikana Dios» (Sal. 31:5). Xla kinkamasiyaniyan tuku xaxlikana xlakata xtayat chu kinkawaniyan la tlan nakakninaniyaw. Na kinkamasiyaniyan la tlakg tlan nalinaw kilatamatkan (kalikgalhtawakga Salmo 43:3c). Kaʼakxilhwi la kinkamasiyaninitan Jehová nema litasiya pi xlikana kinkapaxkiyan.

9, 10. 1) ¿Tuku xlakata Jehová kinkamasiyaniyan la likatsi? 2) ¿Tuku kinkamasiyaniyan Jehová kimpalakatakan?

⁹ Xapulana, Jehová kinkamasiyaniyan tuku lu xlakaskinka xlakata xtayat, xlakata lakaskin pi nalakgapasaw (Sant. 4:8). Wa xlakata kinkamasiyaniyan tuku xtukuwani. Chu kBiblia tlakg makglhuwa tatsokgnit xtukuwani nixawa amakgapitsi tukuwani. Jehová na kinkamasiyaniyan tukuya tayat kgalhi. Akgtum liʼakxilhtit, komo naʼakxilhaw tuku tlawanit, nakatsiyaw pi xla skgalala chu lu tliwakga (Rom. 1:20). Chu akxni likgalhtawakgayaw Biblia, akxilhaw pi xaʼakgstitum chu kinkapaxkiyan. Chuna la tlakg nalakgapasaw Jehová, tlakg talakatsuwiniyaw.

¹⁰ Jehová na kinkamasiyaniyan tuku xlakaskinka kimpalakatakan. Kinkawaniyan pi akinin na makgtapakgsiyaw kxfamilia. Na kinkamasiyaniyan tuku kilitlawatkan xlakata nitu nakinkasakgaliyan ktaskujut nema maxkiyaw, chu makxtum nalayaw. Anta kBiblia Jehová wan pi ni kinkatlawan pi akinin nakinkalakgchanan nalaksakaw tuku tlan chu tuku nitlan (Jer. 10:23). Xla katsi tuku lu tlan kimpalakatakan. Wa xlakata kajwatiya komo nakgalhakgaxmataw chu namaxkiyaw kakni napaxuwayaw chu nitu kintikasakgalin. Jehová kinkamasiyanin uma tuku lu xaxlikana xlakata kinkapaxkiyan.

11. ¿Tuku kinkawaninitan Jehová pi nakinkamaxkiyan?

¹¹ Chatum tlat tiku lu tlan likatsi lu kamakgtayaputun xkamanan xlakata tlan nakakitaxtuni alistalh chu lakaskin pi kapaxuwakgolh. Pero tlakg lhuwa latamanin ni katsikgo tuku nakaʼakgspula alistalh. Kaj paxkat tlawakgo xlatamatkan kxtaskujutkan xpalakata ni katsikgo pi tuku putsamakgo kaj lakapala nasputa (Sal. 90:10). Pero tiku skujnaniyaw Jehová lu paxtikatsiniyaw xlakata kinkamasiyaninitan napaxuwayaw la uku chu kinkawaninitan pi lu lilakgatit tuku nakinkamaxkiyan.

JEHOVÁ KINKASTAKYAWAYAN

12. ¿La limasiyalh Jehová pi xmakgtayaputun Caín chu Baruc?

¹² Akxni Jehová akxilhli pi Caín xʼama tlawa tuku lu nitlan, stakyawalh. Wanilh pi nialh ksitsilh chu xlakgpalilh xtapuwan. Komo xtikgalhakgaxmatli Jehová ksikulunatlawalh (Gén. 4:6, 7). Pero Caín ni kgalhakgaxmatli chu lu lipatinalh xlakata xtayat (Gén. 4:11-13). Atanu kilhtamaku, Jehová akxilhli chatum kskujni wanikan Baruc lu xtlakgwanit o nitlan xmakgkatsi chu kxlajwananit xlakata nitlan la xlakpuwan. Wa xlakata, Jehová wanilh pi xlakgpalilh la xlakpuwan. Baruc kgalhakgaxmatli, chu wa xlakata lakgmaxtulh xlatamat (Jer. 45:2-5).

13. ¿La kamakgtayalh tuku tuwa titaxtukgolh xlakskujnin Jehová?

¹³ Jehová kinkapulalinan chu kinkastakyawayan xlakata kinkapaxkiyan. Xla kinkastakyawayan akxni talakaskin, pero na kinkamakgtayayan tlakg tlan nalikatsiyaw (Heb. 12:6). Jehová kamakgtayalh xlakskujnin xlakata tlakg tlan xlinkgolh xlatamatkan. Akgtum liʼakxilhtit, mastalh talakaskin pi José, Moisés chu David tuwa tuku xtitaxtukgolh. Akxni chuna xtitaxtumakgolh Jehová ni kamakgxtakgli kxtaʼakglhuwitkan chu lhuwa tuku katsinikgolh nema kamakgtayalh alistalh akxni Jehová kalakgayawalh tlakg tuwa taskujut. Akxni likgalhtawakgayaw kBiblia pi Jehová kamakgtaya xlakskujnin tlakg tlan nalinkgo xlatamatkan, akxilhaw pi lu kinkapaxkiyan (kalikgalhtawakga Proverbios 3:11, 12d).

14. ¿La kinkalimasiyaniyan Jehová pi kinkapaxkiyan akxni makgatsankgananiyaw?

¹⁴ Akxni tlawayaw tuku nitlan, Jehová kinkalimasiyaniyan pi kinkapaxkiyan komo makglhtinanaw xtastakyaw. ¿La tlawa? Palakachuwina Isaías wa pi Jehová «lu» kinkatapatiyan (Is. 55:7). Chu mapakgsina David wa pi Jehová «wa tiku tapatiyan putum tuku nitlan tlawaya, wa tiku mapaksa putum mintakatsanajwa, wa tiku kgawaskima milatamat kkalinin, limalankiman xtapaxkit nema ni makgxtakgnan chu lakgalhamaman» (Sal. 103:3, 4, 12). Chuna la akxilhaw, Jehová putum kilhtamaku kinkatapatiputunan. Pero akinin kilikgalhakgaxmatatkan akxni kinkastakyawayan chu nalakgpaliyaw tuku kililakgpalitkan. Kalakapastakwi pi Jehová kinkastakyawayan xlakata kinkapaxkiyan (Sal. 30:5).

JEHOVÁ KINKAKUENTAJTLAWAYAN

15. Kawanti apulaktu tuku Jehová tlawa xlakata limasiya pi kinkapaxkiyan.

¹⁵ Chatum tlat tiku tlan likatsi kakuentajtlawa xkaman xlakata nitu nakaʼakgspula. Wa uma tuku tlawa Jehová kimpalakatakan. Salmo 97:10 wan pi Jehová kakuentajtlawa xlakskujnin chu kalakgmaxtu kxlakgstipan latamanin tiku lixkajni likatsikgo. Kalakpuwanti xlakata uma. Akxni akxilhaw pi wi tuku nakinkatlawaniyan tuku nitlan kkilakgastapukan, lakapala wi tuku tlawayaw xlakata nitu nalani kilakgastapukan. Nachuna, Jehová lakapala kamakgtaya kskujnin xlakata kapaxki (kalikgalhtawakga Zacarías 2:8e).

16, 17. ¿La kakuentajtlawanit Jehová xlakskujnin makgasa chu la kakuentajtlawa la uku?

¹⁶ Jehová putum kilhtamaku kalimaklakaskinit xʼángeles xlakata nakakuentajtlawa xlakskujnin (Sal. 91:11). Akgtum liʼakxilhtit, chatum ángel makgnilh 185,000 soldados kaj akgtum tsisni xlakata lilakgmaxtulh xkachikin (2 Rey. 19:35). Akxni xlamakgolh xapulana kstalaninanin Cristo, ángeles maxtukgolh Pedro kpulachin chu amakgapitsin (Hech. 5:18-20; 12:6-11). Nina makgas analh akgtum lanka guerra kʼakgtum país xalak África. Xʼanan tiku xlakgaxikgo, xkgalhanankgo, xkalikgamanankan lakpuskatin chu lhuwa tiku kamakgnika kpaís. Maski nipara chatum xTatayana Jehová nilh, lhuwa tiku putum makgatsankgakgolh tuku xkgalhikgo. Maski chuna, xlakan xmakgkatsikgo pi Jehová xkakuentajtlawama. Maski lu lhuwa xpatinankgonit, xpaxuwakgo. Akxni kalakgapaxialhnalh chatum tiku makgtapakgsi tiku pulalinkgo xtatayananin Jehová, kakgalhskilh la xwilakgolh. Wankgolh pi tlan xlakata Jehová xkamakgtayanit.

¹⁷ Xlikana, makgapitsi xlakskujnin Dios nikgonit xlakata ni makgxtakgkgolh Dios. Wa uma tuku akgspulalh kstalaninanin Cristo Esteban chu amakgapitsi. Uma liʼakxilhaw pi Jehová ni putum kilhtamaku kalakgmaxtu kskujnin kalinin. Pero kakuentajtlawa xliputumkan xlakata kawani tuku nitlan nakakitaxtuni akxni Satanás wi tuku kamatlawiputun (Efes. 6:10-12). Tlan natekgsaw uma tuku Jehová kinkawaniman kBiblia chu klikgalhtawakga nema tlawa xkachikin. Akgtum liʼakxilhtit, Jehová kinkawaniyan tuku natlawa pi kalipekua natawilayaw, la Internet, tiku lu paxkikgo tumin chu libros, películas chu videos nema liminkgo xlakata talakgxtumit chu latlawanikan tuku nitlan. Xlikana pi Jehová kinkapaxkiyan chu kinkakuentajtlawaputunan.

LANKA TALAKGALHAMAN

18. ¿La makgkatsiyaw xlakata liwana katsiyaw pi Jehová kinkapaxkiyan?

¹⁸ Akxni Moisés lilakpuwa la xlilhuwa kata la kskujnaninit Jehová, lu tlan makgkatsilh la Dios xpaxki. Wa xlakata wa: «Chali chali lata ktakiya tsisa kakilalimatsamaw mintapaxkin, xlakata nakkatliniyan y nakpaxawaya ixliwakg kilatamatkan» (Sal. 90:14, SXP). Kalakapastakwi tuku wa apóstol Juan: «Kaʼakxilhtit, kana tlanka tapaxkit nkinkakgalhinin xaTlat» (1 Juan 3:1). ¿Ni xlikana pi lu lanka talakgalhaman pi liwana katsiyaw chu makgkatsiyaw pi Jehová kinkapaxkiyan?