¿Tuku kilhtamaku nasputa guerras? | ¿Tuku kinkawaniyan Biblia?

«La uku chanit kilhtamaku xlakata namalakgachokoyaw tuku nitlan lama», chuna wa secretario general de las Naciones Unidas, Antonio Guterres, akxni Irán malakgachalh bombas kʼIsrael sábado 13 xla abril kata 2024.

Uma tuku lalh kaj pulaktum liʼakxilhtit xlakata tuku lama kxlikalanka katiyatni.

«Kxlikalanka Katiyatni ananit lhuwa guerras lata akxni sputli Xliʼakgtiy Guerra kxlikalanka Katiyatni chu lhuwa millón latamanin lipatinankgonit xlakata uma» (Consejo de Seguridad de las Naciones Unidas, 26 xla enero kata 2023).

Makgapitsi países niku tlakg anankgonit guerras wa Israel, Gaza, Siria, Azerbaiyán, Ucrania, Sudán, Etiopía, Níger, Birmania chu Haití.a

¿Tuku kilhtamaku nasputkgo umakgolh guerras? ¿Tlan nawilikgo takaksni mapakgsinanin? ¿Tuku kinkawaniyan Biblia?

Anan lhuwa guerras

Putum umakgolh guerras limasiya pi nialh makgas nialh katiʼanalh guerras. Umakgolh guerras limasiyakgo pi kgantaxtuma tuku lichuwinalh Biblia pi xʼama la kkinkilhtamakujkan. Biblia limapakuwi «xlisputni kakilhtamaku» (Mateo 24:3).

• «Wixin nakgaxpatatit pi lama guerras lakatsu chu lakgamakgat. [...] Nalatalatlawa laklanka kachikinin chu nalatalatlawa tamapakgsin» (Mateo 24:6, 7).

Kalikgalhtawakga artículo «¿Tuku nalitasiya pi wilaw “kxaʼawatiya kilhtamaku” o “ksputat kakilhtamaku”?» xlakata naʼakxilha pi guerras nema anan la uku makgantaxtima tuku lichuwinanit Biblia.

Akgtum guerra nema namasputu putum guerras

Biblia lichuwinan pi namin kilhtamaku nasputkgo guerras nema anankgo. ¿La nakgantaxtu uma? Ni wa latamanin katimasputukgolh guerras, wata wa Armagedón. Biblia wan pi uma guerra «natlawakan klanka xkilhtamaku Dios» (Apocalipsis 16:14, 16). Dios namaklakaskin uma guerra xlakata namakgantaxti xtalakaskin: pi latamanin nakgalhikgo takaksni nema nikxni katisputli (Salmo 37:10, 11, 29).

Xlakata tlakg nakatsiya la namasputu uma guerra putum guerras, kalikgalhtawakga artículo «¿Tuku Armagedón?».