Lhuwa millones xla dolares laktlawamikan xpalakata guerra | Pero ¿la xlilhuwa kamakgapatima latamanin?

K’guerras lu lhuwa tumin laktlawamikan.

• «Laktlawamikgolh 2.2 billones xla dolares xpalakata guerras, tlakg lhuwa tumin nema laktlawamikgonit ni xawa amakgapitsi kata» (The Washington Post, 13 xla febrero kata 2024).

Pero tuku kaks kinkamalakawaniyan ni wa tumin, wa tuku nitlan kitaxtu. Kalilakpuwaw guerra xla Ucrania.

• Soldados. Atsinu ni 500,000 soldados tiku nikgonit o tasipanikgonit lata tsukulh guerra.

• Latamanin. Mapakgsinanin xla Naciones Unidas wankgo pi liwaka 28,000 latamanin nikgonit. Atanu chixku tiku kgalhi akgtum xlakaskinka talakgatay k’ONU, wa: «La xlilhuwa laktlawamikgokanit tumin chu katlawanikanit tuku nitlan latamanin nila putlakgekan».a

Lu lhuwa chuna la kamakgapatinit latamanin guerra kxlikalanka katiyatni.

• 114 millones xlilhuwa latamanin tiku makgxtakgkgonit xchikkan xpalakata guerra chu tuku nitlan anan lata septiembre kata 2023.

• 783 millones latamanin tiku ni kgalhikgo tuku nawakgo. «Guerras wa tuku tlawa pi kxlikalanka katiyatni lhuwa latamanin ni nakgalhikgo tuku nawakgo, 70% latamanin tiku ni kgalhikgo tuku nawakgo lamakgo niku anan guerra o tatalachipat» (Programa Mundial de Alimentos).

¿Namin kilhtamaku nialh katiʼanalh guerras? ¿Kaj tamanixnat pi naʼanan takaksni? ¿Nalimaklakaskinkan putum liwat nema anan kkatiyatni xlakata namasputukan tatsinksni chu nakgalhiyaw tuku maklakaskinaw? ¿Tuku wan Biblia?

Kilhtamaku akxni naʼanan lhuwa guerra

Biblia limaklakaskin tantum kawayu chu tiku kgewi xlakata nalimasiya pi na’anan guerras chu tatalachipat kxlikalanka katiyatni.

• «Chu taxtulh tantum kawayu, xaspinini xwanit. Tiku xkgewi makglhtinalh kgantum lanka espada chu makglhtinalh limapakgsin xlakata namapanu takaksni kkatiyatni, xlakata tiku anta lamakgolh nalamakgnikgo» (Apocalipsis 6:4).

Uma tiku kgewi kawayu stalanimakgo chatiy tiku na kgewilakgo kawayu nema limasiyakgo atanu tuku na’akxilhmaw kkinkilhtamakujkan: tatsinksni chu linin nema limin tajatat o atanu (Apocalipsis 6:5-8). Xlakata tlakg nakatsiya xlakata tuku lichuwinanit Biblia pi nala chu nakatsiya pi kgantaxtuma la uku, kalikgalhtawakga artículo «¿Qué representan los jinetes del Apocalipsis?»

Kilhtamaku akxni naʼanan takaksni

Nialh makgas, tuku anan kkatiyatni nialh katimaklakaskinka xlakata nalitlawakan guerra, pero ni wa latamanin tiku chuna natlawakgo. Biblia wan:

• Dios «masputu guerra kxlikalanka katiyatni» (Salmo 46:9).

• Dios nalakkaxwilipara tuku nitlan tlawalh guerra. «Nakaxakani putum xlakgpixtajatkan, chu nialhti katinilh, nialhti katilipuwa, nialhti katitasalh, nialhti katikatsanajwalh. Putum tuku xʼanan xapulana lakgsputkgonit nawan» (Apocalipsis 21:4).

• Dios natlawa pi putum nakgalhiyaw takaksni. «Kinkachikin nalatama niku naʼanan takaksni chu niku nitu katilipekualh chu najaxa niku nitu katimaʼakglhuwilh» (Isaias 32:18).

Chuna la xlichuwinanit Biblia, guerras chu atanu tuku nitlan akxilhmaw la uku limasiyakgo pi nialh makgas na’anan takaksni.

¿Tuku natlawa Dios xlakata na’anan takaksni? Nalimaklakaskin xTamapakgsin, nema wi k’akgapun (Mateo 6:10). Xlakata nakatsiya tuku kilhchani uma Tamapakgsin chu tuku natlawa mimpalakata ka’akxilhti video ¿Tuku xTamapakgsin Dios?